Romanos 4 - Nuevo Testamento Toba Sur

Qaÿaloqnaxana so Abraham

¹ Qaq ÿoqo'oyi chaq shinaqtec ca qad'aqtac: ¿Chaq négue't cam ÿaconguet co'ollaxa som Abraham mayi sachigoxosoxoguet?

² Yi somayi da huo'otaq ÿaÿamaxadeeta ñi Dios, souaxat cam l'onataxanaxac, nachi somayi ishíttaxa da huo'o da n'amqajnaxac, qalaxayi sa ishit da n'amaqteeto'ot ñi Dios.

³ Cha'ayi ¿huá'ague ca 'eetec ca l'aqtac naua ñiyigui'shi l'aqtaqa ñi Dios? Qomyi 'eeta': “So Abraham huo'o da lpi'iÿaxac ñi Dios, qaq chigoqchigui de'eda lpi'iÿaxac da huo'o mshi ñi Dios ÿaÿamaxadeeta, nachi ÿamata'ac da no'on shiÿaxaua.”

⁴ Cha'ayi da huo'otaq huo'o ca shiÿaxaua da huo'o ca l'onataxanaxac, nachi camayi da nshiitenaguec da qaishiiten sa ishit da chochi qoÿaatem, cha'ayi nachi lashiichiÿaxac.

⁵ Qalaxayi da huo'o ca sa ishit da do'onataxan, qalaxayi ÿataqta i'amaqten ñim Dios mayi ishit da ÿaÿamaxadeeta cam 'itaxaloxoic, nachi camayi ÿataqta ÿaÿamaxadeeta ñi Dios souaxat da lpi'iÿaxac.

⁶ So David nataq'en i'axat da lamaxayic ca shiÿaxaua mayi ÿamata'ac ñi Dios da no'on shiÿaxaua, qaq sa ishit da ilotapigui cam i'ottac.

⁷ Nachi so David 'eeta': Ÿataqta machiguiñi qome ca shiÿaxauapi mayi ÿapalaxat ñi Dios na lli'itaxaloxosat, qataq sa ishit da ilogui 'enauac nam lasouaxashitpi.

⁸ Qaq ÿataqta machiguiñi qome ca shiÿaxaua mayi sa ishit da ilogui 'enauac na lasouaxashitpi ñi qadataxala' Dios.

⁹ Qaq ¿peta'a de'eda namaxayic nachaqcata ca qaÿauo'o ca n'anaxat, qalqo' nataq'en cam sa ishit da qaÿauo'o ca n'anaxat? Qaq qomi' sa'axataqtac da ñi Dios ÿaÿamaxadeeta so Abraham, nachi ÿamata'ac da no'on shiÿaxaua souaxat da lpi'iÿaxac.

¹⁰ Qalaxayi ¿chaq lágui co'ollaxa da ÿaÿamaxadeeta? ¿Peta'a co'ollaq imat so Abraham da qaÿauo'o so n'anaxat, loqo' chaq co'ollaq saxanaxa da qaÿauo'o? 'A'i, sa ishit da co'ollaq imat da qaÿauo'o so n'anaxat. Mayi co'ollaq saxanaxa da qaÿauo'o.

¹¹ Qaq co'ollaq ime da so Abraham qaÿauo'o so n'anaxat na l'oc da 'eeta'am da l'anaxanaxat ñi Dios da mashi ÿaÿamaxadeeta somayi, nachi ÿamata'ac da no'on shiÿaxaua souaxat da lpi'iÿaxac. Qaq 'eda da 'eetec so Abraham da huo'o mshi qoÿanagui da lta'a naq'en nam huo'o da lpi'iÿaxac, nai'ctaxa da saxanaxa da qaÿauo'o ca n'anaxat na l'oc. Qalaxayi ñaqaiyita ÿaÿamaxadeeta ñi Dios da 'eeta'am naq'en ca no'on shiÿaxaua.

¹² Qaq 'eesa da so Abraham nachiso so lta'a nam qaÿauo'o ca n'anaxat na l'oc. Qalaxayi sa ishit da nachaqdata damayi. Cha'ayi namayipi nataq'en quetague' da lliquiaxac da lpi'iÿaxac so qadta'a Abraham co'ollaq saxanaxa da qaÿauo'o ca n'anaxat na l'oc.

Qaipacchigui da qaÿachaxanapec, qalaxayi chigoqchigui da npi'iÿaxac

¹³ Cha'ayi ñi Dios ÿachaxanapecot co'ollaxa so Abraham qataq cam llalaqpi ana 'alhua da ÿauo'o lalamaxat lma'. Qalaxayi de'eda qaÿachaxanapec sa ishit da huo'otaq chigoqchigui da souaxat da ÿalaxalec nam nqataxacpi so Abraham. Mayi souaxat da somayi huo'o da lpi'iÿaxac ñi Dios. Nachi ñi Dios ÿaÿamaxadeeta somayi, nachi ÿamata'ac da no'on shiÿaxaua.

¹⁴ Cha'ayi da huo'otaq ndoteec nam ÿalaxaguet na nqataxacpi da nachaqnata ishit da ÿaconguet cam qaÿachaxanapec, huaña, nachi da npi'iÿaxac ÿataqta qaica ca chigaqaigui, qataq de'eda ÿachaxanapec ñi Dios ishit da qaica ca naigui.

¹⁵ Cha'ayi nam nqataxacpi ishit da i'ot ca nhuaxanaguec ca shiÿaxaua. Qalaxayi cam huetaña da qaica na nqataxacpi, nachi sa ishit da huo'o ca sa ÿalaxalec namayipi.

¹⁶ Qaq ÿoqo'oyi de'eda qaÿachaxanapecot so Abraham, damayi chigoqchigui qanqoÿin da npi'iÿaxac, da yaqto' chochi qoÿaatem, qataq yaqto' nachi 'eetai' da hueto'ot 'enauac cam llalaqpi. Qaq damayi 'eeta': De'eda qaÿachaxanapec sa ishit da nachaqnata nam ÿalaxaguet nam nqataxacpi da ÿaconguet, cha'ayi nataq'en 'enauac nam da'amqajnataxan, 'eeta'am so Abraham. Huaña, nachi somayi qoÿanagui da 'enauac qadta'a,

¹⁷ qaq damayi chigoqchigui ñi Dios ñim i'amaqten nataq'en somayi. Qaq ipacchigui dam 'enapec naua ñiyigui'shi l'aqtaqa ñi Dios, mayi 'eeta': “'Am sanagui da 'am lta'a na saqalota ÿotta'a't shiÿaxauapi.” Cha'ayi ñi Dios ishit da qaltaq nca'aleec naq'en nam leuaxaicpi, qataq ishit da yi'oq naq'en cam saq cha'a.

¹⁸ Qaq nai'ctaxa da mashi qaica ca aquitaxac, qalaxayi so Abraham da'amqajnataxan, qataq huo'o da naquitaxac. Qaq ÿoqo'oyi ishit da “lta'a cam qalota ÿotta'a't shiÿaxauapi.” Qaq ipacchigui da l'aqtac ñi Dios co'ollaq 'enapega, 'eeta': “Qaq 'eda qome da 'eetec yi lcata ca 'ai'alaqpi.”

¹⁹ Nachi so Abraham sa ishit da daqat da lpi'iÿaxac, nai'ctaxa da mashi yaqta'a da ivi' naua cien vi'iyi da llaxa. Qataq ila'a somayi qataq aso lhua Sara da mashi yaqta'a da ile'u, cha'ayi mashi ÿataqta ÿi'axaiqolqa, da huo'otaq huo'o ca llalaqpi'.

²⁰ Qalaxayi somayi sa ishit da ÿoqolguet qataq da sa naquita'a dam qaÿachaxanapec. Chaqdata da lta'adaic da lpi'iÿaxac qataq da naquitaxac. Nachi ÿi'oxodeetac ñi Dios,

²¹ cha'ayi ÿataqta ÿaÿateeta da ñimayi huo'o da l'añaxac da ishit da ipacchigui 'enauac cam ÿachaxanapec.

²² Qaq ÿoqo'oyi ñi Dios ÿaÿamaxadeeta somayi, nachi ÿamata'ac da no'on shiÿaxaua, souaxat da lpi'iÿaxac.

²³ Qanachi de'eda 'eetec somayi da ñi Dios ÿaÿamaxadeeta qataq ÿamata'ac da no'on shiÿaxaua souaxat da lpi'iÿaxac, damayi qoÿiyiñi, qalaxayi sa ishit da nachaqsota so Abraham,

²⁴ nataq'en qomi' tachiguilo. Cha'ayi souaxat da qadpi'iÿaxac, nachi ñi Dios nataq'en qomi' ÿaÿamaxadeete', qataq qomi' ÿamata'aque da qomi' no'o'n shiÿaxa'u. Cha'ayi qomi' sa'amaqtenaq ñimayi mayi ishit da nca'alaxateeguesop naq'en da nleuaxa so qadataxala' Jesús,

²⁵ som qoÿanguet co'olloxochiyi da nalaataguec souaxat na qadasouaxashitpi, qataq nca'aleeguesop naq'en ñi Dios da nleuaxa, da yaqto' ishit naq'en da qomi' ÿaÿamaxadeete' ñi Dios.