Lucas 10 - Nuevo Testamento Toba Sur

So Jesús ÿamaq so setenta lapaxaguenatacpi

¹ Qaq co'ollaq ime de'eda, nachi so qadataxala' nataq'en lca'au'a so laÿipi setenta, nachi ÿamaq, qalaxayi dostega't naq'en, da i'auaxana 'enauac na pueblopi qataq naua 'ale'u mayi tata'alo somayi.

² Nachi 'enapego', 'eeta': –'Eesa da ÿataqta qalota na n'onatac da qanqat na ala na nanguishic. Qalaxayi nam 'onataxanaxaicpi saq 'amaqtaq. Qaq ÿoqo'oyi no'on da qauÿaxañiÿot ñim lalamaxat ne'ena n'onatac, da yaqto' namaq ca 'onataxanaxaicpi, da yaqto' nqat namayi.

³ Qami' qoquii nagui, qami' sama'q, qaq qoñiita'am qome ca qagueta llalaqpi da quichiguingui na dequi'iÿapecpi.

⁴ Qaq sa ishit qome da qauachii ca qadachoxonaxaquii qataq ca laÿi' aca qodomi, nataq'en caua lÿa't qadapela'chilli', qataq sa ishit da huo'o ca qaumiilec da qoviita'a da qauquinaxañiitac na nqa'aic.

⁵ Qaq da huo'o ca qavichiu'a nma', qalaq qau'auaxañiiñi da qauquinaxañi, qoñiita': “Huo'o qome da l-lagaxayic ne'ena nma'.”

⁶ Qaq que'eca nma' da hueta'a ca hueto'ot de'eda nlagaxayic, nachi talec camayipi de'eda nquinaxanaxac mayi nlagaxayic. Qaq da qaica, qaq qañi'iguelaxashiila't de'eda nquinaxanaxac.

⁷ Ime, nachi qoviÿa'a que'eca nma', qaq qolliqui qataq qanÿomiigui 'enauac cam huo'o, cha'ayi ca do'onataxaatac, camayi 'itchiguiñi da huo'o da nshiitenaguec. Qaq sa ishit qome da qaiteu'alo naua nma'te.

⁸ Qaq da huo'o ca qavichiÿa pueblo cam huaña da qami' ÿacongueta, nachi qolliqui 'enauac nam qami' iqui'axanque.

⁹ Nachi qanatayiñi 'enauac nam sa no'onpi mayi hueta'a camayi, qataq qau'aqtaxañiim, qoñiita': “Da l'onataxanaxac ñi Dios da ilo'ogue 'enauacna, damayi mashi qami' nayiita'alo.”

¹⁰ Qaq da qavichiÿa ca pueblo da huaña da saq qami' ÿacongueta, nachi qanqo'oñiuga ca nqa'aic, nachi qoñiita':

¹¹ “Ivida'a na namoxoÿaxa nam qadmayi mayi talguete naua qadchil, namayi sechigoxosoxouec, qaq damayi l'anaxat da maichi qanasouaxachiila't. Qalaxayi qami' qauaÿajñiita da l'onataxanaxac ñi Dios da ilo'ogue 'enauacna, damayi mashi qami' nayiita'alo.”

¹² Qaq qami' sa'axatema da que'eca pa'ateec na'a'q, da nhuaxanaguec que'eca pueblo ÿataqta napacalec da nhuaxanaguec so shiÿaxauapi mayi lma' so la ciudad Sodoma.

Soua pueblo mayi sa ÿala'q

¹³ ¡Ÿataqta choxodaxasodo' qami' mayi qoñiitaña yi Corazín! Nataq'en ¡ÿataqta choxodaxaso' na netaña yi Betsaida! Cha'ayíctaxa da huaña yi la ciudad Tiro qataq yi Sidón da qai'ot na n'añaxacpi sa qaÿauanapega mayi qami' huaiguilo, qaq yimayi sogotéctaxa quesom da ca'aisalo na n'onataxaco, qataq nachaxaata da ÿaayiñi naua huasouaxaic alogo, qataq nmejla't na alo.

¹⁴ Qalaxayi ca pa'ateec na'a'q nachi qami' qauacoñiiguet ca lta'adaic qanhuaxanaguiiqui, que'eca qanhuaxanaguiiqui saq 'en'am yi Tiro qataq yi Sidón.

¹⁵ Qaq qami' mayi qoñiitaña yi pueblo Capernaum, ¿qaupi'itaxañiitega peta'a da qami' qanauaxaÿaxaayishigue'm qome da qaviyiÿo'ot na piguem? 'A'i, qami' qañi'iguelaxajyiñi qome, nachi qaviyiÿaña ca lma' na lqui'i na leuaxaicpi.

¹⁶ Qaq ca qami' n'axaÿaxanalo, qaq nachaÿim aÿim n'axaÿaxana, qaq ca qami' sa ÿacongueta, qaq nachaÿim aÿim sa ÿaconguet. Qaq ca aÿim sa ÿaconguet, qaq nachiñi ñi aÿim namaq ñim sa ÿaconguet.

Da lli'iguelaxasoxoc som setenta napaxaguenatacpi

¹⁷ Qaq som setenta napaxaguenatacpi ÿataqta machiguiñi co'ollaq ñi'iguelaq. Nachi da'aqtaxaatac, 'eeta': –'Am qadataxala', ivida'a na n'ec leguemaxaicpi ÿataqta qomi' ÿalaxagueta souaxat da 'ad'enaxat.

¹⁸ Nachi so Jesús 'enapeco': –Aja', aÿim sauaachigui can najñi so Satanás, chigoqtot na piguem, 'eeta'am na nqashilgaxa.

¹⁹ Aÿim qami' sanema da n'añaxac, da yaqto' qauapiigui na n'adaxanaqpi qataq na pelaqtoitpi, qataq yaqto' ishit da qanaloÿa'aguet 'enauac da l'añaxac ca depa'aguenataxaatac, qaq sa ishit da qami' qaique'emaqchi't.

²⁰ Qalaxayi sa ishit qome da nachidata qantoñiitapeguec da mashi qami' ÿalaxagueta na n'ecpi leguemaxaicpi, chaqdata qome da qantoñiitapeguec da mashi qoÿittauo da qad'enaxachi da piguem.

So Jesús qataq ñi lta'a

²¹ Huaña, nachi so Espíritu Santo i'ot da ntonapigui' naq'en so Jesús, nachi 'enapeco': –'Am ita'a, 'am sanot da ñi'oxonnataxanaxac, mayi nachi'am lataxala' na neto'ot na piguem qataq na huetalec ana 'alhua, cha'ayi 'am 'auachaxana nam qaica ca ÿaÿajnapec dam 'oxochiisop co'olloxochiyi nam ÿajnaxanaxaicpi qataq nam huattonaxanaxaicpi. Aja', 'am ita'a, cha'ayi nachida da maichi 'adhuennataxac.

²² Nachi 'enapego' so shiÿaxauapi, 'eeta': –Ñi ita'a aÿim ÿanem 'enauac da nauattonaxanaxac. Qalaxayi qaica ca ishit da ÿauatton ne'ena llalec, chaqñita ñim lta'a mayi ÿauatton, qataq qaica ca ishit da ÿauatton ñim lta'a, chaqnata na llalec mayi ÿauatton qataq 'enauac nam tachigui da ÿauattonaxanaxan namayi.

²³ Nachi ÿamataiguilo soua lapaxaguenataqa, nachi ndoqteetreec 'enapegalo, 'eeta': –Ÿataqta machiguiñi qome nam nma'ai' da ÿauaachigui dam qauloitagui nagui.

²⁴ Cha'ayi qami' sa'aqtaxanema da ÿataqta qalota som l'aqtaxanaxanecpi ñi Dios qataq som nta'alpi mayi ÿauotaique da ÿauaachigui dam qami' qauauañiichigui nagui, qalaxayi sa ishit da qaÿauangui. Qataq qaÿauotaique da qai'aqchigui da qau'aqaichigui nagui, qalaxayi sa ishit da qai'axagui.

Qaÿaloqnaxana som lma' yi Samaria

²⁵ Nachi nachajñi som dapaxaguenataxaatapeguec na nqataxacpi da nqo'oneu'a so Jesús da detaxaÿapegue' da chochi ÿi'iguen. Nachi inat, 'eeta': –'Am mayi 'auapaxaguenataxaatac, ¿chaq huá'ague ca shiitec da yaqto' ishit da senoxoneu'a cam nca'alaxa mayi chochi tateec?

²⁶ Nachi so Jesús 'enapeco': –¿Négue't nam nanettañi nqataxacpi mayi chigoqo'ot so Moisés? ¿'Éetec cam 'adtaxaÿaxanataxanaxac?

²⁷ Nachi som dapaxaguenataxanapec 'eeta': –“Ÿataqta 'auauotec ñi 'adataxala' Dios, ÿataqta 'amato'ot 'enauac da 'adquiyaqteÿaxac, 'adca'alaxa, 'ad'añaxac qataq 'enauac da 'adhuennataxac, nataq'en ÿataqta 'auauotec ca qoneta'am 'adÿa, 'eeta'am da maichi 'anauojla't.”

²⁸ Nachi so Jesús 'enapeco': –Aja', ÿaÿamaqchiguiñi da 'adasataxac, qaq da 'au'ot de'eda, nachi huo'o da 'adca'alaxa.

²⁹ Qalaxayi som dapaxaguenataxanapec ÿauotaique da iuejlec dam nnataxanaxac, nachi 'enapego' so Jesús, 'eeta': –Qaq ¿chaq négue'to' cam iÿa mayi shiita'am?

³⁰ Nachi so Jesús 'enapeco': –Huo'o so shiÿaxaua chigoqtashiguema yi Jerusalén, quetague' so nqa'aic mayi taÿa'a yi Jericó. Nachi qaique'elaxat da qanhuo', nhuo't soua cachaxaiqa. Somayi qanqa't soua alogo, qaiuaxaatac, qataq qaicopchaqchit.

³¹ Qaq huaqteguet se'eso na'a'q da quetague' se'eso nqa'aic so 'oonolec nam ltaxaÿaxanaxanec na shiÿaxauapi da qaitaxaÿapegue' ñi Dios. Qalaxayi co'ollaq ila'a, nachi chochi napactalec.

³² Nataq'en nateuguiyi som ltaua na ntaxaÿaxanaxanecpi, qalaxayi co'ollaq ivita se'eso huaña so shiÿaxaua, nachi ila'a, qalaxayi chochi napactalec.

³³ Qaq anaco' so shiÿaxaua mayi lma' yi Samaria, nataq'en quetague' se'eso nqa'aic. Qaq co'ollaq ila'a, nachi ÿataqta huo'o da lchoxonnataxanaxa.

³⁴ Nachi nqo'ona se'eso shiÿaxaua, nachi nataden, datannataxana so aceite qataq so lataxa. Ime, qaq ÿauo'o so laxataxa. Qaq co'ollaq ime, nachi ÿasaxalec so lalo, nachi ÿauegueu'a so nanataqa'. Huaña, nachi ilotague'.

³⁵ Qaq so lÿa na'a'q co'ollaq mashi jec se'eso Samaria l'ec, nachi nqatshiguem aso lshiitenaxanaqte, nachi ÿami' som lma' se'eso nanataqa'. Nachi 'enapega, 'eeta': “'Aulo'ogue qome ne'ena shiÿaxaua. Qom huo'o aca ÿacauec lavigaxaiste, qaq maichi seshiiten qom ñi'iguelaq.”

³⁶ Qaq nagui 'am senat, ¿chaq négue't se'esoua tres ca 'aupeta'a da ÿachaxan da ÿoqta lÿa se'eso shiÿaxaua mayi nhuo't soua cachaxaiqa?

³⁷ Nachi som dapaxaguenataxanapec 'enapeco': –Qomyi som huo'o da lchoxonnataxanaxa somayi. Nachi so Jesús 'enapeco': –'Aue, qojec, nataq'en 'au'ot damaxa.

So Jesús hueta'a so lma' aso Marta qataq aso María

³⁸ Ime, qaltaq jec so Jesús, qaq co'ollaq ivita som naña so saq 'amaqtaq shiÿaxauapiolec, nachi huo'o aso 'alo l'enaxat Marta ÿauegueu'a so lma'.

³⁹ Qaq aso Marta huo'o aso lqaÿa l'enaxat María. Qaq asomayi nso'ootañi, neto'oto naua lchil so Jesús, nachi n'axaÿaxaatega 'enauac nam i'axattac somayi.

⁴⁰ Qaq aso Marta ÿataqta qaica ca ldaqa', cha'ayi huetapegue' 'enauac nam qalota ldaxacpi. Nachi nqo'oneu'a so Jesús, nachi 'enapega, 'eeta': –'Am ÿataxala', ¿ÿataqta qaico' ca taÿapigui 'adhuel da añi ÿaqaÿa aÿim ndoqteeteguet 'enauac nam idaxacpi? Qonapega añimayi, yaqto' aÿim itauan.

⁴¹ Qalaxayi so Jesús, 'enapeco': –Marta, Marta, ÿataqta 'admela't, qataq 'am ÿaquicoqchit nam qalota 'addaxacpi.

⁴² Qalaxayi 'oonolec dam ÿacteec da qaiuen. Añi María ÿataqta 'onaxaic dam tateu'a, qaq damayi qaica ca ishit da nqat.