Romanos 13 - Nuevo Testamento Toba Sur

¹ 'Enauac qome na shiÿaxauapi iuen da ÿalaxaguet da l'onataxanaxac na nta'alpi. Cha'ayi qaica ca nta'a da saq chigoqchigui ñi Dios. Qaq ÿoqo'oyi nam nta'alpi mayi do'onataxaatacpi nagui, namayipi chigoqchigui ñi Dios.

² Qaq ÿoqo'oyi cam npa'aguene' na nta'alpi, nachi camayi npa'aguene' dam lataxac mayi lapaxañi ñi Dios. Qaq ÿoqo'oyi na nachi 'eetec de'eda, nachi namayipi maichi nasouaxajla't da qaÿauo'o ca nhuaxanaguec.

³ Cha'ayi nam nta'alpi sa ishit da huo'otaq icolanaqchit cam i'ottac ca ÿaÿamaqchiguiñi, cha'ayi chaqcata cam i'ottac cam sa ÿaÿamaxañi. Qaq ¿'anshitaique peta'a da saq 'am icolanaqchit na nta'alpi? Qaq 'an'onaxajla't qone', yaqto' na nta'alpi ishit da 'am ÿi'oxodeetac.

⁴ Cha'ayi namayipi do'onataxaatacot ñi Dios, da yaqto' 'am saqca ca da. Qaq da huo'otaq sa ÿaÿamaxañi da 'adataxac, nachi 'am ishit da huo'o da 'adcolanaxa. Cha'ayi sa ishit da chochi dasaguettac na nta'alpi da huo'o da l'añaxac da huo'o ca ÿauo'o ca nhuaxanaguec. Cha'ayi namayipi do'onataxaatacot ñi Dios, da yaqto' ÿauo'o ca 'itchiguiñi nhuaxanaguec cam huo'o ca i'ot sa ÿaÿamaxañi.

⁵ Qaq ÿoqo'oyi no'on da ÿataqta qaÿalaxaguet na nta'alpi. Sa ishit da chaqdata da qaivittega ca nhuaxanaguec ca shiÿaxaua, cha'ayi nachi lataxac, yaqto' matapiguiñi yi lavilÿaxac ca shiÿaxaua.

⁶ Qaq souaxat nataq'en de'eda, nachi qami' qaushiichiñi qome ca nta'a. Cha'ayi nam nta'alpi, namayipi do'onataxaatacot ñi Dios, qataq ÿataqta nañanguet da i'ottac na l'onataxanaxacpi.

⁷ Qaq ÿoqo'oyi iuen da ñi 'oonolec shiÿaxaua qoÿanem cam iuen da qoÿanem. Cam neto'ot aca navigaxaiste nam ÿotta'a't mayi qaishiiteetacpi, qaq no'on da camayi qaÿi'iguelaxatot cam lalamaxat. Qataq cam iuen da huo'o naq 'enec qanqoÿin, qaq nachida qai'otec. Qataq cam iuen da qaÿi'oxoden, qaq nachida qai'otec.

⁸ Sa ishit qome da huo'o ca neto'ot aca qadavigaxaischi, chaqdato' da lauotaxanaqtaic ñi 'oonolec ca lÿa. Cha'ayi ca ÿauotec ca lÿa, nachi camayi ÿataqta ipacchigui dam lamaxasoxonaxac na lqataxacpi ñi Dios.

⁹ Cha'ayi na namaxasoxonaxacpi 'eeta': “Sa ishit da 'ancachitapegue' aca sa 'adhua, sa ishit da 'aualaataxan, qataq sa ishit da 'aucachi, qataq sa ishit da 'aucachiÿa'a da huo'o ca 'auasaxalec ca camachicague't, qataq sa ishit da 'auqopitta'a ca ÿaqa'a.” Qalaxayi de'eda qataq 'enauac na laÿi namaxasoxonaxacpi imatta't da n'aqtac mayi 'eeta': “'Auauotec ca 'adÿa, 'eeta'am 'anqashin da maichi 'anauojla't.”

¹⁰ Cha'ayi cam huo'o da lsoxoyic, camayi sa ishit da n'aqchit ca lÿa, qaq ÿoqo'oyi de'eda nsoxoyic nachida qone' da ipacchigui 'enauac na lqataxacpi ñi Dios.

¹¹ Qaq 'enauac de'eda shiitega da qami' iuen da qauloÿa'alo ne'enaua na'axa'te mayi souaqtaiguilo, qataq qauaÿajñi da mashi ivita yi laloqo' da ñiloxoueguesop na qad'ochaxa. Cha'ayi dam qadca'alaxa mashi ÿataqta sa qaÿapeque, saq 'en'am co'ollaq chita'ague da sa'amaqtenaq da n'aqtac.

¹² Nagui 'ico' mashi qaÿoqtegue so pe, qaq mashi sa qaÿapeque ca na'a'q. Qaq ÿoqo'oyi iuen da qomi' saxanaxauec nam qai'ottacpi mayi huaigui na napalaxa. Ime, qaq sanaxayiñi caua qad'ogoxonqa'te, shinaqta'am ca ale da quetaigui yi na'a'q.

¹³ Qaq ÿoqo'oyi ÿataqta ñaÿamaxataqta qome, se'enaxataqteguem da qanayiutaigui yi na'a'q. Sa ishit da qomi' taxaiqa. Qataq sa ishit da so'otaq ca lta'adaic qadqui'axac qataq da quishiguetaxac, na ÿotta'a't namanaxanaqtaiguesat, na cotaxaguesat, na nquiÿaxanaqtaiguesat.

¹⁴ Chaqdata da qai'añiiñi da lataxac so qadataxala' Jesucristo, qoñiita'am ca qad'ogoxonaxachi. Qaq sa ishit da qauqochiÿai cam qauem 'eetapeguec dam yi'oqchigui qadapachiyaxaqui.