Mateo 14 - Nuevo Testamento Toba Sur

Da nalaataguec so nachilaxanataxanaq mayi l'enaxat Juan

¹ Nachi se'esoua na'axa'te som Herodes mayi ilotague' yi Galilea, somayi ÿaÿaten da n'aqtaguec so Jesús.

² Nachi 'enapego' nam hueta'aguetpi, 'eeta': –Se'eso ÿoqta da nachiso som Juan mayi nachilaxanataxanaq da qaltaq nca'aleeguesop da nleuaxa. Ÿoqo'oyi huo'o da l'añaxac da i'ot nam sa qaÿauanapega.

³ Cha'ayi som Herodes damaxasoxoolec co'ollaxa da qaÿaconeu'a so Juan, nachi qaicoñida't naq'en naua lhua'q, nachi qaÿauegueu'a aso ncoñitaxanaxaqui. Qaq damaxasoxoolec, cha'ayi souaxat aso lhua Herodías mayi lhua co'ollaxa so lqaÿa l'enaxat Felipe.

⁴ Cha'ayi so Juan 'enapego' co'olloxochiyi so Herodes, 'eeta': –Sa ishit qome da 'auadonguet añimayi.

⁵ Nachi so Herodes huotaique da ÿalauat so Juan. Qalaxayi huo'o da lcolanaxa na shiÿaxauapi, cha'ayi namayipi 'eetega da so Juan ÿataqta 'eesa da l'aqtaxanaxanec ñi Dios.

⁶ Qalaxayi co'ollaq ivita so laloqo' da deque'elec so lañoxoqui so Herodes, nachi aso llale aso Herodías dasottac, qaq 'enauac som lqui'axauapi imeteetac. Nachi so Herodes ÿataqta nqopita da lasotaxac asomayi.

⁷ Nachi ÿanem asomayi da l'aqtac mayi 'enapec da ÿataqta ipacchigui da ÿanem cam camachaqca iÿaxanaique asomayi.

⁸ Nachi asomayi i'auaxaañi da inat aso late'e. Qaq co'ollaq ime da qaÿaqattega, nachi 'enapego' so Herodes, 'eeta': –Aÿim 'ai'anem qome ca nqui'axaqui, huetagui 'anqa'en ca lqaic ñi Juan mayi nachilaxanataxanaq.

⁹ Nachi so nta'a Herodes ÿataqta daquico. Qalaxayi mashi ÿan so l'aqtac mayi 'enapec da ipacchigui, qataq souaxat so lqui'axauapi mayi hua'aqchigui co'ollaxa somayi, nachi damaxasoxoolec da qoÿami' asomayi so iÿaxaneu'a.

¹⁰ Ime, nachi damaxasoxoolec da qaiquesoxouec na lqaic so Juan, huaigui naq'en aso ncoñitaxanaxaqui.

¹¹ Nachi qandouo so nqaic, qaÿachitagui so nqui'axaqui. Nachi qoÿanem aso qa'añole. Qaq asomayi ÿami' aso late'e.

¹² Nachi ana'c soua nale't so Juan, nachi qaidouec so l'oquiaxac, nachi qailayiñi. Qaq co'ollaq ime, nachi je'c da qai'aqtaxanem so Jesús.

So Jesús iqui'axan so cinco mil shiÿaxauapi

¹³ Qaq co'ollaq ÿaÿaten de'eda so Jesús, nachi ca'ai ca hueta'a, ndoteec, nachi huenojñigui aso barco da taitague da le'ego, taÿa ca qaÿoqteuga 'alhua. Qalaxayi so shiÿaxauapi co'ollaq huo'o da l'axaÿaxac, nachi chigoqteu'alo na pueblopi da qaica'ategue somayi, qanayictelec so lqaxaÿaxa.

¹⁴ Nachi co'ollaq huenoteeguesop aso barco so Jesús da le'ego, nachi chochi ilaigui so shiÿaxauapi ÿataqta qalota, nachi ÿataqta qalota da lchoxonnataxanaxa somayipi. Huaña, nachi nataden na sa no'onpi mayi qandotauo.

¹⁵ Qaq co'ollaq mashi avit, nachi soua lapaxaguenataqa so Jesús ana'c da qoÿinapega somayi, qoÿiita': –Mashi avit, qataq qaica ca netaña ne'ena 'alhua. Qaq no'on da qonapega na shiÿaxauapi, da yaqto' jec da nqo'oneu'alo naua netañalo na shiÿaxauapi da deshijnaxanaique ca aloq.

¹⁶ Nachi so Jesús 'enapeco': –Namayipi sa iuen da jec. Qami' qai'añiim qome ca aloq.

¹⁷ Nachi soomayi 'ena'po': –Qaica cam lÿa qonoq, chaq yiuate' yiua cincole pan, qataq yiua dosolqa nÿaxayi.

¹⁸ Nachi so Jesús 'enapeco': –Ñaq aÿim qandoiua'alo caamayi.

¹⁹ Nachi 'enapega so shiÿaxauapi da nso'ooñi, nso'oolec na 'auaqpi dadala. Ime, nachi ÿaconalo soua cincole pan qataq soua dos nÿaxayi. Nachi ÿamato'ot na piguem, nachi ÿanot da n'achiquiaxac ñi Dios. Ime, qaq ncolaxajyiñi soua pan, nachi ÿanema soua lapaxaguenataqa. Qaq soomayi nachi ÿanoiguilo na shiÿaxauapi.

²⁰ Nachi 'enauac somayipi deque'e qataq ÿataqta comadaxaicpi. Qaq co'ollaq ime, nachi qaiÿoxoguilo soua doce canasta som ñi'iÿoxotpi, nachi ÿataqta nlaqchiguilo.

²¹ Qaq som deque'epi co'ollaxa ivi' na cinco mil shiÿaxauapi. Qaq sa ishit da qanaloqneuo nam 'alpi qataq na ñaqpiolec.

So Jesús quetalec so 'etaxat

²² Nachi so Jesús 'enapegalo soua lapaxaguenataqa da huenojyingui aso barco da yaqto' hua'autrague da le'ego. Qaq somayi n'onañi da ña ncoyigueetague' so shiÿaxauapi.

²³ Qaq co'ollaq ime da lcoyiguenataxanaxac, nachi so Jesús tashiguemec aso saqaÿoqotchiguemec 'alhua, da yaqto' ndoteec da natamen. Qaq co'ollaq mashi pe, nachi so Jesús ñaq huetashiguemec yi'iyi 'alhua.

²⁴ Qaq aso barco ñaq huetangui na laiñi aso lapel late'edai. Qaq ana lapaxa na 'etaxat ÿataqta iuaxaatacot asomayi, cha'ayi so l'at ÿataqta datateguet somayipi.

²⁵ Qaq co'ollaq mashi sa qaÿapeque so na'a'q, nachi so Jesús nqo'oneueegue somayipi, petalec na 'etaxat.

²⁶ Nachi somayipi co'ollaq ila'aguet somayi da petalec na 'etaxat, nachi ÿataqta huo'o da lcolanaxa, nachi i'alaqtagui, 'eeta': –¡Ña qauloÿa na nqui'i!

²⁷ Nachi so Jesús 'enapegalo soomayi, 'eeta': –¡Qan'añaxachi qome, sa ishit da qayi'ii, nachaÿim!

²⁸ Nachi so Pedro detaqa, 'eeta': –'Am qadataxala', qom ÿoqta 'eesa da nachi'am, qaq no'on qome da aÿim 'auashiitem da sapelec na 'etaxat, da yaqto' 'am ñoqo'oneuga.

²⁹ Nachi so Jesús 'enapeco': –Aja', 'ayala. Nachi so Pedro huenoteeguesop aso barco, nachi petalec na 'etaxat da nqo'oneuga so Jesús.

³⁰ Qalaxayi co'ollaq nomteguet da l'añaxac so l'at, nachi ÿataqta huo'o da lcolanaxa. Nachi somayi iyiiñi, nachi i'alaq, 'eeta': –¡'Am ÿataxala', aÿim 'anca'alaxateec!

³¹ Nachi so Jesús ÿacooteguet na lhuaq. Nachi 'enapega, 'eeta': –¡Ÿataqta qapi'olec da 'adpi'iÿaxac! ¿Tá'ainco' yi 'auqolguetaxan?

³² Nachi soomayi co'ollaq mashi huenojyingui aso barco, nachi vi'iiguet so l'at.

³³ Nachi soua netanguilo aso barco, soomayi i'adoto naua l-llicte so Jesús, nachi 'eeta': –Ÿoqta 'eesa da nachi'am mayi 'am llalec ñi Dios.

So Jesús nataden na sa no'onpi yi Genesaret

³⁴ Qaq co'ollaq mashi qai'axasoxoolec aso lapel, nachi qaivitta yi 'alhua mayi huaigui yi Genesaret.

³⁵ Nachi na shiÿaxauapi mayi lma' se'eso 'alhua co'ollaq ÿauatton so Jesús, nachi qai'aqtaxanem 'enauac nam netalec se'eso 'alhua, nachi qandou'a 'enauac na sa no'onpi cam hueta'a.

³⁶ Nachi qanachoxodeetacot da nai'ctaxa da chochi qaipoteu'a na laÿi so lapo'. Nachi 'enauac som ipoteu'a na laÿi so lapo', nachi no'oita.