Romanos 6 - Nuevo Testamento Toba Sur

Da qanachaalataxac n'attau'a so Cristo

¹ Qaq nagui ¿chaq huá'ague ca 'eetec ca qad'aqtac? ¿Peta'a soqolaqtalec da ñi'itaxaloxo, yaqto' ñi Dios ishit da nquigaxattashiguem da qomi' ÿachaxanalo da lqouagaxanaqtaic?

² ¡'A'i, sa ishit! Cha'ayi qomi' mashi soqolqa'ai da ñi'itaxaloxo, qaq 'eeta'am da mashi 'ico' qomi' leuaxaiqa. Qaq ÿoqo'oyi ¿táloxochiyictoxo' da ña soqolaqtalec da so'otaqtac damayi?

³ Cha'ayi 'enauaque qomi' mayi mashi qomi' qanachilaxa'n, da yaqto' ñi'adaxau'a so Cristo Jesús, 'eeta'am da qomi' qanachilaxanguilo da l-leuaxa somayi. Qaq ¿peta'a sa ishito' da qauaÿajñi damayi?

⁴ Cha'ayi co'ollaq qomi' qanachilaxa'n, nachi 'eeta'am da qomi' qailalyiñi da qadÿachiguiñi' so Cristo da qadeleu, yaqto' qaltaq qomi' qanca'alaxatreec, nachi sanaxañi da dalaxaic qanachaalataxac. Qanachi shinaqta'am so Cristo co'ollaq ñi qadta'a Dios nca'aleeguesop naq'en da nleuaxa, idolec da l'añaxac mayi lta'adaic da lli'oxoyic.

⁵ Cha'ayi da mashi 'ico' qadÿachiguiñi' so Cristo da 'eetec co'ollaxa da l-leuaxa, qanachi shinaqta'am nataq'en da 'eetec qom qaltaq qomi' qanca'alaxatreec.

⁶ Cha'ayi qomi' mashi saÿajnaqta da so toguishic qanachaalataxac mashi qaiuaxaneuo, lÿatchiguem so Cristo co'ollaq qaiuaxanguet so npe'enaxaqui, yaqto' da qadapachiyaxac mayi 'itaxaloxoic ishit da qanlaxajñi, yaqto' sa ishit da qomi' l-lataqa da ñi'itaxaloxo da qomi' ÿamaqta'pe da 'ico' qan'aco'.

⁷ Cha'ayi ca shiÿaxaua da mashi ileu, nachi camayi huesoueguesop dam ñi'itaxaloxo.

⁸ Cha'ayi qomi' da mashi seleuaqtañi' so Cristo, qataq sa'amaqtenaq da nachi qanachaalataxaua somayi.

⁹ Cha'ayi qomi' saÿajnaq so Cristo co'ollaq ñi Dios qaltaq nca'aleec naq'en, nachi somayi lÿactoxo' da qaltaq ileu, cha'ayi da nleuaxa mashi sa ishit da huo'o ca l'añaxac da qaltaq ÿalauat somayi.

¹⁰ Cha'ayi so Cristo co'ollaq ileu souaxat da ñi'itaxaloxo, nachi somayi lÿactoxo' da qaltaq ileu, cha'ayi co'ollaq nca'aleec, nachi de'eda nachaalataxac lalamaxat ñi Dios.

¹¹ Qaq ÿoqo'oyi nataq'en da qoñiita qoquiÿa'ai qome na nasouaxashitpi, nachi 'eeta'am qanqashiñi da 'ico' mashi qami' leuaxaiqa. Cha'ayi da qanachaalataxaqui lalamaxat qanqashiñi ñi Dios, cha'ayi mashi qoviito'ot so Cristo Jesús som qadataxala'.

¹² Qaq ÿoqo'oyi qami' sa ishit qome da qauauaqaita'a da 'onataxac da nachi 'eetai' da ÿamaqtac dam qad'oquiaxaqui mayi huo'o ca loga't, da ÿileetalec da i'ot da maichi 'eetapeguec.

¹³ Qataq sa ishit qome da qai'añiim da qad'oquiaxaqui dam 'onataxac da yaqto' i'onataxanaxanec cam sa ÿaÿamaxañi. Chaqdata da qami' qanañañiÿot ñi Dios, qalaxayi qoñiita'am ca shiÿaxaua da mashi ileu qaltaq ÿi'iguelaxalec da nca'aleec. Qaq qai'añiÿot qome ñi Dios 'enauac da qad'oquiaxaqui, da yaqto' ñimayi do'onataxana da i'ot ca ÿaÿamaqchiguiñi.

¹⁴ Cha'ayi de'eda ñi'itaxaloxo mashi sa ishit da qami' ÿamaqta'pe, cha'ayi qami' sa ishit da qoviito'ot da lamaxasoxonaxac na nqataxacpi, chaqdata dam lqouagaxanaqtaic ñi Dios.

Qaÿaloqnaxana ca nlatac

¹⁵ Qaq ÿoqo'oyi ¿huá'ague ca 'eetec ca qad'aqtac? ¿Peta'a so'otaq ca qadasouaxashit, cha'ayi mashi sa ishit da souaqto'ot na nqataxacpi, chaqdata dam lqouagaxanaqtaic ñi Dios? ¡'A'i, sa ishit!

¹⁶ Cha'ayi qami' qauaÿajñiita da huo'otaq qanañañiÿot ca 'aco' da ÿauo'o qami' l-lataqa, huaña, nachi qami' ÿataqta qaualaqaiguet camayi, cha'ayi qan'aco'oi. Qaq nachi 'eetec nataq'en qami' da huo'otaq ÿataqta qaualaqaiguet da ñi'itaxaloxo mayi chigaqaigui da nleuaxa da 'eeta'am da qan'aco'oi, huo'otaq da qaualaqaiguet ñi Dios da qau'ochi ca ÿaÿamaqchiguiñi.

¹⁷ Qalaxayi huo'o da qan'achic ñi Dios souaxat da qoñiita mayi qami' l-lataqa co'olloxochiyi da ñi'itaxaloxo, qalaxayi nagui ÿataqta imauec da qadquiyaqteÿaxaqui da qaualaqaiguet dam lataxac da napaxaguenataxanaxac mayi qami' qoÿanema.

¹⁸ Qaq nagui da mashi qami' huesochiyiñi da sa ishit da qami' l-lataqa da ñi'itaxaloxo, nachi qaunoxoñiu'a da qami' l-lataqa ñi Dios da qau'ochi ca ÿaÿamaqchiguiñi.

¹⁹ (Qaq de'eda itaxaÿaxac 'eeta'am ñaq'en da ltaxaÿaxac na shiÿaxauapi, cha'ayi qami' qaica ca qad'añaxaqui, qaq sa ishit da qauaÿajñi de'eda.) Qaq ÿoqo'oyi de'eda 'eetec co'ollaq qami' qai'añiim da qad'oquiaxaqui dam lamaxasoxonaxac nam ishit da deshipaxanaqtaxan qataq nam sa ÿaÿamaxañisat qataq nam qauemsat, da yaqto' i'ot. Qaq nachida nagui da qoñiitec, qai'añiÿot da qad'oquiaxaqui dam lamaxasoxonaxac da qui'itta achaalataxac, da yaqto' ishit da imauec da qanañañiÿot ñi Dios.

²⁰ Cha'ayi qami' co'ollaq ñaq qami' l-lataqa da ñi'itaxaloxo, nachi qami' sa ishit da qoviito'ot da lamaxasoxonaxac da achaalataxac mayi qui'itta.

²¹ Qaq ¿chaq négue't cam qauachigoxochiÿaigui damayi dam i'ot nagui da qad'alqoi? Cha'ayi damayi da naigui, nachida da nleuaxa.

²² Qalaxayi nagui da mashi qansoiueguesop da l-lataxanaxac da ñi'itaxaloxo, nachi qami' qaunoxoñiu'a da qami' l-lataqa ñi Dios. Qaq 'eda mayi ÿataqta huo'o ca naigui. Qaq dam naigui nachida da achaalataxac qui'itta mayi qoÿanot ñi Dios qataq dam achaalataxac mayi qaica ca loga't.

²³ Cha'ayi dam ñi'itaxaloxo da deshiitenaxan, qalaq deshiitenaxana da nleuaxa. Qaq dam lqouagaxanaqtaic ñi Dios, qalaxayi da mashi souaqto'ot so Cristo Jesús som qadataxala', nachi deshiitenaxana da achaalataxac mayi qaica ca loga't.