Marcos 8 - Nuevo Testamento Toba Sur

So Jesús iqui'axan so cuatro mil shiÿaxauapi

¹ Qaq se'esoua na'axa'te ÿataqta qalota na shiÿaxauapi na lapootapegueu'a so Jesús, nachi somayipi qaica ca chic. Nachi so Jesús iÿaxanoiguilo soua lapaxaguenataqa, nachi 'enapegalo, 'eeta':

² –Aÿim ÿataqta huo'o da ichoxonnataxanaxa ne'ena shiÿaxauapi. Cha'ayi mashi ivi' naua tres na'axa'te da aÿim hueta'aguet, qaq namayipi mashi qaica ca aloq.

³ Qaq da huo'otaq shinapega namayipi da taÿalo naua lma'te da saxanaxa da deque'e, nachi yi'oqta qome da huo'o na iquishiuguijñi na nqa'aic, cha'ayi namayipi huo'o na qaÿoqta ca chigaqa'ague.

⁴ Nachi soua lapaxaguenataqa 'ena'po': –¿Ca 'éeteco' da qoÿanem ca chic ne'ena shiÿaxauapi, yi ne'ena souaqta'a tojlec?

⁵ Nachi so Jesús inatta'po' soomayi, 'eeta': –¿Ca lcáte' caua qanqolli' pan? Nachi soomayi 'ena'po': –Qomyi sietole.

⁶ Nachi so Jesús ÿamaxalec somayipi da nso'ooñi, nachi somayi ÿaconalo soua pan, nachi nqouagaxaunot ñi Dios. Qaq co'ollaq ime, nachi ÿanoiguilo soua lapaxaguenataqa, da yaqto' soomayi ÿanoiguilo so shiÿaxauapi.

⁷ Qaq nataq'en huo'oi soua nÿaxayolqa. Nachi so Jesús nqouagaxaueelguete soomayi, nachi damaxasoxoolguete da qanaloqteedeec.

⁸ Nachi 'enauac da deque'e somayipi qataq comadaxaicpi. Qalaxayi ñaqaiyita huo'o so ñi'iÿoxot, nachi somayi qaÿachaguilo soua siete canastas.

⁹ Qaq se'eso deque'e, somayipi huac da ivi' ca cuatro mil. Nachi so Jesús ncoyigueetague' somayipi,

¹⁰ nachi huenojñigui aso nnotaxaqui, lÿata'pe soua lapaxaguenataqa da nqo'ooda yi 'alhua Dalmanuta.

Na fariseopi iÿaxaatacot so Jesús, da yaqto' i'ot cam sa qaÿauanapigui

¹¹ Nachi anac na fariseopi da huotaique da ncotaÿapegue' so Jesús. Qaq qaiÿaxanot somayi, da yaqto' ÿachaxan cam n'anec mayi sa qaÿauanapigui da chigoqo'ot naq'en na piguem. Qalaxayi somayi chochi qaÿi'iguen.

¹² Qalaxayi so Jesús decovi, nachi 'enapeco': –¿Tá'ainco' ne'ena shiÿaxauapi yi iÿaxaataique da qai'ot cam n'anec mayi sa qaÿauanapigui? Qaq ÿataqta 'eesa de'eda qami' sa'axatema, da nagui sa ishit da huo'o ca qami' qoÿanema n'anec.

¹³ Nachi so Jesús ca'ai somayipi, nachi qaltaq huenojñigui aso barco, nachi taitague da le'ego aso lapel.

Ana ÿashiidaxachigui ana pan mayi huetaigui na fariseopi

¹⁴ Qaq soomayi icoua'aisalo co'ollaxa da ÿachi' ca alo'q, chaqasota aso 'oonole pan co'ollaq qanayiitangui aso barco.

¹⁵ Nachi so Jesús huaqattapeguelguete soomayi, 'eeta': –Maxatchaxa qome, qadvichiÿa'a ana ÿashiidaxachigui ana pan mayi huetaigui na fariseopi qataq ñi Herodes.

¹⁶ Nachi soua lapaxaguenataqa maichi nnattega't, 'eeta': –'Enapec de'eda, cha'ayi souaxat peta'a da sa ñachoq aca pan.

¹⁷ Nachi so Jesús noma'alo soomayi, nachi 'enapeco': –¿Tá'ainco' yi qan'aqtaxañiitapigui da sa qanachii aca pan? ¿Peta'a ñaq 'eetalec da saxanaxa da huo'o ca qauauattoñi qataq ca qauaÿajñi? ¿Ÿataqta qadamchiguilo peta'a naua qadquiyaqchilli'?

¹⁸ ¿Sa ishit peta'a da nauaayiñi naua qad'ai'chilli', qataq sa ishit peta'a da hua'axai' naua qadtelalauacolli'? qataq ¿sa ishit da huo'o ca qantouñiic?

¹⁹ Yi can ñicolaxajyiñi soua cincole pan da sequi'axan so cinco mil shiÿaxauapi, qaq ¿chaxan lcáte' soua canastas mayi nlaxatchiguilo so ñi'iÿoxot? Nachi soomayi 'ena'po': –Qomyi doce.

²⁰ Nachi somayi qataq 'enapeco': –Qaq can ñicolaxajyiñi soua sietole pan da sequi'axan so cuatro mil shiÿaxauapi, qaq ¿chaxan lcáte' soua canastas mayi nalaxatchiguilo so ñi'iÿoxot? Nachi soomayi 'ena'po': –Qomyi sietole.

²¹ Nachi 'enapegalo soomayi, 'eeta': –¿Qalaq ñaq 'eetalco' da saxanaqca ca qauaÿajñi?

So Jesús nauaañi naq'en so qanamaic co'ollaq hueta'a yi Betsaida

²² Qaq co'ollaq ivilda yi Betsaida, nachi qanauegueu'a so Jesús so qanamaic, nachi qanachoxodeetot somayi, da yaqto' ÿashil-lec.

²³ Nachi somayi ÿacona na lhuaq so qanamaic, nachi nqateeguesop so pueblo. Ime, nachi i'amiinguilo naua l'ai'te aso l'alli, nachi ipoteu'alo. Nachi inattac somayi da huo'otaq mashi huo'o ca ila'a.

²⁴ Qaq se'eso qanamaic demejnaxan, nachi 'enapeco': –Sela'a na shiÿaxauapi, qalaxayi 'eeta'am ana qo'ipaq, qalaxayi queuotapigui'.

²⁵ Nachi so Jesús qaltaq ipoteu'alo naua l'ai'te, qaq somayi nachi ÿataqta i'añaxachiguilo naua l'ai'te, nachi ishit da nauaañi. Huaña, nachi ÿataqta nauaachiguiñi.

²⁶ Nachi so Jesús ÿamaxa ca lma' somayi. Nachi 'eetega, 'eeta': –Sa ishit qome da 'au'a na pueblo, qataq sa ishit da huo'o ca 'au'axatem de'eda.

So Pedro i'axat so Jesús da nachiso so nta'a nca'alaxaqui

²⁷ Qaq co'ollaq ime de'eda, nachi so Jesús nnaictagueto soua lapaxaguenataqa da nqo'ooda na pueblopiolec mayi huaña yi Cesarea de Filipo. Qaq co'ollaq huangui na nqa'aic, nachi inatta'pe soua lapaxaguenataqa, 'eeta': –¿Chaq négue't ca ipettega aÿim na shiÿaxauapi?

²⁸ Nachi soomayi 'ena'po': –Qomyi huo'o na 'eetega da nachi'am Juan mayi nachilaxanataxanaq, qataq huo'o na 'eetega da nachi'am Elías, qataq huo'o na 'eetega da 'auachigaqaigui som hua'au Dios l'aqtaxanaxanecpi.

²⁹ Nachi somayi inatta'po' soomayi, 'eeta': –Qaq qami', ¿négue't ca qaupichiitega da aÿim? Nachi so Pedro 'enapeco': –Qomyi nachi'am mayi 'am nta'a nca'alaxaqui.

³⁰ Qalaxayi so Jesús huaqajlec somayipi da sa ishit da huo'o ca i'axatem de'eda.

So Jesús i'axata'a da l-leuaxa

³¹ Huaña, nachi da'aqtaxanema soomayi, 'eeta': Ne'ena shiÿaxaua llalec ÿataqta qalota qome da nque'ejnaxac, qataq ÿamaqhuec qome namayi na nquedoxonecpi, qataq na lataxala'pi na ntaxaÿaxanaxanecpi da qaitaxaÿapegue' ñi Dios, qataq nam dapaxaguenataxaatapeguec na nqataxacpi. Qataq i'axatema soomayi da somayi taÿa'a da qaÿalauat, qalaxayi qom mashi inoxoodeec caua tres na'axa'te, nachi qaltaq nca'aleec.

³² Qaq ÿataqta i'axatta de'eda taÿa'a. Qaq ÿoqo'oyi so Pedro nachi iÿotauga somayi, nachi nlaxa.

³³ Qalaxayi so Jesús nqoilec da ÿamataiguilo soua lapaxaguenataqa, nachi nlaxa so Pedro, 'eeta': –Aÿim qoca'ai, 'am Satanás, cha'ayi da 'adhuennataxa sa ishit da 'eeta'am da lhuennataxa ñi Dios. Chaqdata da qoneta'am na chochi shiÿaxauapi naua lhuennataxaco.

³⁴ Nachi so Jesús iÿaxanoiguilo soua lapaxaguenataqa nataq'en na shiÿaxauapi. Nachi 'enapego', 'eeta': –Da huo'o ca nshitaique da aÿim quegue, nai'ctaxa da huo'otaq aÿim ileutalec.

³⁵ Cha'ayi ca nshitaique da maichi nca'alaxajla't, nachi camayi daqat da nachaalataxac; qalaxayi ca daqat da nachaalataxac, souaxat da aÿim quetague' qataq souaxat da n'aqtac, nachi camayi qanca'alaxateec qome.

³⁶ Cha'ayi ¿négue't ca ÿachigoxotaigui ca shiÿaxaua da huo'otaq imatta't 'enauac nam huetalec ana 'alhua, qaq da nachaalataxac daqat?

³⁷ Cha'ayi ¿chaq négue't ca deshiitenaxana ca shiÿaxaua, da yaqto' ishit da ñi'iguelaxajla't da nachaalataxac?

³⁸ Cha'ayi ca aÿim da'aguelec qataq dam i'aqtaxanaxac, da ncaxa nam shiÿaxauapi mayi ÿalat ñi Dios qataq 'itaxaloxoicpi, nachi ne'ena shiÿaxaua llalec nataq'en ÿataqta da'aguelec camayi, qom ivita da ñi'iguelaq da nactaigui da lli'oxoyic ñi lta'a qataq na lamaxashicpi mayi qui'itta.