Marcos 10 - Nuevo Testamento Toba Sur

So Jesús i'axat da lataxac ca nalate' aca lhua

¹ So Jesús ca'ai yi Capernaum, nachi nqo'ona yi 'alhua l'enaxat Judea qataq yim 'alhua mayi pa'aigue da nala' lliguishiguem so tala Jordán. Huaña yimayi, nachi na shiÿaxauapi qaltaq laponeu'a ca hueta'a. Nachi somayi qaltaq dapaxaguenataxaatac, cha'ayi nachi n'onataxac.

² Nachi na fariseopi nachaateu'a somayi da qaÿauotaique da chochi huo'o qanqoÿin ca lasouaxashit. Nachi qainattac somayi da huo'otaq qaÿaÿamaxadeeta ca shiÿaxaua da nalate' aca lhua.

³ Nachi somayi 'enapeco': –¿Négue't ca qami' ÿamaxalguete co'ollaxa so Moisés?

⁴ Nachi somayipi 'enapeco': –Qomyi so Moisés ÿashiitem ca shiÿaxaua da huo'otaq ÿalat aca lhua, nachi ÿauo'o aca lmalate da ÿalat, nachi camayi ishit da dalataxan.

⁵ Nachi so Jesús 'enapego' somayipi, 'eeta': –So Moisés qami' ÿanema co'ollaxa de'eda lamaxasoxonaxac, souaxat da ÿataqta qadamchiguilo naua qadquiyaqchilli'.

⁶ Qalaxayi dam chigoqchiguiña co'ollaq ñi Dios chita'ague da i'ot 'enauacna, qalaq ñimayi “i'ot so shiÿaxaua qataq aso 'alo.”

⁷ “Qaq ÿoqo'oyi ca shiÿaxaua, camayi ca'ai ca lta'a qataq aca late'e, da yaqto' lmayaxaua aca lhua.

⁸ Huaña, nachi caamayi 'eeta'am da 'oonolec da lataxa'c.” Nachi caamayi sa ishit da 'eeta'am da dos, nda'a't da 'eeta'am da 'oonolec.

⁹ Qaq ÿoqo'oyi ca shiÿaxaua sa ishit da isoguilo cam ÿadonaxanaxana't ñi Dios.

¹⁰ Qaq co'ollaq huetra'a so lma', nachi soua lapaxaguenataqa qaltaq inatta'pe so Jesús, qainataxaatapeguec de'eda.

¹¹ Nachi so Jesús 'enapeco': –Ca shiÿaxaua da ÿalat aca lhua qaltaq huadonguet aca lÿa 'alo, nachi camayi huo'o da lasouaxashit, cha'ayi huadoolec aca hua'auchiguiñi lhua.

¹² Qaq aca 'alo da ÿalat ca lhua, nachi huadonguet ca lÿa ÿale, nataq'en acamayi huo'o da lasouaxashit, cha'ayi huadonaxai.

So Jesús ÿanem da no'on lliquiaxac so ñaqpiolec

¹³ Nachi huo'o na qanauegueu'a ñaqpiolec so Jesús, da yaqto' somayi ÿashil-lec, qalaxayi soua lapaxaguenataqa nachi nlaqtrega na nauectapegueuo namayipi.

¹⁴ Qaq so Jesús co'ollaq ÿauaachigui de'eda, nachi denoÿai'. Nachi 'eetegalo soomayi, 'eeta': –Ña qauauaqaita'a na ñaqpiolec da aÿim nau'a, sa ishit da sa qanashiñiiguet, cha'ayi de'eda l'onataxanaxac ñi Dios nam huetaigui nachina na 'eeta'am namayipi.

¹⁵ Qaq ÿataqta 'eesa de'eda qami' sa'axatema, da ca sa ishit da i'enaxat ca nogotolec da ÿaconguet da l'onataxanaxac ñi Dios da ilo'ogue 'enauacna, nachi camayi sa ishit da inoxoneuo.

¹⁶ Nachi so Jesús naueguela't na ñaqpiolec da nsoqtauo, nachi ÿanem da no'on lliquiaxac, qataq 'enauac ÿashil-lec.

So nsoq sallaxanec detaqtague' so Jesús

¹⁷ Nachi so Jesús qaltaq jec, nachi anac so shiÿaxaua nqalgoqta'ague. Nachi i'adoto naua l-llicte, nachi inattac somayi, 'eeta': –'Am soxodaic mayi 'auapaxaguenataxaatac, ¿huá'ago' ca shiitec, da yaqto' senoxoneu'a da nca'alaxa mayi qaica ca loga't?

¹⁸ Nachi so Jesús 'enapeco': –¿Tá'ainco' yi qonetega da aÿim soxodaic? Yi saqca ca soxodaic, 'oonolec ñim Dios mayi soxodaic.

¹⁹ 'Am 'auaÿaten peta'a na nqataxacpi mayi 'eeta': “Sa ishit da 'ancachitapeguelec aca 'adhua; sa ishit da 'aualaataxan; sa ishit da 'aucachi; sa ishit da 'anashipegaxan; sa 'auatenachit ca 'adÿa; 'aualaxalec ca 'adta'a qataq aca 'adate'e.”

²⁰ Nachi se'eso shiÿaxaua 'enapeco': –'Am mayi 'auapaxaguenataxaatac, 'enauac ne'ena so'ottac, chigoqchiguiña co'ollaq aÿim nogotolec.

²¹ Nachi so Jesús ÿataqta huo'o da lauochi co'ollaq ÿamato'ot somayi. Nachi 'enapego', 'eeta': –Ñaq 'oonolec da saxanaxa da 'au'ot, 'eeta': 'auesoma, 'aumen qome 'enauac na 'am hueto'ot qataq 'ai'anoigui na choxodaqpi, yaqto' huo'o qome ca 'adsallaxa da piguem. Qaq qom 'adme, nachi aÿim qoquegue, nai'ctaxa da aÿim 'auleetalec.

²² Qalaxayi somayi co'ollaq hua'axaÿa de'eda, nachi sa ÿamaqchit, nachi jec, daquigoigue, cha'ayi ÿataqta sallaxanec.

²³ Nachi so Jesús ÿamatapiguiñi, nachi 'enapegalo' soua lapaxaguenataqa, 'eeta': –¡Ÿataqta huo'o da lqalaic na sallaxanecpi da inoxoneu'a da l'onataxanaxac ñi Dios da ilo'ogue 'enauacna!

²⁴ Nachi soua lapaxaguenataqa ÿataqta i'elaqchi't de'eda l'aqtac, qalaxayi so Jesús qaltaq ÿi'iguelaxalec da l'aqtac, 'eeta': –Qami' ÿalaqpi, qami' shinapegalo da ¡ÿataqta huo'o da lqalaic da inoxoneu'a da l'onataxanaxac ñi Dios nam pe'etega da nsallaxa!

²⁵ Ÿataqta huo'o da lqalaic aca shiguiÿac l'enaxat camello da taigui qanqoÿin ca lauac aca qana, qalaxayi ÿataqta ÿapacteec da lqalaic ca sallaxanec da inoxoneu'a da l'onataxanaxac ñi Dios.

²⁶ Qaq co'ollaq hua'aqchiyigui de'eda soomayi, nachi ÿataqta i'elaqchi't. Nachi maichi nnattega't, 'eeta': –Qaq ¿negue'tom qone' ca ishit da qanca'alaxateec?

²⁷ Nachi so Jesús ÿamataiguilo soomayi, nachi 'enapeco': –Nam shiÿaxauapi sa ishit da ÿañoxot de'eda, qalaxayi ñi Dios ishit, cha'ayi ñimayi qaica ca ÿaqalanapec.

²⁸ Nachi so Pedro 'enapego' somayi, 'eeta': –'Am qadataxala', qomi' mashi ñi'onaxataqchigui 'enauac nam qomi' hueto'oto, nachi 'am seca'ataqtague'.

²⁹ Nachi so Jesús 'enapeco': –Ÿataqta 'eesa de'eda qami' sa'axatema, da camachicague't shiÿaxaua da huo'otaq ÿalat ca lma', lqaÿa qataq aca lqaÿa, lta'a huo'otaq late'e, huo'otaq lhua qataq llalaqpi, huo'otaq ca n'alhua, souaxat aÿim qataq da n'aqtac mayi chigaqaigui da nca'alaxa,

³⁰ nachi camayi ÿaconguet nagui da ñaq hueta'a ana 'alhua ca cien lma'pi, qataq ca lqaÿañicpi, lqaÿanpi 'alpi, late'elpi, qataq llalaqpi, qataq na n'alhuapi. Qataq nai'ctaxa da huo'o na ncanagueguesat, qalaxayi cam ñaq natai' 'alhua camayi qoÿami' qome ca nca'alaxa mayi qaica ca loga't.

³¹ Qalaxayi qalota qome nam nagui l'auaxanecpi nam pa'ateec qome qanqoÿin, qalaxayi nataq'en qalota qome nam nagui pa'ateecpi, nam l'auaxanecpi qome qanqoÿin.

So Jesús qaltaq i'axata'a da l-leuaxa

³² Qaq mashi qanayiitangui so nqa'aic mayi taÿa'ague da Jerusalén, qaq so Jesús hua'auta, qaq soua lapaxaguenataqa nca'attrauo, qaq soomayi ÿataqta i'elaqtapigui'salo qataq ñi'itapigui'salo. Nachi so Jesús qaltaq iÿaxanoiguilo soua doce lapaxaguenataqa da iÿotaugalo, nachi ÿataqta da'aqtaxaatema soomayi dam huaigui qome somayi.

³³ 'Eeta': –Qami' qauaÿajñiita da nagui qomi' saxague da Jerusalén. Qaq huaña qome yimayi, nachi na shiÿaxaua llalec qoÿaneu'a na lataxala'pi na ntaxaÿaxanaxanecpi da qaitaxaÿapegue' ñi Dios qataq na dapaxaguenataxaatapeguec na nqataxacpi. Qaq namayipi qome nachi ÿauo'o ca ñalaataguec, qataq aÿim ÿaneu'a na chigoxouecpi.

³⁴ Nachi namayipi qome ÿataqta aÿim i'en, qataq aÿim iuaxaatalec, qataq nqaigoqtaigui na ÿashic qataq aÿim ÿalauat. Qalaxayi qom mashi ivi' caua tres na'axa'te, nachi qaltaq aÿim qanca'alaxateec.

Dam iÿaxaadaique soua Santiago qataq so Juan

³⁵ Nachi so Santiago qataq so Juan som llalqa so Zebedeo, soomayi nqochiideu'a so Jesús. Nachi 'enapegalo', 'eeta': –'Am mayi 'auapaxaguenataxaatac, ñishoqtaique da qomi' 'ai'anema cam seÿaxanaqaique.

³⁶ Nachi somayi ina't soomayi, 'eeta': –¿Négue't ca qanshiitaique da qami' sanema?

³⁷ Nachi soomayi 'ena'po': –Qomyi qomi' sauoqtaique da qom 'am qonalec ca 'ad'onataxanaxac mayi qaica ca 'en'am da lli'oxoyic da 'am nta'a, qaq no'on da ca 'oonolec da shinaqta nso'oota'ague qome na 'oic, qaq ca lÿa neta'ague na 'an'emaq.

³⁸ Nachi so Jesús 'enapegalo' soomayi, 'eeta': –Qami' sa qauaÿajñi ca llic da qauÿaxañiitapegueu'a. ¿Peta'a ishito' da qauachii da que'ejnaxac mayi 'ico' da aÿim qanÿomaxangui qome, qataq dam achilaxac mayi saigui qanqoÿin?

³⁹ Nachi soomayi 'ena'po': –Aja', seshitaq. Nachi so Jesús 'enapeco': –'Eesa da qami' ishit qome da qauachii da que'ejnaxac mayi 'eeta'am da aÿim qanÿomaxangui, qataq da achilaxac mayi saigui qome.

⁴⁰ Qalaxayi da lataxac da yaqto' qanso'oota'ague na aÿoic qataq na ñi'emaq, qalaq damayi sa ishit da aÿim qoÿami' da yaqto' san. Cha'ayi nachicata cam sogote da qaÿaqataxaatapigui' mayi qoÿami' damayi.

⁴¹ Nachi soua lÿa't diez lapaxaguenataqa co'ollaq hua'aqchiguilo de'eda, nachi qaÿalemataÿalo soua Santiago qataq so Juan.

⁴² Nachi so Jesús iÿaxanoiguilo soomayi, nachi 'enapegalo, 'eeta': –Qami' sogote da qauaÿajñi da lataxac na nta'alpi mayi ilotague' na ÿotta'a't shiÿaxauapi, da namayipi 'eeta'am ca 'aco' da ÿamaqtac na laÿipi, qaq nam 'añaxaicpi, namayipi ÿataqta i'otec da ÿalaxaguet naq'en da lamaxasoxonaxac nam laÿipi.

⁴³ Qaq da qoñiita, qalaxayi sa ishit da qoñiitec de'eda. Chaqdata da ca nshitaique da 'amaqtaqaic da qoñiita, qalaq camayi nachica ca huapegue' na laÿipi;

⁴⁴ qataq camachicague't da qoñiita, da nshitaique da nataxala', qalaq nachica ca l-latac 'enauac na laÿipi.

⁴⁵ Cha'ayi na shiÿaxaua llalec, namayi saq anac da yaqto' qanayiutapegue'. Chaqdata da huapec qataq da ÿan da nachaalataxac da 'eeta'am naq'en aca lashiue, da yaqto' qalota na qanca'alaxateec.

So Jesús nauaañi naq'en so Bartimeo

⁴⁶ Qaq mashi qaivita yi la ciudad Jericó. Nachi so Jesús co'ollaq mashi ca'ai yimayi, nnaictagueto soua lapaxaguenataqa qataq qalota so laÿipi shiÿaxauapi. Nachi huo'o so qanamaic l'enaxat Bartimeo. Somayi llalec so Timeo. Qaq somayi nso'ootañi, netau'a na laÿi so nqa'aic, dashilaxaatac.

⁴⁷ Qaq somayi co'ollaq hua'axaÿa'aguet so Jesús mayi Nazaret l'ec, nachi somayi i'alaq, 'eeta': –¡'Am Jesús, mayi 'am llalec so David, aÿim 'auchoxoden qome!

⁴⁸ Nachi qalota na nlaqtega somayi, 'eetega da de'enaxaatai'. Qalaxayi somayi qaltaq nquigaxatteec da lÿaxanaxac, 'eeta': –¡'Am llalec so David, aÿim 'auchoxoden qome!

⁴⁹ Nachi so Jesús vi'iiguet, nachi 'enapeco': –Ña qauÿaxañiÿa ñimayi. Nachi qaiÿaxana so qanamaic, nachi qoÿiitega, qoÿiita': –'An'añaxat qome, qoñishiguem, cha'ayi 'am qanÿaxana.

⁵⁰ Nachi somayi ÿasaxauec so lapo', nachi npadenaxaashiguem da nqo'ona so Jesús.

⁵¹ Nachi so Jesús inattac somayi, 'eeta': –¿Négue't ca 'anshitaique da 'am so'otec? Nachi se'eso qanamaic 'enapeco': –'Am mayi 'auapaxaguenataxaatac, aÿim ñishitaique da ñauaañi.

⁵² Nachi so Jesús 'enapeco': –Qojec qome, mashi 'am no'oita, cha'ayi 'au'amqajnataxan. Huaña, nachi se'eso qanamaic ishit da nauaañi, qanachi ca'ategue so Jesús.