Mateo 26 - Nuevo Testamento Toba Sur

Qaÿauotaique da qaÿaconeu'a so Jesús

¹ Qaq so Jesús co'ollaq imat da i'axattac 'enauac de'eda, nachi 'enapegalo soua lapaxaguenataqa, 'eeta':

² –Qami' qauaÿajñi da qom inoxoodeec ne'enaua dos na'axa'te, nachi nnoxoneuo ca na'a'q mayi huetoigui da qaiuennate so na'a'q co'ollaq qanayica'ai yi Egipto. Nachi na shiÿaxaua llalec qome qoÿaneuo, da yaqto' qaiuaxaneuo.

³ Nachi se'eso na'a'q nam lataxala'pi na ntaxaÿaxanaxanecpi da qaitaxaÿapegue' ñi Dios, qataq nam dapaxaguenataxaatapeguec na nqataxacpi, qataq nam lquedoxonecpi na judiopi, namayipi lapona't, hueta'a yi nqasoxoc so lma' lta'adaic so Caifás mayi lataxala' nam ntaxaÿaxanaxanecpi.

⁴ Qaq huaña yimayi, nachi qaitaqtapigui cam natenataxanaxac, da yaqto' qaÿaconeu'a so Jesús da qaÿalauat.

⁵ Qalaxayi somayipi 'enapeco': –Sa ishit qome da huetoigui ñaqashinaq naua na'axa'te naponaxaqui', yaqto' sa ishit da i'elaxa't na shiÿaxauapi.

Aso 'alo mayi icodelec na lqaic so Jesús

⁶ So Jesús hueta'a yi Betania, hueta'a yi lma' so Simón mayi qaÿamata'ac da nchiga na l'oc.

⁷ Nachi nqochineu'a somayi aso 'alo, ÿachitac aso coma' l'enaxat alabastro, laÿi'ole na codaxat mayi ÿataqta qaÿoqteu'a. Qaq so Jesús co'ollaq datatalec so nqui'axala', nachi asomayi icodelec na lqaic som codaxat mayi ÿataqta ama na laita.

⁸ Nachi soua lapaxaguenataqa co'ollaq ÿauaachiyigui de'eda, nachi dalematai'. Nachi huo'o da l'aqta'c, 'eeta': –¿Chi 'eeto' da chochi qaÿi'en de'eda codaxat?

⁹ Cha'ayi de'eda codaxat ishíttaxa da ÿataqta late'edai qanqoÿin aca lashiue da qaimen, da yaqto' ishit da qaitauan na choxodaqpi.

¹⁰ Qaq so Jesús hua'aqchigui de'eda, nachi 'enapeco': –¿Tá'ainco' qami' yi sa qaualemaxachi ada'ada 'alo? Cha'ayi de'eda aÿim i'otec, damayi ÿataqta ÿaÿamaqchiguiñi.

¹¹ Qaq nam choxodaqpi, qalaq nachi 'eetai' qome da qami' hueta'agueta; aÿim, qalaxayi sa ishit da nachi 'eetai' qome da qami' hueta'agueta; aÿim, qalaxayi sa ishit da nachi 'eetai' da qami' soota'agueta.

¹² Cha'ayi de'eda i'ot ada'ada 'alo da icodelec da i'oquiaxac som codaxat, damayi ÿaqataxanai' nagui da aÿim icodelec da ñaq saxanaxa da aÿim qailayiñi.

¹³ Qaq ÿataqta 'eesa de'eda qami' sa'axatema da cam pa'aigue naua laÿil ana 'alhua da qai'axattac de'eda n'aqtac mayi chigaqaigui da nca'alaxa, nachi nataq'en qai'axattac qome de'eda i'ot ada'ada 'alo, yaqto' nachi 'eetai' qome da qaiuennatapega adamayi.

So Judas huotaique da ÿaneuo so Jesús

¹⁴ Nachi so 'oonolec soua doce lapaxaguenataqa, l'enaxat Judas Iscariote, somayi jec da detaxaÿapegue' som lataxala' na ntaxaÿaxanaxanecpi da qaitaxaÿapegue' ñi Dios.

¹⁵ Nachi 'enapego' somayi, 'eeta': –¿Chaq négue't aca aÿim qai'añiim, da aÿim qami' saneu'alo ñi Jesús? Nachi somayipi ÿanem somayi aso treinta lcatpiole mayi chigaqaigui na plata.

¹⁶ Huaña, nachi so Judas ilotaique ca lataxac da ÿaneu'a somayipi so Jesús.

Da lqui'axac so qadataxala'

¹⁷ Qaq som l'auaxanec na'a'q mayi huetoigui da qanallic ana pan mayi sa qaÿauo'o ana lalecte, nachi soua lapaxaguenataqa so Jesús inattrac somayi, 'eetra': –¿Chaq huá'ague ca 'anshitaique huaña da qomi' saqataxanqai', da yaqto' 'am 'auque'e ca na'a'q mayi huetoigui da qaiuennate da qanayica'ai yi Egipto?

¹⁸ Nachi so Jesús 'enapeco': –Qanqo'oñiu'a qome yi la ciudad, nachi qaiteu'a yi lma' que'eca shiÿaxaua. Nachi qoñiÿapega, qoñiita': “Ñim qanapaxaguenaxala' 'eeta': Yi ÿaloqo' mashi sa qaÿapeque. Qaq na 'adma' qome huaña da sachic ca nallic mayi naigui da qaiuennate co'ollaq qanayica'ai yi Egipto, da sequi'iÿa'ai'salo naua ÿapaxaguenataqa.”

¹⁹ Nachi soua lapaxaguenataqa nachi i'enaxatchiyigui dam lamaxasoxonaxac so Jesús da ÿaqataxaadai' so nqui'axac.

²⁰ Qaq co'ollaq mashi ivita so pe, nachi so Jesús datatalec so nqui'axala', qataq soua doce lapaxaguenataqa.

²¹ Qaq co'ollaq ña deque'eta'pe, nachi 'enapeco': –Ÿataqta 'eesa de'eda qami' sa'axatema da ñi 'oonolec da qoñiita aÿim ÿaneuo.

²² Nachi somayipi ÿataqta daquicota. Huaña, nachi ñi 'oonolec inattac somayi, 'eeta': –'Am qadataxala', ¿peta'a nachaÿim?

²³ Nachi so Jesús 'enapeco': –Ñim ÿauoltenaxanaxaua ne'ena qadqui'axaqui, nachiñi qome ñim aÿim ÿaneuo.

²⁴ Qalaxayi ne'ena shiÿaxaua llalec, namayi ÿataqta quetegue dam lliquiaxac mayi i'axat naua ñiyigui'shi l'aqtaqa ñi Dios. Qalaxayi ¡ÿataqta choxodaxaso' ñim shiÿaxaua mayi ÿaneuo namayi! Ñi mayi 'onaxáictaxa co'ollaxa da sa ishit da ñiguiñi.

²⁵ Nachi detaqa so Judas mayi nachiso so ÿaneuo, 'eeta': –'Am qadataxala', ¿peta'a nachaÿim? Nachi so Jesús 'enapeco': –Aja', nachi'am.

²⁶ Qaq co'ollaq ña deque'eta'pe, nachi so Jesús ÿacona aso pan. Qaq co'ollaq ime da icolaxachigui, nachi ÿanot da n'achiquiaxac ñi Dios. Ime, nachi ÿanoiguilo soua lapaxaguenataqa, nachi 'eeta': –Qolliqui ana'ana, anamayi nachida da i'oquiaxac.

²⁷ Qaq co'ollaq ime, nachi ÿacona aso ÿomaxaqui, nachi qaltaq ÿanot da n'achiquiaxac ñi Dios. Ime, nachi ÿanoiguilo soomayi, nachi 'eeta': –Qanÿomiigui qome ana'ana ÿomaxaqui 'enauac da qoñiita.

²⁸ Cha'ayi na huetagui anamayi nachinaua na itago'q mayi ÿoqta 'itchiguiñi naq'en dam dalaxaic aÿamaxataxac. Nam itago'q taÿa'alo da qaicoldeec, da yaqto' ÿataqta qalota qome na qaÿapalaxat na lasouaxashitpi.

²⁹ Qalaxayi aÿim qami' shinapegalo da nagui nachi sa lÿa da shi'iguelaxalec da ñiÿomgui ne'ena lli'i ana uvas, to' qom mashi ivita ca na'a'q da qaltaq qami' ñiÿoma'ato, qom sootaigui ca l'onataxanaxac ñi ita'a da ilo'ogue 'enauacna.

So Jesús i'axata'a da nqolguetaxac so Pedro

³⁰ Qaq co'ollaq mashi ime da qai'on so n'onec, nachi qanqo'oneuga som saqaÿoqotchiguemec 'alhua mayi nanqa' ana olivos.

³¹ Nachi so Jesús 'enapeco': –'Enauac da qoñiita aÿim qaualachiÿa'a't na pe. Cha'ayi nachi 'enapec naua ñiyigui'shi l'aqtaqa ñi Dios, mayi 'eeta': “Salauat qome ñim ilotague' ana qagueta, nachi ana qaguetapi qome nlagaxattac.”

³² Qalaxayi qom mashi qaltaq yica'aleec, nachi aÿim sa'auta'ague qome da Galilea.

³³ Nachi so Pedro 'enapeco': –Nai'ctaxa da 'enauac 'am qaÿalata'a't, qalaxayi aÿim sa ishit da 'am salat.

³⁴ Nachi so Jesús 'enapeco': –Aÿim ÿataqta 'eesa de'eda 'am sa'axatem, da nachina ne'ena pe da qom yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega aÿim sa 'auauatton.

³⁵ Nachi so Pedro 'enapeco': –Nai'ctaxa da 'am seleutañi', qalaxayi sa ishit qome da ñoqolguettac. Nachi 'enauac so laÿipi qai'enaxatchigui da l'aqtac somayi.

So Jesús nqouagaxaueetac, hueta'a yi Getsemaní

³⁶ Nachi so Jesús qataq soua lapaxaguenataqa ivitra so 'alhua l'enaxat Getsemaní. Nachi 'enapegalo soomayi, 'eeta': –Qanso'oñiiñi qome, qoviita'a ne'ena; aÿim, qalaq saicda'atai' da ñoqouagaxauen.

³⁷ Nachi ÿauec so Pedro qataq soua dos llalqa so Zebedeo. Huaña, nachi somayi ÿataqta daquicota, qataq huo'o da nqui'ic.

³⁸ Nachi 'enapegalo' soomayi, 'eeta': –Añi iquiyaqte ÿataqta daquico. Huotaique da yalauat da ÿaquicoxo. Qaq qoviita'a qome ne'ena, qataq sa ishit qome da qau'ochii.

³⁹ Nachi so Jesús taÿa ca qaÿata'a, nachi ÿataqta nqapaxanguet na 'alhua. Nachi nqouagaxaunot ñi Dios, 'eeta': –'Am ita'a, da 'aushit, qaq no'on da sa ishit qome da aÿim 'aupagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot cam maichi shiitapeguec, chaqcato' ca maichi qonetapeguec.

⁴⁰ Ime, nachi qaltaq nqo'onalo soua lapaxaguenataqa, nachi ilalguete soomayi da do'ochite'. Nachi 'enapega so Pedro, 'eeta': –¿Sa ishito' peta'a qami' da cada'ac da qanloitauec da qoñiita'am aÿim?

⁴¹ Qami' qanloitauec qome, qataq qanqouagaxauñiitac, yaqto' sa ishit da qami' inoxonoiguilo ca qauem qadhuennataqai. Cha'ayi ca shiÿaxaua ÿataqta nasapatta da lquiyaqteÿaxac, qalaxayi da l'oquiaxac mayi qaica ca lasapachaxa.

⁴² Nachi qaltaq ÿi'iguelaxalec da nqouagaxauen, 'eeta': –'Am ita'a, qom huo'otaq ishit da sepaca'aguet da ñique'etaxangui de'eda ñi'iguenataguec, qalaxayi no'on qome da 'au'ot ca maichi qonetapeguec.

⁴³ Ime, nachi ÿi'iguelaxai', nachi qaltaq ilalguete soua lapaxaguenataqa da do'ochite', cha'ayi naua l'ai'te ÿataqta sa ishit da nlotraue'c, souaxat na l'ochaqa'.

⁴⁴ Nachi ca'aisalo soomayi, nachi qaltaq ñi'iguelaxai' da nqouagaxauen, qataq i'enaxatchigui so hua'auchiguiñi nqouagaxaunaxac.

⁴⁵ Nachi qaltaq nqo'onalo soua lapaxaguenataqa, nachi 'enapegalo, 'eeta': –Hua', nagui mayi qau'ochii, qataq qanmachiiuec. Mashi ivita yi laloqo' da na shiÿaxaua llalec qoÿaneu'a na shiÿaxauapi 'itaxaloxoicpi.

⁴⁶ Qoñiishiguem qome, qolaq, mashi nvi' nam aÿim ÿaneuo.

So Jesús qaÿaconeu'a da qaicoñi'

⁴⁷ Qaq so Jesús ña detaqtac co'ollaq mashi nvi' so Judas, som 'oonolec soua doce lapaxaguenataqa. Qaq somayi ÿataqta qalota so nnaictague' shiÿaxauapi, nachitac na lainecpi qataq na nponpi. Somayipi nachi lamaxashicpi som lataxala' na ntaxaÿaxanaxanecpi da qaitaxaÿapegue' ñi Dios, qataq nam lquedoxonecpi na judiopi.

⁴⁸ Qaq so Judas mayi demenaxan, somayi ÿauo'o co'ollaxa da l'anec, 'eeta': –Ca ñapigoqot qome, qaq nachica qaucoñiyi.

⁴⁹ Nachi somayi nqo'oneu'a so Jesús, nachi iquin, 'eeta': –¡La', 'am ÿataxala'! Nachi napigoqot.

⁵⁰ Nachi so Jesús 'enapego': –'Am iÿa, ¿négue't ca 'alotaique? Nachi somayipi nqochineu'a so Jesús, nachi ÿaconeu'a da icoñi'.

⁵¹ Huaña, nachi so 'oonolec soua lÿa't so Jesús, somayi nqatshiguem so lainec. Nachi iquesoxouec ana ltela lÿa so lamaxashic so lataxala' na ntaxaÿaxanaxanecpi.

⁵² Nachi so Jesús 'enapega somayi, 'eeta': –'Ai'oxot qome na 'ainec. Cha'ayi 'enauac qome nam huota'a na lainec da deloqui, nachi namayipi qaÿauota'a ÿiilonec da qaÿalauat.

⁵³ ¿Sa qauaÿajñiÿo' da aÿim ishit da seÿaxanot ñi ita'a, nachi ñimayi ishit da aÿim namaxa nagui ca napacalec ca doce mil lamaxashic piguem l'ecpi?

⁵⁴ Qalaxayi da nachi 'eetec de'eda, qaq ¿huá'ago' da ishit da ipacchigui cam 'enapec naua ñiyigui'shi l'aqtaqa ñi Dios, mayi i'axa't co'ollaxa da nachi qoÿiitec de'eda?

⁵⁵ Nachi so Jesús 'enapego' so shiÿaxauapi, 'eeta': –¿Tá'ainco' qami' yi qauauoita'alo naua qainaqalli' qataq naua qanpo'ñilli', da aÿim qañi'iguiñiÿauga, 'eeta'amo' da aÿim cachaxaic? Qamaq 'enauaque naua na'axa'te ñiso'ootanguilo qami', sapaxaguenataxaatac da sootaigui añi n'onaxanaxaqui late'edai, qalaq ¿tá'ainco' yi aÿim sa qauacoñiu'a da aÿim qaucoñiyi?

⁵⁶ Qalaxayi 'enauac de'eda qau'ochi damayi, yaqto' ipacchigui dam ÿiyiñi co'ollaxa da l'aqtaxanaxanecpi ñi Dios. Nachi soua lapaxaguenataqa n'onaxatchiguilo somayi. Nachi datadeec.

So Jesús qaÿataxanoigui so nta'alpi mayi i'ot na lataxacpi

⁵⁷ Nachi som icoñi' so Jesús, somayipi i'auaxaachiguiñi da ÿauegueu'a so Caifás mayi nachiso so lta'a na lataxala'pi na ntaxaÿaxanaxanecpi da qaitaxaÿapegue' ñi Dios, cha'ayi nachi laponqa' so lma' somayi nam dapaxaguenataxaatapeguec na nqataxacpi qataq nam lquedoxonecpi na judiopi.

⁵⁸ Qalaxayi so Pedro ca'attaueegue somayipi, qalaxayi qaÿoqteguet, chochi ivittau'a ca nqasoxoc ca lma' som lta'a na lataxala'pi na ntaxaÿaxanaxanecpi. Huaña, nachi pa'auo, nachi nso'ootañi, netangui so huataxanaqpi, cha'ayi ÿauotaique da ÿauaachigui ca loga't 'enauac de'eda.

⁵⁹ Nachi nam lataxala'pi na ntaxaÿaxanaxanecpi qataq so nquedoxonecpi qataq 'enauac nam nta'alpi mayi loicnatac na lataxacpi, namayipi nmittaique ca lataxac da huo'o ca chochi qaÿasaxalec lasouaxashit qanqoÿin so Jesús, nai'ctaxa da saq 'en, da yaqto' qaÿalauat.

⁶⁰ Qalaxayi sa ishit da huo'o ca qaÿanata, nai'ctaxa da qalota so shiÿaxauapi nachaateuo da i'ot na chochi latenataxanaxacpi da ÿasaxalec somayi. Qalaxayi co'ollaq mashi pa'ateec, nachi nachaatreuo soua dos ashipegaxanaxanqa.

⁶¹ Nachi 'ena'po': –De'eda shiÿaxaua huo'o so na'a'q nachi 'eeta': “Aÿim seshit da ñilaxajñi ñi'iñi lauo' ñi Dios, qataq ishit da ñi'oxooshiguem tres na'axa'te, nachi ime ñaq'en.”

⁶² Nachi nachajñi so lta'a na lataxala'pi na ntaxaÿaxanaxanecpi, nachi 'enapega so Jesús, 'eeta': –¿Tá'ainco' yi sa 'auasat? ¿Huá'ague ca 'eetec da n'aqtac mayi 'am qaÿasaxalec?

⁶³ Qalaxayi so Jesús sa ishit da ÿasat. Nachi so lta'a na lataxala'pi na ntaxaÿaxanaxanecpi 'enapega somayi, 'eeta': –Seÿaxanot nagui ñi Dios mayi nca'altauec da ÿauo'o qome ca 'anhuaxanaguec qom sa ishit da 'en ca 'ad'aqtac. Ñaq qomi' 'au'aqtaxanema nagui qom 'eesa da nachi'am nta'a nca'alaxaqui mayi 'am llalec ñi Dios.

⁶⁴ Nachi so Jesús 'enapeco': –Aja', nachaÿim, nachida dam qonapec. Nataq'en qami' shinapegalo da qami' qauloÿa'a qome na shiÿaxaua llalec da nso'oota'ague na aloic ñim Dios mayi qaica ca ÿaqalanapec, qataq qom anactaigui ca l'oc da ñi'iguelaq.

⁶⁵ Nachi som lta'a na lataxala'pi na ntaxaÿaxanaxanecpi, somayi icolaxata'aguelo naua alogo. Damayi naigui dam 'eeta lta'adaic. Nachi 'enapeco': –De'eda shiÿaxaua, damayi naua l'aqtaqa ÿataqta npa'agueneto ñi Dios. ¿Negue'tom ca lÿa shiÿaxaua seuenaq da da'aqtaxan? Cha'ayi qami' qau'aqaichigui da l'aqtac da ÿataqta npa'aguene' ñi Dios.

⁶⁶ Qaq ¿chaq 'éetec cam qad'aqtaqui? Nachi somayipi 'enapeco': –Qomyi damayi huo'o da ÿasouaxat, qaÿalauat qome.

⁶⁷ Nachi qanqaigoxoigui na lashic somayi, qataq qaiuaxaatac. Qataq huo'o na iuaxanoigui na lashic.

⁶⁸ Nachi qoÿiitega, qoÿiita': –'Am mayi 'am nta'a nca'alaxaqui, ¡ña 'au'axat négue't na 'am iuaxaatac!

So Pedro 'eetega da sa ÿauatton so Jesús

⁶⁹ Qaq so Pedro ña nso'ootañi, netauga so qasoxoc, nachi anac aso namaxashi. Nachi 'enapega somayi, 'eeta': –'Am nataq'en 'annaictague' da Jesús mayi l'ec yi Galilea.

⁷⁰ Qalaxayi so Pedro hua'aqchigui naq'en 'enauac so shiÿaxauapi co'ollaq nqolguet, 'eeta' –Aque', sa saÿaten dam 'au'axattac.

⁷¹ Qaq so Pedro mashi taÿa'a so lasom co'ollaq anac aso lÿa namaxashi. Nachi co'ollaq ila'a somayi, nachi asomayi 'enapego' som hueta'a so qasoxoc, 'eeta': –De'eda shiÿaxaua, damayi nataq'en nnaictague' da Jesús mayi Nazaret l'ec.

⁷² Nachi so Pedro qaltaq ÿi'iguelaxalec da ÿoqta 'en naq'en da l'aqtac da nqolguet, 'eeta': –Aÿim sa ishit da sauatton de'eda shiÿaxaua.

⁷³ Qaq co'ollaq qaÿata'ague de'eda, nachi nam hueta'a se'eso qasoxoc, namayipi nqochineu'a so Pedro, nachi qoÿiitega, qoÿiita': –Ÿoqta 'eesa peta'a da 'am nataq'en 'adaÿipi namayipi, cha'ayi 'am ivida'alo naua 'ad'aqtaqa 'eeta'ama namayipi.

⁷⁴ Nachi somayi ÿataqta n'axannec da nqolguet, qataq iÿaxaatega da qaÿalauat da huo'otaq ÿauatton somayi, nachi 'enapeco': –Aque', aÿim sa sauatton de'eda shiÿaxaua. Huaña, nachi noÿin so 'olgaxa.

⁷⁵ Nachi so Pedro tachigui yi lauel da l'aqtac so Jesús co'ollaq 'eeta': “Qom yaqta'a da noÿin ca 'olgaxa, qaq 'am mashi sogote qome da tres 'avi'iguelaxalec da qonetega da aÿim sa 'auauatton.” Nachi so Pedro pa'auec, nachi ÿataqta noÿiitac.