Romanos 2 - Nuevo Testamento Toba Sur

Ñi Dios sa ishit da sa ÿaqatchigui da nmit ca nasouaxashit

¹ Qaq ÿoqo'oyi sa ishit da saqca ca 'adasouaxashit, 'am mayi 'ai'aatapigui ca lasouaxashit ca 'adÿa, nai'ctaxa da chaq negue't da qoneta. Cha'ayi da 'am 'ai'aatapigui ca lasouaxashit ca 'adÿa, nachi 'am maichi qoquetau'a da qaÿauo'o qome ca 'anhuaxanaguec, cha'ayi 'am nataq'en 'au'ottac nam 'anshitaique da 'anmit.

² Cha'ayi qomi' saÿajnaq da ñi Dios sa ishit da sa ÿaqatchigui da nmit ca nasouaxashit, qom ivita da ÿauo'o ca nhuaxanaguec cam i'ottac nam sa ÿaÿamaxañisat.

³ Qaq 'am mayi 'ai'aatapigui ca lasouaxashit ca 'adÿa, qamaq 'am nataq'en 'au'ottac namayipi, qaq ¿'aupi'itaxaatega peta'a da 'am ÿit ñi Dios, qom ÿauo'o ca nhuaxanaguec cam huo'o ca ÿasouaxat?

⁴ Loqo' chaq ¿'am 'au'otan peta'a dam sa ishit da imeuo lqouagaxanaqtaic qataq da lhualaxavic ñi Dios, qaq sa ishit da tagui yi 'adhuel da de'eda nqouagaxanaqtaic ishit da 'am ÿaueca'a da ishit da 'axaadeec naua 'an'onataxaco?

⁵ Qalaxayi 'am ÿataqta qadamchigui añi 'adquiyaqte, qataq sa ishit da 'ai'axaadeec naua 'an'onataxaco. Qaq ÿoqo'oyi 'eeta'am da maichi 'alapootashiguem nam 'anhuaxanaguecpi, qom ivita ca na'a'q mayi huetoigui da ñi Dios ichoxot ca lasouaxashit ñi 'oonolec da ÿauo'o ca nhuaxanaguec.

⁶ Que'eca na'a'q qom ñimayi ÿauo'o ca nshiitenaguec naq'en ñi 'oonolec cam naigui ca i'ottac.

⁷ Nachi ñimayi ÿanem cam achaalataxac chochaq tateec cam quetot da i'ottac cam ÿaÿamaqchiguiñi qataq nmittaique da ñi Dios ÿanem ca lli'oxoyic, ñi'oxonnataguec, qataq cam achaalataxac mayi qaica ca loga't.

⁸ Qalaxayi idolec qome da layiloxo qom ÿauo'o ca nhuaxanaguec nam i'ottac ca maichi 'eetapeguec qataq sa ishit da ÿalaxalec da 'eesa lataxac, chaqnata nam sa ÿaÿamaxañisat.

⁹ Qaq ÿataqta huo'o qome da nque'ejnaxac qataq da nqui'ic 'enauac nam i'ottac da qauem. Qaq i'auaxaachiguiñi qome na judiopi, qataq nataq'en nam saq judiopi.

¹⁰ Qalaxayi ñi Dios ÿanem qome da lli'oxoyic, ñi'oxonnataguec, qataq da nlagaxayic 'enauac nam i'ottac da ÿaÿamaqchiguiñi. Hua'auchiguiñi naq'en na judiopi, nataq'en nam saq judiopi.

¹¹ Cha'ayi ñi Dios sa ishit da lca'atapigui na shiÿaxauapi.

¹² Cha'ayi 'enauac nam huo'o ca ÿasouaxat, da sa ishit da hueto'ot na nqataxacpi mayi chigoqo'ot so Moisés, namayipi daqat, nai'ctaxa da saq hueto'ot de'eda nqataxac. Qataq na huo'o ca ÿasouaxat, nai'ctaxa da huo'otaq hueto'ot ne'ena nqataxacpi, namayipi qome qanmit, qaidolec cam 'enapec ne'ena nqataxacpi.

¹³ Cha'ayi sa ishit da ÿaÿamaxadeeta ñi Dios ca ndoxotteec da n'axaÿaxaatega na nqataxacpi, chaqcata cam ÿataqta ÿalaq.

¹⁴ Qalaxayi nam sa ishit da judiopi mayi sa ishit da hueto'ot na nqataxacpi, da maichi chigoqchigui da lavilÿaxac da i'ot cam damaxasoxoolec na nqataxacpi, nachi namayipi ÿachaxan da ÿaÿaten cam ishit da qai'ot.

¹⁵ Cha'ayi da maichi lalamaxat lataxac ichoxot da de'eda nqataxac nanettalec da lquiyaqteÿaxac. Cha'ayi dam lavilÿaxac 'eesa naq'en de'eda, qataq da maichi lhuennataxac ichoxot da lasouaxashit, huo'otaq ncotatapec

¹⁶ que'eca pa'ateec na'a'q, qom ivita da ñi Dios chigoqchigui naq'en so Jesucristo da nmi't nam saq cha'alo lhuennataxaco 'enauac na shiÿaxauapi. Nachi ÿataqta ipacchigui qome de'eda sa'axattac n'aqtac mayi chigaqaigui da nca'alaxa.

Na judiopi qataq na nqataxacpi mayi chigoqo'ot so Moisés

¹⁷ Qaq 'am mayi qonetega da 'am judío l'ec, qataq 'ai'ictega nam nqataxacpi mayi chigoqo'ot so Moisés, qataq 'añi'oxodeetapigui ñi 'adta'a Dios.

¹⁸ Qataq 'auauattoota nam 'eetapeguecpi ñi Dios, qataq na nqataxacpi 'am ÿapaxaguenec da qoquegue ca ÿaÿamaqchiguiñi.

¹⁹ Qataq ÿataqta 'eesa 'anqa'en da 'auaÿaten da 'auaueca'aguet cam sa ishit da nauaañi, qataq da 'ico' 'aucoÿadelec nam huetaigui ca napalaxa.

²⁰ Qataq 'aupi'itaxaatega da 'am 'auaÿaten da lataxac da 'auapaxaguen cam qaica ca ÿaÿajnapec qataq nam dalaxaicpi, cha'ayi nam nqataxacpi imatta't 'enauac nam lataxaguesat dam nauattonaxanaxac qataq dam lataxac mayi 'eesa.

²¹ Qaq 'am mayi 'auapaxagueetac ca 'adÿa, qalaq ¿tá'ainco' yi sa ishit da maichi 'anapaxagueela't? Yi 'am maichi 'au'axattac da sa ishit da huo'o ca qaicachiÿa, qalaq ¿tá'ainco' yi 'aucachitac?

²² Qataq 'am mayi qonetega da sa ishit da qancachitapegue' aca sa ishit da nhua, qalaq ¿tá'ainco' yi 'ancachitapegue' aca sa 'adhua? Qataq 'am mayi 'anquiÿatega na nqolacpi, qalaq ¿tá'ainco' yi 'aucachitapega da lsallaxa na lma'pi na nqolacpi?

²³ Qataq 'am mayi 'añi'oxodeetapigui na nqataxacpi, qalaxayi sa ishit da 'aualaxalec namayipi. Nachi 'am 'auasouaxat da sa ishit da qaiyacnapec ñi Dios.

²⁴ Qaq mañaxasaco' naua ñiyigui'shi l'aqtaqa ñi Dios da 'eeta': “Nam sa ishit da judiopi sa ishit da iyacnapec da detaxaÿa ñi Dios, souaxat da qoñiita.”

²⁵ Qaq 'eesa da huo'o ca naigui da huo'otaq qaÿauo'o ca 'an'anaxat, da ÿataqta 'aualaxaguet ca 'enapec na nqataxacpi mayi chigoqo'ot so Moisés. Qalaxayi da sa ishit da 'aualaxalec, nachi 'eeta'am da sa ishit da qaÿauo'o ca 'an'anaxat.

²⁶ Qaq cam sa ishit da qaÿauo'o ca n'anaxat na l'oc, da huo'otaq i'ot 'enauac nam damaxasoxoolec na nqataxacpi, nachi camayi ñi Dios 'eeta'am naq'en cam huo'o ca n'anaxat, qaq nai'ctaxa da sa ishit da huo'o ca n'anaxat.

²⁷ Qaq que'eca sa ishit da huo'o ca n'anaxat na l'oc, qalaxayi ÿataqta ÿalaxaguet cam 'enapec na nqataxacpi, nachi camayi i'ot qome da 'am qaÿauo'o ca 'anhuaxanaguec, souaxat da sa ishit da 'aualaq, qamaq 'am hueto'ot na nqataxacpi, qataq da qaÿauo'o ca 'an'anaxat.

²⁸ Cha'ayi da 'am judío l'ec, qalaxayi sa ishit da chaqdata dam yi'oqchigui. Qataq da qaÿauo'o ca 'an'anaxat, qalaxayi sa ishit da chaqdata dam yi'oqchigui 'ad'oquiaxac.

²⁹ Cha'ayi ca ÿoqta 'eesa da judío l'ec, qalaxayi nachida dam saq cha'a lavilÿaxac. Qataq cam ÿoqta 'eesa da qaÿauo'o ca n'anaxat, qalaxayi nachañi añi lquiyaqte qai'an. Qaq de'eda sa ishit da chigoqchigui naua ñiyigui'shi nqataxaco, cha'ayi damayi chigoqchigui dam saq cha'a nvilÿaxac. Qaq cam nachi 'eetec de'eda, nachi camayi ÿataqta qaÿaÿamaxadeeta, qalaxayi sa ishit da chochi shiÿaxaua ca ÿaÿamaxadeeta, cha'ayi nachiñi ñi Dios.