Marcos 5 - Nuevo Testamento Toba Sur

So Gadara l'ec mayi huo'o so l'ec leguemaxaic

¹ Qaq mashi ivittrague da le'ego aso lapel, qaivitta yi 'alhua Gadara.

² Qaq co'ollaq mashi huenoteeguesop aso notaxaqui so Jesús, nachi anaÿa somayi so shiÿaxaua mayi chigoqtoigui so napa'alpi. Somayi huo'o so l'ec leguemaxaic.

³ Se'eso shiÿaxaua, somayi nachi netauga se'eso napa'alpi. Somayi sa ishit da huo'o ca icoñidai', nai'ctaxa da huo'otaq qoÿanagui ca lquet qadamta.

⁴ Somayi mashi qalota naxa da qaicoñidai', qoÿaxachiguilo naua lchil qataq naua lhua'q na lquet qadamta, qalaxayi nachi 'en'am ÿataqta ÿachipiaxattac. Qaq sa ishit da huo'o ca ÿañoxot da icoñidai' somayi.

⁵ Qaq somayi nachi 'eetai' da coleetac yi na'a'q qataq yi pe, i'alaqtac, coleetapeguelec aso qasoxonaxa, qataq ana huachiquipi, qataq ipelectac na l'oc na coma'.

⁶ Qalaxayi co'ollaq ña qaÿata'aguet so Jesús, nachi ÿauaateguet, nachi nqalgaqa'aguet da i'adoto naua l-llicte somayi.

⁷ Nachi ÿataqta nlamaxaden da 'enapega, 'eeta': –¿Tá'ainco' yi aÿim 'atapegueu'a, 'am Jesús, mayi 'am llalec ñi Dios mayi 'amaqtaqaic? Ñi Dios aÿim ÿauaachigui da 'am ñachoxodeetot da sa ishit qome da 'auauo'o ca ñique'ejnaxac.

⁸ Qaq somayi 'enapec de'eda, cha'ayi so Jesús mashi 'eetego' somayi, 'eeta': –¡'Am n'ec leguemaxaic, qoca'ai qome ne'ena shiÿaxaua!

⁹ Nachi so Jesús inat somayi, 'eeta': –¿'Eetec ca 'ad'enaxat? Nachi somayi ÿasat, 'eeta': –Aÿim i'enaxat da qalota, cha'ayi qomi' qalote'.

¹⁰ Nachi somayi ÿataqta nachoxodeetacot so Jesús, da yaqto' sa ishit da qaÿoqtegue ca ÿamaxague somayipi se'eso qanayiuta'a 'alhua.

¹¹ Qaq cha'ayi huo'o aso qalota cos late'epi sa qaÿauga, deque'etac, netalec aso qasoxonaxa,

¹² nachi se'eso n'ecpi nachoxodeetacot so Jesús, 'eeta': –Qomi' 'auamaxalo qome ayi cos late'epi, da yaqto' saxaigui ayimayipi.

¹³ Nachi so Jesús ÿashiitem somayipi da nqo'ona. Nachi se'eso n'ecpi leguemaxaic ca'ai se'eso shiÿaxaua, nachi taigui aso cos late'epi. Nachi asomayi nqalgaqañi so tocot, nachi tangui aso lapel, nachi 'ogaxaipi. Qaq asa'aso cospi ivi' dos mil.

¹⁴ Qaq som ilotague'pi asomayi, somayipi datauec, ñi'i. Nachi jec da da'aqtaxaneu'a so pueblo qataq nam netauga na n'onaxa. Nachi anac na shiÿaxauapi da qanmejnaxana ca 'eetec ca aloic de'eda.

¹⁵ Qaq co'ollaq qanvita ca hueta'a so Jesús, nachi qailalec so shiÿaxaua mayi huo'o co'ollaxa so l'ecpi da nso'ootañi, huo'oi naua alogo, ÿaÿamaqta. Nachi so shiÿaxauapi ÿataqta ñi'i.

¹⁶ Qaq nam ÿauaatalec da 'eetec se'eso shiÿaxaua, namayipi nachi i'axattac da 'eetec se'eso shiÿaxaua mayi huo'o co'ollaxa so l'ecpi, nataq'en i'axattac da 'eetec asom cospi.

¹⁷ Nachi qanachoxodeetacot so Jesús da yaqto' ca'ai se'eso n'alhua somayipi.

¹⁸ Qaq so Jesús co'ollaq huenojñigui aso notaxaqui, nachi se'eso shiÿaxaua mayi huo'o co'ollaxa so l'ecpi, somayi nachoxodeetacot so Jesús da ishit da nashiiteguet somayi da ca'ategue.

¹⁹ Qalaxayi so Jesús sa ishit da nashinguet. Chaqdata da 'enapega, 'eeta': –'Anqo'ona qome ca 'adma', qataq ca 'adhuo' l'ecpi, nachi 'au'axattac qome 'enauac da 'am i'otec ñi qadataxala', qataq da 'eetec da lchoxonnataxanaxa da qoneta.

²⁰ Nachi se'eso shiÿaxaua jec, nachi quetot da da'aqtaxanem 'enauac nam netalguete soua 'ale'u yi Decápolis, i'axattac 'enauac dam i'otec somayi so Jesús. Nachi se'eso shiÿaxauapi ÿataqta i'aalatapeguec de'eda.

Aso llale so Jairo, qataq aso 'alo mayi ipoteu'a so Jesús lapo'

²¹ Qaq co'ollaq ÿi'iguelaxata so Jesús, netangui aso barco da ÿi'iguelaxatague da le'ego, nachi anaÿa somayi so qalota shiÿaxauapi. Nachi somayi hua'a ca loigue aso lapel.

²² Nachi nvi' so 'oonolec nam nataxala'pi, somayi ilotague' aso laponaxaqui na judiopi, l'enaxat da Jairo. Qaq co'ollaq ila'a so Jesús, nachi i'adoto naua l-llicte.

²³ Nachi ÿataqta nachoxodeetot, 'eeta'; –Ayi ÿale mashi ileetapigui'. Ña 'auanáctaxa da 'auashil-lec, yaqto' no'oita qataq nca'aleec.

²⁴ Nachi so Jesús ca'ategue somayi. Qalaxayi qalota na shiÿaxauapi na ca'attague' somayi, ÿataqta qanpataxagui.

²⁵ Qaq se'eso shiÿaxauapi huo'o aso ÿalectauo 'alo sa no'on, asomayi mashi ivi' naua doce vi'iyi da anactac na ltago'q.

²⁶ Qaq asomayi qalota da nque'etaxanaxac da quetagui na natannaxanaqpi, chochi imateuo 'enauac na hueto'otpi. Qalaxayi qaica ca ÿachigoxotagui, chaqdata da nquicta'aguet da qauem.

²⁷ Qaq co'ollaq hua'axaÿapeguelec so Jesús, nachi asa'aso 'alo nqo'oneu'a somayi, queteu'oguet na l-laq, nachi ipoteu'a so lapo'.

²⁸ Cha'ayi asomayi da lhuennataxa 'eeta': “Da chochi sepoteu'a ca lapo', nachi aÿim no'oita qome.”

²⁹ Huaña, nachi asomayi vi'iiguet na ltago'q, nachi nomteguet da l'oquiaxac da mashi qaica so lalolaxa.

³⁰ Nachi so Jesús nomteueegue da l'añaxac da huo'o ca nataden, nachi somayi nqoilec da ÿamataigui so shiÿaxauapi. Nachi denataxan, 'eeta': –¿Négue't ca ipoteu'a na ipo'?

³¹ Nachi soua lapaxaguenataqa 'eetegalo' somayi, 'eeta': –'Am 'auaÿaten mque' da na shiÿaxauapi 'am npataxagui, qalaq lloxochiyo' da 'aunataxaatac da qoneta': “¿Négue't cam aÿim ipoteu'a?”

³² Qalaxayi so Jesús demejnaxaatapiguiñi da nshitaique da ila'a cam ipoteu'a somayi.

³³ Nachi asa'aso 'alo ÿataqta iviloxolaqchit da lcolanaxa, cha'ayi asomayi maichi ÿaÿateetac da 'eetec co'ollaxa. Nachi jec da nqo'oneu'a somayi, nachi i'adoto naua l-llicte, nachi i'axatem 'enauac dam huaigui.

³⁴ Nachi so Jesús 'enapego' asomayi, 'eeta': –'Am ÿalole, 'am qanataden, cha'ayi 'au'amqajnataxan. 'Aue qome, qojec, saqca ca da, 'am nagui mashi qaica so 'adalolaxa.

³⁵ Qaq co'ollaq ña detaqtac so Jesús, nachi huo'oi soua nvi't, chigoqda'a so lma' som lataxala' aca laponaxaqui na judiopi. Nachi qai'aqtaxanem som lta'a aso nogotole, qoÿiita': –Ayi 'ai'ale mashi saqaca, qaq ÿoqo'oyi ¡shapeco' da 'audaatapigui' nam dapaxaguenataxaatac!

³⁶ Qalaxayi so Jesús sa ishit co'ollaxa da ÿoqocha'a de'eda n'aqtaxanaxac. Nachi 'enapego' so lataxala' aca laponaxaqui na judiopi, 'eeta': –Sa ishit qome da 'ayi'i, chaqdata da 'au'amqajnataxan.

³⁷ Nachi somayi sa ishit da huo'o ca nashinguet da nnaictague', chaqsota so Pedro qataq Santiago qataq so lqaÿa Juan.

³⁸ Qaq co'ollaq mashi ivildeu'a ca lma' so lataxala' aca naponaxaqui, nachi ila'a so shiÿaxauapi da i'elaxa't qataq noÿiitagui qataq i'alaqtagui.

³⁹ Nachi inoxonoigui ca noÿic, nachi 'enapego' somayipi, 'eeta': –¿Tá'ainco' yi qau'alqaitagui qataq qanoÿiñiitagui? Ayi nogotole sa ishit da ileu, ayimayi chochi do'ochita.

⁴⁰ Qalaxayi qalashitac somayi. Nachi so Jesús ipa'axaneec 'enauac somayipi, nachi ÿauec so lta'a qataq aso late'e qataq soua nnaictagueto, nachi inoxoneu'a ca hueta'a aso nogotole.

⁴¹ Nachi ÿacona na lhuaq asomayi, nachi 'enapega, 'eeta': –Talita, cumi –de'eda n'aqtac 'eeta': 'Am nogotole, 'am shinapega, qoñishiguem.

⁴² Huaña, nachi asa'aso nogotole mayi mashi ivi' naua doce vi'iyi, asomayi ñishiguem qataq queuoÿapigui'. Nachi so shiÿaxauapi ÿataqta huo'o da l'aalaxa.

⁴³ Qalaxayi so Jesús ÿataqta sa ÿala'ac da huaqattega da sa ishit da huo'o ca qai'axatem de'eda, nachi damaxasoxoolec da qaiqui'axan asomayi.