Marcos 14 - Nuevo Testamento Toba Sur

Qaÿauotaique da qaÿaconeu'a so Jesús

¹ Qaq mashi saxanaxalo caua dos na'axa'te da iviteuga ca laloxoqui da qaiuennate co'ollaq qanayica'ai so Egipto qataq som na'a'q mayi huetoigui da qanallic ana pan mayi qaca aca lalecte. Nachi nam lataxala'pi na ntaxaÿaxanaxanecpi qataq nam dapaxaguenataxaatapeguec na nqataxacpi, namayipi ilotaique ca lataxac da ÿachigoxotchigui da ÿaconeu'a so Jesús da ÿalauat.

² Qalaxayi somayipi 'enapeco': –No'on da sa ishit qome da huetoigui ñaqshinaq na naponaxaqui, yaqto' sa ishit da huo'o ca l'elaxa na shiÿaxauapi.

Aso 'alo mayi icodelec na lqaic so Jesús

³ So Jesús hueta'a yi Betania, netaña ca lma' so Simón mayi qaÿamata'ac da nchiga na l'oc. Qaq somayi co'ollaq ña datatalec ca nqui'axala', nachi nvideuo aso 'alo lasoqta'a aso coma', l'enaxat alabastro. Asomayi nlaqchigui na codaxat, l'enaxat nardo. Somayi ÿataqta qaÿoqteu'a. Nachi asomayi ilaxat, nachi icodelec so codaxat na lqaic so Jesús.

⁴ Nachi huo'o nam ÿalectauo na dalemata, nachi maichi detaqtega't, 'eeta': –¿Tá'ainco' yi chochi qai'en se'eso codaxat?

⁵ Cha'ayi somayi ishíttaxa da ivi' aca trescientos denarios da qaimen, nachi qaitauan na choxodaqpi. Nachi ÿataqta qaÿalemataÿa asomayi.

⁶ Qalaxayi so Jesús 'enapeco': –Qauaqaita'a adamayi. ¿Tá'ainco' yi sa qaualemaxachi? Dam aÿim i'otec adamayi ÿataqta ÿaÿamaqchiguiñi.

⁷ Qami' nachi 'eetai' da qoviita'aguet na choxodaqpi, qaq ÿataqta da ivita da huo'o ca qau'ochiic. Aÿim, qalaxayi sa ishit da nachi 'eetai' da qami' soota'agueta.

⁸ Ada'ada 'alo, adamayi i'ot dam nalotau'a. Adamayi icodelec da i'oquiaxac so codaxat, llaxatemallaxa da saxanaxa da aÿim qailayiñi.

⁹ Qaq ÿataqta 'eesa de'eda qami' sa'axatema, da cam pa'aigue naua laÿil ana 'alhua da qai'axattac de'eda n'aqtac mayi chigaqaigui da nca'alaxa, nachi nataq'en qai'axattac qome de'eda i'ot ada'ada 'alo, yaqto' nachi 'eetai' qome da qaiuennatapega adamayi.

So Judas huotaique da ÿaneuo so Jesús

¹⁰ So Judas Iscariote som 'oonolec soua doce napaxaguenataqa, somayi nqo'oneu'a da detaxaÿapegue' na lataxala'pi na ntaxaÿaxanaxanecpi da ÿauotaique da ÿaneu'a namayipi so Jesús.

¹¹ Qaq somayipi co'ollaq hua'axaÿa de'eda, nachi ÿataqta machiguiñi, nachi qaÿachaxanapecot aso nshiitenaqte da qaishiiten. Nachi so Judas nmittaique ca lataxac da ishit da ÿaneu'a somayipi so Jesús.

Da lqui'axac so qadataxala'

¹² Qaq som l'auaxanec soua na'axa'te naponaxaqui' mayi huaigui da qanallic ana pan mayi qaca aca lalegue anam ÿashiidaxachigui, se'eso na'a'q nachi nalaataxaqui na qagueta mayi qanallic da qaiuennate co'ollaq qanayica'ai so Egipto, nachi soua lapaxaguenataqa inatta'po' so Jesús, qoÿiita': –¿Chaq huá'ague ca 'anshitaique da saxague, da yaqto' saqataxanqai' ca huaña da 'auque'e ca na'a'q huaigui da qaiuennate co'ollaq qanayica'ai so Egipto?

¹³ Nachi somayi ÿama'q soua dos nam lapaxaguenatacpi, nachi 'enapegalo, 'eeta': –Qanqo'oñiu'a qome yi la ciudad. Qaq huaña qome, nachi qauloiÿa'ague ca ÿale ÿachitac aca laco'oña huetagui na l'ec. Qaq nachica qoquiigue.

¹⁴ Qaq cam tateu'a, nachi qoñiÿapega qome cam lalamaxat ca nma', qoñiita': “Ñi qadataxala' 'eeta': ¿Chaq huá'ague ca iqui'aqa', da yaqto' iqui'axa'u naua ÿapaxaguenataqa da sachic ca nallic mayi naigui da qaiuennate co'ollaq qanayica'ai so Egipto?”

¹⁵ Nachi camayi qami' ÿachaxanalo qome yi pa'ashiguem ñi noÿic. Yimayi qalochiguiñi, mashi qaÿaqataxaatai'. Nachi qauqataxañiÿai' qome ca qadqui'axac.

¹⁶ Nachi soua lapaxaguenataqa je'c. Qaq co'ollaq ivildeu'a so la ciudad, nachi ÿataqta ipacchigui 'enauac nam i'axat so Jesús. Nachi soomayi ÿaqataxaadai' so nallic.

¹⁷ Qaq co'ollaq mashi pe, nachi ivideuo so Jesús, nnaictagueto soua doce lapaxaguenataqa.

¹⁸ Nachi somayi co'ollaq mashi datatalec so nqui'axala' da deque'etac, nachi so Jesús 'enapegalo' soomayi, 'eeta': –Ÿataqta 'eesa de'eda qami' sa'axatema, da ñi 'oonolec da qoñiita mayi aÿim lqui'axaua, ñimayi nachiñi ñi aÿim ÿaneuo.

¹⁹ Nachi somayipi ÿataqta daquigoÿa't. Nachi ñi 'oonolec somayipi denataxan, 'eeta': –¿Peta'a nachaÿim? Qataq nataq'en so laÿipi 'eeta': –¿Peta'a nachaÿim?

²⁰ Nachi so Jesús 'enapeco': –Ñimayi nachiñi ñi 'oonolec da qoñiita, qami' doce, ñim ÿauoltenaxanaxaua ne'ena qadqui'axaqui.

²¹ Qalaxayi nachi lataxac, cha'ayi na shiÿaxaua llalec, namayi quetegue da llic naua ñiyigui'shi l'aqtaqa ñi Dios. Qalaxayi ¡ÿataqta choxodaxaso' ñi'iñi shiÿaxaua mayi ÿaneuo namayi da qaÿalauat! 'Onaxaigueso' co'ollaxa da sa ishit da ñiguiñi ñimayi.

²² Qaq co'ollaq ña deque'eta'pe soomayi, nachi so Jesús ÿacona aso pan, nachi ÿanot da n'achiquiaxac ñi Dios. Qaq co'ollaq imat da ncolaxajñi, nachi ÿanoiguilo soomayi. Nachi 'enapeco': –Qolliqui ana'ana, anamayi nachida da i'oquiaxac.

²³ Ime, qataq ÿacona aso ÿomaxaqui. Qaq co'ollaq imat da ÿanot da n'achiquiaxac ñi Dios, nachi ÿanoiguilo soomayi, nachi 'enauaque soomayi da nÿomguilo aso ÿomaxaqui.

²⁴ Nachi 'enapegalo' soomayi, 'eeta': –Ne'ena nachina na itago'q mayi ÿoqta 'itchiguiñi naq'en dam dalaxaic aÿamaxataxac. Ne'enaua itago'q, naamayi taÿa'alo da qaicoldeec, da yaqto' qalota na qanca'alaxateec.

²⁵ Qaq ÿataqta 'eesa de'eda qami' sa'axatema, da nagui nachi tachiguiña da sa lÿa da qaltaq ñiÿomgui ne'ena lli'i ana uvas, to' qom mashi ivita ca na'a'q da sootaigui ca l'onataxanaxac ñi Dios da ilo'ogue 'enauacna, nachi qaltaq ñiÿomgui ca lataxa dalaxaic.

So Jesús i'axata'a so Pedro da 'enac sa ÿauatton somayi

²⁶ Qaq co'ollaq mashi ime da qai'on so n'onec, nachi qanqo'oneuga aso qasoxonaxa mayi nanqa' ana olivos.

²⁷ Nachi so Jesús 'enapegalo soomayi, 'eeta': –'Enauac da qoñiita aÿim qaualachiÿa'a't ne'ena pe, cha'ayi nachi 'enapec naua ñiyigui'shi l'aqtaqa ñi Dios, 'eeta': “Salauat qome ñim ilotague' ana qagueta, nachi ana qaguetapi qome nlagaxattac.”

²⁸ Qalaxayi qom mashi qaltaq aÿim qanca'alaxateec, nachi aÿim sa'auta'a qome yi Galilea.

²⁹ Nachi so Pedro 'enapego' somayi, 'eeta': –Nai'ctoxo' da 'enauac 'am qaÿalata'a't, qalaxayi aÿim sa ishit da 'am salat.

³⁰ Nachi so Jesús 'enapego' somayi 'eeta': –Ÿataqta 'eesa de'eda 'am sa'axatem, da ne'ena pe qom yaqta'a da dos ÿi'iguelaxalec da noÿin ca 'olgaxa, qaq mashi ivi' tres qome da 'anqoleguettac da qonetega aÿim sa 'auauatton.

³¹ Qalaxayi so Pedro ÿataqta ÿi'iguelaqtalec da l'aqtac, 'eeta': –Nai'ctaxa da 'am seleutañi', qalaxayi sa ishit qome da shinapec 'am sa sauatton. Nachi 'enauac so laÿipi qaima'ague de'eda qoÿinapec.

So Jesús nqouagaxaueetac, hueta'a yi Getsemaní

³² Qaq co'ollaq qaivita yi 'alhua l'enaxat da Getsemaní, nachi so Jesús 'enapegalo soua lapaxaguenataqa, 'eeta': –Qanso'oñiiñi qome, qoviita'a ne'ena; aÿim, qalaxayi saicde'eda da ñoqouagaxauen.

³³ Nachi ÿauec so Pedro, Santiago qataq so Juan. Huaña, nachi nomteguet da lta'adaic lcolanaxa qataq da nqui'ic.

³⁴ Nachi 'enapeco': –Añi iquiyaqte ÿataqta daquico, nomteguet da l-leuaxa. Qaq qami' qoviÿa'a qome ne'ena, sa ishit da qau'ochii.

³⁵ Nachi so Jesús taÿa cam cada'ac da qaÿata'a, nachi nqapaxanguet na 'alhua da iÿaxanot ñi Dios da huo'otaq ishit da sa ipagaqneguet da nque'ejnaxac mayi taÿa'a.

³⁶ Qaq co'ollaq nqouagaxaueetac, nachi 'eeta': –'Am ita'a, 'am qaica 'enauac ca 'auqalanapec. Qaq sa ishit qome da aÿim 'apagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot ca maichi shiitapeguec, chaqcata ca maichi qonetapeguec.

³⁷ Ime, nachi nqo'onalo soua lapaxaguenataqa, nachi ilalguete da do'ochite'. Nachi 'enapego' so Pedro, 'eeta': –Simón, ¿mashi 'au'ochita? ¿Sa ishito' da cada'acolec da 'anlotauec?

³⁸ Qanloitauec qome qataq qanqouagaxauñiitac, yaqto' sa ishit da qami' inoxonoiguilo ca qauem qadhuennataqai. Cha'ayi ca shiÿaxaua da lquiyaqteÿaxac ÿataqta nasapatta, qalaxayi da l'oquiaxac mayi qaica ca lasapachaxa.

³⁹ Nachi somayi ÿi'iguelaxa ca nqouagaxaunqa', nachi qaltaq nqouagaxauen, ipacchigui so hua'auchiguiñi l'aqtac.

⁴⁰ Ime, nachi ÿi'iguelaq, qaltaq ilalguete soua lapaxaguenataqa da do'ochite', cha'ayi soomayi naua l'ai'te sa ishit da nlodeec, souaxat na l'ochaqa'. Nachi soomayi sa ÿaÿate'n ca nadeuga.

⁴¹ Qaq mashi ivita da tres da ÿi'iguelaxalo soomayi. Nachi 'enapegalo', 'eeta': –Nagui mayi qau'ochii qataq qanmachiiuec. Hua', nachi tachiguiña, cha'ayi mashi ivita yi laloqo' na shiÿaxaua llalec da qoÿaneu'a na shiÿaxauapi mayi 'itaxaloxoicpi.

⁴² Qaq qoñiishiguem qome. Qolaq, cha'ayi mashi nvi' nam aÿim ÿaneuo.

So Jesús qaÿaconeu'a da qaicoñi'

⁴³ Qaq ña detaqtac so Jesús co'ollaq nvi' so Judas mayi nachiso som 'oonolec soua doce lapaxaguenataqa. Qaq ÿataqta qalota so shiÿaxauapi nnaictague', somayipi huota'a na lainecpi qataq na nponpi qo'ipaq. Qaq somayipi nachi lamaxashic nam lataxala'pi na ntaxaÿaxanaxanecpi da qaitaxaÿapegue' ñi Dios, qataq nam dapaxaguenataxaatapeguec na nqataxacpi qataq na nquedoxonecpi.

⁴⁴ Qaq so Judas mayi nachiso som demenaxan, somayi ÿan co'ollaxa da l'aqtac, 'eeta': –Cam aÿim ñapigoqot, qaq nachica qome ca qauacoñiu'a, qaucoñiyi. Ÿataqta qauaÿamaxachiitec da qauaviqui.

⁴⁵ Nachi somayi co'ollaq nvi', nachi nqo'oneu'a so Jesús. Nachi 'enapego', 'eeta': –'Am ÿataxala'. Nachi napigoqot.

⁴⁶ Nachi qaÿaconeu'a so Jesús, nachi qaÿauec da qaicoñi'.

⁴⁷ Qalaxayi huo'o som 'oonolec soua hueta'agueta som nqatshiguem so lainec, nachi iquesoxouec ana ltela som l-latac so lataxala' na ntaxaÿaxanaxanecpi.

⁴⁸ Nachi so Jesús 'enapego' so shiÿaxauapi, 'eeta': –¿Qami' qauanaqui, qanachiita'pe naua qailonqalli' qataq na qanpoñi da aÿim qauacoñiu'a da aÿim qaucoñiyi, 'eeta'amo' da huo'otaq aÿim cachaxaic?

⁴⁹ 'Enauaque soua na'axa'te da qami' soota'agueta, sapaxaguenataxaatac añi n'onaxanaxaqui, qalaq sa ishito' da aÿim qauacoñiu'a da aÿim qaucoñiyi. Qalaxayi yaqto' ipacchigui dam 'enapec naua ñiyigui'shi l'aqtaqa ñi Dios.

⁵⁰ Nachi 'enauac so lapaxaguenatacpi datauec, n'onaxatchigui so Jesús.

So nsoq mayi datauec

⁵¹ Qaq huo'o so nsoq ca'atta'ague so Jesús, somayi napotaña so lacanec hualoq, nachi somayi qaÿaconeu'a.

⁵² Qalaxayi somayi datauec, n'onaxatchigui se'eso lapo', nachi huetauec.

So Jesús qaÿataxanoigui so nta'alpi mayi i'ot na lataxacpi

⁵³ Nachi so Jesús qai'auaxaachiguiñi da qaÿauegueu'a so lta'a na lataxala'pi na ntaxaÿaxanaxanecpi. Nachi lapona't na lataxala'pi na ntaxaÿaxanaxanecpi, qataq na nquedoxonecpi, qataq na dapaxaguenataxaatapeguec na nqataxacpi.

⁵⁴ Qaq so Pedro ca'atta'ague somayi co'ollaxa, qalaxayi qaÿoqteguet, chochi ivittau'a ca nqasoxoc som lta'a na lataxala'pi na ntaxaÿaxanaxanecpi. Nachi nso'ootañi, ÿalectaigui na huataxanaqpi, ntootapigui so nodec.

⁵⁵ Nachi nam lataxala'pi na ntaxaÿaxanaxanecpi qataq 'enauac na nta'alpi mayi loicnata na lataxaguesat, namayipi nmittaique ca lataxac ca ÿachigoxotchigui da yaqto' ÿanguet ca nalaataguec so Jesús. Qalaxayi sa ishit da qaÿanata.

⁵⁶ Cha'ayi qalota na chochi ÿasaxalec da latenataxanaxac somayi, qalaxayi sa natena't nam l'aqtaxanaxacpi somayipi.

⁵⁷ Qataq huo'o na nachajñi, nachi ÿasaxalec nam saq 'en lasouaxashitpi, 'eeta':

⁵⁸ –Qomi' sa'axasoqchigui damayi co'ollaq 'eeta': “Aÿim ñilaxajñi qome aña'añi n'onaxanaxaqui mayi l'onata nam chochi shiÿaxauapi; qaq ivi' tres na'axa'te, nachi semat da ñi'oxooshiguem aca lÿa n'onaxanaxaqui mayi sa ishit da l'onata na chochi shiÿaxauapi.”

⁵⁹ Qalaxayi ñaqaiyita sa natena't na n'aqtaxanaxacpi.

⁶⁰ Nachi som lta'a na lataxala'pi na ntaxaÿaxanaxanecpi nachaatoigui so laÿipi, nachi inat so Jesús, 'eeta': –¿Qalaq qaico' ca 'ad'aqtac? ¿Chaq huá'ague ca 'eetec ca lataxac nam 'am qaÿasaqtapeguelecpi?

⁶¹ Qalaxayi so Jesús ÿi'imaqtom, sa ishit da ÿasat. Nachi som lta'a na nataxala'pi qaltaq ÿi'iguelaxalec da inat, 'eeta': –¿Peta'a nachi'am qadta'a qadca'alaxaqui, mayi 'am llalec ñim Dios mayi qayi'oxonnatac?

⁶² Nachi so Jesús 'enapeco': –Aja', nachaÿim. Qaq qami' qome qauloiÿa'a ne'ena shiÿaxaua llalec da nso'oota'ague da aloic ñi Dios mayi 'añaxaic, qataq qom ñi'iguelaq, nactaigui na l'oc mayi hueto'ot na piguem.

⁶³ Nachi som lta'a na lataxala'pi na ntaxaÿaxanaxanecpi, somayi ncolaxata'aisalo soua alogo. Damayi naigui da 'eeta lta'adaic. Nachi 'enapeco': –¿Negue'tom ca lÿa seuenaqtaique da qaltaq i'ot ca l'aqtaxanaxac?

⁶⁴ Yi qami' mashi qau'aqaichigui damayi da naua l'aqtaqa ÿataqta npa'agueneto ñi Dios. Qaq ¿huá'ague ca qoñiitec damayi? Nachi 'enauac qaimalec da qoÿanguet da nalaataguec somayi.

⁶⁵ Huaña, nachi huo'o na nqaigoqot somayi, qataq qaÿauo'o so laxataxat na lashic, nachi qaiuaxaatac, qoÿiitega, qoÿiita': –¡Ña 'au'axat chaq négue't na 'am iuaxaatac! Nachi na huataxanaqpi iuaxaatapigui na lashic somayi.

So Pedro 'eetega da sa ÿauatton so Jesús

⁶⁶ Qaq so Pedro ñaq hueta'a ca pa'aguiñi so qasoxoc, nachi nvita aso lamaxashi som lta'a na lataxala'pi na ntaxaÿaxanaxanecpi.

⁶⁷ Qaq asomayi co'ollaq ila'a somayi da ntootapigui so nodec, nachi iloto'ot, nachi inato', 'eeta': –'Am peta'a nataq'en 'annaictague' de'eda Jesús mayi Nazaret l'ec.

⁶⁸ Nachi so Pedro 'enapeco': –Aque', sa sauatton damayi, qataq sa saÿaten dam qonetega. Nachi somayi taueegue da laÿi so lasom. Huaña, nachi noÿin so 'olgaxa.

⁶⁹ Nachi aso namaxashi qaltaq ÿamatto'ot somayi, nachi 'enapego' nam hueta'a yi'iyi, 'eeta': –De'eda shiÿaxaua nachida da 'oonolec namayipi.

⁷⁰ Qalaxayi somayi qaltaq nqoleguettac. Qaq co'ollaq lcopa'a, nachi na hueta'a yimayi qaltaq 'eetega somayi, 'eeta': –'Am ÿoqta 'eesa da nachi 'adaÿipi namayipi, cha'ayi 'am 'auachigaqa'ague da Galilea, qataq naua 'ad'aqtaqa yi nachi 'eeta'ama namayipi.

⁷¹ Nachi so Pedro ÿataqta 'eesa naq'en da l'aqtac qataq 'eetega da qaÿalauat da huo'otaq ÿauatton somayi, 'eeta': –Aque', sa sauatton de'eda shiÿaxaua mayi aÿim qau'axachiitapeguem.

⁷² Huaña, nachi so 'olgaxa qaltaq noÿin. Nachi so Pedro tachigui yi lauel da l'aqtac co'ollaxa so Jesús, co'ollaq 'eeta': “Qom yaqta'a da dos ÿi'iguelaxalec da noÿin ca 'olgaxa, qaq mashi ivi' qome da tres da 'avi'iguelaxalec da qonetega aÿim sa 'auauatton.” Nachi somayi co'ollaq tachigui lauel de'eda, nachi noÿiitac.