Romanos 14 - Nuevo Testamento Toba Sur

Sa ishit da qoquetapeguelec ca 'ad'amqajnataxanaxaua

¹ Ca shiÿaxaua da huo'otaq qaica ca l'añaxac da lpi'iÿaxac, qalaq camayi qauacoñiiguet, qalaxayi sa ishit da qancotaitapigui cam saq 'en.

² Chochi saloqnaxana da huo'otaq huo'o ca ipi'ittega da ÿañoxot da chic 'enauac na nalliguesat, qalaxayi huo'o cam lÿa mayi sa ishit da huo'o ca l'añaxac da lpi'iÿaxac, nachi ndoteec nam nallic mayi chigaqaigui na nanguishic laue na chictac.

³ Qaq ÿoqo'oyi cam 'eetega ÿañoxot da chic 'enauac na nalliguesat, no'on da sa ishit da i'otan cam huo'o ca ivita'a da chic nam nalliguesat. Qataq cam huo'o ca ivita'a da chic naua nalli'c, no'on da sa ishit da quetega cam ÿañoxot da chic 'enauac nam nalliguesat. Cha'ayi ñi Dios ÿaconguet que'eca shiÿaxaua.

⁴ Cha'ayi ¿négue't 'am da huo'otaq qoquetapeguelec cam l-latac ca lÿa shiÿaxaua? Cha'ayi da huo'otaq ÿaÿamaqchiguiñi cam i'ottac, huo'otaq sa ÿaÿamaxañi, qalaxayi maichi ÿoiqueetac cam n'aco'. Qalaxayi camayi ÿataqta ÿaÿamaqchiguiñi, cha'ayi so qadataxala' ÿataqta 'añaxaic da ÿaÿamaqchiguiñi naq'en camayi.

⁵ Qataq da lÿa saloqnaxana 'eeta': Huo'o na ÿapagaqchiitac ca 'oonolec na'a'q da 'eetega saq 'en'am ca lÿa na'a'q. Qataq huo'o na 'eetega da 'en'a't naua na'axa'te. Qaq ñi 'oonolec maichi ÿataqta 'eesa naq'en da lhuennataxa.

⁶ Qaq cam ÿapagaqchin ca 'oonolec na'a'q, camayi i'ot, qalaxayi ÿi'oxoden so qadataxala'. Qataq cam sa ishit da i'ot, qalaxayi nataq'en camayi ÿi'oxoden so qadataxala', qaq nai'ctaxa da sa ishit da i'ot. Qaq cam ishit da 'enauac chic na nalliguesat, camayi deque'e, qalaxayi nachiso so qadataxala' ÿi'oxoden, cha'ayi camayi ÿaatacot da n'achic ñi Dios. Qaq cam ivita'a da huo'o ca chic naua nalli'c, camayi i'ot damayi, da yaqto' ÿi'oxoden so qadataxala', qaq camayi nataq'en ÿaatacot da n'achic ñi Dios.

⁷ Cha'ayi sa ishit da huo'o ca 'oonolec da shinaqta da maichi lalamaxat da nachaalataxac, qataq qaica ca chochi maichi lalamaxat da l-leuaxa.

⁸ Cha'ayi da huo'otaq ñica'alaqtauec, qalaq da qanachaalataxac naigui da lli'oxoyic so qadataxala'. Qaq da huo'otaq seleuaq, qalaq da qadeleuaxa naigui da lli'oxoyic so qadataxala'. Qaq ÿoqo'oyi da huo'otaq ña ñica'alaqtauec, huo'otaq da seleuaq, qalaxayi nachi 'en'am qomi' lalamqa'te somayi.

⁹ Cha'ayi so Cristo ileu qataq ÿi'iguelaxalec da nca'aleec, da yaqto' somayi nachiso so lataxala' nam saqcapi qataq nam ña nca'altauecpi.

¹⁰ Qalaq 'am ¿tá'ainco' yi qoquetapeguelec ca 'ad'amqajnataxanaxaua? qataq ¿tá'ainco' yi 'au'otaatac? Cha'ayi 'enauac qome da shinaqta da ñachaataxau'a so Cristo, da yaqto' somayi qomi' nmi't.

¹¹ Cha'ayi naua ñiyigui'shi l'aqtaqa ñi qadataxala' 'eeta': Ÿataqta 'eesa da aÿim ñica'altauec, ÿoqo'oyi ÿataqta 'eesa da 'enauac qome na shiÿaxauapi aÿim i'adoto naua l-llicte, qataq 'enauac qome namayipi detaxaÿa da ÿataqta aÿim lta'a.

¹² Qaq ÿoqo'oyi ñi 'oonolec qome da shinaqta ishit da maichi nauattoola't qom dataÿot ñi Dios.

Sa ishit da 'auauo'o ca lasouaxashit ca 'amqajnataxanaxaua

¹³ Qaq ÿoqo'oyi sa ishit qome da ca 'oonolec da shinaqta da quetapeguelec ca l'amqajnataxanaxaua. Chaqdata da qami' qanpogoxoiñiÿapegue' da sa ishit da 'ico' huañi qanqashiñi ca qad'amqajnataxanaxauai, huo'otaq da huo'o qanqashiñi ca lasouaxashit.

¹⁴ Cha'ayi aÿim saÿaten da sa ishit da huo'o ca chochi natchiguem da dauogaxanaqta. Qaq de'eda shiitega ÿataqta 'eesa, cha'ayi sa'amaqteetac so qadataxala' Jesús. Qalaxayi da huo'o ca 'oonolec da qoñiita ipi'ittega da ishit da sa qaishitapec ca nallic, qaq camayi mayi maichi pa'aÿo'ot da sa qaishitapec naq'en.

¹⁵ Qaq ÿoqo'oyi ca nallic mayi qollictac, da huo'otaq ishit da ique'emaqchit da lhuennataxac ca 'ad'amqajnataxanaxaua, nachi 'am sa ishit qone' da qoquetaigui da 'adsoxoyic. Qaq sa ishit qome da huo'o ca 'auqataqchit nam ileualecpi co'ollaxa so Cristo, souaxat da 'am 'anshitaique da qollic nam ÿotta'a't nallic.

¹⁶ Qaq sa ishit qome da qauauo'oi ca ldaqa' da huo'o ca qauem n'aqtaguec cam qami' qoñiitega da ÿaÿamaqchiguiñi.

¹⁷ Cha'ayi da l'onataxanaxac ñi Dios da ilo'ogue 'enauacna, damayi sa ishit da naigui da yi'oqchigui nqui'axac qataq da ÿomaxac, chaqdata da qui'itta achaalataxac, nlagaxayic, qataq da namaiquiaxac mayi chigoqo'ot so Espíritu Santo.

¹⁸ Qaq ca nachi 'eetec de'eda da do'onataxanot so Cristo, qaq camayi ÿataqta ÿaÿamaxadeeta ñi Dios qataq 'enauac na shiÿaxauapi.

¹⁹ Qaq ÿoqo'oyi qolaqtot qome da ñimitaqaique cam i'ot ca nlagaxayic, yaqto' ñi 'oonolec da shinaqta itaunec ca lÿa da da'añi naq'en da lpi'iÿaxac.

²⁰ Qaq sa ishit qome da qanlaxachiiñi da l'onataxanaxac ñi Dios da ÿasouaxat qanqashiñi cam chochi nallic. Cha'ayi 'eesa da 'enauac nam nalliguesat ÿataqta qui'itta. Qalaxayi sa ÿaÿamaxañi da cam qanallic ishit da chigoqchigui da huo'o naq'en ca lasouaxashit ca nÿa.

²¹ Qaq ÿoqo'oyi 'onaxaic da sa ishit da qanallic na lapat qataq da qanÿomgui na lataxa qataq 'enauac nataq'en nam ishit naq'en da huañi ca 'ad'amqajnataxanaxaua, huo'otaq da ÿauo'o naq'en ca lasouaxashit, huo'otaq da qaica naq'en ca l'añaxac da lpi'iÿaxac.

²² Qaq ÿataqta 'auaÿamaxattec qome dam 'ad'amqajnataxanaxac mayi 'am hueto'ot, ÿataqta 'analamaqteguet ñi Dios. Cha'ayi ¡ÿataqta machiguiñi qome ca shiÿaxaua qom ime da huo'o ca ÿataqta ÿaÿamaxadeeta, nachi sa ishit da ÿi'iguelaxaguet da 'ico' n'aqchit naq'en da lavilÿaxac!

²³ Cha'ayi cam chochi nachita'a da chic ca nallic, camayi ishit da maichi nasouaxajla't, cha'ayi sa ishit da ÿoqta i'amaqteeta cam chic. Qaq 'enauac nam qanallic, da sa ishit da natenguet da n'amqajnataxanaxac, nachi i'ot ca nasouaxashit.