Mateo 21 - Nuevo Testamento Toba Sur

So Jesús inoxoneu'a yi Jerusalén

¹ Qaq co'ollaq mashi qanayiitau'a yi Jerusalén, nachi qaivita yi pueblo l'enaxat Betfagé mayi sa qaÿapeque yi saqaÿoqotchiguemec 'alhua mayi nanqa' ana olivos. Nachi so Jesús ÿama'q soua dos lapaxaguenataqa.

² Nachi 'enapegalo, 'eeta': –Qanqo'oñiÿa qome yim naña na saq 'amaqtaq shiÿaxauapi mayi ñaloqotta. Huaña qome yimayi, nachi qauloÿalec añi 'ashina qaicoñittai', huaqta'ai' ñi llalec. Nachi qausoiuec qome, nachi qanaviqui.

³ Qaq da huo'o ca qami' ina't, qalaq qoñiÿapega qome camayi, qoñiita': “Ñi qadataxala' iue'n naamayi, qalaxayi saqaÿaloq qome da ñi'iguelaxa't.”

⁴ Qaq de'eda 'eetec somayi, damayi ipacchigui da i'axat co'ollaxa so l'aqtaxanaxanec ñi Dios co'ollaq ÿiyiñi da 'eeta':

⁵ 'Au'aqtaxanem qome yi la ciudad l'enaxat Sión, qoneta': “Ña 'aulo'oguet na 'adta'a, namayi 'am naÿau'a, namayi ÿataqta qaica ca l'amaqchic, netalec ana 'ashina, qataq nam 'ashinolec mayi llalec ana 'ashina mayi nachoxonaxalate.”

⁶ Nachi soua lapaxaguenataqa je'c da i'o't dam damaxasoxoolec so Jesús.

⁷ Nachi qanavigui' aso 'ashina qataq so llalec, nachi qaÿachalguete soua alogo soomayi, nachi so Jesús huenotshiguem.

⁸ Nachi som shiÿaxauapi mayi ÿataqta qalota, somayipi ipiguiingui so nqa'aic na lapo'pi. Qataq huo'o na iquesoxouec ana laue ana chaic, nachi ÿachangui so nqa'aic.

⁹ Nachi nam shiÿaxauapi mayi hua'auta qataq nam nca'ataxaatauo nachi i'alaqtagui, 'eeta': –¡Huo'o da lli'oxoyic so llalec so qadta'a David! ¡Ÿataqta no'on da lliquiaxac som nactaigui da l'enaxat ñi qadataxala'! ¡Huo'o da lli'oxoyic ñi qadta'a Dios!

¹⁰ Nachi so Jesús co'ollaq mashi inoxoneu'a yi Jerusalén, nachi 'enauac nam netaigui yimayi ÿataqta huo'o da l'elaxa. Nachi qalota na denataxaatac, 'eeta': –¿Négue't som so'?

¹¹ Nachi som shiÿaxauapi 'eeta': –Qomyi nachiso so Jesús mayi l'aqtaxanaxanec ñi Dios, som chigaqa'ague da Nazaret mayi huaigui yi 'alhua Galilea.

So Jesús do'otaxaalec aso n'onaxanaxaqui late'edai

¹² Qaq co'ollaq ime, nachi so Jesús inoxoneu'a so lauo' ñi Dios. Nachi somayi i'odauec 'enauac nam nmenaxaicpi qataq nam deshijnaxaatega na nmenec. Qataq ÿamaxañi na nmenaxala'pi nam nmenaxanaxaatega't ana alom na shiÿaxauapi, qataq ana nso'onaxaquipi na imeetac na qoto'pi.

¹³ Nachi 'enapeco': –Naua ñiyigui'shi l'aqtaqa ñi Dios 'eeta': “Na ima', namayi qouagaxaunaqa'.” Qalaxayi qami' qau'ochiic namayi da nqañoxotaqa' na cachaxaicpi.

¹⁴ Qaq co'ollaq huaña asa'aso n'onaxanaxaqui, nachi huo'o na qanamaicpi na nau'a so Jesús qataq nam qaica ca lchi lÿa. Nachi somayi nataden 'enauac somayipi.

¹⁵ Qalaxayi nam lataxala'pi na ltaxaÿaxanaxanec na shiÿaxauapi da qaitaxaÿapegue' ñi Dios qataq nam dapaxaguenataxaatapeguec na nqataxacpi, namayipi co'ollaq ÿauaachigui nam qai'otpi mayi sa qaÿauanapega qataq hua'axaÿa da 'eetec so ñaqpiolec da i'alaqtagui co'ollaq huaigui aso n'onaxanaxaqui, 'eeta': “Ÿataqta huo'o da lli'oxoyic da llalec so qadta'a David,” nachi somayipi ÿataqta dalemata.

¹⁶ Nachi somayipi 'enapega so Jesús, 'eeta': –¿'Am peta'a 'au'aqtega da 'enapec ne'enapi? Nachi so Jesús 'enapeco': –Aja', sa'aqtega. Qalaxayi qami' ¿sa ishito' peta'a da qautaxaÿaxañi naxa da 'enapec naua ñiyigui'shi l'aqtaqa ñi Dios? Mayi 'eeta': 'Au'otec nam ñaqpiolec qataq nam ñaq lliptac da ÿataqta ÿaÿamaqchiguiñi da lli'oxonnataxanaxac.

¹⁷ Nachi ca'ai somayipi, qataq ca'ai yi la ciudad da taÿa yi Betania da l'ochaqa' se'eso pe.

So Jesús nlaxa aso higo mayi qaca aca ala

¹⁸ Qaq so nte'etom so lÿa na'a'q co'ollaq ÿi'iguelaxau'a yi la ciudad so Jesús, nachi huo'o na lqouaxa.

¹⁹ Nachi ila'a aso higo mayi neteu'a na laÿi so nqa'aic. Nachi nqo'oota asomayi, qalaxayi sa ishit da ÿanata aca ala, ndoteec ana laue. Nachi so Jesús 'enapega asa'aso higo, 'eeta': –¡Nagui nachi tachiguiña da sa ishit qome da huo'o ca alaÿaxac da qoneta! Huaña, nachi asa'aso higo daqaqa.

²⁰ Qaq co'ollaq ÿauaachigui de'eda soua lapaxaguenataqa, nachi ÿataqta huo'o da l'aalaqa'. Nachi qainattac so Jesús, qoÿiita': –¿Chaq huá'ague ca 'eetec ada higo yi saqaÿaloq da daqaqa?

²¹ Nachi so Jesús 'enapeco': –Ÿataqta 'eesa de'eda qami' sa'axatema, da ÿoqta 'eesa da huo'o ca qadpi'iÿaxaqui qataq sa ishit da qauqoleguetaxañi, qaq sa ishit da chaqdata de'eda so'otec ada higo da ishit da qau'ochi. Cha'ayi nataq'en ishit da qoñiÿapega aca qaÿoqotchiguemec 'alhua, qoñiita': “Qoca'ai ne'ena qonetaña, ime, qaq 'angui aso auaxai,” qaq de'eda qad'aqtaqui ÿataqta ipacchigui.

²² Qataq 'enauac nam qami' qauÿaxañiÿaique da qanqouagaxauñiitac, da ÿataqta qau'amaqchiñi, nachi ishit da qauacoñiiguet.

Da 'enec so Jesús

²³ Nachi so Jesús huenoxoneu'a aso n'onaxanaxaqui late'edai. Qaq co'ollaq ña dapaxaguenataxaatac, nachi nqo'oneu'a somayi nam lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios qataq nam lquedoxonecpi na judiopi. Nachi inattac somayi, 'eeta': –¿Huá'ague ca 'auachigoxota'ague ca 'an'aqtac da huo'o mshi 'au'ot de'eda? ¿Négue't ca 'am ÿanem de'eda 'adamaxasoxonaxac?

²⁴ Nachi so Jesús 'enapeco': –Aÿim nataq'en qami' sena't. Da aÿim qau'axachiim cam senataxanec, nachi nataq'en ishit da qami' sa'axatema ca sachigoxota'ague da shinec da so'ot de'eda.

²⁵ Da inataxanaxac 'eeta': ¿Chaq négue't ca ÿamaxalec so Juan da dachilaxanataxan? ¿Peta'a nachiñi ñi Dios, huo'otaq ca chochi shiÿaxaua? Nachi somayipi maichi nqalligottega't, 'eeta': –Da qomi' shinaqpec da nachiñi ñi Dios da ÿamaxalec somayi da dachilaxanataxan, qaq ÿoqta qome da 'eeta': “¿Tá'ainco' qone' yi sa qau'amaqchiñi?”

²⁶ Qaq da huo'otaq shinaqpec da chochi shiÿaxaua ca ÿamaxalec, qaq huo'o da qadcolanaxa na shiÿaxauapi. Cha'ayi 'enauac namayipi ÿataqta i'amaqten so Juan da l'aqtaxanaxanec ñi Dios.

²⁷ Nachi somayipi 'enapega so Jesús, 'eeta': –Aque', sa saÿatenaq. Nachi so Jesús 'enapeco': –Aÿim nataq'en sa ishit da qami' sa'aqtaxanema ca sachigoxota'ague de'eda shinec da so'ot de'eda.

Qaÿaloqnaxanalo soua dos ñalqa

²⁸ Nachi so Jesús 'enapeco': –¿Chaq 'eetec ca qadhuennataxaqui de'eda sa'axat? 'Eeta': Huo'o so shiÿaxaua dos soua llalqa. Nachi 'enapega so 'oonolec soomayi, 'eeta': “'Am ÿalec, qojec qome, 'au'onataxan, 'anqat ana ala ayi ÿanguishi uvas.”

²⁹ Nachi se'eso llalec 'enapeco': “¡Qai'tai', sa ñasapat!” Qalaxayi co'ollaq qaÿata'ague, nachi nadalaxat da lhuennataxa. Ime, nachi jec da do'onataxan.

³⁰ Ime, nachi se'eso lta'a qaltaq nqo'ona so lÿa llalec da nataq'en 'enapega. Nachi se'eso llalec 'enapeco': “Aja', taxade, ashico'.” Qalaxayi somayi sa ishit da jec.

³¹ Qaq ¿chaq négue't se'esoua dos ñalqa cam i'ot da 'eetapeguec so lta'a? Nachi somayipi 'enapeco': –Qomyi som hua'auchiguiñi. Nachi so Jesús 'enapeco': –Ÿoqta 'eesa de'eda qami' sa'axatema da nam ÿacootapeeguet ana nshiitenaqte ca nta'a qataq anam quishiguetaxaipi, namayipi l'auaxanec da inoxoneu'a da l'onataxanaxac ñi Dios da ilo'ogue 'enauacna.

³² Cha'ayi anac so Juan mayi nachilaxanataxanaq, da yaqto' qami' ÿapaxaguenque ca lataxac da yaqto' no'on da qadataxaqui, qalaq qami' sa ishit da qau'amaqchiñi somayi. Qalaxayi nam ÿacootapeeguet ana nshiitenaqte ca nta'a qataq nam quishiguetaxaipi i'amaqten somayi co'ollaxa. Qalaxayi qami' nai'ctaxa da qauauañiichigui 'enauac de'eda, qalaxayi ñaqaiyita da sa ishit da qai'axañiideec naua qan'onataxacolli' da yaqto' qau'amqajnataxañi.

Qaÿaloqnaxana so 'onataxanaxaicpi mayi qauemaicpi

³³ Qan'axaÿaxañiÿa qome de'eda lÿa ÿaloqnaxanaxat mayi 'eeta': Huo'o so shiÿaxaua lalamaxat so 'alhua, nachi somayi ÿaañi aso uvas. Ime, nachi npaxateu'a, qataq i'ot so laÿi' da qanlom na lli'i anamayi, qataq aso lalloxolate, da yaqto' ishit da qaÿallitalec 'enauac se'eso nanaxanqa'. Ime, nachi somayi huo'o so i'aalaxanaxanec 'onataxanaxaicpi se'eso n'alhua. Ime, nachi jec.

³⁴ Qaq co'ollaq mashi ivita so laloqo' da qanqat ana ala na nanguishic, nachi somayi namaq so l-latacpi, da yaqto' iÿaxanot se'eso 'onataxanaxaicpi, da yaqto' icolaxateuga cam talec somayi qanqoÿin.

³⁵ Qalaxayi se'eso 'onataxanaxaicpi ÿaconeu'a se'eso namaxashicpi. Nachi huo'o na iuaxaatac, qataq huo'o na ÿalauat, qataq huo'o na ÿasaq na coma'.

³⁶ Nachi se'eso lalamaxat se'eso nanaxanqa' qaltaq nquigaxatteec so ÿamaq lamaxashicpi. Qalaxayi se'eso 'onataxanaxaicpi qaltaq i'enaxatteguet da 'eetec naq'en som hua'auchiguiñi namaxashicpi 'enauac se'eso dalaxaic qanamaq.

³⁷ Qaq ivitta'a da ÿamaq so maichi lalamaxat llalec, cha'ayi da lhuennataxa 'eeta': “Ÿoqtá qome da qaÿalaxaguet ñi ÿalec.”

³⁸ Qalaxayi co'ollaq qaila'aguet se'eso llalec, nachi so 'onataxanaxaicpi detaxaÿapega't, 'eeta': “'Ena cha'aguet nam talec qome qanqoÿin da lsallaxa so qan'aco'. Namayi salauataq, yaqto' qomi' talguete qome na nma'.”

³⁹ Nachi somayi qaÿaconeu'a, nachi qanqateeguesop se'eso 'alhua, nachi qaÿalauat.

⁴⁰ Nachi so Jesús denataxan, 'eeta': –Qom ivita da anac se'eso lalamaxat so 'alhua, qaq ¿chaq huá'ague ca 'eetec naq'en se'eso 'onataxanaxaicpi?

⁴¹ Nachi qoÿiita': –Qomyi ÿataqta sa ichoxonnai' da ÿalauat se'eso qauemaicpi. Ime, qaq ÿanem so 'alhua so laÿipi 'onataxanaxaicpi mayi ÿataqta ipacchigui da icolaxateuga cam talec so 'aco', da iviteuga ca laloqo' da qanqat na nanguishic.

⁴² Nachi so Jesús 'enapeco': –¿Qami' peta'a sa ÿauanapego' da qautaxaÿaxañi' naua ñiyigui'shi l'aqtaqa ñi Dios? Mayi 'eeta': Ca coma' mayi i'otan nam noÿic l'opi, nachica nagui cam nllañi ca noÿic. Qaq damayi chigoqchigui da i'ot ñi qadataxala'. Qaq damayi ÿataqta qaica ca 'en'am ñaqashinaq da lli'oxoyic.

⁴³ Qaq ÿoqo'oyi qami' shinapegalo da de'eda l'onataxanaxac ñi Dios da ilo'ogue 'enauacna, damayi qami' qanqateeguesopa qome. Nachi damayi qoÿami' ca shiÿaxauapi mayi ÿoqta ipacchigui cam alaÿaxac mayi taiguet de'eda l'onataxanaxac.

⁴⁴ Qaq se'eso coma', qalaq da huo'o ca camachaqca talec somayi, nachi camayi dolachigui. Qataq se'eso coma' da huo'otaq huo'o ca talec, nachi ÿataqta dolachigui naq'en.

⁴⁵ Nachi se'eso lataxala'pi na ntaxaÿaxanaxanecpi da qaitaxaÿapegue' ñi Dios, qataq na fariseopi, co'ollaq hua'axaÿa de'eda daloqnaxaatega so Jesús, nachi ÿauattooteguet da nachiso somayipi taÿaigui de'eda n'aqtac.

⁴⁶ Nachi somayipi ÿauotaique da icoñi' so Jesús. Qalaxayi huo'o da lcolanaxa na shiÿaxauapi, cha'ayi namayipi 'eetega da so Jesús ÿataqta 'eesa da l'aqtaxanaxanec ñi Dios.