Lucas 22 - Nuevo Testamento Toba Sur

Qaÿauotaique da qaÿaconeu'a so Jesús

¹ Qaq mashi nayiitauga som laloxoqui da qanallic ana pan mayi sa qaÿauo'o aca lalegue mayi ÿashiidaxachigui som huetoigui da qaiuennate so na'a'q co'ollaq qanayica'ai so Egipto.

² Nachi so lataxala'pi na ntaxaÿaxanaxanecpi da qaitaxaÿapegue' ñi Dios qataq som dapaxaguenataxaatapeguec na nqataxacpi, somayipi nmittaique ca ÿachigoxotchigui da ishit da ÿalauat so Jesús, qalaxayi somayipi ÿataqta ñi'iÿa so shiÿaxauapi.

³ Nachi so Satanás inoxonoigui so Judas, da l'enaxat lÿa Iscariote. Somayi nachiso so 'oonolec soua doce lamaxa'shi.

⁴ Nachi somayi nqo'oneu'a da detaxaÿapegue' so lataxala'pi na ntaxaÿaxanaxanecpi, nachi da'aqtaxanem somayipi da 'eetec naq'en da lataxac da ÿaneu'a somayipi so Jesús.

⁵ Nachi somayipi ÿataqta ntootec. Huaña, nachi qaÿachaxanapecot somayi da qaishiiten.

⁶ Nachi somayi ÿasat, nachi nmitaique ca lataxac da ÿaneuo so Jesús da ivita da ndoteec.

Da lqui'axac so qadataxala'

⁷ Qaq mashi iviteuga so na'a'q mayi huetoigui da qanallic ana pan mayi sa qaÿauo'o anam ÿashiidaxachigui. Se'eso na'a'q nachi nalaataxaqui na qagueta llalec mayi qanallic, da yaqto' qaiuennate so na'a'q co'ollaq qanayica'ai yi Egipto.

⁸ Nachi so Jesús ÿamaq so Pedro qataq so Juan, nachi 'enapegalo', 'eeta': –Qoquii qome, qauqataxañiÿai' cam qonoq qom qaiuennate so na'a'q mayi qanayica'ai yi Egipto.

⁹ Nachi soomayi denataxa'n, 'eetra': –¿Chaq huá'ague ca 'anshitaique da sachaqa'ague camayi da saqataxanqai'?

¹⁰ Nachi so Jesús 'enapeco': –Qami' qom qaunoxoñiu'a yi la ciudad, nachi qanachiñiÿalec qome ca shiÿaxaua ÿachitac aca laco'oña 'alhua. Qaq nachica qome qauca'achiigue, chochi qaviyiitau'a ca nma' mayi tateu'a.

¹¹ Nachi qoñiÿapega qome cam lma' que'eca noÿic, qoñiita': “Ñim dapaxaguenataxaatac 'eeta': ¿Chaq huá'ague cam noÿic mayi nqui'aqa', da yaqto' sequi'iÿa'ai' na ÿapaxaguenatacpi da sachiguenaq ca nallic mayi naigui da qaiuennate co'ollaq qanayica'ai yi Egipto?”

¹² Nachi qami' ÿachaxanalo qome yi nqui'aqa' ÿataqta lta'adaic mayi pa'ashiguemec na l-laq ñi noÿic, sogote da qaÿaqataxaatai'. Huaña, nachi qauqataxañiÿai' qome cam qonoq.

¹³ Nachi soomayi je'c, nachi ipacchigui da nateedalec 'enauac nam 'eetega so Jesús. Huaña, nachi ÿaqataxaadai' so nallic.

¹⁴ Qaq co'ollaq ivita so laloqo' da nqui'axac, nachi so Jesús qataq soua lamaxa'shi nachi nso'ooyiñi da qaÿatalec so nqui'axala'.

¹⁵ Nachi so Jesús 'enapeco': –¡Aÿim ÿataqta huo'o da iyaxa da qami' ñiuanaxa'u ne'ena nallic, llaxatemallaxa da saxanaxa da seleu!

¹⁶ Cha'ayi aÿim shinapec da nagui sa ishit qome da qaltaq shi'iguelaxalec da sachic ne'ena nallic, chochi ivitta'a ca na'a'q qom ivita cam laloqo' da ilo'ogue 'enauacna ñi Dios. Huaña, nachi ÿoqta nalochiguiñi ne'ena nallic.

¹⁷ Nachi ÿacona asom ÿomaxaqui. Ime, nachi ÿanot da n'achic ñi Dios. Qaq co'ollaq ime, nachi 'eeta': –Qauacoñiiguet ana'ana ÿomaxaqui, nachi ñi 'oonolec da qoñiita ÿami' ca lÿa.

¹⁸ Cha'ayi aÿim shinapec nagui da sa ishit da qaltaq shi'iguelaxalec da ñiÿomgui ne'ena lli'i ana uvas, to' qom ivita ca laloqo' da ilo'ogue 'enauacna ñi Dios.

¹⁹ Qaq co'ollaq ime, nachi ÿacona aso pan, nachi ÿanot da n'achic ñi Dios. Ime, nachi icolaxachigui, nachi ÿanoiguilo soomayi, nachi 'enapeco': –Ana'ana pan nachi naigui da i'oquiaxac mayi qoÿanguet da nalaataguec, souaxat da qoñiita. Qaq qau'ochi qome damayi, yaqto' sa ishit da aÿim qaucouaÿa'ai.

²⁰ Qaq nachi i'enaxatteguet nataq'en aso ÿomaxaqui co'ollaq mashi ime da nqui'axac, nachi 'eeta': –Ana'ana ÿomaxaqui nachana ana naigui da dalaxaic aÿamaxataxac mayi ÿataqta 'itchiyiñi naq'en naua itago'q mayi qaicoldeec da qaitaunec da qoñiita.

²¹ Qaq nagui ñi aÿim ÿaneuo qome, ñimayi nataq'en ñiso'onaqta'ai', datatalec ne'ena qadqui'axala'.

²² Qalaxayi ne'ena shiÿaxaua llalec, namayi quetelec dam lliquiaxac mayi sogote da qoÿiitañi, qalaxayi ¡choxodaxaso' ñaqshin ñim shiÿaxaua mayi ÿauotaique da ÿaneuo namayi!

²³ Huaña, nachi maichi nnattega't somayipi da chaq negue't cam ÿaneuo somayi.

Qancotatapigui da chaq negue't ca ÿoqta ÿi'oxodaq

²⁴ Huaña, nachi ncotatega't somayipi da chaq negue't ca ÿoqta ÿacteec da qaÿamata'ac da ÿi'oxodaq.

²⁵ Qalaxayi so Jesús 'enapeco': –Nam nta'alpi mayi ilotague' na ÿotta'a't shiÿaxauapi, namayipi ÿataqta huo'o naq 'enec da damaxasoxonapec, qataq nam nataxala'pi mayi ilotague' nam shiÿaxauapi da qaitaxaÿa namayipi qalaq qaÿamata'ac da no'on shiÿaxauapi.

²⁶ Qami', qalaxayi sa ishit da nachi qoñiitec de'eda. Cha'ayi ca 'oonolec da qoñiita da ÿi'oxodaq, qalaq camayi i'enaxat qome ca ña nsoqolec; qaq cam damaxasoxonapec, qalaq 'eeta'am qome ca chochi namaxashic.

²⁷ Qaq ÿoqo'oyi ¿chaq négue't cam ÿoqta ÿi'oxodaq, peta'a cam nso'ootañi da datatalec cam nqui'axala' da deque'etac, huo'ochaq cam qaÿamaqtac? Qaq ¿peta'a sa ishito' da nachiso som datatalec so nqui'axala' som ÿi'oxodaq? Aÿim, qalaxayi qami' sootaiguilo, shiita'am cam chochi qaÿamaqtac.

²⁸ Qaq qami' mayi nachi 'eetai' da aÿim qannaiquiitapegue', qaq qanqui'itaxañiigui 'enauac nam ñique'ejnaxaguesat.

²⁹ Qaq ÿoqo'oyi aÿim qami' sanema qome ca qad'onataxanaxaqui da qauloÿigue 'enauacna, 'eeta'am da 'eetec ñi ita'a da aÿim ÿanem da i'onataxanaxac,

³⁰ yaqto' qami' ñiuanaxa'u, qataq qami' ñiÿomaxa'u cam iqui'axala' qom mashi sootaigui ca i'onataxanaxac, qataq nataq'en qanso'oñiingui acam so'onaxaquipi mayi ÿi'oxodaq, da yaqto' qanmichi nam llalaqpi som doce llalaqpi so Israel.

So Jesús i'axata'a da nqolguetaxac so Pedro

³¹ Nataq'en 'enapeco' so qadataxala': –Simón, Simón, ña 'aula'a so Satanás mashi qami' iÿaxaneu'alo da 'ico' qami' ichigo'q, 'eeta'am naq'en da qaichigoq ca trigo.

³² Qalaxayi aÿim 'am ñoqouagaxaueetapeguelec, da yaqto' sa ishit da saqca da 'adpi'iÿaxac. Qaq 'am qom ivita da aÿim 'añi'iguelqot, nachi 'autauan qome na 'adqaÿañicpi da yaqto' nachi 'eetai' da lpi'iÿaxac.

³³ Nachi so Simón 'enapeco': –'Am ÿataxala', aÿim qaica ca shiga da 'am iÿateuo aca ncoñitaxanaxaqui, ivitta'a da 'am seleutañi'.

³⁴ Qalaxayi so Jesús 'enapeco' somayi, 'eeta': –Pedro, nagui 'am shinapega da qomele qom yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega aÿim sa 'auauatton.

Nayiita'a so laloqo' da nque'ejnaxac so Jesús

³⁵ Nachi so Jesús denataxan, 'eeta': –Se'eso na'a'q can qami' sama'q da sa ishit da sauo'o ca qadachoxonaxaqui qataq aca laÿi' aca qodomi qataq caua qadapela'chilli', qaq ¿peta'a huo'o co'ollaxa ca qaviñiitac? Nachi soomayi 'ena'po': –'A'i, qaica ca seuenaqtac.

³⁶ Nachi 'enapeco': –Nagui qalaxayi ca huo'o ca lachoxonaxaqui, qaq no'on da ÿachi, nataq'en cam alom laÿi'. Qaq cam qaica ca lailonec, qaq no'on da imen ca lapo', ime, qaq deshijnaxanaique camayi.

³⁷ Cha'ayi aÿim shinapec da ÿataqta ipacchigui qome da ñi'aqtaguec mayi i'axat naua ñiyigui'shi l'aqtaqa ñi Dios, mayi 'eeta': “Nachi qaÿalecnoigui nam 'itaxaloxoicpi camayi.” Cha'ayi 'enauac nam ñi'aqtaguec mayi qoÿittañi, namayi ÿataqta ipacchigui.

³⁸ Nachi somayipi 'enapeco': –'Am qadataxala', 'enaua huo'oi naua dos ÿilonqa. Nachi somayi 'enapeco': –A'ayi, nachi tachiguiña.

So Jesús nqouagaxaueetac, hueta'a yi Getsemaní

³⁹ Ime, nachi so Jesús huenoxoneec, tauga cam nachi 'eetai'cnaxa da lanataqa' saqaÿoqotchiguemec 'alhua mayi nanqa' ana olivos. Qataq so lapaxaguenatacpi nachi nnaictague'. Qataq so lapaxaguenatacpi nachi nnaictague'.

⁴⁰ Qaq co'ollaq qaiviteuga yimayi, nachi 'enapega somayipi, 'eeta': –Qanqouagaxauñi qome, yaqto' sa ishit da qami' inoxonoiguilo ca qauem nhuennataxac.

⁴¹ Nachi so Jesús ca'aisalo soomayi, taÿa cam qaÿata'a. Ime, nachi i'alyiñi naua l-llicte da nqouagaxauen.

⁴² Nachi 'eeta': –'Am ita'a, da 'aushit, qaq no'on da sa ishit da aÿim 'apagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot ca maichi shiitapeguec, chaqcata cam qonetapeguec.

⁴³ Nachi anac som namaxashic piguem l'ec da ÿanem da l'añaxac somayi.

⁴⁴ Qaq co'ollaq mashi ÿagueec da nque'ejnaxac, nachi qaltaq nquigaxatteec da n'añaxataxac da nqouagaxaunaxac, nachi na nchilchaxa mayi anactac, 'eeta'am na ntago'q, ÿataqta ñijlec na 'alhua.

⁴⁵ Qaq co'ollaq imat da nqouagaxaunaxac, nachi ñishiguem da nqo'ona so lapaxaguenatacpi. Nachi co'ollaq ivita, nachi ilalec da do'ochita somayipi, souaxat da sa nalo'oguet da laquicoxo.

⁴⁶ Nachi 'eetega somayipi, 'eeta': –¿Tá'ainco' yi qau'ochiita? Ña qoñiishiguem. Ime, qaq qanqouagaxauñi, yaqto' sa ishit da qami' taiguilo ca qauem nhuennataxa.

Qaÿaconeu'a so Jesús da qaicoñi'

⁴⁷ Qaq ña detaqtac so Jesús co'ollaq nvi' so ÿataqta qalota shiÿaxauapi. Qaq qanatataueegue so l'enaxat Judas, som 'oonolec so doce lapaxaguenatacpi. Nachi somayi nquigueu'a so Jesús da napigoq.

⁴⁸ Nachi so Jesús 'enapego': –Judas, ¿'am 'anapigoqot na shiÿaxaua llalec da 'auauotaique da 'aneuo?

⁴⁹ Qaq som nnaictague'pi so Jesús co'ollaq ÿauaachigui de'eda qanayiuaigui, nachi qainattac somayi, qoÿiita': –'Am qadataxala', ¿seloquiaxai' peta'a namayipi?

⁵⁰ Nachi so 'oonolec somayipi iquesoxouec aso aloiguishi ltela som l-latac so lataxala' nam ntaxaÿaxanaxanecpi da qaitaxaÿapegue' ñi Dios.

⁵¹ Qalaxayi so Jesús 'enapeco': –Qauaqaÿa'a, a'ayi, nachi tachiguiña. Nachi so Jesús ipoteu'a ana ltela so nlatac, nachi nataden.

⁵² Ime, nachi 'enapega som lataxala'pi nam ntaxaÿaxanaxanecpi qataq som ilotague'pi asom n'onaxanaxaqui late'edai, qataq som nquedoxonecpi mayi anac da ñi'iguenauga somayi da ÿauec, 'eeta': –¿Qami' qauanaqui, qanachiita'pe naua qainaqalli' qataq naua qanpo'ñilli', 'eeta'amo' da huo'otaq aÿim cachaxaic?

⁵³ Qami' soota'agueta soua na'axa'te añi n'onaxanaxaqui late'edai, qalaq ¿tá'ainco' yi sa ishito' da aÿim qauacoñiu'a? Qalaxayi mashi ivita yi laloqo' da qau'onataxañi qataq da do'onataxan da l'añaxac na napalaxa.

So Pedro nqoleguettac, 'eetega da sa ÿauatton so Jesús

⁵⁴ Nachi qaÿaconeu'a so Jesús da qaicoñi', nachi qaÿauegueu'a ca lma' som lataxala' na ntaxaÿaxanaxanecpi da qaitaxaÿapegue' ñi Dios. Nachi so Pedro ca'attau'ogue somayi.

⁵⁵ Qaq co'ollaq ivideuo somayipi, nachi qaÿalon so nodec, qaÿachangui na laiñi so qasoxoc. Qaq nataq'en so Pedro nso'ooñi, netangui somayipi.

⁵⁶ Nachi aso nlata co'ollaq ila'a somayi da datatangui so nodec, nachi iloto'ot, qaq 'enapeco': –Nataq'en peta'a ñi'iñi shiÿaxaua nnaictague' damaxa.

⁵⁷ Qalaxayi so Pedro nqolguet, nachi 'eeta': –Aque', aÿim sa sauatton damayi.

⁵⁸ Qaq co'ollaq qaÿata'ague de'eda, qaltaq jec so lÿa da ila'a somayi, nachi 'enapega, 'eeta': –'Am peta'a nataq'en 'adaÿipi namayipi. Nachi so Pedro 'enapeco': –Aque', sa ishit da nachaÿim.

⁵⁹ Qaq co'ollaq mashi qaÿata'ague de'eda, nachi ÿi'iguelaxalec da denataxan so lÿa, 'eeta': –Ÿoqta 'eesa da ñi'iñi shiÿaxaua maichi lÿa de'eda shiÿaxaua, cha'ayi ñimayi nataq'en chigaqa'ague da Galilea.

⁶⁰ Nachi so Pedro 'enapeco': –Aque', aÿim sa saÿaten de'eda 'au'axattac. Nachi co'ollaq ña detaqtac so Pedro, nachi noÿin so 'olgaxa.

⁶¹ Huaña, nachi so qadataxala' nqoilga da ÿamato'ot so Pedro. Huaña, nachi somayi tachigui yi lauel da l'aqtac so qadataxala' co'ollaq 'eeta': “Qomele qome yaqta'a da noÿin ca 'olgaxa, qaq mashi tres qome da 'avi'iguelaxalec da 'anqolguet da qonetega da aÿim sa 'auauatton.”

⁶² Huaña, nachi pa'auec so Pedro, nachi ÿataqta lta'adaic da nneenaxac.

Qaÿi'inai' so Jesús

⁶³ Nachi so shiÿaxauapi mayi iuattague' so Jesús ÿataqta ÿi'inai' somayi qataq iuaxaatac.

⁶⁴ Qaÿapoguilo naua l'ai'te somayi, qataq qanhuaxanec na lashic, nachi qoÿiitega, qoÿiita': –¡Ña 'au'axat chaq negue't na 'am iuaxaatac!

⁶⁵ Qataq lapa na laÿipi n'aqtac somayi da qaishiueetac.

So Jesús qaÿataxanoigui so nta'alpi mayi i'ot na lataxacpi

⁶⁶ Qaq co'ollaq mashi yi'oxoñi, nachi lapona't so lquedoxonecpi na judiopi qataq so lataxala'pi na ntaxaÿaxanaxanecpi qataq nam dapaxaguenataxaatapeguec na nqataxacpi. Nachi qaÿauegueu'a so nta'alpi mayi loicnatac na lataxacpi. Nachi qainattac, qoÿiita':

⁶⁷ –Ña qomi' 'au'aqtaxanema, ¿'am peta'a nachi'am nta'a nca'alaxaqui? Nachi somayi 'enapeco': –Da shinapec aja', nachaÿim, qaq ÿoqta da sa ishit da aÿim qau'amaqchiñi.

⁶⁸ Qaq da huo'otaq qami' sena't, qalaq ÿoqta da sa ishit da aÿim qau'aqtaxañiim, qataq sa ishit da aÿim qauesoiuec.

⁶⁹ Qalaxayi nagui na shiÿaxaua llalec sogote da nso'oota'ague da aloic ñi Dios mayi qaica ca ÿaqalanapec.

⁷⁰ Ime, nachi 'enauac qaimalec da qainattac, qoÿiita': –¿Nachi'am, peta'a 'am llalec ñi Dios? Nachi so Jesús 'enapeco': –Aja', nachaÿim, cha'ayi nachi qoñiÿapec nataq'en qami'.

⁷¹ Nachi somayipi 'enapeco': –¿Negue'tom ca lÿa seuenaq da detaxaÿauo?, yi qomi' maichi sa'axasoqchigui da l'aqtac damayi mayi nasaxauec.