Romanos 15 - Nuevo Testamento Toba Sur

Ÿataqta machiguiñi 'anqa'en ca 'adÿa, qaq sa ishit da nachi'am

¹ Qomi' mayi ÿataqta 'añaxaic da qadpi'iÿaxac, qaica qome ca shigaqtega da saconaxaguet da sachoq da lqalviaxa nam sa da'añi da lpi'iÿaxac, qaq sa ishit da maichi qomi' ñaÿamaxadenaqtapeguela't.

² Ñi 'oonolec da shinaqta ÿataqta npogoxoinapegue' qome cam ishit da machiguiñi naq'en ca l'amqajnataxanaxaua qataq cam ÿaÿamaqchiguiñi, qataq cam ishit da nquictashiguem naq'en da lpi'iÿaxac.

³ Cha'ayi so Cristo sa ishit co'ollaxa da maichi naÿamaxadeetapeguela't. Chaqdata da ipacchiguilo naua nanettrañi l'aqtaqa ñi Dios mayi 'eeta': “Da lshiunaxanaxac nam 'am ishiueetac 'enauac aÿim talec.”

⁴ Cha'ayi 'enauac nam l'aqtacpi ñi Dios mayi qoÿiyiñi co'ollaxa, namayipi qoÿiyiñi da qanapaxaguenaxat, yaqto' sachigoxotaqaigui da qadhualaxavic qataq qan'añaqchitaguec, da yaqto' huo'o da qanaquitaxac.

⁵ Qaq ñim Dios mayi ÿan da nhualaxavic qataq da n'añaxac itauan qome ñi 'oonolec da qoñiita, da ÿataqta 'oonolec ca qadhuennataxaqui mayi chigoqo'ot so Cristo Jesús,

⁶ yaqto' ima 'enauac da qoñiita 'oonolec ca qadvilÿaxaqui da qavi'oxoyiñiitac ñi Dios ñim lta'a so qadataxala' Jesucristo.

Da no'on qad'axaÿaxac qai'axatem nam saq judiopi

⁷ Qaq ÿoqo'oyi ñi 'oonolec qome da qoñiita ÿataqta ÿaconguet ca lÿa da 'eeta'am naq'en da 'eetec so Cristo co'ollaq qomi' ÿacongueta, da yaqto' qaÿi'oxoden ñi Dios.

⁸ Cha'ayi de'eda sa'axattac da so Cristo anac da do'onataxaalec nam judiopi, da yaqto' ipacchigui 'enauac nam qaÿachaxanapeguempi som hua'au qadta'alpi, qataq da ÿachaxan da ñi Dios ÿataqta ipacchiguilo nam ÿachaxana'pe.

⁹ Somayi nataq'en anac da yaqto' nam sa ishit da judiopi ishit da ÿi'oxoden ñi Dios souaxat da lchoxonnataxanaxa, cha'ayi nachi 'enapec naua ñiyigui'shi l'aqtaqa ñi Dios, mayi 'eeta': Ÿoqo'oyi aÿim 'am shi'oxodeetac da sootangui na ÿotta'a't shiÿaxauapi, qataq so'ootac na n'onecpi mayi naigui da 'ayi'oxoyic.

¹⁰ Qataq so lÿa nanettañi l'aqtac ñi Dios 'eeta': Qami' ÿotta'a't shiÿaxauapi, qataq 'enauac nam lalamaxatpi ñi Dios, qantoñiitapigui' qome.

¹¹ Qataq so lÿa l'aqtac 'eeta': Qavi'oxoyiñi qome ñi qadataxala', qami' ÿotta'a't shiÿaxauapi, qataq 'enauac da qoñiita, qau'axachi da l'amaqchic ñimayi.

¹² So Isaías nataq'en ÿiyiñi da l'aqtac ñi Dios, 'eeta': Ñaxatshiguem qome ca 'ico' lpa'a'q so Isaí, cam nachajñi da ilo'ogue qome na ÿotta'a't shiÿaxauapi; nachi namayipi ÿataqta huo'o qome da lpe'e camayi.

¹³ Qaq ñi Dios mayi qomi' ÿanema da qanaquitaxac qami' nlaxatchiguilo qome da qantonaxaqui qataq da qadlagaxayiqui souaxat da qau'amaqchiñi ñimayi, da yaqto' chochaq huañi da qanaquitaxaqui souaxat da l'añaxac so Espíritu Santo.

¹⁴ Qami' ÿaqaÿadolqa, aÿim ÿoqta 'eesa ñaq'en da ÿataqta qami' nlaqchiguilo da qadauotaxanaqtaiqui qataq 'enauac nam nauattonaxanaxacpi, qataq ñi 'oonolec da qoñiita ÿaÿaten da huaqata ca lÿa.

¹⁵ Qalaxayi ñaqaiyita sa ishit da shi'iÿalec ana'ana ÿide da qami' samaxalo da sa'axatta 'enauac namayipi, yaqto' sa ishit qome da qaucouai'ai. Cha'ayi maichi chigoqchigui naq'en da lqouagaxanaqtaic ñi Dios da aÿim ÿanagui da i'onataxanaxac,

¹⁶ da aÿim lamaxashic naq'en so Jesucristo, da yaqto' so'onataxanoigui na saq judiopi. Qaq ÿoqo'oyi sa'axatem namayipi da n'aqtac mayi naigui da nca'alaxa mayi ÿan ñi Dios, da yaqto' sanot ñimayi nam saq judiopi, da 'eeta'am ñaq'en acam nachitaqtaxanaqte mayi ÿaÿamaxadeeta ñi Dios, cha'ayi mashi iÿotauga namayipi so Espíritu Santo.

¹⁷ Cha'ayi aÿim sa'amaqteetac so Cristo Jesús, ÿoqo'oyi huo'o da ñi'amqajnaxac, souaxat da so'onataxaatacot ñi Dios.

¹⁸ Cha'ayi aÿim ÿataqta sa sadenalec da sa'axat 'enauac nam chigoqchigui naq'en aÿim so Cristo da ÿauotaique lalaxayic naq'en nam saq judiopi, da yaqto' ÿalaxaguet ñi Dios. Qaq damayi chigoqchiguilo naua i'aqtaqa qataq nam so'otpi

¹⁹ qataq da l'añaxac na n'anecpi qataq nam sa qaÿauanapegapi qataq da l'añaxac so Espíritu Santo. Qaq 'eda da 'eetec da aÿim sematta da sa'axat da n'aqtac mayi n'aqtaguec so Cristo dam chigaqaigui da nca'alaxa, sachigoqchiguiña yi Jerusalén qataq 'enauaque naua 'ale'u, chochi sovitta'a yi Iliria.

²⁰ Qaq ÿataqta huo'o da iuogoxo da sa'axattac da nca'alaxa nam huañalo da saxanaxa da qai'axat da l'enaxat so Cristo, da yaqto' sa ishit da 'ico' shiita'am ca n'oxooshiguem ca noÿic mayi ÿaqa'a ca lapaxañi ca l'oxonaxala'.

²¹ Chaqdata da yaqto' ipacchigui dam 'enapec naua ñiyigui'shi l'aqtaqa ñi Dios, mayi 'eeta': Yaqto' nam sa ishit da nauanapegue' da hua'axagui ca n'aqtaguec somayi ishit da ila'a, qataq yaqto' ÿauatton nam sa ishit da hua'axaÿapeguelec somayi.

So Pablo ÿauotaique da taigue da Roma

²² Qaq 'eda da huo'o mshi sa ishit naxa da sañoxot da qami' ñoqo'onalo da qami' ñamaqtegalo, qaq mashi qalota da sauotaique da qami' ñoqo'onalo, qalaxayi sa seshit.

²³ Qalaxayi nagui mashi semat nam so'ottacpi ne'enaua 'ale'u, qataq da mashi qaÿoqteguelo naua vi'iyi da sauotaique da qami' soota'agueta.

²⁴ Qalaxayi aÿim seuatta'a qom huo'otaq ishit da saigue da España, nachi qami' saÿalguete da qami' ñamaqtegalo. Qaq qom mashi nmeta da qami' ñauaneto, nachi huo'o da ñaquitaxac da ishit da aÿim qautauañi, da yaqto' sevida'ague damayi.

²⁵ Qalaxayi nagui aÿim satapeegue da Jerusalén da sedo aca ntaunaqte cam qadqaÿañicpi mayi netaña yimayi.

²⁶ Cha'ayi nam Macedonia l'ecpi qataq nam Acaya l'ecpi mashi huo'o da lhuennataxa da i'ot aca ltaunaxanaqte da ÿauotaique da ÿamaxa cam qadqaÿañicpi choxodaqpi mayi netaña yi Jerusalén.

²⁷ Qaq damayi quetelec yi lavilÿaxac da i'ot namayipi, cha'ayi nachi 'eetec iuen da i'ot damayi. Cha'ayi nam judiopi mayi 'amqajnataxanaxaicpi ÿachitec co'ollaxa da n'achiquiaxac mayi saq cha'a nam sa ishit da judiopi. Qaq ÿoqo'oyi namayipi iuen da itaunec nam judiopi 'amqajnataxanaxaicpi dam yi'oqchigui lsallaxa.

²⁸ Qaq qom huo'otaq mashi so'ot de'eda, qataq da mashi ime da sanem camayipi acam ntaunaxanaqte, nachi saigue qome da España, nachi qami' saÿalguete qome da qami' ñamaqtegalo.

²⁹ Qaq yi'oqta da qom qami' ñoqo'onalo, qalaq aÿim nlaqchigui da nqouagaxanaqtaic mayi chigaqaigui da n'aqtaguec so Cristo.

³⁰ Qami' ÿaqaÿa't, souaxat da qadpi'iÿaxac so qadataxala' Jesucristo, qataq souaxat da nsoxoyic mayi qomi' ÿanema so Espíritu Santo, ÿoqo'oyi qami' ñachoxodeetoiguilo da aÿim qautauañi qome da qanqouagaxauñiÿot ñi Dios da aÿim qanqouagaxauñiitalec,

³¹ da yaqto' ñimayi aÿim nca'alaxateeguesop nam sa da'amqajnataxanpi mayi netaña yi Judea, qataq yaqto' aca ntaunaxanaqte mayi seda'a ca qadqaÿañicpi mayi netaña yi Jerusalén ishit da saqca ca da qom qaÿaconguet,

³² yaqto' qom huo'otaq aÿim ÿashiiteec ñi qadta'a Dios, nachi ndoteec qome da ñitonaxac qom qami' ñauaneto, qataq yaqto' ishit da ñimateec qom qami' ñamaqtegalo.

³³ Qaq ñim Dios mayi chigoqo'ot da nlagaxayic hueta'aguet 'enauac qome da qoñiita. Aja', nachi 'eetec.