Marcos 15 - Nuevo Testamento Toba Sur

So Jesús qaÿataxanot so Pilato

¹ Qaq co'ollaq mashi yi'oxoñi, nachi lapona't som lataxala'pi na ntaxaÿaxanaxanecpi, qataq so nquedoxonecpi qataq som dapaxaguenataxaatapeguec na nqataxacpi, qataq 'enauac nam nta'alpi mayi loicnatac na lataxaguesat. Nachi namayipi ÿauec so Jesús, ÿaxatta'a't na lhua'q, da qoÿaneu'a so Pilato.

² Nachi so Pilato inattac somayi, 'eeta': –¿Nachi'amo' mayi 'am lta'a na judiopi? Nachi so Jesús 'enapeco': –Aja', nachida dam qonapec.

³ Nachi nam lataxala'pi na ntaxaÿaxanaxanecpi ÿataqta qalota nam ÿasaxalec lasouaxashitpi somayi.

⁴ Nachi so Pilato qaltaq ÿi'iguelaxalec da inattac somayi, 'eeta': –¿Tá'ainco' yi sa ishit da 'auasat? Sa 'ameteno' yi ÿataqta qalota na 'am qaÿasaxalec 'adasouaxashitpi.

⁵ Qalaxayi so Jesús sa ishit da ÿasat. Nachi so Pilato ÿataqta sa ÿaÿaten ca 'eetec.

So Jesús qoÿanguet da nalaataguec

⁶ Qaq huo'o naxa da n'onataxac so Pilato da iviteuga soua na'axa'te naponaxaqui', nachi ishit da isouec cam iÿaxaneu'a na shiÿaxauapi.

⁷ Qaq huo'o so netaigui aso ncoñitaxanaxaqui l'enaxat da Barrabás. Somayi huo'o so laÿipi mayi dalaataxan co'ollaq qai'ottapeguec ca nta'a.

⁸ Nachi se'eso shiÿaxauapi iÿaxanot so Pilato da yaqto' i'ot da n'onataxac naxa, da ishit da huo'o ca isouec se'eso na'a'q.

⁹ Nachi so Pilato 'enapeco': –¿Qami' qanshiitaique peta'a da sesouec da lta'a na judiopi?

¹⁰ Cha'ayi somayi ÿauatton da chochi qanquiÿa so Jesús, ÿoqo'oyi nam lataxala'pi na ntaxaÿaxanaxanecpi ÿaneu'a somayi.

¹¹ Qalaxayi nam lataxala'pi na ntaxaÿaxanaxanecpi, namayipi ÿayina'a na shiÿaxauapi, da yaqto' iÿaxaneu'a da qaisouec so Barrabás.

¹² Nachi so Pilato inat somayipi, 'eeta': –¿Qaq huá'ago' ca shiitec ca lataxac dam qoñiitega lta'a na judiopi?

¹³ Nachi somayipi i'alaqtagui, 'eeta': –¡Qomyi 'auaxaneuo damayi!

¹⁴ Nachi so Pilato 'enapego' somayipi, 'eeta': –Qalaxayi damayi, ¿ca 'éeteco' ca lasouaxashit? Qalaxayi somayipi qaltaq i'alqagui, 'eeta': –¡'Auaxaneuo damayi!

¹⁵ Huaña, nachi so Pilato isouec so Barrabás, cha'ayi nshitaique da qaica ca machicague't na shiÿaxauapi. Qaq co'ollaq imat da damaxasoxoolec da qaiuaxaatac so Jesús, nachi ÿanoigui somayipi, da yaqto' qaiuaxaneuo.

¹⁶ Nachi so allippi ÿauec so Jesús, ÿauegueuga ca nqasoxoc ca lma' so nta'a. Nachi qalapona't 'enauac na huataxanaqpi.

¹⁷ Nachi so Jesús qanapoxonaxanaxaaña so npo' mayi nauedalec na ltogaxa, qataq qoÿanagui na lqaic aso n'onata ÿaxat.

¹⁸ Qaq co'ollaq ime, nachi qai'alaqto'ot, qoÿiita': –¡La', 'am mayi 'am lta'a na judiopi!

¹⁹ Nachi qaiuaxaatapigui na lqaic, qaidotega na coqta, qataq qanqaigoqto'ot, qataq qai'attacoto naua nllicte da 'eeta'am da huo'o naq 'enec qanqoÿin.

²⁰ Qaq co'ollaq ime da n'enaguec somayi, nachi qanqat so lapo' mayi nauedalec na ltogaxa, nachi qoÿanaxanaxaanguilo soua maichi alogo. Nachi qaÿauec da qaiuaxaneuo.

Qaiuaxaneuo so Jesús

²¹ Qaq huo'o so shiÿaxaua mayi lma' yi Cirene, l'enaxat Simón, som lta'a' soua Alejandro qataq Rufo. Somayi chigoqtauga na n'onaxa. Qaq somayi co'ollaq qanatena'aguet, nachi ÿachi qanqoÿin som npe'enaxaqui so Jesús.

²² Nachi qaÿauegueuga so Jesús so 'alhua, l'enaxat Gólgota. De'eda n'aqtac naigui da nqaic lpi'inec lma'.

²³ Nachi qaÿauotaique da qanÿomaxangui so lataxa mayi qaÿalecneguet na qo'ipaq lcha'q, l'enaxat mirra. Qalaxayi so Jesús sa ishit da nÿomgui.

²⁴ Ime, nachi qaiuaxaneuo. Nachi soua huataxanaq lashi' nallittapiguilo soua alogo so Jesús, da yaqto' qanaloguilo soomayi.

²⁵ Qaq mashi qaÿatashiguemgue aso nala' co'ollaq qaiuaxaneuo somayi.

²⁶ Qaq som qoÿittalec da lasouaxashit huetalec da 'eeta': “Lta'a na judiopi.”

²⁷ Nataq'en nachi lÿatchiyigue'm soua dos cachaxaiqa da qaiuaxaadeuo, so 'oonolec soomayi neta'ague qanqoÿin na aloic, qaq so lÿa neta'ague na n'emaq.

²⁸ Huaña, nachi ÿataqta ipacchigui dam 'enapec naua ñiyigui'shi l'aqtaqa ñi Dios, mayi 'eeta': “Camayi qaÿalecnoigui qome na qauemaicpi.”

²⁹ Nachi nam natapeuga se'eso nqa'aic, namayipi ishiueetac, qataq iconnaxaatac na lqaic. Nachi 'eetega somayi, 'eeta': –¡'A! 'Am mayi qonapec da 'anlaxajñi añi n'onaxanaxaqui, qaq tres caua na'axa'te, nachi qaltaq 'aumat da 'an'oxooshiguem,

³⁰ ña 'anca'alaxajla't nagui, 'aunoteeguesop na 'anpe'enaxaqui.

³¹ Qaq nataq'en na lataxala'pi na ntaxaÿaxanaxanecpi qataq nam dapaxaguenataxaatapeguec na nqataxacpi ÿi'eetac somayi, qataq maichi detaqtega't, 'eeta': –Ñimayi ishit da nca'alaxateec ca lÿa, qalaxayi sa ishit da ÿañoxot da maichi nca'alaxajla't.

³² Ñim 'eetega da nca'alaxaqui lta'a na llalaqpi so Israel, da ishit da sauanaqchigui nagui da huenoteeguesop ñi npe'enaxaqui, nachi ishit da sa'amaqtenaq. Qaq ivida'alo soua lÿa't mayi qaiuaxaatrauo, soomayi ishiueetrac so Jesús.

Da 'eetec da l-leuaxa so Jesús

³³ Qaq co'ollaq mashi na'a'q laiñi, nachi huo'o so napalaxa ima'a't 'enauac que'eca 'alhua. Somayi chochi ivida'a so mashi dashi aso nala'.

³⁴ Qaq se'eso mashi dashichiguiñi aso nala', nachi so Jesús ÿataqta n'axannec da l'alaxac, 'eeta': –Eloi, Eloi, ¿lama sabactani?, (de'eda n'aqtac da naigui 'eeta': 'Am ita'a Dios, 'am ita'a Dios, ¿tá'ainco' yi aÿim 'aualat?)

³⁵ Qaq huo'o na hueta'a yi'iyi na hua'aqchigui, nachi namayipi 'eeta': –Ña qan'axaÿaxañiÿa, ñimayi iÿaxaataique so l'aqtaxanaxanec ñi Dios l'enaxat Elías.

³⁶ Nachi somayipi 'oonolec so nqalgoqtac. Qaq co'ollaq imat da ipet aso nauol, depetaxana na lataxa 'iuaxaic, nachi ÿanagui aso coqta, nachi ÿaashiguemec somayi da huotaique da napigoq naq'en. Nachi somayi 'enapeco': –Ña qauaqaiÿa'a ñimayi, ña semejnaq shapeegueto' qom anac ca Elías da nqajñi ñimayi.

³⁷ Nachi so Jesús ÿataqta n'axannec da l'alaxac, nachi ileu.

³⁸ Huaña, nachi som lapoxot aso n'onaxanaxaqui mayi nacchiguingui na laiñi, somayi depoqchiguingui na laiñi, ÿataqta nvidañi se'eso lcolaxa.

³⁹ Nachi som huataxanaq lta'a mayi nachattañi, datato'ot so Jesús, somayi co'ollaq ÿauaachigui somayi da l'alaxac, qataq da 'eetec co'ollaq ileu, nachi somayi 'enapeco': –Ÿoqta 'eesa da ñi'iñi shiÿaxaua, ñimayi llalec ñi Dios.

⁴⁰ Nataq'en huo'o so 'alpi ilotau'a somayi. Qaq somayipi nachi ÿalectaigui aso María mayi lashi yi Magdala, qataq aso lÿa María mayi late'e so Santiago som n'asa qataq so José, qataq aso Salomé.

⁴¹ Se'esoua 'alo, soomayi nachi ca'attagueto co'ollaxa so Jesús qataq itauaata'pe co'ollaq somayi hueta'a yi Galilea. Qataq nataq'en qalota so laÿipi 'alpi ÿalectauo, som nnaictague' so Jesús co'ollaq naÿau'a yi Jerusalén.

So Jesús mashi qailayiñi

⁴² Qaq co'ollaq mashi napaltapiguiñi se'eso na'a'q mayi aÿamaxataxaqui mayi nachi pa'aiguet so na'a'q mataxaqui,

⁴³ nachi anac so José mayi lma' yi pueblo Arimatea. Somayi ÿataqta 'amaqtaqaic, qaq nachi ÿalectaigui nam nta'alpi mayi loicnatac na lataxaguesat. Qaq somayi nataq'en iuattaique da nvi' ca l'onataxanaxac ñi Dios da ilo'ogue 'enauacna. Nachi ÿataqta i'añaxachigui yi lauel da nqo'oneu'a so Pilato, nachi iÿaxaneu'a so l'oquiaxac so Jesús.

⁴⁴ Nachi so Pilato ÿataqta i'aalac da mashi sogote da ileu so Jesús. Nachi iÿaxaneuga som nhuataxanaq lta'a, nachi inattac da 'eesa de'eda.

⁴⁵ Nachi som huataxanaq lta'a co'ollaq i'axat da 'eesa, nachi so Pilato ÿanem so José so l'oquiaxac so Jesús.

⁴⁶ Nachi so José deshijnaxana so hualoq lapagaxaic nsaxaatac, nachi nqajñi so l'oquiaxac so Jesús, nachi ÿaxategue. Qaq co'ollaq ime, nachi ÿachaigui aso huachiqui mayi naigui aso coma', nachi ÿapogui asa'aso huachiqui, dapoxona so coma' lta'adaic.

⁴⁷ Nachi aso María mayi lashi yi Magdala, qataq aso lÿa María mayi late'e so José, soomayi ÿauaachiguilo so qaÿachaña so Jesús.