Lucas 17 - Nuevo Testamento Toba Sur

Da lchic ca shiÿaxaua da huo'o ca lasouaxashit

¹ Nachi so Jesús 'enapega so lapaxaguenatacpi, 'eeta': –Aÿim saÿateeso'o' da huo'o qome ca ishit da ÿauo'o naq'en ca lasouaxashit na shiÿaxauapi, qalaxayi ¡choxodaxaso' qome que'eca shiÿaxaua mayi huo'o naq'en ca lasouaxashit ca lÿa!

² Camayi no'on qome da qaicoñida'ac na lqosot ca coma' lta'adaic, ime, qaq qaÿasaxauga aca auaxai, cha'ayi sa ÿaÿamaxañi da huo'o naq'en ca lasouaxashit ca 'oonolec ne'ena saq 'amaqtaqpiolec.

³ Qaq maxatchaxa qome. Ca 'adqaÿa qom huo'o ca 'am i'otec sa ÿaÿamaxañi, qaq no'on da 'avidaxato'ot camayi. Qaq da huo'otaq ÿaxaneec ca n'onataxac, qaq 'auchoxoden.

⁴ Qaq nai'ctaxa da huo'otaq ivi' siete da ÿi'iguelaxalec da huo'o ca 'am i'otec ca 'oonolec na'a'q, qaq da i'enaxatteguet da siete da 'am nau'a da 'am 'enapega, 'eeta': “Nagui sa ishit da shi'iguelaxalec da huo'o ca 'am so'otec,” nachi 'am no'on da 'auchoxoden camayi.

Dam 'enec cam npi'iÿaxac

⁵ Nachi soua lamaxa'shi 'enapegalo' so Jesús, 'eetra': –'Am qadataxala', 'anquigaxatshiguem qome da qadpi'iÿaxac.

⁶ Nachi so qadataxala' 'enapegalo' soomayi, 'eeta': –Qami' da huo'o ca qadpi'iÿaxaqui, nai'ctaxa da 'ico' lcata'amole aca ala ana l'enaxat mostaza, qalaxayi qoñiÿapega ada'ada qo'ipaq late'edai, qoñiita': “Qoca'ai ne'ena qonetaña, ime, qaq qonangui aso auaxai,” qaq ada'ada qo'ipaq ishit da qami' ÿalaxagueta.

Da l'onataxanaxac cam qaÿamaqtac

⁷ Da huo'o ca 'oonolec da qoñiita da huo'o ca l-latac, qaq camayi da huo'otaq chigaqauga na n'onaxa da huo'otaq mashi imat da n'attapiguishiguem na 'alhua, huo'otaq da ilotague' cam 'atetpi, qaq ¿'am peta'a ishit da qonapega da qoneta': “'Ayala, 'anso'ooñi, ime, qaq 'auque'e?”

⁸ 'A'i, sa ishit, nda'a't da qonapega, qoneta': “Ña 'ansauat qome, aÿim qouapegue', 'au'ot ca anoq. To' qom ime da iqui'axac qataq da ñiÿomaxac, qaqca ishit da 'am 'auque'e.”

⁹ Qaq ¿peta'a ishit da 'ai'anem da 'an'achic que'eca 'adlatac qom mashi imat cam 'auamaxalec? 'A'i, sa ishit.

¹⁰ Qaq nachi 'eetec nataq'en qami', qom mashi ivita da qaumachi 'enauac nam qami' ÿamaxalguete ñi Dios, nachi qoñiita': “Qomi' mayi qomi' nlataqa, ÿataqta qaica ca shinaxac, cha'ayi nam so'otaqtac, nachinatac na maichi qad'onatacpi.”

So Jesús nataden so diez shiÿaxauapi mayi nchiga na l'oc

¹¹ Qaq co'ollaq mashi jec so Jesús da taigue da Jerusalén, nachi tajlec yim 'alhua mayi huaigui yi Samaria qataq yi Galilea.

¹² Qaq co'ollaq ivita som naña som saq 'amaqtaq shiÿaxauapiolec, nachi i'axasoxooteguet somayi som diez shiÿaxauapi mayi nchiga na l'oc, qalaxayi nachi qaÿata'aguet somayi

¹³ co'ollaq i'alaq, 'eeta': –¡'Am Jesús mayi 'auapaxaguenataxaatac, qomi' 'auchoxode'n qome!

¹⁴ Nachi so Jesús co'ollaq ila'a somayipi, nachi 'enapega, 'eeta': –Qauesomiÿa, qanachaxañiu'a cam ltaxaÿaxanaxanecpi nam shiÿaxauapi da qaitaxaÿapegue' ñi Dios. Qaq co'ollaq quetague' somayipi ca nqa'aic, nachi maichi no'oita.

¹⁵ Nachi so 'oonolec somayipi co'ollaq ila'a da mashi qui'itta na l'oc, nachi ñi'iguelaq, nachi ÿi'oxodeetac ñi Dios, ÿataqta i'alaqtai'.

¹⁶ Nachi i'adoto naua l-llicte so Jesús, ÿataqta ividaxata'aguet naq'en na latap na 'alhua, nachi ÿaatacot da n'achic somayi. Qaq se'eso shiÿaxaua somayi l'ec yi Samaria.

¹⁷ Nachi so Jesús 'enapeco': –¿Sa ishito' da diez som no'oitapi qanqoÿin na l'oc? ¿Huéta'ague cam laÿipi?

¹⁸ Cha'ayi yim ya' chigaqa'a ca lÿa 'alhua, ¿peta'a yimayi 'oonolec da ñi'iguelaq da ÿanot da lli'oxonnataxanaxac ñi Dios?

¹⁹ Nachi 'enapega so shiÿaxaua, 'eeta': –Qoñishiguem qome. Ime, qaq qojec. Mashi 'am no'oita, cha'ayi 'au'amqajnataxan.

Da lvidaxac dam l'onataxanaxac ñi Dios da ilo'ogue 'enauacna

²⁰ Nachi so fariseopi inattac so Jesús da chaq lagui qaq nvi' cam l'onataxanaxac ñi Dios da ilo'ogue 'enauacna. Nachi somayi ÿasat, 'eeta': –Ca lvidaxac da l'onataxanaxac ñi Dios da ilo'ogue 'enauacna, camayi sa ishit da qaila'a.

²¹ Qataq sa ishit da qoÿiita': “'Ena namayi,” huo'otaq da qoÿiita': “'Eda cha'a,” cha'ayi da l'onataxanaxac ñi Dios mashi qami' huetanguilo.

²² Nachi 'enapega so lapaxaguenatacpi, 'eeta': –Huo'oi qome caua na'axa'te, qaq qami' huo'o da qadyaqai da qanauañi' cam 'oonolec caua na'axa'te mayi huetoigui da nachaxan na shiÿaxaua llalec, qalaxayi sa ishit qome da qanauañi'.

²³ Huaña qome, nachi qoñiita': “'Ena namayi, huetai' ne'ena,” huo'otaq qoÿiita': “'Eda damayi, hueta'ague de'eda.” Qalaxayi sa ishit qome da qoquii, qataq sa ishit da qauca'achiigue.

²⁴ Cha'ayi camayi 'eeta'am na nqashilgaxa da huo'otaq nqashilguiñi, nachi imata 'enauac na piguem. Qaq 'eda qome da 'eetec ca lvidaxac ne'ena shiÿaxaua llalec qom ivita ca na'a'q da ñi'iguelaq.

²⁵ Qalaxayi namayi hua'auñi qome da taigui na qalota nque'ejnaxaguesat, qataq sa ishit qome da qaÿaconguet, sa ÿaconguet nam shiÿaxauapi mayi huetaigui nagui.

²⁶ Qaq 'eeta'am qome da 'eetec soua vi'iyi mayi huetaiguilo co'ollaxa so Noé, qaq nachi 'eeta'am nataq'en ca na'a'q mayi huetoigui da ñi'iguelaq ne'ena shiÿaxaua llalec.

²⁷ Somayipi deque'etac qataq nÿomtac, qataq huadootega't qataq huetapegue' da ladonaxac na llalpi, chochi ivitta'a so na'a'q co'ollaq so Noé inoxonoigui aso nnotaxaqui. Nachi anac so auot, huaña, nachi ileu 'enauac somayipi.

²⁸ Qaq nachi 'eetec nataq'en soua vi'iyi mayi huetaiguilo so Lot: so shiÿaxauapi deque'etac qataq nÿomtac qataq maichi nmeetega't, danaxaatac qataq i'otta'pe naua lma'te.

²⁹ Qalaxayi co'ollaq ca'ai so Lot so la ciudad Sodoma, nachi qananacot so nodec qataq so 'ico' quiquiaxadaic, chigoqo'ot na piguem, nachi ÿalauat 'enauac somayipi.

³⁰ Qaq 'eda qome da 'eetec ne'ena shiÿaxaua llalec qom ivita que'eca na'a'q da nachaxan.

³¹ Nachi que'eca na'a'q da huo'otaq huo'o ca pa'atashiguema na pa'ashiguem ca lma', qaq na logoxotpi pa'ataigui ca lma', qaq camayi sa ishit da huenoteec da nqateec; qataq da huo'otaq huo'o ca huetauga na n'onaxa, qaq camayi sa ishit da ñi'iguelaxau'a ca lma'.

³² Qaq qauennachi qome da 'eetec aso lhua so Lot.

³³ Ca nshitaique da nachi 'eetai' da nca'altauec, qaq nachica ca daqat da nachaalataxac; qaq cam daqat naq'en da nachaalataxac, qaq nachica cam nca'aleec.

³⁴ Qaq aÿim shinapec da que'eca pe huo'oi qome ca nauataña't, qaq 'oonolec qome ca qaÿauec caamayi, qaq ca lÿa qalaq qan'onaxatañi.

³⁵ Qataq huo'oi qome caua dos 'alo da'adaxaata'pe, huota'ai aca l'adaxanaxaqui', nachi 'oonole qome aca qaÿauec, qaq aca lÿa qalaq qan'onaxatañi.

³⁶ Qataq huo'oi qome caua dos shiÿaxa'u huetralec na n'onaxa, nachi 'oonolec qome ca qaÿauec, qaq ca lÿa qalaq qan'onaxatañi.

³⁷ Nachi co'ollaq qai'axaÿa de'eda, nachi qainattac somayi, qoÿiita': –'Am qadataxala', ¿chaq huá'ague qome de'eda? Nachi somayi 'eeta': –Qomyi cam hueta'ague ca leuaxaic, qaq nachica ca huaña da lapona't na teguesanpi.