Mateo 22 - Nuevo Testamento Toba Sur

Qaÿaloqnaxana so nadonaxac mayi qaique'elec

¹ Nachi so Jesús qaltaq ÿi'iguelaxalec da da'aqtaxan, ÿauota'a na laloqnaxanaxatpi, 'eeta':

² –Da l'onataxanaxac ñi Dios mayi neta'ague da piguem, damayi 'eeta'am ca nta'a mayi i'ot ca lqui'axac da deque'elec ca ladonaxac ca llalec.

³ Nachi ÿamaq so lamaxashicpi da icoyiguen 'enauac so lqui'axauapi. Qalaxayi somayipi sa ishit da huo'o ca anac.

⁴ Nachi qaltaq ÿamaq so laÿipi lamaxashicpi. Qaq 'enapega, 'eeta': “Qoñiÿapega qome cam ñiuanaxauapi da mashi sogote da saqataxaatai' da nqui'axac. Mashi samaxasoxoolec da qaÿalauat som ilo huaca qataq nam chaxadaic ilopi. Qaq mashi sogote da imetai' da nqui'axac. Qauanaiua'a qome ca nadonaxac.”

⁵ Qalaxayi som qaÿauotaique nqui'axauapi sa ishit da ÿalaq. Chaqdata da huo'o so nqo'oneuga ca n'alhua, qataq huo'o so nqo'ona ca nmenqa',

⁶ qataq so laÿipi ÿaconeu'a so lamaxashicpi so nta'a, nachi iuaxaatac, chochi ivitta'a da ÿalauat.

⁷ Nachi se'eso nta'a ÿataqta qalota da lalemataic. Nachi ÿamaq so nallippi, da yaqto' ÿalauat 'enauac se'eso laataxanaxaicpi qataq da ÿavigaxat 'enauac na lma'pi.

⁸ Ime, nachi somayi 'enapega so lamaxashicpi, 'eeta': “Da nadonaxac mashi sogote da 'enauac imetai', qalaxayi nam temaq huanaxauapi saq taiguet da ÿalectauo.

⁹ Qaq qoquii qome, qoquiiguelo naua pooco nqa'aico. Nachi qaucoyiguiñi 'enauac nam qauloÿalec, da yaqto' nau'a dam nadonaxac.”

¹⁰ Nachi som namaxashicpi jec da queguelo naua nqa'aico. Nachi lapona't 'enauac nam ilalec. Huo'o na qauem da lataxac qataq na no'on da lataxac. Nachi ÿataqta nlaqchigui so nqui'aqa' na shiÿaxauapi.

¹¹ Nachi so nta'a pa'auo da demejnaxaneu'a som ncoyiguinguishicpi. Nachi ilalec so shiÿaxaua mayi ÿalectauo da sa ishit da ÿaatrañi caua anogo mayi lataxa'u da qaÿalectau'a ca nadonaxac.

¹² Nachi 'enapega somayi, 'eeta': “'Am iÿa, ¿tá'ainco' yi 'anpa'auo co'ollaxa yi sa ishit da 'ai'aatrañi caua anogo mayi lataxa'u da qaÿalectau'a ca nadonaxac?” Qalaxayi somayi sa ishit da ÿasat.

¹³ Nachi so nta'a 'enapega nam ilotague'pi so nqui'axala', 'eeta': “Ñi'iñi shiÿaxaua qaucoñiyiÿa't qome naua lchil qataq naua lhua'q. Ime, nachi qauasaqaiuga na napalaxa da pa'auec, yim huaña qome da noÿiitac qataq ÿataqta inaga't naua lhue da nqui'ic.”

¹⁴ Qaq cha'ayi nagui ÿataqta qalota nam qaiÿaxaneugapi, qalaxayi saq 'amaqtaq qome nam ÿoqta nca'aguishicpi.

Qainataxaatapeguec da nshiitenaguec so nta'a

¹⁵ Nachi nam ÿalectaigui na fariseopi jec da detaxaÿapigui ca lataxac da ÿauotaique ÿauo'o ca ÿachigoxotchigui lasouaxashit so Jesús da inat.

¹⁶ Huaña, nachi huo'o na qanamaq nam lapaxaguenatacpi namayipi qataq nam ÿalectaigui na quetague' so nta'a Herodes, da yaqto' 'enapega so Jesús, 'eeta': –'Am mayi 'auapaxaguenataxaatac, qomi' saÿajnaq da 'am ÿataqta 'eesoda naua 'ad'aqtaqa, qataq 'auapaxaguenataxaatapeguec da llic da no'on nataxac mayi ÿaÿamaxadeeta ñi Dios, qataq sa ishit da 'auqochitega cam 'enapec na shiÿaxauapi, cha'ayi 'am sa ishit da 'aulotapigui da yi'oqchigui lataxac na shiÿaxauapi.

¹⁷ Ña qomi' 'au'axatema ca 'adhuennataxac dam senataxanaqtapeguec, mayi 'eeta': ¿Peta'a ÿaÿamaqchiguiñi da qaishiiten ñim lta'a na nta'alpi, loqo' chaq sa ishit?

¹⁸ Qalaxayi so Jesús ÿataqta ÿauattooteguet dam qauem lhuennataxac somayipi. Nachi 'enapega, 'eeta': –Qami' mayi qoñiitega da qami' 'eesoda, ¿tá'ainco' yi aÿim qavi'iguiñiitac?

¹⁹ Ñaq aÿim qauachaxañiÿa qome acam lcatole mayi lashiue da qaishiiten ca nta'a. Nachi qandou'a aso 'oonole denario.

²⁰ Qaq co'ollaq mashi imeten, nachi so Jesús inat somayipi, 'eeta': –¿Négue't lashic ñim huetalec ana'ana? qataq ¿négue't l'enaxat yim nanettañi?

²¹ Nachi somayipi 'eeta': –Qomyi nachiñi ñi lta'a na nta'alpi. Nachi so Jesús 'enapeco': –Qai'añiim qome ñim lta'a na nta'alpi cam lalamaxat, qataq ñim Dios qai'añiim qome cam lalamaxat.

²² Qaq co'ollaq qai'aqchigui de'eda, nachi somayipi ÿataqta huo'o da l'aalaxa. Nachi qoÿaxaañi somayi, nachi somayipi jec.

Qainataxaatapeguec ca lataxac da qaltaq nca'aleec ca shiÿaxaua

²³ Qaq nachiso se'eso na'a'q da huo'o na ÿalectaigui na saduceopi na nqo'oneu'a so Jesús. Cha'ayi namayipi sa i'amaqten da qaltaq qanca'alaxateec na leuaxaicpi. Nachi namayipi inattac so Jesús, 'eeta':

²⁴ –'Am mayi 'auapaxaguenataxaatac, so Moisés co'ollaxa 'enapec da huo'otaq huo'o ca shiÿaxaua da huadon, qaq da ivita da ileu da huo'otaq qaica ca llalec, nachi ca lqaÿa ishit da qaltaq huadonguet aca lli'oxoua, da yaqto' huo'o naq'en ca llalec som lqaÿa mayi saqca.

²⁵ Qaq da shinaqta huo'oi co'ollaxa soua siete nqaÿa't. Qaq so ÿi l'auaxanec da huadon, qalaxayi ileu. Qaq cha'ayi somayi qaica ca llalec, nachi aso lhua n'ona'aguet so lqaÿa.

²⁶ Qalaxayi nachi 'en'am se'eso lqaÿa, somayi ileu. Qataq jec so lÿa lqaÿa. Nachi quetot de'eda, chochi ivitta'a som pa'ateec se'esoua siete nqaÿa't.

²⁷ Qaq co'ollaq mashi nmiguiñi 'enauac somayipi, nachi pa'ateec da ileu asa'aso 'alo.

²⁸ Qaq da ivita da qaltaq qanca'alaxateec na leuaxaicpi, nachi ¿chaq négue't ca ÿoqta lhua asa'aso 'alo, yi 'enauac somayipi da huadonguet asomayi?

²⁹ Nachi so Jesús 'enapeco': –Qami' qauesomiÿapec, cha'ayi sa ishit da qauaÿajñi' naua ñiyigui'shi l'aqtaqa ñi Dios qataq da l'añaxac ñimayi.

³⁰ Cha'ayi qom ivita da qaltaq qanca'alaxateec na leuaxaicpi, nachi sa ishit da huo'o ca huadon, qataq qaica ca ÿadonaxanaxan aca llale, cha'ayi namayipi 'eeta'am na lamaxashicpi ñi Dios mayi neta'ague da piguem.

³¹ Qaq de'eda lataxac qom qaltaq nca'aleec na leuaxaicpi, qalaq ¿sa ishito' peta'a da qautaxaÿaxañiÿapec da maichi l'aqtac ñi Dios? Mayi 'eeta':

³² “Aÿim mayi nachaÿim nDios so Abraham, Isaac qataq so Jacob.” Qaq sa ishit da nDios ñimayi nam leuaxaicpi. Chaqnata nam nca'altaicpi.

³³ Qaq co'ollaq hua'aqchigui de'eda na shiÿaxauapi, nachi ÿataqta huo'o da l'aalaxa naua lapaxaguenataxanaxaco somayi.

Da namaxasoxonaxac mayi ÿacteec da qaÿalaxalec

³⁴ Qaq na fariseopi co'ollaq ÿaÿaten da so Jesús qaica ca llic naq'en na lnataxanaxacpi so saduceopi, nachi somayipi lapona't da detaxaÿapega't.

³⁵ Nachi huo'o so 'oonolec somayipi som dapaxaguenataxaatapeguec na nqataxacpi som ÿauotaique da ÿi'iguen so Jesús. Nachi inat, 'eeta':

³⁶ –'Am mayi 'auapaxaguenataxaatac, ¿chaq négue't ca ÿoqta ÿacteec da qaÿalaxalec nam nqataxacpi?

³⁷ Nachi so Jesús 'enapeco': –“Ÿataqta 'auauotec ñi 'adataxala' Dios, imauec 'anqa'en da 'adquiyaqteÿaxac, qataq da 'anachaalataxac, qataq da 'adhuennataxac.”

³⁸ Qaq 'eda dam l'auaxanec qataq ÿacteec da qaÿalaxalec 'enauac nam namaxasoxonaxacpi.

³⁹ Qaq da lÿa mayi nachi 'eeta'am damayi 'eeta': “'Auauotec ca 'adÿa, 'eeta'am 'anqa'en da maichi 'anauojla't.”

⁴⁰ Qaq ne'enaua dos namaxasoxonaxaco nachinaua naua n'attalguete 'enauac nam lqataxacpi so Moisés qataq nam lapaxaguenataxanaxacpi som l'aqtaxanaxanecpi ñi Dios.

¿Chaq négue't llalec cam nta'a mayi nca'alaxaqui?

⁴¹ Qaq co'ollaq ña lapoota'a't so fariseopi,

⁴² nachi so Jesús inat somayipi 'eeta': –Qami', ¿chaq 'éetac ca qadhuennataqai cam nta'a mayi nca'alaxaqui? ¿Chaq négue't llalec camaxa? Nachi somayipi 'enapeco': –Qomyi camayi llalec so nta'a David.

⁴³ Nachi so Jesús 'enapego' somayipi, 'eeta': –Qalaq ¿tá'ainco' qone' so David yi co'ollaq i'aqtaxanaxan so Espíritu Santo, nachi ÿamata'ac camayi da lataxala'? Cha'ayi so David 'enapeco':

⁴⁴ Ñi qadataxala' Dios 'enapega ñi ÿataxala', 'eeta': “'Anso'oota'ague qome da aÿoic, to' qom mashi ime da sacho'oto naua 'adapia'te na 'am ipa'agueetacpi.”

⁴⁵ Qaq ¿huá'ago' ca 'eetec da ca nta'a mayi nca'alaxaqui da llalec so David, yi somayi ÿamata'ac da lataxala'?

⁴⁶ Nachi sa ishit da huo'o ca chochi 'oonolec somayipi da ÿasat. Nachi chigoqchiguiña se'eso na'a'q da sa ishit da huo'o ca inattac somayi.