Romanos 10 - Nuevo Testamento Toba Sur

¹ Qami' ÿaqaÿa't, lta'adaic da lhuennataxac añi iquiyaqte qataq da ñoqouagaxaunaxac ñi Dios da ñoqouagaxaueetapeguelec na Israel llalaqpi, cha'ayi ñishitaique da qanca'alaxateec.

² Cha'ayi aÿim sa'axat da namayipi ÿataqta lta'adaic da lyaxa da do'onataxanot ñi Dios, qalaxayi de'eda lyaqchic sa ishit da chigoqchigui ca 'eesa nauattonaxanaxac.

³ Cha'ayi namayipi sa ishit da ÿaÿaten ca 'eetec ca lataxac da ñi Dios ishit da ÿaÿamaxadeeta ca shiÿaxaua. Chaqdata da namayipi ipactega da maichi 'eetapeguec, da yaqto' ishit da ÿaÿamaxadeeta ñimayi, qaq sa ishit da nañaneu'a dam lataxac mayi lapaxañi ñi Dios.

⁴ Cha'ayi som Cristo nachiso so loga't nam nqataxacpi mayi chigoqo'ot so Moisés, qataq chigoqchigui somayi da 'enauac nam i'amaqten somayi, nachi ishit da ÿaÿamaxadeeta ñi Dios.

⁵ Qaq de'eda 'eetec da huo'o ca ishit da ÿaÿamaxadeeta ñi Dios da chigoqchigui na nqataxacpi, qalaq so Moisés co'ollaq ÿiyiñi, qalaq 'eeta': “Ca shiÿaxaua da ipacchigui 'enauac na nqataxacpi, qaq camayi da nachaalataxac chigoqchigui da i'ot ca 'enapec namayipi.”

⁶ Qataq da 'eetec da huo'o ca ishit da ÿaÿamaxadeeta ñi Dios da chigoqchigui da lpi'iÿaxac, qalaq 'eeta': “Sa ishit da detaqtagui da 'adquiyaqteÿaxac da qoneta': ¿Négue't ca ishit da taÿot na piguem, da yaqto' ishit da ñi'iguelaxajñi so Cristo?

⁷ Qataq sa ishit da qoneta': ¿Négue't ca ishit da nqo'ooña ca lma' na nqui'ipi,” da yaqto' ñi'iguelaxatshiguem so Cristo da chigoqtoigui naq'en na leuaxaicpi?

⁸ Qaq 'eda dam 'eetega naua ñiyigui'shi l'aqtaqa ñi Dios, mayi 'eeta': “Naua n'aqtaqa ÿataqta sa qaÿapiguii naq'en 'am da 'au'axa't qataq 'au'amaqte'n.” Qaq 'eda da n'aqtaxanaxac mayi i'axat da qai'amaqten ñi Dios dam sa'axataqtac.

⁹ Cha'ayi da 'au'axat so Jesús da nachiso so 'adataxala', qataq da 'adquiyaqteÿaxac i'amaqten da ñi Dios nca'aleeguesop naq'en somayi da nleuaxa, nachi 'am qanca'alaxateec.

¹⁰ Cha'ayi da qadquiyaqteÿaxac da ÿataqta da'amqajnataxan, nachi ñi Dios ishit da qomi' ÿaÿamaxadeete'; qataq da sa'axataq so Jesucristo, nachi ishit da qomi' qanca'alaxatreec.

¹¹ Cha'ayi naua ñiyigui'shi l'aqtaqa ñi Dios 'eeta': “Qaica ca 'oonolec nam i'amaqteetac ñimayi da huo'otaq ishit da n'aloxootac.”

¹² Cha'ayi qaica ca ÿaqa'a ca lataxac da qanca'alaxateec na judiopi qataq nam sa ishit da judiopi. Cha'ayi so qadataxala' nachiso so lataxala' 'enauac namayipi, qataq somayi ÿataqta sa naloqnañi ca ÿanem cam nqouagaxaueetega somayi.

¹³ Cha'ayi nachi 'enapec dam nanettañi, 'eeta': “'Enauac nam nqouagaxaueetapega da l'enaxat so qadataxala', namayipi qanca'alaxateec.”

¹⁴ Qalaxayi ¿huá'ague ca 'eetec ca lataxac da qanqouagaxauna somayi, da huo'otaq sa ishit da qai'amaqten? qataq ¿huá'ago' ca 'eetec da qai'amaqten somayi, da huo'otaq sa ishit da qai'axaÿa da qai'axattac? qataq ¿huá'ago' ca 'eetec da qai'axaÿa somayi, da huo'otaq sa ishit da huo'o ca i'axat cam n'aqtaguec?

¹⁵ Qataq ¿huá'ago' ca 'eetec da huo'otaq huo'o ca da'aqtaxan, da huo'otaq sa ishit da namaxashic? Cha'ayi dam 'enapec naua ñiyigui'shi l'aqtaqa ñi Dios, 'eeta': “¡Ÿataqta sa n'onolec da lvidaxac nam ndotai' da n'aqtaxanaxac mayi i'ot da nlagaxayic, qataq i'axattac da no'on qad'axaÿaxac!”

¹⁶ Qalaxayi sa ishit da 'en'a't da qaÿoqocha'a de'eda n'aqtaxanaxac mayi i'axat da nca'alaxa. Qaq ipacchigui da l'aqtac so Isaías co'ollaq 'eeta': “'Am ÿataxala', ¿negue'tom ca ishit da i'amaqten da qad'aqtaxanaxac?”

¹⁷ Qaq ÿoqo'oyi da npi'iÿaxac chigoqchigui da 'axaÿaxanaxac, qaq dam qan'axaÿaxaatega, nachida da n'aqtaguec so Cristo.

¹⁸ Qalaxayi aÿim senataxan, shiita': ¿Namayipi sa ishit peta'a da hua'axaÿa de'eda n'aqtaxanaxac? ¡'A'i, sogote da hua'aqtega! Cha'ayi naua ñiyigui'shi l'aqtaqa ñi Dios 'eeta': Naua l'aqtaqa so n'aqtaxanaxanecpi ima 'enauac na huetalec ana 'alhua da hua'axaÿa, qataq naua l'aqtaxanaxaco ivida'alo 'enauaque naua pa'atreec laÿil ana 'alhua.

¹⁹ Qalaxayi qataq shi'iguelaxalec da inataxanaxac, shiita': ¿Peta'a nam Israel l'ecpi sa ishit da ÿaÿaten de'eda n'aqtaxanaxac? 'A'i, ÿaÿaten. Yi so Moisés hua'auchiguiñi da ÿiyiñi co'ollaxa da l'aqtac ñi Dios, mayi 'eeta': Aÿim qami' sanema qome da ÿataqta qadquiÿai cam shiÿaxauapi mayi sa ishit da qadhuo'oi l'ecpi, qataq ÿataqta qami' senogoqchi't souaxat cam shiÿaxauapi mayi sa iuen da huo'o ca ÿaÿaten.

²⁰ Ime, qataq so Isaías ÿataqta qaica ca lyiÿaxac co'ollaq ÿiyiñi da l'aqtac ñi Dios, mayi 'eeta': Nam sa ishit co'ollaxa da aÿim nmittaique, qalaq aÿim ÿanata, qataq ñachaxana nam sa ishit co'ollaxa da aÿim denataxanaique.

²¹ Qataq co'ollaq detaxaÿa na Israel l'ecpi so Isaías, qalaq 'eeta': “Ÿataqta ima yi na'a'q da aÿim seÿaxaatega nam shiÿaxauapi mayi aÿim sa ÿalaxaguet qataq aÿim npa'aguene'.”