Marcos 3 - Nuevo Testamento Toba Sur

So shiÿaxaua mayi daqaqta na lhuaq

¹ So Jesús qaltaq inoxoneu'a aso laponaxaqui na judiopi, qaq ÿalectauo so shiÿaxaua mayi daqaqta na lhuaq.

² Qaq huo'o na ÿalectauo na chochi nauaatac so Jesús da huo'otaq datannataxañigui se'eso na'a'q mataxaqui, da nataden se'eso shiÿaxaua, da yaqto' ishit da qaÿauo'o ca lasouaxashit qanqoÿin somayi.

³ Nachi so Jesús 'enapego' se'eso shiÿaxaua mayi daqaqta na lhuaq, 'eeta': –Ña qoñishiguem, 'anachajñigui na laiñi.

⁴ Ime, nachi inat so shiÿaxauapi, 'eeta': –¿Chaq négue't ca qaÿashiita da qai'ot yi na'a'q mataxaqui, peta'a ca ÿaÿamaqchiguiñi, huo'otaq ca qauem? ¿Da qanca'alaxateec ca shiÿaxaua, qalqo' qaÿalauat? Qalaxayi somayipi ÿataqta ÿi'imaqtom.

⁵ Nachi so Jesús ÿataqta denogui co'ollaq ÿamataigui somayipi, qataq ÿataqta daquico. Cha'ayi somayipi sa ishit da qaÿapaxaguenai'. Nachi 'enapego' so shiÿaxaua mayi daqaqta na lhuaq, 'eeta': –'Anchinnaxaneec na 'adhuaq. Nachi somayi nchinnaxaneec na lhuaq, nachi no'oita.

⁶ Huaña, nachi so fariseopi jec da nqo'ona nam quetague'pi so Herodes da qaitaxaÿapigui ca lataxac da qaÿalauat so Jesús.

Qalota so shiÿaxauapi hueto'ot na loigue aso lapel

⁷ Qalaxayi so Jesús jec, nnaicapegueto soua lapaxaguenataqa da tadaxaama ca loigue aso lapel. Nachi ÿataqta qalota na shiÿaxauapi na ca'ategue somayi, chigoqchiguiña yi Galilea.

⁸ Qaq co'ollaq qai'axaÿapeguelec da l'amaqchic nam i'otpi somayi, nachi ÿataqta qalota na anaÿa somayi, mayi chigaqa'a yi Judea, qataq Jerusalén, qataq yi Idumea, qataq da le'ego so tala Jordán mayi pa'aigue da yi'oxoñi, qataq yi 'alhua Tiro qataq Sidón.

⁹ Qaq ÿoqo'oyi so Jesús huaqajleguete soua lapaxaguenataqa, da yaqto' ÿaqataxaatrai' aca nnotaxaqui somayi, yaqto' som qalota shiÿaxauapi sa ishit da npataxagui somayi.

¹⁰ Cha'ayi somayi ÿataqta qalota na nataden, nachi 'enauac na sa no'onpi ÿataqta namaxa't, nasoneu'a so Jesús da huotaique da ipoteu'a.

¹¹ Nachi na n'ecpi co'ollaq ilo'ot somayi, nachi i'adoto naua l-llicte, qataq i'alaxalec, 'eeta': –¡'Am nachi'am llalec ñi Dios!

¹² Qalaxayi so Jesús ÿataqta sa ÿala'ac da huaqattega na n'ecpi da sa ishit da i'axat somayi.

So Jesús ÿaconeu'alo soua doce lamaxa'shi

¹³ Qaq co'ollaq ime de'eda, nachi so Jesús tashiguemec aso qasoxonaxa, nachi huaña co'ollaq ÿauo'oi soua iÿaxanalo, som lca'agui'shi. Nachi soomayi naÿalo somayi.

¹⁴ Nachi ÿauaxaÿaxana't soua doce somayipi, da yaqto' nachi 'eetai' da hueta'agueta somayi, qataq da yaqto' ÿama'q soomayi da i'axa't da n'aqtac.

¹⁵ Qataq ÿanema soomayi da l'añaxa'c da natade'n na dalolaxaic qataq da i'oldaue'c na n'ec leguemaxaicpi.

¹⁶ Qaq 'enaua naua l'enqa'te soua doce, 'eeta': so Simón som ilonec so Jesús da Pedro;

¹⁷ qataq so Santiago qataq so lqaÿa Juan, llalqa so Zebedeo, som ilonque so Jesús da Boanerges, da mayi naigui da 'añaxaiqa, 'eeta'ama na nalataxa;

¹⁸ qataq so Andrés, Felipe, Bartolomé, Mateo, Tomás, Santiago som llalec so Alfeo; Tadeo, Simón mayi chigaqaigui na cananista,

¹⁹ qataq so Judas Iscariote, mayi ÿaneuo co'ollaxa so Jesús. Qaq co'ollaq ime, nachi so Jesús inoxonoigui ca noÿic, nataq'en soua lapaxaguenataqa.

So Jesús qoÿiitega huo'o ca l'ec leguemaxaic

²⁰ Nachi qaltaq qalota so laponeu'a shiÿaxauapi, ivitta'a da sa ishit da chochi deque'e somayipi.

²¹ Qaq co'ollaq hua'axaÿapeguelec de'eda so lauo' l'ecpi so Jesús, nachi anaÿa da ÿauotaique da ÿauec somayi. Cha'ayi mashi qoÿiitega da huo'o da aloic.

²² Nataq'en huo'o na anac na dapaxaguenataxaatapeguec na nqataxacpi mayi chigaqa'a yi Jerusalén. Nachi namayipi 'eeta': –De'eda shiÿaxaua, da mayi netaigui ñi Beelzebú ñim lataxala' nam n'ecpi leguemaxaic, qaq nachiñi ñim do'otaxaatega da l'añaxac da i'odauec ne'ena n'ecpi.

²³ Nachi so Jesús iÿaxanoigui so shiÿaxauapi, nachi ÿauo'o so daloqnaxana, 'eeta': –¿Huá'ago' ca 'eetec ca lataxac da so Satanás maichi n'odela't?

²⁴ Ca nta'a da huo'otaq nÿodacachi nam quetague'pi, nachi maichi deloguiÿa't, nachi que'eca nta'a, camayi sa ishit da 'eetai'.

²⁵ Qataq ca maichi nhuo' l'ecpi da huo'otaq maichi npa'aguena't, nachi camayipi nataq'en sa ishit da 'eetai'.

²⁶ Qaq nachi 'eetec nataq'en so Satanás da huo'otaq maichi npa'agueela't, qataq da colaqapigui da l'añaxac, nachi somayi sa ishit da 'eetai'. Huaña, nachi ishit da imeuo.

²⁷ Qaica ca ishit da inoxoneu'a ca lma' ca shiÿaxaua 'añaxaic da ÿacona na logoxoshitpi, da huo'otaq saxanaxa da icoñidai'. Da nachi 'eetec de'eda, mayi ishit da deuotaxanec na logoxoshitpi.

²⁸ Qaq ÿataqta 'eesa de'eda qami' sa'axatema nagui, da 'enauac na shiÿaxauapi ishit da qaÿapalaxat na lasouaxashitpi, qataq 'enauac nam qauem l'aqtacpi mayi nasaxauec.

²⁹ Qalaxayi ca sa iyacna'pe naua l'aqtaqa da detaxaÿa so Espíritu Santo, nachi camayi ÿataqta sa ishit da huo'o ca nchoxonnataguec. Chaqdata da nachi 'eetai' da huetalec qanqoÿin ca lasouaxashit.

³⁰ Qaq 'eda da 'eetec da l'aqtac so Jesús, cha'ayi somayipi 'eetega da somayi huo'o ca l'ec leguemaxaic.

Aso late'e qataq soua lqaÿa't so Jesús

³¹ Huaña, nachi nvideuo aso late'e so Jesús qataq soua lqaÿa't, qalaxayi soomayi nachi pa'atrauec, nachi qaÿamaxasoxoneu'a somayi.

³² Nachi nam nso'ootañipi mayi datato'ot so Jesús 'enapego' somayi, 'eeta': –Ada 'adate'e qataq daua 'adqaÿa't, daamayi pa'atrauec, 'am nmittapigui.

³³ Qalaxayi somayi 'enapeco': –¿Négue't acam ÿate'e, qataq ca ÿaqaÿañicpi?

³⁴ Ime, nachi ÿamataigui nam nso'ootañi mayi datato'ot somayi, nachi 'enapeco': –'Ena nam 'eeta'am aca ÿate'e, qataq ÿaqaÿañicpi.

³⁵ Cha'ayi ca i'ot ca 'eetapeguec ñi Dios, qaq nachica ca 'eeta'am ca ÿaqaÿa, qataq aca ÿate'e.