Mateo 25 - Nuevo Testamento Toba Sur

Qaÿaloqnaxanalo soua diez qa'añole

¹ Nachi de'eda l'onataxanaxac ñi Dios mayi neta'ague da piguem, damayi 'eeta'am qome caua diez qa'añole mayi ÿaconalo soua lcoÿadaxanaxaqui' mayi lca'atoxo't na aceite. Nachi nqo'ooda so nadonaxac, da yaqto' huaqatra'aguet ca adonaq.

² Qaq cinco soomayi soua qaica ca ÿaÿajna'alo, qataq cinco soua ÿajnaxanaqchaqai.

³ Qaq se'esoua qaica ca ÿaÿajna'pe co'ollaq je'c nachi ÿachi' soua lcoÿadaxanaxaqui', qalaq sa ishit da ÿachi' ca lcoÿadaxanaxa't da ivita da imedeuo soua lcoÿadaxanaxaqui'.

⁴ Qalaxayi soua ÿajnaxanaqchaqai, soomayi ÿachita'pe soua lcoÿadaxanaxaqui', nataq'en soua laÿi' so lqataxanata'c lcoÿadaxanaxa't.

⁵ Qaq cha'ayi ÿataqta qaÿaloqteguet se'eso adonaq, nachi 'enauaque soomayi huo'o na l'ochaqa', nachi do'ochi'.

⁶ Qaq co'ollaq mashi laiñi na pe, nachi qai'axaÿa so nÿaxanaxac, 'eeta': “¡Mashi nvi' na adonaq, ña qanpa'aiuec, qauqachiÿa'aguet!”

⁷ Nachi 'enauaque se'esoua qa'añi ñiyishigue'm, nachi ÿaÿamaxajyiñi soua lcoÿadaxanaxaqui'.

⁸ Nachi soua cinco mayi qaica ca ÿaÿajna'alo, soomayi iÿaxaatracot soua lÿa't cinco mayi huo'o na ÿaÿajna'alo, 'eeta': “Ña qomi' qai'añiima ca laÿi na qadcoÿadaxanaxachi. Ten, mashi huotaique da 'o'm naua qadcoÿadaxanaxaqui'.”

⁹ Qalaxayi soua qa'añole mayi ÿajnaxanaqchaqai 'ena'po': “'A'i, sa ishit. Ten, qom qomi' ichiÿaugalo, nataq'en da qoñiita. No'on da qanqo'oñiÿa cam imeetac, nachi qaushijnaxañiÿa cam qadcoÿadaxanaxachi.”

¹⁰ Qalaxayi se'esoua cinco qa'añole mayi qaica ca ÿaÿajna'pe, co'ollaq je'c da deshijnaxaadaique ca lcoÿadaxanaxa't, nachi mashi nvideuo so adonaq. Nachi som qa'añi mayi lhuotte', nachi lÿatreuo somayi da pa'adeu'a ca nadonaxac. Ime, nachi qaÿapogui so lasom.

¹¹ Qaq co'ollaq qaÿata'ague, nachi nvildeuo soua lÿa't qa'añole. Nachi deÿaxaata'pe, 'eeta': “¡'Am qadataxala'! ¡Ña qomi' 'auauategueta!”

¹² Qalaxayi somayi 'enapeco': “Aque', qami' sa sauatto'n.”

¹³ Nachi so Jesús 'enapeco': –Qami' ÿataqta qanloiteec qome, cha'ayi sa ishit da qauaÿajñi ca na'a'q qataq ca laloqo' da ñi'iguelaq na shiÿaxaua llalec.

Qaÿaloqnaxana aso anom mayi huo'oi so qaipataxagueta

¹⁴ De'eda l'onataxanaxac ñi Dios mayi neta'ague da piguem, damayi 'eeta'am ca shiÿaxaua da huotaique da taÿa ca lÿa 'alhua. Nachi camayi iÿaxanalo soua l-lataqa, nachi ipataxalguete aso alom.

¹⁵ Nachi so 'oonolec soomayi ÿanem aso ivi' cinco mil, qaq so lÿa qalaq ÿanem aso ivi' dos mil, qataq so lÿa ÿanem aso ivi' mil. Qaq ÿanema soomayi añim nalota'ai'. Ime, nachi jec.

¹⁶ Nachi so l-latac mayi ÿaconguet aso cinco mil, somayi do'onataxangui asa'aso anom da nmen. Nachi ivi' cinco mil aso laÿi laueque.

¹⁷ Qaq nachi 'eetec nataq'en som ÿaconguet asom dos mil, somayi ivi' dos mil aso laÿi laueque.

¹⁸ Qalaxayi som ÿaconguet aso mil, somayi jec da ÿoxojñi aso alom so n'aco', ÿachangui aso lshide na 'alhua.

¹⁹ Qaq co'ollaq mashi qaÿoqteguelo naua vi'iyi, nachi ñi'iguelaq se'eso n'aco' se'eso nlatacpi. Nachi somayi naloqna't da l'onataxanaxac somayipi.

²⁰ Nachi l'auaxanec da anac som ÿaconguet co'ollaxa aso cinco mil, nachi ÿanot so n'aco' aso laÿi cinco mil. Nachi 'enapega, 'eeta': “'Am ñi'aco', aÿim co'ollaxa aÿim 'ai'anem aso cinco mil. Qaq nagui 'ana ana laÿi cinco mil mayi ÿaueque.”

²¹ Nachi so n'aco' 'enapeco': “Ÿataqta ÿaÿamaqchiguiñi, 'am no'on nlatac, qataq 'aupactelec ca 'au'ot. Qaq cha'ayi 'am ÿataqta 'aupactelec da 'au'ot cam saq 'amaqtaq, qaq nagui ÿataqta lta'adaic qome ca 'am sepataxalec da 'aulo'ogue. Qaq nagui 'aupa'auo qome da aÿim 'antonaxaua.”

²² Ime, qataq anac so lÿa nlatac mayi ÿaconguet co'ollaxa aso dos mil. Nachi 'enapeco': “'Am ñi'aco', aÿim 'ai'anem co'ollaxa aso dos mil. Qaq nagui 'ana ana lÿa dos mil mayi ÿaueque.”

²³ Nachi so n'aco' 'enapeco': “Aja', ÿaÿamaqchiguiñi, ÿataqta 'am no'on nlatac, qataq ÿataqta 'aupactelec cam 'au'ot. Qaq cha'ayi 'aupactelec da 'au'ot cam saq 'amaqtaq, qaq nagui lta'adaic qome ca 'am sepataxalec da 'aulo'ogue. Nataq'en 'am nagui 'aupa'auo qome da aÿim 'antonaxaua.”

²⁴ Qalaxayi co'ollaq nvideuo so nlatac mayi ÿaconguet co'ollaxa aso mil, nachi somayi 'enapega so n'aco', 'eeta': “'Am ñi'aco', aÿim saÿaten da ÿataqta 'am saq llivigui yi 'adhuel da 'anqat na ala ca saq 'anguishic, qataq da 'alapon cam saq 'adchigoxoshic.

²⁵ Qaq ÿoqo'oyi aÿim huo'o da icolanaxa. Nachi aÿim soxojñi aso 'om, soxotoigui na 'alhua. Qalaxayi 'ana anamayi, cha'ayi 'adalamaqte.”

²⁶ Nachi se'eso 'aco' 'enapeco': “'Am nlatac qauemaic qataq hualaic. ¡'Am 'auaÿateetac mque' co'ollaxa da aÿim ishit da ñaqat na ala ca saq ÿanguishic, qataq da llapon cam sa ishit da ichigoxoshic!

²⁷ Qalaq ¿tá'ainco' co'ollaxa da saq 'ai'anoigui añi laÿi' ana plata ana aÿom, da yaqto' ñovi', nachi ishíttaxa da saconguet acam laueque anamayi?”

²⁸ Nachi 'enapega som hueta'aguetpi, 'eeta': “Ña qauacoñiÿa qome adam mil mayi hueto'ot damayi. Ime, qaq qai'añiim dam hueto'ot adam diez mil.

²⁹ Cha'ayi cam huo'o ca hueto'ot, qalaq camayi ÿacteec ca qoÿanem, nachi ÿataqta qaica ca iueetac. Qaq cam qaica ca hueto'ot, qalaq camayi ivida'a cam saq 'amaqtoqolec mayi hueto'ot qaÿacona.

³⁰ Qaq dam da' nlatac mayi qaica ca taiguet, damayi qauasaqaiuga na napalaxa da pa'auec. Huaña qome, nachi noÿiitac, qataq ÿataqta inaga't naua lhue da nqui'ic.”

Qom qanmit na ÿotta'a't shiÿaxauapi

³¹ Qaq qom ivita da ñi'iguelaq na shiÿaxaua llalec da nta'a, nactaigui 'enauac na lamaxashic piguem l'ecpi, nachi nso'oongui aca nso'onaxaqui mayi ÿi'oxodaq da nta'a.

³² Nachi 'enauac nam ÿotta'a't shiÿaxauapi qalaponeu'a namayi, nachi namayi iÿodacachi qome na shiÿaxauapi da 'eeta'am ca ilotague' ana qagueta da iÿotauga ana qagueta qataq ana quetaqpi.

³³ Nachi ipa'axangue da aloic ana qaguetapi, qaq ana quetaqpi ipa'axangue da n'emaq.

³⁴ Nachi ne'ena nta'a 'enapega qome nam hueta'ague na aloic, 'eeta': “Qauanaqui qome, qami' mayi qami' nqouagueque ñi ita'a. Qaunoxoñiu'a qome da n'onataxanaxac mayi ÿaqataxaatapigui' da qami' ÿanema ñi Dios co'ollaq chita'ague i'ot ana 'alhua.

³⁵ Cha'ayi aÿim huo'o co'ollaxa na ÿoqouaxa, qalaq qami' aÿim qauqui'axañi; qataq huo'o na ÿaquip, qalaq aÿim qanÿomaxañi; qataq shiita'am ca ÿaqa'a ca chigaqa'ague, qalaq qauauo'oi ca i'ochaqa'.

³⁶ Qataq qaica ca ñapogoña, qalaq aÿim qauauo'oi ca ÿogoxot; qataq aÿim sa no'on, qalaq aÿim qanamaqaitega; qataq aÿim qaicoñittai', qalaq aÿim qanqo'oñiu'a.”

³⁷ Nachi nam no'on da lataxac 'enapec qome: “'Am qadataxala', ¿chi láguio' co'ollaxa da 'am seloqta'a da 'auqouat, nachi 'am sequi'axanaq? qataq ¿láguio' co'ollaxa da 'am ñiÿomaxanaqtac?

³⁸ Qataq ¿chi láguio' co'ollaxa da 'am seloqta'a da qoneta'am cam ÿaqa'a ca chigaqa'ague, nachi sauoqo'o ca 'ad'ochaqa', huo'otaq da qaica ca 'anapogoña, qalaq 'am sanaxam ca 'ogoxot?

³⁹ ¿Huo'otaq da 'am seloqta'a da 'am sa no'on, huo'otaq da 'am qaicoñittai', nachi 'am ñoqo'onaxau'a?”

⁴⁰ Nachi ne'ena nta'a 'enapec qome: “Ÿataqta 'eesa de'eda qami' sa'axatema da 'enauac ne'ena qau'ochiic ca 'oonolec ne'ena ÿaqaÿañicpi, da nai'ctaxa da qaica ca l'amaqchic, qaq nachaÿim mayi aÿim qau'ochiic de'eda.”

⁴¹ Nachi ne'ena nta'a 'enapega qome nam hueta'ague na n'emaq, 'eeta': “Aÿim qoquiÿa'ai qome, qami' mayi qaÿauo'o da qanhuaxanaguiiqui. Qaÿingui yim chochaq tateec nodec mayi qaÿaqataxaatai' da yaqto' qaÿasaxangui so shiÿaxaua lma'na qataq nam lamaxashicpi.

⁴² Cha'ayi aÿim co'ollaxa huo'o na ÿoqouaxa, qalaq qami' sa ishit da aÿim qauqui'axañi; qataq huo'o na ÿaquip, qalaq qami' sa ishit da aÿim qanÿomaxañi;

⁴³ qataq 'eeta'am da ÿaqa'a ca sachigaqa'ague, qalaq sa qauauo'oi ca i'ochaqa'. Qataq qaica ca ÿogoxot, qalaq sa qauauo'oi ca ÿogoxot; qataq aÿim sa no'on qataq sootaigui aca ncoñitaxanaxaqui, qalaq sa ishit da aÿim qanamaqaitapegueu'a.”

⁴⁴ Nachi namayipi 'enapec qome: “'Am qadataxala', ¿chi láguio' co'ollaxa qaq 'am seloqta'a da 'auqouat, huo'otaq da 'aulem na 'adaquip, huo'otaq da 'eeta'am da ÿaqa'a ca 'auachigaqa'ague, huo'otaq da qaica ca 'ogoxot, huo'otaq da 'am sa no'on, huo'otaq da 'am qaicoñittai', nachi sa ishit da 'am setauanaq?”

⁴⁵ Nachi ne'ena nta'a 'enapec qome: “Ÿataqta 'eesa de'eda qami' sa'axatema, da 'enauac nam sa ishit co'ollaxa da qau'ochiic ca 'oonolec ne'ena saq 'amaqtaqpi, qaq nataq'en aÿim sa ishit da huo'o ca aÿim qau'ochiic.”

⁴⁶ Qaq qom ime, nachi ne'enapi taigui qome cam chochi tateec nhuaxanaguec, qaq nam no'on da lataxac, qalaq taigui cam chochaq tateec achaalataxac.