Marcos 9 - Nuevo Testamento Toba Sur

¹ So Jesús nataq'en 'enapeco': –Ÿataqta 'eesa de'eda qami' sa'axatema, da huo'o nagui nam ÿalectauopi nam saxanaxa qome da ileu, chochi ivitta'a da ÿauaachigui da nvi' da l'onataxanaxac ñi Dios qataq da l'añaxac da ilo'ogue 'enauacna.

Qanadalaxat da nmejnaguec so Jesús

² Qaq co'ollaq inoxoodeec soua seis na'axa'te, nachi so Jesús nnaicapegueto soua Pedro, Santiago, Juan, da nqo'ooshiguemec aso qasoxonaxa. Qaq hualec asomayi, nachi qanadalaxat da lataxac, ÿauaachiguilo qanqoÿin soomayi.

³ Soua alogo ÿataqta qashilectrapiguiñi qataq ÿataqta qaica ca 'en'am da lapagaqa', ÿataqta qaica ca shiÿaxaua ana 'alhua da ishit da 'en'am naq'en da lapagaxa soua alogo.

⁴ Nachi soomayi iloda'a so Elías qataq so Moisés da detaqtrague' so Jesús.

⁵ Nachi so Pedro 'enapego' so Jesús, 'eeta': –'Am mayi 'auapaxaguenataxaatac, ¡ÿataqta ÿaÿamaqchiguiñi da nachi souaqta'a ne'ena! Nachi so'ota'q caua qadma'chilli', 'oonolec ñaq'enaq ca 'adma', qataq da Moisés, qataq da Elías.

⁶ Cha'ayi soua lapaxaguenataqa ÿataqta ñi'i' co'ollaxa, ÿoqo'oyi so Pedro sa ÿaÿaten ca nauga.

⁷ Nachi anac so l'oc da nalotelguete soomayi. Qaq se'eso l'oc nachi chimaxaigui so n'aqtac, 'eeta': –'Eda da ÿalec mayi ÿataqta ÿauotaxat, damayi qan'axaÿaxañiÿa qome.

⁸ Qaq co'ollaq namatrashigue'm, nachi qaica ca iloda'a, chaqsota so Jesús ndota't.

⁹ Qaq co'ollaq mashi huenotreeguesop aso qasoxonaxa, nachi so Jesús huaqattapeguelguete soua lapaxaguenataqa da sa ishit da huo'o ca i'axatrem de'eda lauanaqchi'c, chaqdata da qom mashi qaltaq nca'aleec ne'ena shiÿaxaua llalec.

¹⁰ Qaq ÿoqo'oyi soomayi ÿataqta ñi'imaxattre' de'eda lauanaqchi'c, qalaxayi nchimaxattrapigui da 'eetec ca naigui da qaltaq nca'aleeguesop da l-leuaxa.

¹¹ Nachi qainattac so Jesús, qoÿiita': –¿Tá'ainco' yi nam dapaxaguenataxaatapeguec na nqataxacpi yi 'eetega qome da hua'auñi da nvi' ca Elías?

¹² Nachi somayi 'enapeco': –'Eesa ca Elías da hua'auñi da nvi' qome, da yaqto' ÿaÿamaxajñi 'enauac na lataxaguesat. Qalaxayi ¿huá'ago' ca 'eetec naua ñiyigui'shi l'aqtaqa ñi Dios yi nataq'en i'axat da 'eetec qome cam shiÿaxaua llalec? Da huo'o da nque'ejnaxac qanqoÿin qataq da n'otanaguec.

¹³ Qalaxayi aÿim qami' shinapegalo da so Elías mashi sogote da nvi'. Qalaxayi somayi maichi qoÿoiqueetac 'enauac cam qoÿiita'ac, qaq ÿataqta ipacchigui da n'aqtaguec mayi i'axat naua ñiyigui'shi l'aqtaqa ñi Dios.

So Jesús nataden so nsoq mayi huo'o so l'ec leguemaxaic

¹⁴ Qaq co'ollaq mashi ñi'iguelaxa so Jesús ca huetra'a soua lapaxaguenataqa, nachi iloda'a so qalota shiÿaxauapi da coleesopa soomayi. Nataq'en huo'o nam dapaxaguenataxaatapeguec na nqataxacpi, qaq namayipi ncotatapegueto soomayi.

¹⁵ Qaq co'ollaq qaila'aguet so Jesús, nachi somayipi ÿataqta huo'o da l'aalaxa, nachi qanqalgaqa'aguet somayi da qanquine'.

¹⁶ Nachi so Jesús denataxan, 'eeta': –¿Négue't cam qanqalligochiitapigui?

¹⁷ Nachi huo'o som ÿalectauo ÿasat, 'eeta': –'Am mayi 'auapaxaguenataxaatac, na ÿalec 'am ñauegueu'a, namayi huo'o ñi l'ec leguemaxaic mayi sa ishit da i'aqtaxanaxan.

¹⁸ Camachica pa'aigue, nachi ÿacha'ague ñi'iñi l'ec leguemaxaic da nalaqaañi. Huaña, nachi anac naq'en ana l'alli na alap, qataq inaga't naq'en naua lhue, qa nachi 'eetai' da nquigaxatta'aguet da saqca ca l'añaxac naq'en. Qaq mashi sogote da seÿaxanoto naua 'adapaxaguenataqa, da yaqto' i'oldaue'c ñi l'ec leguemaxaic, qalaxayi sa ÿañoxot.

¹⁹ Nachi so Jesús 'enapeco': –¡Aicoue nam na' shiÿaxauapi yi sa da'amqajnataxan! ¡Mashi huo'oi soua na'axa'te da qami' sootaiguilo, qataq mashi huo'oi soua na'axa'te da qami' ñiualaxaueetapegueto! Ñaq aÿim qanaviquiÿa na nsoq.

²⁰ Nachi qanauega somayi so nsoq. Nachi so l'ec leguemaxaic co'ollaq ilo'ot so Jesús, nachi decopchi naq'en so nsoq, nachi ncocatapiguiñi, qataq anac naq'en ana l'alli na alap.

²¹ Nachi so Jesús inattac so lta'a so nsoq, 'eeta': –¿Chaxan lcáte' soua na'axa'te da 'eeta'ac de'eda? Nachi somayi 'enapeco': –Qomyi naquitchigueme'.

²² Qaq qalota naxa da ñi'iñi l'ec leguemaxaic tangui naq'en na nodec qataq na 'etaxat da nshitaique da ÿalauat. Qaq ÿoqo'oyi da 'aushit, qaq no'on da qomi' 'auchoxode'n da qomi' 'autaua'n.

²³ Nachi so Jesús 'enapego' somayi, 'eeta': –Da 'aushit da 'au'amqajnataxan, cha'ayi cam da'amqajnataxan, nachi sa ishit da huo'o ca alaq.

²⁴ Nachi so lta'a so nsoq, somayi i'alaq, 'eeta': –¡Sa'amqajnataxan, aÿim 'autauan, yaqto' nquic da i'amqajnataxanaxa!

²⁵ Nachi so Jesús co'ollaq ila'aguet da mashi qalota na shiÿaxauapi, nachi nlaxa so n'ec leguemaxaic, 'eeta': –'Am n'ec leguemaxaic mayi sa 'au'aqtaxanaxan qataq sa hua'aqa 'anqa'en na shiÿaxaua, 'am shinapega da qoca'ai ne'ena nsoq, nachi sa ishit qome da 'avi'iguelaxaigui namayi.

²⁶ Qaq se'eso n'ec leguemaxaic i'alaq, nachi decopchi naq'en so nsoq. Ime, nachi ca'ai, qalaxayi 'eeta'am naq'en da ileu. Qaq ÿoqo'oyi qalota na 'eetega da ileu somayi.

²⁷ Qalaxayi so Jesús ÿacona na lhuaq somayi, nachi nachaalataxaañi. Nachi somayi nachajñi.

²⁸ Nachi so Jesús taigui so noÿic, nachi soua lapaxaguenataqa co'ollaq ndoda'aguet somayi, nachi inattrac, 'eeta': –¿Tá'ainco' yi qomi' sa seshitaq da so'odaqhuec so n'ec leguemaxaic?

²⁹ Nachi somayi 'enapeco': –Qomyi na 'eeta'am se'eso n'ec leguemaxaic da qai'odauec, qalaq iuen da nqouagaxauen qataq nqouaqchit ca shiÿaxaua.

So Jesús qaltaq i'axata'a da l-leuaxa

³⁰ Qaq co'ollaq queda'ai yi'iyi huetra'a, nachi qotaÿalec yi Galilea. Nachi so Jesús nshitaique da sa ishit da qaÿanoma.

³¹ Cha'ayi somayi i'axattapeguema soua lapaxaguenataqa da 'eeta': –Na shiÿaxaua llalec qoÿanoigui qome na shiÿaxauapi, da yaqto' ÿalauat. Qalaxayi qom ivi' caua tres na'axa'te, nachi qaltaq nca'aleec.

³² Qalaxayi soomayi sa ishi't co'ollaxa da ÿaÿate'n de'eda qai'axattapeguema, qalaxayi ñi'iÿalguete da qaltaq denataxa'n.

¿Chaq négue't ca ÿoqta ÿacteec ca l'amaqchic?

³³ Nachi mashi ivildeu'a yi la ciudad Capernaum. Qaq co'ollaq huetra'a ca lma', nachi so Jesús inatta'pe soua lapaxaguenataqa, 'eeta': –¿Négue't ca qanqalligochiitapigui qami' can huangui na nqa'aic?

³⁴ Qalaxayi soomayi sa ishit da ÿasa't, cha'ayi soomayi co'ollaq huangui so nqa'aic, nachi ncotatrapigui da chaq negue't soomayi ca ÿoqta ÿacteec da l'amaqchic.

³⁵ Nachi so Jesús nso'ooñi, nachi iÿaxanoiguilo soua doce lapaxaguenataqa, nachi 'enapegalo, 'eeta': –Da huo'o ca nshitaique da l'auaxanec, qaq nachica ca ÿoqta pa'ateec, qataq nachica ca huapegue' 'enauac na laÿipi.

³⁶ Ime, nachi ÿacona na lhuaq so nogotolec, nachi ÿanangui na laiñi somayipi, nachi nsoqtauo. Nachi 'enapegalo soomayi, 'eeta':

³⁷ –Ca shiÿaxaua da aÿim quetague' da huo'otaq ÿacongueta ca 'oonolec ne'ena nogotolec, qaq nachaÿim mayi aÿim ÿaconguet. Qaq sa ishit da nachaqaÿimta da aÿim ÿaconguet, cha'ayi camayi nataq'en ÿaconguet ñim aÿim namaq.

Ca sa qomi' npa'aguenalo, qaq nachica ca qomi' sa iÿota'alo

³⁸ Nachi so Juan 'enapego' somayi, 'eeta': –'Am mayi 'auapaxaguenataxaatac, qomi' huo'o so sauanaqchigui da do'otaxaatega da 'ad'enaxat da i'ottapeguec na n'ecpi, qalaxayi somayi sa ishit da qomi' ÿalegoiguilo, qaq sellaqpeguem da nachi 'eeta'ac de'eda.

³⁹ Qalaxayi so Jesús 'enapeco': –Sa ishit da qaulliÿapeguem, cha'ayi sa ishit da huo'o ca 'oonolec da huo'otaq i'ot ca sa qaÿauanapigui da do'onataxana da i'enaxat, qaq da ime, nachi aÿim ishiueetac.

⁴⁰ Cha'ayi ca sa qomi' npa'aguenalo, qaq nachica ca qomi' sa iÿota'alo.

⁴¹ Cha'ayi ca camachicague't da huo'otaq qami' ÿanema ca nai'ctaxa da saq 'amaqtaq 'etaxat, qaq souaxat da qami' lalamqa'te na Cristo, nachi camayi ÿataqta huo'o da nshiitenaguec.

Da lchic ca shiÿaxaua da huo'o ca lasouaxashit

⁴² Qaq camachicague't shiÿaxaua da huo'otaq ÿaueca'aguet ca lasouaxashit ca 'oonolec ne'enatai' saq 'amaqtaqpiolec mayi aÿim i'amaqten, nachi camayi no'on da qaicoñida'ac na lqosot ca coma' lta'adaic mayi namaicnaxanaxat, nachi qaÿasaxangui aca auaxai.

⁴³ Na maichi 'adhuaq da huo'otaq 'am ÿaueca'aguet ca 'adasouaxashit, qaq no'on da 'auchigueec. Cha'ayi ÿaÿamaqchiguiñi da 'aunoxoneu'a da nca'alaxa, da 'oonolec na 'adhuaq, qalaxayi saq 'en'am da nalota't naua 'adhuaxayi, qaq 'am qaÿasaxaña ca nhuaxanqa' na 'itaxaloxoicpi mayi huaña ca nodec mayi sa ishit da qaÿalamat,

⁴⁴ qataq huetaña na qochi'l mayi sa ishit da ileu. Que'eca nodec sa ishit da qaÿalamat.

⁴⁵ Qataq na 'adapia' da huo'otaq 'am ÿaueca'aguet ca 'adasouaxashit, qaq no'on da 'auchigueec. Cha'ayi ÿaÿamaqchiguiñi da 'aunoxoneu'a da nca'alaxa da 'am tedaic, qalaxayi saq 'en'am da nalota't naua 'adapia'te da 'am qaÿasaxaña ca nhuaxanqa' na 'itaxaloxoicpi mayi huetaña ca nodec mayi sa ishit da qaÿalamat,

⁴⁶ qataq huetaña na qochi'l mayi sa ishit da ileu. Que'eca nodec sa ishit da qaÿalamat.

⁴⁷ Qataq ana 'ad'aite da huo'otaq 'am ÿaueca'aguet ca 'adasouaxashit, qaq no'on da 'anqat. Cha'ayi ÿaÿamaqchiguiñi da 'oonole ana 'ad'aite da 'aunoxoneu'a da l'onataxanaxac ñi Dios da ilo'ogue 'enauacna, qalaxayi saq 'en'am da nalota't naua 'ad'ai'te da 'am qaÿasaxaña ca nhuaxanqa' na 'itaxaloxoicpi,

⁴⁸ cam huetaña na qochi'l mayi sa ishit da ileu, qataq sa ishit da qaÿalamat que'eca nodec.

⁴⁹ Cha'ayi 'enauac na shiÿaxauapi qaÿi'iguenec ca nodec, qataq 'enauac na nachitaqtaxanaxatpi mayi qaÿavigaxat, namayi qaÿasaxagui na toue.

⁵⁰ Na toue, namayi ÿataqta no'on. Qalaxayi da huo'otaq daqat na lli'iuaxa, qaq ¿ishit peta'a camayi da qaltaq huo'o ca taiguet qanqoÿin? Qaq qami' qoñiita'amo' qome ca toue da 'ico' qami' nalecnaxanqa'te, qalaxayi ñi 'oonolec da qoñiita ÿataqta lactapegue' na laÿipi.