Romanos 11 - Nuevo Testamento Toba Sur

Nam Israel llalaqpi mayi qanca'alaxateec

¹ Qaq ÿoqo'oyi nagui aÿim senataxan, shiita': ¿Ñi Dios peta'a imaqhuec na Israel l'ecpi mayi maichi lalamaxatpi? ¡'A'i, sa ishit! Cha'ayi aÿim nataq'en aÿim Israel l'ec, aÿim lauo' l'ec so Abraham, qataq sachigoxoigui na llalaqpi so laual Benjamín.

² Cha'ayi nal'ena co'ollaxa ñi Dios da lca'aguishic na Israel l'ecpi da ÿauo'o lalamaxatpi. Qaq ÿoqo'oyi nagui sa ishit da imaqhuec. Qaq ÿoqta da qami' mashi qauaÿajñi dam 'enapec naua ñiyigui'shi l'aqtaqa ñi Dios co'ollaq i'axat so l'aqtaxanaxanec Elías co'ollaq somayi nqouagaxaueetacot ñimayi, nachi ÿauo'o da ÿasaxalec na Israel l'ecpi, 'eeta':

³ “'Am ÿataxala', 'enauac so 'ad'aqtaxanaxanecpi qaÿalauat, qataq qanlaxajñi nam huañapi da 'am qanatamnot, qaq chaqaÿimtom da ñi'onañi, qaq nataq'en qanshitaique da aÿim qaÿalauat.”

⁴ Qalaxayi ñi Dios 'enapeco': “Aÿim seÿotauga yi siete mil shiÿaxauapi yim sa ishit da i'adoto naua l-llicte da natamnot ñim nqolac l'enaxat Baal.”

⁵ Qaq nachida da 'eetec nagui da huo'o na n'onañi namayipi da chigoqchigui da lqouagaxanaqtaic ñi Dios da nca'aguishicpi.

⁶ Qaq ÿoqo'oyi da huo'otaq nachida da lqouagaxanaqtaic ñi Dios da chigoqchigui namayipi, nachi sa ishit qone' da ñi 'oonolec maichi chigoqchigui cam l'onataxanaxac. Cha'ayi da huo'otaq nachi 'eetec de'eda, nachi da lqouagaxanaqtaic ñi Dios sa ishit qone' da nqouagaxanaqtaic.

⁷ Qaq ¿chaq huá'ague ca 'eetec? Yi nam Israel l'ecpi sa ishit da ÿanata cam nmittaique, qalaxayi nam lca'aguishicpi ñi Dios qalaq ishit da ÿanata. Qaq nam laÿipi, qalaq n'ona'aguet da ÿataqta qadamchigui.

⁸ Qaq ipacchigui da 'enapec naua ñiyigui'shi l'aqtaqa ñi Dios, 'eeta': “Ñi Dios i'otec namayipi da ÿataqta qaica ca nomguet, cha'ayi ÿanem da sa ishit da nauaañi, qataq sa hua'aqa. Qaq 'eda da 'eetec namayipi, chochi ivitta'a nagui.”

⁹ So David nataq'en 'eeta': 'Onaxaico' qome da lta'adaic lqui'axac namayipi da ishit da que'emaxam, 'eeta'am aca nqoina qataq ca naleguec, da yaqto' qui'aqaisop qataq qaÿauo'o ca nhuaxanaguec.

¹⁰ Qataq 'onaxaico' qome da naua l'ai'te qana'm, nachi sa ishit da nauaañi, qataq 'onaxaico' qome da nachi 'eetai' na l-laq da sa ishit da nchilliishiguem.

Da 'eetec da lca'alaxa nam sa ishit da judiopi

¹¹ Qaq ÿoqo'oyi huo'o da inataxanaxac, shiita': ¿Peta'a nagui da 'ico' qui'aqañi na judiopi, nachi ÿoqta imauec da daqat? ¡'A'i, sa ishit! Cha'ayi de'eda 'eetec da sa ÿalaq na judiopi, nachida da i'ot da ishit da huo'o mshi huo'o da lca'alaxa nam saq judiopi, yaqto' nam Israel l'ecpi ishit da n'añaxatta da ilolec namayipi.

¹² Qaq ÿoqo'oyi de'eda lasouaxashit na judiopi da i'otteu'a da nchoxonnataguec 'enauac na shiÿaxauapi mayi huetalec ana 'alhua, qataq dam lqoshaxac da huo'otaq i'otteu'a da nchoxonnataguec nam saq judiopi, qaq ¡táloxochiyictoxo' da saq ÿacteec ca nchoxonnataguec namayipi, qom ivita ca na'a'q da qaltaq inoxoneuo!

¹³ Qalaxayi aÿim huo'o da i'aqtac qami' tachiguilo qami' mayi sa ishit da qami' judío lashi'. Cha'ayi ñi Dios aÿim ÿamaxalec nam sa ishit da judiopi, qaq ÿoqo'oyi aÿim ÿataqta shi'oxoden da i'onataxanaxac.

¹⁴ Cha'ayi ñishitaique da yaqto' na maichi ÿalamaxat iuo' l'ecpi ishit da huo'o ca lyaxa da qami' datalguete, yaqto' namayipi ishit da qanca'alaxateec.

¹⁵ Cha'ayi de'eda 'eetec na judiopi da qaimaqhuec, nachi chigoqchigui da ishit da 'enauac nam shiÿaxauapi mayi huetalec ana 'alhua ishit da nmane' ñi Dios, qaq ¡táloxochiyictoxo' da saq ÿacteec qom ivita da qaÿaconguet namayipi! Ÿataqta 'eeta'am ca nca'aleec da chigoqtoigui na leuaxaicpi.

¹⁶ Cha'ayi aca hua'auchiguiñi pan mayi chigaqaigui ca nvigoxoshic, da mashi sogote da qoÿanot ñi Dios, nachi nataq'en 'enauac que'eca nvigoxoshic lalamaxat ñimayi. Qataq cam lpa'a'q aca qo'ipaq, da mashi sogote da qoÿanot ñi Dios, nachi nataq'en 'enauac ana lcouepi imauec da lalamaqte ñimayi.

¹⁷ Qaq huo'o nam judiopi nam lcoue asa'aso nanguishi l'enaxat olivo nam qaiquesoxouec. Qaq som chigoqchiguiña, nachi nañaxateu'a qanqoÿin 'am mayi qoneta'am aca lcoue aca olivo mayi saq nanguishi. Huaña, nachi 'am ishit da 'anhuanau'a so lpa'a'q qataq da lca'alaxa asom olivo.

¹⁸ Qalaxayi 'am sa ishit qome da 'anapacapeguelec anam ÿataqta lcouepi mayi qaiquesoxouec. Cha'ayi da 'aupi'itaxaatega da 'am ÿi'oxodaq, qaq 'auennata'a qome da sa ishit da nachi'am mayi 'au'añaqchit so lpa'a'q, cha'ayi so lpa'a'q mayi nachiso so 'am i'añaqchit.

¹⁹ Qaq sa iuena'a da qoneta': “Aja', qalaxayi anam lcouepi qaiquesoxouec, yaqto' ishit da aÿim nañaxateu'a qanqoÿin aso nanguishi olivo.”

²⁰ Qaq damayi ÿaÿamaqchiguiñi. Qalaxayi namayipi qaiquesoxouec, cha'ayi qaica ca lpi'iÿaxac. Qaq 'am huo'o yi 'addaqa', cha'ayi souaxat da huo'o da 'adpi'iÿaxac. Qaq ÿoqo'oyi sa ishit qome da 'am 'an'amaqten. Chaqdata da ÿataqta 'antelañi.

²¹ Cha'ayi ñi Dios da ÿataqta sa ichoxonnai' co'ollaxa da nqat asa'aso lcoue aso qo'ipaq, qaq nataq'en 'am sa ishit da 'am ichoxonnai'.

²² Qaq ña 'aula'a, ÿataqta qouagaxanaqtaqaic ñi Dios, qalaxayi nataq'en ÿataqta qaica ca lqouagaxat. Ñimayi ÿataqta sa ichoxonnai' nam huo'o co'ollaxa ca ÿasouaxat, qaq 'am qalaxayi ñimayi ÿataqta 'am nqouaguec. Qalaxayi iuen da 'am nachi 'eetai' da qoquetalec de'eda lqouagaxanaqtaic. Cha'ayi qom sa ishit, qaq nataq'en ishit da 'am qaiquesoxouec.

²³ Qaq nachi 'eetec nataq'en na judiopi da huo'otaq ÿi'iguelaxalec da da'amqajnataxan, nachi namayipi ishit da qaltaq nañaxateuo qanqoÿin. Cha'ayi ñi Dios sa ishit da ÿaqalanapec da qaltaq ÿi'iguelaxateuo da nañaxateuo naq'en.

²⁴ Cha'ayi 'am mayi sa ishit da 'am judío l'ec, qoneta'am aca qaiquesoxouec lcoue aca olivo mayi saq nanguishi, nachi 'am nañaxateu'a qanqoÿin aso olivo mayi nanguishi, qaq ¡táloxochiyictoxo' da saq 'eetec qome na judiopi da qaltaq qaÿi'iguelaxatteu'a asom chigoqteu'a nanguishi olivo! Cha'ayi namayipi maichi lcoue co'ollaxa asomayi.

Da 'eetec qome da lca'alaxa na Israel l'ecpi

²⁵ Ÿoqo'oyi qami' ÿaqaÿa't, ñishitaique da qauaÿajñi de'eda saq cha'a lataxac mayi 'eetapeguec ñi Dios, yaqto' qami' sa ishit da qaupi'itaxañiitega da qami' ÿajnaxanaxaiqa. Cha'ayi huo'o nam Israel l'ecpi nam ÿataqta qadamchigui, qalaxayi to' qom ivita ca laloqo' da nala'a't na sa ishit da Israel l'ecpi da inoxoneuo.

²⁶ Qaq qom mashi ime, nachi 'enauac nam Israel l'ecpi qanca'alaxateec, cha'ayi naua ñiyigui'shi l'aqtaqa ñi Dios 'eeta': Chigoqchiguiña qome yi Sión cam ishit da nsouec naq'en nam llalaqpi so Jacob, qataq nqat qome da lli'itaxaloxo.

²⁷ Qaq 'eda qome da lataxac cam ñaÿamaxataxac mayi sami' namayipi, qom ivita da ñaqat na lasouaxashitpi.

²⁸ Cha'ayi nam judiopi yi sa ishit co'ollaxa da ÿaconguet da n'aqtaxanaxac mayi chigaqaigui da nca'alaxa, qaq ÿoqo'oyi 'eeta'am qanqoÿin da npa'aguene' ñi Dios, da yaqto' huo'o yi qaddaqa'ai qami'. Qalaxayi ñi Dios ñaq 'eetalec da ÿauotec namayipi, cha'ayi lca'aguishic som hua'au lta'alpi.

²⁹ Cha'ayi cam mashi ÿan ñi Dios, qalaq sa ishit da ÿacona, qataq sa ishit da ñi'iguelaxajla't da lÿaxanaxac.

³⁰ Cha'ayi qami' sa ishit co'ollaxa da qaualaqaiguet ñi Dios. Qalaxayi nagui na judiopi da sa ishit da ÿalaq, nachi ñi Dios huo'o da lchoxonnataxanaxa da qoñiita.

³¹ Qaq nachi 'eeta'am da 'eetec nagui namayipi da sa ishit da ÿalaq, nachi ñi Dios ishit da qaltaq huo'o da lchoxonnataxanaxa namayipi, da 'eeta'am naq'en da 'eetec nagui da qoñiita.

³² Cha'ayi ñi Dios i'otec da lcoñitaguishic naq'en 'enauac na shiÿaxauapi da lasouaxashit, da yaqto' ñimayi ishit da imata da huo'o da lchoxonnataxanaxa 'enauac namayipi.

³³ ¡Ÿataqta lta'adaxanec da lqouagaxanaqtaic ñi Dios, qataq da laÿajnec qataq da lauattonaxanaxac! Ÿataqta sa ishit da saÿajnaq da sa'axataxaguelo naua 'eetapegueco qataq naua llico.

³⁴ Cha'ayi “¿negue'tom ca ishit da ÿaÿate'n naua lhuennataxaco ñi qadataxala'? qataq ¿negue'tom ca ishit da ÿapaxaguen ñimayi?

³⁵ Qataq ¿negue'tom ca ishit da hua'auñi da ÿauo'o ca ÿanem ñi qadataxala', da yaqto' ñimayi ishit da ÿi'iguelaxateguet camayi da ÿauo'o ca ÿanem?”

³⁶ Cha'ayi 'enauac na huetalec na chigoqo'ot ñi Dios, qaq 'enauac l'onatacpi ñimayi, qataq maichi lalamaxatpi. Qaq ÿoqo'oyi ¡nachi 'eetai' da shi'oxodenaqtac ñi Dios! Aja', nachi 'eetec.