Romanos 12 - Nuevo Testamento Toba Sur

Da 'eetec da achaalataxac da qoÿanot ñi Dios

¹ Qaq ÿoqo'oyi qami' ÿaqaÿadolqa, souaxat da lta'adaic lqouagaxanaqtaic ñi Dios, qaq ÿoqo'oyi qami' ñachoxodeetoiguilo da ÿataqta imauec qome da qanachaalataxaqui da qai'añiÿot ñi Dios. Qoñiita'am qanqashiñi aca nachitaqtaxanaqte mayi ÿataqta nca'altauec, yaqto' qami' lhuotte' da qau'onataxañiÿot ñi Dios, qataq da qami' ÿaÿamaxadeete' ñimayi. Qaq 'eda qome da 'eetec da lli'oxonnataxanaxac da qadquiyaqteÿaxaqui.

² Qaq sa ishit qome da qoquiitegue da llic na 'onataxacpi mayi lma' ana 'alhua. Chaqdata da qanadalaxachi qome naua qadhuennataxacolli', yaqto' ishit da qanadalaxat 'enauac da qanachaalataxaqui, qataq yaqto' ishit da ÿataqta qauaÿajñiita ca 'eetapeguec ñi Dios: cam ÿaÿamaqchiguiñi qataq cam ÿaÿamaxadeeta ñimayi qataq cam nalochiguiñi.

³ Cha'ayi ñi Dios aÿim nqouaguec da aÿim ÿanem de'eda i'onataxanaxac. Ÿoqo'oyi qami' shinapegalo da 'enauac da qoñiita sa ishit qome da huo'o ca ñi'oxonnapec da lhuennataxa da nlotapeguela't. Chaqdata qome da ñi 'oonolec ÿataqta nloteec da deuennataxaatac, qataq iloteguet cam nalotau'a da lpi'iÿaxac mayi ÿanem ñi Dios.

⁴ Cha'ayi de'eda 'eetec da qad'oquiaxac da ÿataqta qalota na logoxoshitpi, qalaxayi sa ishit da 'enauac namayipi da 'oonolec ca l'onataxanaxac.

⁵ Qaq nachi 'eetec nataq'en qomi', nai'ctaxa da ÿataqta qomi' qalota, qalaxayi 'oonolec da qad'oquiaxac da ñi'adaqtau'a so Cristo. Qataq ñi 'oonolec da shinaqta ÿataqta n'atte' ca lÿa, nachi 'eeta'am da 'oonolec da n'oquiaxac.

⁶ Cha'ayi ñi Dios maichi chigoqchigui da qomi' ÿanema na ÿotta'a't lshitaxanaxatpi. Qaq ÿoqo'oyi ÿataqta sepagaqtenaqchigui da 'eetec ca qomi' ÿanema. Da ñi Dios qomi' ÿanema da sa'axata'q naua l'aqtaqa, qaq nachida so'otaq, qalaxayi cam nalotau'a da qadpi'iÿaxac.

⁷ Da huo'o ca qoÿami' da huapegue' na laÿi 'amqajnataxanaxaicpi, qaq nachiyi i'ot. Qataq ca tateu'a da dapaxaguenataxan qanqoÿin, qaq nachiyi huelec da i'ot.

⁸ Qaq cam tateu'a da ÿaÿaten da i'añaqchit ca lÿa, qaq nachiyi huelec da i'ot. Ca da'agaxanaqta, qaq sa ishit qome da huo'o ca chochi naquitta'a. Ca tateu'a da nataxala', qaq ÿataqta ilotelec qome da l'onataxanaxac. Ca tateu'a da itaunec da lhuenaxanaxa ca lÿa, qalaq chaqdata qome da lamaiquiaxac.

Nam l'onataxanaxacpi na 'amqajnataxanaxaicpi

⁹ Ÿataqta 'eesa qome da qadsoxoyiqui ñi 'oonolec da ÿauotec ca lÿa. Qataq ÿataqta sa qauojñiÿa'aguet qome ca sa ÿaÿamaxañi, qataq qoquiigue ca ÿaÿamaqchiguiñi.

¹⁰ Ñi 'oonolec ÿataqta ÿauotec ca lÿa, 'eeta'am naq'en da lauotaxanaqtaic ca maichi lqaÿa. Qataq ÿataqta ipacapega ca lÿa, qataq ñi 'oonolec sa ishit da saq huo'o naq'en ca 'enec ca lÿa.

¹¹ Qataq ÿataqta qan'añaxachi, sa ishit da qami' hualaiqa. Qataq da qau'onataxañiitacot so qadataxala', qalaq ÿataqta imauec da qadquiyaqteÿaxaqui.

¹² Qataq ÿataqta qauamaichiguiñi souaxat dam qanaquitaxaqui. Qataq ÿataqta qauauo'oi da qanhualaxaunaxaqui da huo'o ca qanque'ejnaxaqui. Qataq sa ishit da qai'axañiiñi da qanatamnaxaqui.

¹³ Qataq qautauañi ca qad'amqajnataxanaxauai da huo'o ca lhuenaxanaxa, qataq ÿataqta qauloÿiguet ca qanamaxasoxoiqui.

¹⁴ Qataq ÿataqta qauchoxoyiñi cam saq qami' iyacna'pe. Qataq qauÿaxañiÿot ñi Dios, da yaqto' ÿanem ca no'on lliquiaxac namayipi, qaq sa ishit da nachica ca sa ÿaÿamaxañi.

¹⁵ Qataq qauamaitapegue' cam matapec, qataq qannoinaxauai cam noÿiitapec.

¹⁶ Qataq sa ishit da huo'o ca ÿoqtapeuga da qoñiita. Qataq sa ishit da qami' ñi'oxonnaxaiqa. Chaqdata da qau'enaxachi cam qaica ca l'amaqchic. Qataq sa ishit da qaupi'itaxañiitega da qami' ÿajnaxanaxaiqa.

¹⁷ Qataq sa ishit da huo'o ca qavi'iguelaxachiÿa'aguet ca sa ÿaÿamaxañi. Chaqdata da qanpogoxoiñiÿapegue' ca no'on, yaqto' 'enauac qami' qaÿaÿamaxadeete'.

¹⁸ Qaq souaxat da qanshiitaique da qaica ca da qanqashiñi 'enauac na shiÿaxauapi, qaq ÿoqo'oyi qan'añaxachi qome, ÿataqta cam tachiguiña ca qauañoxochi.

¹⁹ Qami' ÿaqaÿadolqa, sa ishito' qome qami' da maichi qaupalliitaique ca qadviyi. Chaqdato' qome da qauauaqaita'a da nachiñi ñi Dios ñim i'ot ca nhuaxanaguec ca shiÿaxaua. Cha'ayi naua ñiyigui'shi l'aqtaqa ñimayi 'eeta': “Aÿim mayi nachaÿim so'ot ca nhuaxanaguec ca shiÿaxaua, nachaÿim mayi seshiitenaxan, 'enapec nam qadataxala'ai.”

²⁰ Qataq nataq'en 'eeta': “Ca 'am ipa'agueetac, da huo'otaq ÿoqouat, qalaq 'auqui'axan. Qataq da ilem laquip, qalaq 'anÿomaxan. Cha'ayi da nachi qoÿiitec de'eda, nachi camayi 'ico' napaqhuec naq'en na lashic souaxat da l'aloxo.”

²¹ Sa ishit qome da 'auauaqta'a da 'am loxonec ca sa ÿaÿamaxañi. Chaqdata da 'oxonec ca sa ÿaÿamaxañi, qalaxayi 'audolec ca ÿaÿamaqchiguiñi.