Juan 7 - Nuevo Testamento Toba Sur

Soua lqaÿa't so Jesús sa ishit da i'amaqte'n somayi

¹ Qaq co'ollaq ime de'eda, nachi so Jesús coleetac yi 'alhua Galilea. Somayi sa ishit da taÿa yi Judea, cha'ayi na judiopi mayi lma' yimayi nshitaique da ÿalauat somayi.

² Qalaxayi mashi sa qaÿapeque so laponaxaqui na judiopi da qanayinaiguilo naua qai'ada'a't noiqolqa.

³ Qaq ÿoqo'oyi soua lqaÿa't 'eetegalo somayi, 'eeta': –Sa ishit qome da qoueta'a ne'ena. No'on da 'anqo'ona yi Judea, yaqto' na 'am quetague'pi mayi hueta'a yimayi ishit da nataq'en ÿauaachigui na 'au'otpi.

⁴ Cha'ayi ca shiÿaxaua da nshitaique da qaÿauatton, nachi sa ishit da nqañoxottañi da huo'o ca i'ot. Cha'ayi 'am mashi sogote da 'au'ottac de'eda 'ad'onataxanaxac, qaq no'on da 'am 'anachaxana 'enauac na shiÿaxauapi.

⁵ Cha'ayi ivida'alo co'ollaxa soua maichi lqaÿa't da sa ishit da i'amaqte'n somayi.

⁶ Nachi so Jesús 'enapeco': –Aÿim saxanaxa da ivita yi ÿaloqo'. Qami', qalaxayi camachica na'a'q nachi 'en'am 'onaxaic qanqashiñi.

⁷ Nam shiÿaxauapi mayi huetalec ana 'alhua, namayipi sa ishit da qami' nquiÿalo. Aÿim, qalaxayi ÿataqta aÿim nquiÿa, cha'ayi aÿim ÿataqta sa'axattem namayipi da naua i'otta'pe naamayi sa ÿaÿamaxayiñi.

⁸ Qauesomiÿa qome, qanqo'oñiu'a que'eca naponaxac. Aÿim, qalaxayi sa ishit da ñoqo'ona, cha'ayi saxanaxa da ivita yi ÿaloqo'.

⁹ Qaq co'ollaq ime de'eda 'enapec, nachi somayi n'onaña yi Galilea.

So Jesús ÿalectaigui so naponaxac mayi huetoigui da qanayinaiguilo naua qai'ada'a't noiqa

¹⁰ Qalaxayi co'ollaq mashi ÿoxoguelo soua lqaÿa't, nachi so Jesús nataq'en nqo'oneu'a se'eso naponaxac. Qalaxayi somayi sa ishit da ÿoqta nachaxaata.

¹¹ Nachi na judiopi nmittaique somayi co'ollaq huaigui se'eso naponaxac. Nachi nnataxaatac, 'eeta': –¿Chaq huéta'ague que'eca shiÿaxaua?

¹² Nachi qalota na shiÿaxauapi na n'aqtaxaatapigui somayi. Huo'o na 'eeta': “Se'eso shiÿaxaua, somayi no'on da lataxac.” Qalaxayi huo'o na laÿipi 'eeta': “Somayi sa ishit da no'on da lataxac; somayi chochi ÿatenachittac na shiÿaxauapi.”

¹³ Qalaxayi namayipi sa ishit da ÿoqta i'axaÿaqchit 'enauac na shiÿaxauapi da 'eetega somayi, souaxat da ñi'itega na judiopi.

¹⁴ Qalaxayi co'ollaq mashi laiñi so naponaxac, nachi so Jesús taigui aso n'onaxanaxaqui, nachi quetot da dapaxaguenataxaatac.

¹⁵ Nachi na judiopi ÿataqta huo'o da l'aalaxa somayi, nachi 'eeta': –¿Chaq huá'ago' ca 'eetec damayi, yi ÿataqta qalota na ÿaÿaten, qamaq sa ishit co'ollaxa da napaxaguen?

¹⁶ Nachi so Jesús 'enapeco': –Da ÿapaxaguenataxanaxac, damayi sa ishit da ÿalamaxat, damayi chigoqo'ot ñim aÿim namaq.

¹⁷ Da huo'o ca qaica ca i'apigui da i'ot cam 'eetapeguec ñi Dios, nachi camayi ishit da ÿaÿateeta da naua ÿapaxaguenataxanaxaco ÿataqta chigoqtoto ñi Dios, huo'otaq da chochi maichi aÿim chigoqtoto.

¹⁸ Ca shiÿaxaua da huo'otaq maichi nalligoxottela't ca ltaxaÿaxac, camayi 'eetec de'eda, cha'ayi nshitaique da na shiÿaxauapi ÿi'oxoden. Qalaxayi cam ÿataqta npogoxoueetague' da yaqto' qaÿi'oxoden cam namaq, camayi nachica ca ÿoqta 'eesa ca l'aqtaxanaxac, qaq sa ishit da chochi datenataxaatac.

¹⁹ ¿Sa ishito' peta'a da 'eesa so Moisés da qami' ÿanema so lqataxacpi? Qalaxayi ñaqaiyita sa ishit da huo'o ca 'oonolec da qoñiita da ÿalaxalec se'eso nqataxacpi. Cha'ayi ¿tá'ainco' yi qanshiitaique da aÿim qaualauachi?

²⁰ Nachi na shiÿaxauapi 'enapeco': –'Am huo'o ñi 'ad'ec leguemaxaic, cha'ayi ¿negue'to' ca nshitaique da 'am ÿalauat?

²¹ Nachi so Jesús 'enapeco': –Aÿim 'oonolec co'ollaxa da so'ot co'ollaq huaigui so na'a'q mataxaqui, nachi 'enauac da qoñiita ÿataqta qau'elqaim.

²² Qalaxayi so Moisés qami' ÿanema co'ollaxa da qauauo'oi ca n'anaxat ca shiÿaxaua (qaq nai'ctaxa da sa ishit da nachiso somayi da ÿoqta chigoqtot, cha'ayi damayi chigoqtot co'ollaxa som hua'au qadta'aipi). Qaq ÿoqo'oyi qami' ishit da qau'ochi ca n'anaxat ca nogotolec, nai'ctaxa da huetoigui ca na'a'q mataxaqui.

²³ Qaq cha'ayi qanshiitaique da qaupaquiichigui na lqataxacpi so Moisés, nachi qami' ishit da qau'ochi ca n'anaxat ca nogotolec, nai'ctaxa da huo'otaq huetoigui ca na'a'q mataxaqui, qalaq ¿tá'ainco' qone' yi aÿim qaualemataÿai souaxat da imauec da l'oquiaxac so shiÿaxaua da ñataden so na'a'q mataxaqui?

²⁴ Qami' sa ishit qome da qauloitapigui ca yi'oqchigui da qanmichi. Da huo'otaq huo'o ca qanmichi, qalaq ÿataqta ÿashicteec qanqashiñi ca qadmitaxanaxaqui.

So Jesús i'axat cam chigoqchiguiña

²⁵ Nachi huo'o na netaña yi Jerusalén na denataxaatac, 'eeta': –¿Sa ishito' peta'a da nachida dam da' dam qanmittaique da qaÿauotaique da qaÿalauat?

²⁶ Cha'ayi damayi ÿataqta nachaxaata da detaqtac, qalaq qaica ca ishit da 'enapega damayi. ¿Ÿoqta peta'a da nataq'en na nta'alpi da i'amaqten damayi, da nachida dam nta'a nca'alaxaqui?

²⁷ Qalaxayi qomi' saÿajnaqta da chigaqa'ague damayi. Cha'ayi qom ivita da nvi' que'eca nta'a nca'alaxaqui, qalaq qaica ca ishit da ÿaÿaten ca chigaqa'ague.

²⁸ Qaq co'ollaq hua'aqchigui de'eda so Jesús mayi dapaxaguenataxaatapoigui aso n'onaxanaxaqui, nachi ÿataqta n'axannec da l'aqtac, 'eeta': –¡Qachi aÿim qauauattoñiÿo', qataq qauaÿajñi cam sachigoqta'ague! Qalaxayi aÿim sa ishit da maichi ñalligoxottela't da ñanac, cha'ayi aÿim lamaxashic ñim ÿataqta 'eesa, ñim qami' sa ishit da qauauattoñi.

²⁹ Aÿim, qalaxayi sauatton, cha'ayi sachigoqtot ñimayi, qataq ñimayi aÿim namaq.

³⁰ Huaña, nachi qanshitaique da qaÿaconeu'a somayi da qaicoñi'. Qalaxayi sa ishit da huo'o ca nañoxota da ÿaconeu'a, cha'ayi somayi saxanaxa da ivita ca laloqo'.

³¹ Qalaxayi ÿataqta qalota na i'amaqten somayi. Nachi namayipi 'eeta': –Qom ivita da nvi' ca nta'a nca'alaxaqui, qaq ¿peta'a ÿacteec na i'ot n'anecpi mayi sa qaÿauanapega da napacalec dam da' shiÿaxaua?

Na fariseopi namaq so huataxanaqpi da icoñi' so Jesús

³² Na fariseopi co'ollaq hua'aqtapoigui na shiÿaxauapi da 'eetega so Jesús, nachi namayipi qataq nam lataxala'pi na ntaxaÿaxanaxanecpi namaq so huataxanaq mayi ilotague' aso n'onaxanaxaqui, da yaqto' ÿaconeu'a somayi da icoñi'.

³³ Nachi so Jesús 'enapeco': –Aÿim ñaq cada'acolec da qami' soota'agueta. Qaq qom ime, nachi aÿim shi'iguelaxa ñi aÿim namaq.

³⁴ Qaq qami' qome aÿim qanmichiitaique, qalaq sa ishit da aÿim qauanachiÿa, cha'ayi sa ishit da qauañoxochi da qaviyiÿa'a cam soota'a.

³⁵ Nachi nam judiopi maichi nnattega't, 'eeta': –¿Chaq huá'ago' ca dataigue damayi, da yaqto' qomi' sa ishit da sanataxa? ¿Qalqo' nqo'ona nam judiopi mayi nlagaxattac nam netaigui nam saq judiopi, da yaqto' ÿapaxaguen na sa ishit da judiopi?

³⁶ ¿Chaq négue't cam naigui de'eda l'aqtac mayi 'eeta': “Aÿim qanmichiitaique qome, qalaxayi sa ishit da aÿim qauanachiÿa, cha'ayi sa ishit da qauañoxochi da qaviyiÿa'a cam soota'a?”

Ca 'etaxat mayi 'en'am ca l'auaxac

³⁷ Qaq som pa'ateec na'a'q soua naponaxaqui' mayi ÿataqta ÿacteec da ñi'oxonnataxanaxac. Nachi se'eso na'a'q nachajñi so Jesús, nachi ÿataqta nlamaxaden da detaqa, 'eeta': –Ca huo'o na laquip, qaq no'on da aÿim nau'a, yaqto' nÿom.

³⁸ Cha'ayi nachi 'ena'pe naua ñiyigui'shi n'aqtaqa da ca aÿim i'amaqten, nachi camayi añi lquiyaqte chigoqtoigui ca 'etaxat mayi 'eeta'am na l'auaxac da npaxaatashiguem.

³⁹ Qaq de'eda 'enapec so Jesús, damayi naigui da ca i'amaqten somayi, nachi camayi ÿaconguet so Espíritu Santo. Cha'ayi so Espíritu Santo saxanaxa co'ollaxa da anac, cha'ayi so Jesús saxanaxa da ivita ca laloqo' da lli'oxoyic.

Na shiÿaxauapi nÿodacachi da lhuennataxa

⁴⁰ Nachi huo'o na shiÿaxauapi na hua'aqchigui co'ollaxa de'eda, nachi 'eeta': –De'eda shiÿaxaua ÿoqta 'eesa da nachida da l'aqtaxanaxanec ñi Dios mayi qai'axatta'aguet co'ollaxa da naÿa'cna.

⁴¹ Qataq huo'o na laÿipi 'eeta': –Damayi nachida da nta'a nca'alaxaqui. Qalaxayi huo'o na laÿipi 'eeta': –¿Táloxochiyo' da chigoqchiguiña yi Galilea cam nta'a nca'alaxaqui?

⁴² Yi naua ñiyigui'shi l'aqtaqa ñi Dios, naamayi i'axa't da que'eca nta'a nca'alaxaqui, camayi qoÿinac da llalec qome so nta'a David, qataq qoÿinac yi chigoqchiguiña yi Belén, yim lma' co'ollaxa so David.

⁴³ Nachi na shiÿaxauapi nÿodacachi da lhuennataxac souaxat so Jesús.

⁴⁴ Qataq huo'o na huotaique da ÿaconeu'a somayi da icoñi', qalaxayi sa ishit da huo'o ca nañoxota da ÿaconeu'a.

Na nta'alpi sa ishit da i'amaqten so Jesús

⁴⁵ Nachi so huataxanaqpi mayi ilotague' aso n'onaxanaxaqui ñi'iguelaxa so hueta'a so fariseopi qataq som lataxala'pi na ntaxaÿaxanaxanecpi. Nachi se'eso nta'alpi denataxaatac, 'eeta': –¿Tá'ainco' yi sa qanaviquiiuo camayi?

⁴⁶ Nachi so huataxanaqpi 'enapeco': –¡Ÿataqta sa ÿauango' da huo'o ca 'eeta'am da ltaxaÿaxac de'eda shiÿaxaua!

⁴⁷ Nachi na fariseopi 'enapeco': –¿Qachi nataq'eno' da qoñiita qanashiñiita da chochi qami' qaÿatenachi't?

⁴⁸ ¿Peta'a huo'o' ca 'oonolec na qadataxala'pi, huo'otaq nam fariseopi, da huo'otaq i'amaqten somayi?

⁴⁹ Qalaxayi ne'ena shiÿaxauapi mayi sa ÿaÿaten na nqataxacpi, namayipi qome taÿa'a ca nhuaxanaguec naq'en ñi Dios.

⁵⁰ Nachi so Nicodemo mayi huo'o co'ollaxa so pe da hueta'a so Jesús, somayi nachi ÿalectaigui ne'ena fariseopi. Nachi 'enapeco':

⁵¹ –Nam nqataxaco mayi qomi' qoÿanema co'ollaxa, naamayi i'axa't da qomi' sa ishit da so'otaq ca nhuaxanaguec ca shiÿaxaua, da huo'otaq saxanaxa da ñi'axaÿaxanaxa, da yaqto' saÿajnaq cam i'ot.

⁵² Nachi qoÿinapego' somayi, qoÿiita': –¿'Am peta'a nataq'en 'am Galilea l'ec? Ña 'anapaxaguenalo qome naua nanettrañi l'aqtaqa ñi Dios, yaqto' ishit da 'aula'a da qaica ca l'aqtaxanaxanec ñi Dios da huo'otaq chigoqchiguiña co'ollaxa yi Galilea.

Aso 'alo mayi quishiguetaxai

⁵³ Nachi ñi 'oonolec namayipi tau'alo naua lma'te.