Marcos 11 - Nuevo Testamento Toba Sur

So Jesús inoxoneu'a yi Jerusalén

¹ Qaq co'ollaq mashi qanayiitau'a yi Jerusalén, mashi qaiviteu'alo soua pueblolqa, l'enaxat da Betfagé qataq Betania, nalottalo aca qasoxonaxa mayi nanqa' ana olivos. Nachi so Jesús ÿama'q soua dos lapaxaguenataqa.

² Nachi 'enapegalo, 'eeta': –Qanqo'oñiÿa qome yi pueblolec mayi ñaloqotta. Qaq qom qavichiÿa, nachi qauloÿalec ca 'ashina qaicoñittai', camayi sa ÿauanapega da qanayiilec. Nachi qausoiuec qome, aÿim qanaviquiÿa.

³ Qaq da huo'o ca qami' ina't, da ta'ainco' da qoñiitec de'eda, nachi qoñiÿapega qome da ñi qadataxala' iuen. Qalaxayi qom imat namayi, nachi ñi'iguelaxat.

⁴ Nachi soomayi je'c, nachi ilodalec so 'ashina qaicoñittai', huaqta'ai' ca lasom, netau'a na laÿi ca nqa'aic. Nachi isodeec.

⁵ Qaq huo'o na hueta'a somayi na inatta'pe soomayi, 'eeta': –¿Négue't cam qoñiitapeguec? ¿Tá'ainco' yi qausoitapeguec na 'ashina?

⁶ Nachi soomayi da'aqtaxaadem somayipi, i'enaxatchiyigui da l'aqtac so Jesús. Nachi qai'aqta'alo da je'c.

⁷ Ime, nachi qaÿauega so 'ashina so Jesús, nachi qaÿasaxalguete soua alogo, nachi so Jesús nelec somayi.

⁸ Qaq ÿataqta qalota na lapaxañi na lapo' da ÿachangui so nqa'aic. Qataq huo'o na iquesoxouec ana qo'ipaq lcoue, nachi ÿachangui so llic somayi.

⁹ Nachi nam hua'autapi, qataq nam nca'ataxaatauo, namayipi i'alaqtagui, 'eeta': –¡Huo'o da lli'oxoyic ñi Dios! ¡Ÿataqta no'on da lliquiaxac nam nactaigui da l'enaxat ñi qadataxala'!

¹⁰ ¡Ÿataqta no'on dam natai' n'onataxanaxac, mayi 'eeta'am da l'onataxanaxac so qadta'a David! ¡Huo'o da lli'oxoyic ñi Dios!

¹¹ Nachi so Jesús inoxoneu'a yi Jerusalén, qataq nataq'en aso n'onaxanaxaqui late'edai. Qaq co'ollaq imat da imeteetac 'enauac nam huo'o, nachi taÿa yi Betania, lÿata'pe soua doce lapaxaguenataqa, cha'ayi mashi avit.

So Jesús nlaxa aso higo lchiyic mayi qaca aca ala

¹² Qaq so lÿa na'a'q, co'ollaq queda'ai yi Betania, nachi so Jesús nomteguet na lqouaxa.

¹³ Nachi ilota'a aso higo lchiyic co'ollaq ña qaÿoqta, nachi demejnaxaata da huo'otaq huo'o ana ala. Qalaxayi qaca aca ÿanata, nda'a't ana laue, cha'ayi saxanaxa da laloxoqui da huo'o ana ala.

¹⁴ Nachi so Jesús 'enapego' asomayi, 'eeta': –Nagui nachi tachiguiña qome da sa ishit da huo'o ca chic ca alaÿaxac da qoneta. Qaq soua lapaxaguenataqa hua'aqchiguilo de'eda.

So Jesús do'otaxaalec aso n'onaxanaxaqui

¹⁵ Qaq co'ollaq ivildeu'a yi Jerusalén, nachi so Jesús inoxoneu'a aso n'onaxanaxaqui. Huaña, nachi i'odauec nam imeetac na lmenecpi qataq nam deshijnaxaatega na nmenec. Qataq ÿamaxañi na nmenaxala'pi nam nmeetega't naq'en ana alom na shiÿaxauapi, qataq ana nso'onaxaquipi nam imeetac na qoto'pi.

¹⁶ Nachi sa ishit da huo'o ca ÿashinem da ÿauota'a ca lli'ac da tatoigui aso n'onaxanaxaqui.

¹⁷ Huaña, nachi dapaxaguenataxaatac, 'eeta': –Naua nanettrañi l'aqtaqa ñi Dios 'eeta': “Ne'ena ima', namayi qaÿamata'ac da qouagaxaunqa', nqouagaxaunqa' na 'enauac ÿotta'a't shiÿaxauapi.” Qalaxayi qami' qau'ochiic namayi da nqañoxotaqa' na huotaxanaxaicpi.

¹⁸ Nachi hua'aqchigui de'eda nam lataxala'pi na ntaxaÿaxanaxanecpi da qaitaxaÿapegue' ñi Dios qataq nam dapaxaguenataxaatapeguec na nqataxacpi. Nachi namayipi nmittaique ca lataxac da yaqto' ÿalauat somayi souaxat da ñi'itega, cha'ayi 'enauac na shiÿaxauapi ÿataqta huo'o da l'aalaxa somayi naua lapaxaguenataxanaxaco.

¹⁹ Qalaxayi co'ollaq mashi pe, nachi so Jesús ca'ai yi la ciudad.

Aso higo lchiyic daqaqa

²⁰ Qaq so nte'etom so lÿa na'a'q, nachi tatrelec aso higo lchiyic, nachi qaila'ata asomayi da daqaqta, ividanguilo naua lpa'a'yi na lqaxaÿaxa.

²¹ Nachi so Pedro tachigui lauel co'ollaxa da l'aqtac so Jesús, nachi 'enapego' somayi, 'eeta': –'Am mayi 'auapaxaguenataxaatac, ña 'aula'a adam higo lchiyic mayi 'anlaqtega caillayi, adamayi daqaqa.

²² Nachi so Jesús 'enapeco': –Ÿataqta qauauo'oi qome ca qadpi'iÿaxaqui ñi Dios.

²³ Ÿataqta 'eesa de'eda qami' sa'axatema, da huo'o ca camachicague't da huo'otaq 'enapega añi qasoxonaxa da 'eeta': “Qoca'ai qome na qonetaña, nachi 'angui aso auaxai,” qaq camayi da sa ishit da ÿoqolguet da l'aqtac, nda'a't da i'amaqten, nachi ishit da ipacchigui.

²⁴ Qaq ÿoqo'oyi qami' shinapegalo da 'enauac nam qauÿaxañiÿaique da qanqouagaxauñiitac, da huo'otaq ÿataqta qau'amaqchiñi da qauacoñiiguet, nachi ishit da ipacchigui.

²⁵ Qaq da huo'otaq qanqouagaxauñiitac, nachi da huo'otaq huo'o ca qanasouaxachiÿa'ai' qadÿai, qalaq camayi qauchoxoyiñi, yaqto' nataq'en ñim qadta'ai mayi neto'ot na piguem, ñimayi ishit da ÿapalaxat ca qadasouaxashichi.

²⁶ Cha'ayi da sa qauchoxonnataxañi, nachi ñim qadta'ai mayi neto'ot na piguem, ñimayi sa ishit da ÿapalaxat na qadasouaxashichi.

Da 'enec so Jesús

²⁷ Qaq co'ollaq ÿi'iguelaxadeu'a yi Jerusalén. Nachi so Jesús co'ollaq huetaigui aso n'onaxanaxaqui, nachi naÿa somayi nam lataxala'pi na ntaxaÿaxanaxanecpi da qaitaxaÿapegue' ñi Dios qataq nam dapaxaguenataxaatapeguec na nqataxacpi qataq nam nquedoxonecpi.

²⁸ Nachi qainattac somayi, qoÿiita': –¿Huá'ague ca 'auachigoxota'ague ca 'an'aqtac da huo'o mshi 'au'ot de'eda? ¿Négue't ca 'am ÿanem de'eda 'adamaxasoxonaxac?

²⁹ Nachi so Jesús 'enapeco': –Aÿim nataq'en huo'o da inataxanaxac da qoñiita. Qom ishit da aÿim qau'aqtaxañiim, nachi ishit da qami' sa'axatema cam sachigoxota'ague ca ñi'aqtac da huo'o mshi so'ot de'eda.

³⁰ ¿So Juan chaq négue't co'ollaxa ca ÿamaxalec da dachilaxanataxan? ¿Peta'a ñi Dios, huo'otaq ca chochi shiÿaxaua? Ñaq aÿim qau'aqtaxañiim.

³¹ Nachi somayipi jec da maichi ncotatega't, 'eeta': –Da qomi' shinaqpec da nachiñi ñi Dios ñi ÿamaxalec, nachi ÿoqta qome da qomi' 'enapegalo da 'eeta': “Qalaq ¿tá'ainco' qone' yi sa qau'amaqchiñi?”

³² ¿Qalqo' shinaqpec da nachina na shiÿaxauapi na ÿamaxalec? Cha'ayi somayipi ÿataqta huo'o da lli'iÿaxa na shiÿaxauapi, cha'ayi qaÿaÿaten da 'enauac da qai'amaqten so Juan da ÿoqta 'eesa da l'aqtaxanaxanec ñi Dios.

³³ Nachi qoÿinapega so Jesús, qoÿiita': –Qomi' sa saÿajnaq. Nachi so Jesús 'enapego' somayipi, 'eeta': –Aÿim nataq'en sa ishit da qami' sa'aqtaxanema cam sachigoxoto'ot ca ñi'aqtac da huo'o mshi so'ot de'eda.