Mateo 28 - Nuevo Testamento Toba Sur

Da 'eetec co'ollaq nca'aleec so Jesús

¹ Qaq co'ollaq mashi inoxoneec so na'a'q mataxaqui, nachi mashi yi'oxoguejda so l'auaxanec na'a'q. Nachi aso María mayi lashi yi Magdala, qataq aso lÿa María, soomayi nqo'oodeuga aso huachiqui.

² Nachi nque'elaxatta da huo'o so lacholaxanaxa ana 'alhua, cha'ayi so lamaxashic piguem l'ec ñi qadataxala', somayi chigoqtot na piguem da naÿaña aso huachiqui. Nachi nqat so coma' lta'adaic mayi lapoxot asomayi, nachi nso'ootalec.

³ Qaq somayi ÿataqta 'edoigui, 'eeta'am na nqashilgaxa, qataq soua alogo ÿataqta ÿapaga'q, 'eeta'ama ana aloñi.

⁴ Qaq co'ollaq ila'a somayi so huataxanaqpi, nachi ÿataqta iviloxolaqchit da lcolanaxa. Nachi huañi, 'eeta'am na leuaxaicpi.

⁵ Nachi so namaxashic piguem l'ec, somayi 'enapegalo soua 'alo, 'eeta': –Sa ishit qome da qayi'ii. Aÿim saÿaten da qami' qanmichiitaique so Jesús som qaiuaxaneuo co'ollaxa.

⁶ Qaq somayi sa ishit da hueta'a ne'ena. Cha'ayi mashi qaltaq nca'aleec, ipacchigui co'ollaxa da 'enapec. Qayalaÿi, ña qaumijñi nam qaÿachaña co'ollaxa.

⁷ Qaq sa qanaÿaloxoñi qome da qoquii, nachi qau'aqtaxañiima caua lapaxaguenataqa. Qoñiita': “Somayi ileu, qalaxayi mashi qaltaq nca'aleec. Qaq mashi hua'auta'ague da Galilea. Qaq huaña qome yimayi, nachi qanauañi'.” Qaq 'eda da n'aqtac mayi qami' sa'axatema.

⁸ Nachi soua 'alo sa naÿaloxo'n da queda'ai aso huachiqui, ÿataqta huo'o da lcolanqa' qataq ÿataqta qalota nataq'en da ntonaxa'c. Nachi je'c, ÿataqta nqalgoqte' da idou'alo da l'axaÿaxa'c soua napaxaguenataqa.

⁹ Huaña, nachi so Jesús nachaxanalo soomayi, nachi iquiita'pe. Nachi soomayi nquigueu'alo somayi, nachi i'adoto naua l-llicte, qataq qapaloiguilo naua lchil.

¹⁰ Nachi so Jesús 'enapegalo soomayi, 'eeta': –Sa ishit qome da qayi'ii. Chaqdata da qoquii, qau'aqtaxañiim qome ca ÿaqaÿañicpi, da yaqto' taigue da Galilea. Huaña qome yimayi, nachi aÿim nauane'.

Da l'aqtaxanaxa'c soua huataxanaq lashi'

¹¹ Qaq co'ollaq mashi je'c soua 'alo, nachi huo'oi soua je'c huataxanaq lashi' da tadeu'a yi la ciudad. Nachi da'aqtaxaadem som lataxala'pi na ntaxaÿaxanaxanecpi 'enauac de'eda qaÿauaachigui.

¹² Nachi se'eso nataxala'pi jec da detaxaÿapegue' so nquedoxonecpi. Qaq co'ollaq ime da detaxaÿapega't, nachi ÿataqta qalota aso qoÿami' anom so huataxanaqpi.

¹³ Nachi qoÿiitega, qoÿiita': –Qami' qoñiÿapec qome da se'eso pe co'ollaq qau'ochiita, nachi soua lapaxaguenataqa so Jesús ana'c da decachiida so l'oquiaxac somayi.

¹⁴ Qaq ñi nta'a da huo'otaq ivido'ot da ÿaÿaten de'eda, qalaxayi huo'oi qomi' qami' ñipaxataqleguete, da yaqto' sa ishit da huo'o ca qanhuaxanaguiiqui.

¹⁵ Nachi soua huataxanaq lashi ÿacoodeguet aso nshiitenaqte', nachi je'c da i'o't dam n'aqta'c. Qaq 'eda da 'eetec da l'aqtaxanaxac na judiopi, chochi ivitta'a nagui.

So Jesús ÿama'q soua lamaxa'shi

¹⁶ Nachi soua once lapaxaguenataqa je'c da tadegue da Galilea da nqo'ooda aso qasoxonaxa mayi ÿachaxanapec co'ollaxa so Jesús, da huaña, qaq qanauane'.

¹⁷ Qaq co'ollaq mashi qanauane' so Jesús, nachi qai'adoto naua nllicte, nai'ctaxa da huo'o na ÿoqolguettac da ÿoqta 'eesa da nachiso somayi.

¹⁸ Nachi so Jesús nquiga somayipi, nachi 'enapega, 'eeta': –Aÿim mashi aÿim qaipataxalec da samaqpec 'enauac na hueto'ot na piguem qataq na huetalec ana 'alhua.

¹⁹ Qaq ÿoqo'oyi nagui qanqo'oñiÿa qome na ÿotta'a't shiÿaxauapi da qauauo'oi ñallippi, qauachilaxanataxañiÿa qome da l'enaxat ñi qadta'a, qataq na llalec, qataq so Espíritu Santo.

²⁰ Qataq qauapaxaguiñiic qome namayipi da ÿalaxalec 'enauac na ÿaqataxacpi mayi qami' sanema. Qataq sa ishit qome da qaucouai'ai da aÿim nachi 'eetai' da qami' soota'agueta 'enauaque naua na'axa'te, chochi ivitta'a ca loga't ana 'alhua. Aja', nachi 'eetec de'eda.