Romanos 5 - Nuevo Testamento Toba Sur

Mashi qomi' ÿaÿamaxadeete' ñi Dios

¹ Qaq mashi qomi' ÿaÿamaxadeete' ñi Dios souaxat da qadpi'iÿaxac. Qaq ÿoqo'oyi nagui ñaÿamaxannaqte' ñimayi, qaq de'eda chigoqchigui so qadataxala' Jesucristo.

² Cha'ayi somayi chigoqchigui da huo'o mshi qomi' senoxonaxau'a de'eda lqouagaxanaqtaic ñi Dios, qaq de'eda chigoqchigui da qadpi'iÿaxac. Qaq ÿoqo'oyi de'eda nqouagaxanaqtaic ÿataqta ñi'añaxataqtec, qataq samaqchiguiñi, cha'ayi huo'o da qanaquitaxac da ñiuanaqhua'a da lli'oxoyic ñi Dios.

³ Qaq sa ishit da chaqdata de'eda. Nataq'en samaqchiguiñi souaxat da qanque'ejnaxac. Cha'ayi qomi' saÿajnaq da de'eda que'ejnaxac i'ot da qadhualaxavic,

⁴ qaq de'eda nhualaxavic i'ot da qomi' qaÿaÿamaxadeete'. Qaq da qomi' qaÿaÿamaxadeete', nachi huo'o nataq'en da qanaquitaxac.

⁵ Qaq de'eda qanaquitaxac i'ot da sa ishit da ñi'aloxonaqtac. Cha'ayi da lsoxoyic ñi Dios sogote da qaicoyinguita naua qadquiyaqte, chigoqchigui naq'en so n'Espíritu Santo mayi qomi' ÿanema.

⁶ Cha'ayi co'ollaq souaqtaigui da qaica ca qad'añaxac da maichi ñica'alaxataxala't, nachi so Cristo ileualec na qauemaicpi co'ollaq ivita so laloqo' naq'en ñi Dios.

⁷ Ÿataqta 'eesa da qaica ca shiÿaxaua da huo'otaq ishit da ÿañoxot da nañaalec da ileualec ca 'eeta'am lÿa, nai'ctaxa da huo'otaq ipacchiguilo naua nqataxaco. Qalaxayi sa iuena'a da huo'otaq huo'o ca ishit da ÿañoxot da nañaalec da ileualec ca lÿa mayi ÿataqta soxodaic.

⁸ Qalaxayi da ÿoqta ichoxot da ñi Dios qomi' ÿauoteque 'eeta': So Cristo qomi' ileualguete naq'en, nai'ctaxa da qomi' ñaq souaqtaigui da qayi'itaxaloxo.

⁹ Qaq nagui da mashi qomi' ÿaÿamaxadeete' ñi Dios da sachigoxosoqchigui da l-leuaxa so Cristo, nachi ÿoqta 'itchiguiñi qone' da qomi' nca'alaxateeguesopa somayi cam nhuaxanaguec na shiÿaxauapi mayi ñaq naÿa'cna.

¹⁰ Cha'ayi ñi Dios da ÿachigoxotchigui da l-leuaxa so llalec da qomi' ÿaÿamaxadeete' co'ollaq ñaq souaqtaigui da ñipa'aguenaqtague' ñimayi, qanachi ÿoqta 'itchiguiñi qone' da qomi' nca'alaxatreec somayi, cha'ayi nca'altauec, qataq cha'ayi mashi ime da ñaÿamaxannaqte' ñi Dios.

¹¹ Qaq sa ishit da nachaqdata de'eda. Cha'ayi nataq'en qomi' ñitonaqtapeguec ñi Dios, qaq de'eda qantonaxac chigoqchigui so qadataxala' Jesucristo. Cha'ayi somayi chigoqchigui da huo'o mshi ñaÿamaxannaqte' ñi Dios.

So Adán qataq so Cristo

¹² Qaq chigoqchigui so 'oonolec shiÿaxaua da huo'o mshi huo'o da nasouaxashit ana 'alhua qataq da nleuaxa. Huaña, nachi da nleuaxa taigui 'enauac na shiÿaxauapi, cha'ayi 'enauac namayipi huo'o da lasouaxashit.

¹³ Qaq co'ollaq saxanaxa da huo'o na nqataxacpi, nachi nal'ena da huo'o na nasouaxashitpi ana 'alhua, qaq nai'ctaxa da huo'otaq sa qaÿoqocha'a na nasouaxashitpi da huo'otaq qaica na nqataxacpi.

¹⁴ Qaq nachi chigoqchiguiña so Adán nachi ivitta'a so Moisés da de'eda nleuaxa ÿataqta huo'o da l'añaxac da ishit da ileu naq'en nam huo'o da ÿasouaxat, qaq nai'ctaxa da huo'otaq de'eda lasouaxashit, sa ishit da chigoqchigui da souaxat da sa ÿalaxaguet ca namaxasoxonaxac, 'eeta'am da 'eetec so Adán. Qaq so Adán, somayi chochi 'ico' lqui'i som naÿa'cna.

¹⁵ Qalaxayi de'eda lasouaxashit so Adán, damayi sa ishit da qanaloqnaxanguet dam lachitaqtaxanaxat ñi Dios mayi qomi' ÿanema. Cha'ayi de'eda lasouaxashit so 'oonolec shiÿaxaua ÿasouaxat da qalota na ileu. Qalaxayi de'eda nca'alaxa, damayi ÿataqta ÿacteec da lta'adaic, da yaqto' qalota na ishit da ÿaÿamaxañi. Qaq damayi chochi qomi' ÿaatema ñi Dios, chigoqchigui naq'en so 'oonolec ÿale, l'enaxat Jesucristo.

¹⁶ Qaq de'eda lasouaxashit so 'oonolec shiÿaxaua sa ishit da qanaloqnaxanguet dam nca'alaxa mayi qomi' ÿanema ñi Dios. Cha'ayi da 'eetec de'eda 'oonolec nasouaxashit, damayi chigoqchigui da qaÿauo'o ca nhuaxanaguec na shiÿaxauapi. Qaq dam 'eetec da nca'alaxa, qalaxayi ñi Dios chochi ÿaatem na shiÿaxauapi da ishit da ÿaÿamaxadeeta, qaq nai'ctaxa da huo'otaq namayipi qalota co'ollaxa na lasouaxashitpi.

¹⁷ Cha'ayi de'eda nleuaxa da huo'otaq chigoqchigui da lasouaxashit so 'oonolec shiÿaxaua da ÿataqta huo'o da l'añaxac co'ollaxa, nachi ¿táloxochiyictoxo' da saq 'eetec nam shiÿaxauapi mayi chochi ÿaatem ñi Dios da ishit da ÿaÿamaxadeeta? Namayipi ishit da huo'o da l'añaxac dam dalaxaic achaalataxac mayi chigoqchigui so 'oonolec shiÿaxaua Jesucristo.

¹⁸ Qaq de'eda 'eetec dam lasouaxashit so Adán da ÿasouaxateguet 'enauac na shiÿaxauapi da qaÿauo'o ca nhuaxanaguec, qaq nachi 'eetec nataq'en dam no'on lataxac so Jesucristo nda'a 'enauac na shiÿaxauapi cam achaalataxac mayi ÿataqta huesochiguiñi. Sa ishit da huo'o ca nhuaxanaguec qanqoÿin.

¹⁹ Cha'ayi de'eda 'eetec co'ollaq sa ishit da ÿalaq so 'oonolec shiÿaxaua, nachi ÿasouaxat da qalota na 'itaxaloxoicpi, qaq nachi 'eetec nataq'en dam lalaxayic so 'oonolec shiÿaxaua i'ot da qalota naq'en na ÿaÿamaxadeeta ñi Dios.

²⁰ Cha'ayi nam nqataxacpi anac, da yaqto' ishit da nquicteec da yi'oq naq'en na nasouaxashitpi. Qalaxayi co'ollaq nquicteec na nasouaxashitpi, nachi da lqouagaxanaqtaic ñi Dios nataq'en ÿataqta nquiguishiguem.

²¹ Cha'ayi dam 'eetec da nasouaxashit co'ollaq ÿataqta huo'o da l'añaxac da ishit da dalaataxan, qaq nachi 'eetec nataq'en da qomi' ÿaÿamaxadeete' ñi Dios, nachi de'eda lqouagaxanaqtaic ñimayi ÿataqta huo'o da l'añaxac da qomi' ÿanema da achaalataxac mayi qaica ca loga't, chigoqchigui naq'en so qadataxala' Jesucristo.