Juan 6 - Nuevo Testamento Toba Sur

So Jesús iqui'axan so cinco mil shiÿaxauapi

¹ Qaq co'ollaq ime de'eda, nachi so Jesús taitague da le'ego aso lapel late'edai mayi huaña yi Galilea qataq yi la ciudad Tiberias.

² Qaq ÿataqta qalota na shiÿaxauapi ca'attague' somayi souaxat da ÿauaatapigui na i'ottac n'anecpi mayi sa qaÿauanapega da natadeetac na sa no'onpi.

³ Nachi so Jesús tashiguemec aso qasoxonaxa. Huaña, nachi nso'oota'ai'salo soua lapaxaguenataqa.

⁴ Qaq mashi sa qaÿapeque som na'a'q mayi laponaxaqui na judiopi da iuennate co'ollaq qanayica'ai yi Egipto.

⁵ Nachi co'ollaq namatashiguem so Jesús, nachi ila'aguet so qalota shiÿaxauapi da nca'attaueegue somayi. Nachi 'enapega so Felipe, 'eeta': –¿Chaq huá'ago' ca sachigoxotaqa'ague da seshijnaxanaxa ca aloq, da yaqto' deque'e 'enauac ne'ena shiÿaxauapi?

⁶ Qalaxayi so Jesús 'enapec de'eda, cha'ayi nshitaique da ÿaÿaten ca l'aqtac so Felipe, cha'ayi somayi maichi ÿaÿateetac ca lataxac cam i'ot.

⁷ Nachi so Felipe 'enapeco': –Da doscientos aca denarios da qaishijnaxana aca pan, qalaq ñaqaiyita sa ishit qome da nalolec da chochi yitai' ca chic ñi 'oonolec namayipi.

⁸ Nachi so Andrés mayi nachiso so 'oonolec soua lapaxaguenataqa, som lqaÿa so Simón Pedro, somayi 'enapeco':

⁹ –Huo'o da nogotolec hueta'a ne'ena. Damayi huo'oi daua ÿachita'pe cincole pan chigaqaigui na cebada, qataq daua doosolqa nÿaxayolqa. Qalaxayi ¡neguenshapeco', daamayi sa nalolguete na qalota shiÿaxauapi!

¹⁰ Nachi so Jesús 'enapeco': –Qoñiÿapega qome 'enauac na shiÿaxauapi da nso'ooñi. Qaq ÿataqta qalota na 'auaqpi se'eso qanayiuta'a. Nachi nso'ooñi 'enauac somayipi, qaq ivi' ca cinco mil ÿallippi.

¹¹ Nachi so Jesús ÿaconalo soua pan. Qaq co'ollaq imat da ÿanot da n'achiquiaxac ñi Dios, nachi ÿanoiguilo soua lapaxaguenataqa. Qaq soomayi nachi ÿanoiguilo 'enauac nam nso'ootañi. Qaq nachi i'enaxatchigui naq'en soua nÿaxayi da ÿanoigui 'enauac somayipi, chochi ivitta'a da comadaxaicpi.

¹² Qaq co'ollaq mashi comadaxaicpi somayipi, nachi so Jesús 'enapegalo soua lapaxaguenataqa, 'eeta': –Qalapoñiÿa't qome 'enauac na ñi'iÿoxotpi, yaqto' sa ishit da huo'o ca ne'en.

¹³ Nachi qalapona't somayi, nachi ivi' aso doce canasto aso nlaxatchiguipi som ñi'iÿoxot soua cincole pan mayi chigaqaigui na cebada.

¹⁴ Nachi som shiÿaxauapi mayi ÿauaachigui de'eda n'anec mayi sa qaÿauanapega mayi i'ot so Jesús, nachi somayipi 'enapeco': –Ÿoqta 'eesa da nachida damayi dam l'aqtaxanaxanec ñi Dios mayi qai'axatta'aguet co'ollaxa da naÿa'a ana 'alhua.

¹⁵ Qalaxayi so Jesús co'ollaq noma da qaÿauotaique da qaÿaconeu'a da qoÿanagui da nta'a, nachi somayi qaltaq ca'ai somayipi da tashiguemec aso qasoxonaxa, da yaqto' ndoteec.

So Jesús quetalec so 'etaxat

¹⁶ Qaq co'ollaq mashi pe nachi soua lapaxaguenataqa so Jesús, soomayi tadaxaama aso lapel late'edai.

¹⁷ Nachi huenojyingui aso nnotaxaqui', nachi qai'axasoxoolec aso lapel da qanqo'oota yi Capernaum. Qaq mashi ÿataqta napanñi, qalaq so Jesús ñaq saxanaxa da nvidaxasom.

¹⁸ Nachi anac so l'at lta'adaic, nachi ÿataqta huo'o ana lapaxa so 'etaxat.

¹⁹ Nachi co'ollaq mashi qaÿataueeguelo soomayi, nachi qaÿauaateguet so Jesús da naÿa'a aso barco, petalec na 'etaxat, nachi soomayi ÿataqta huo'o da lcolanqa'.

²⁰ Qalaxayi somayi 'enapegalo soomayi, 'eeta': –¡Nachaÿim, sa ishit qome da qayi'ii!

²¹ Nachi soomayi ÿataqta huo'o da lyaqa' da huenotshiguem somayi aso barco. Huaña, nachi saqaÿaloq da qaivitta so loigue yim qotaÿa'ta 'alhua.

Na shiÿaxauapi nmittaique so Jesús

²² Nachi so lÿa na'a'q, nachi na shiÿaxauapi mayi n'ona'atague da le'ego aso lapel, namayipi nomta'a da soua lapaxaguenataqa so Jesús ndotreec co'ollaq huenojyingui aso 'oonole barco, qaq so Jesús sa ishit da nnaictagueto soomayi.

²³ Qalaxayi qaltaq huo'oi soua lÿa't barcos nvilyi', chigoqda'a yi la ciudad Tiberias, nvilda yim sa qaÿapeque yim huaña co'ollaq qanallic aso pan co'ollaq ime da ÿan da n'achic so qadataxala'.

²⁴ Nachi se'eso shiÿaxauapi, co'ollaq ila'a da sa ishit da hueta'a yi'iyi so Jesús qataq soua lapaxaguenataqa, nachi somayipi huenojñiguilo se'esoua barcos da qanqo'oota yi Capernaum da qanmitaique somayi.

So Jesús nachiso so pan mayi chigaqaigui da nca'alaxa

²⁵ Nachi somayipi co'ollaq ivittague da le'ego aso lapel, nachi qailalec so Jesús. Nachi qainattac, qoÿiita': –'Am mayi 'auapaxaguenataxaatac, ¿chaq lágui co'ollaxa da 'anvitta ne'ena?

²⁶ Qalaxayi so Jesús 'enapega somayipi, 'eeta': –Ÿataqta 'eesa de'eda qami' shinapegalo, da qami' aÿim qanmichiitaique, cha'ayi qami' qauqui'ii, nachi qami' comadaxaiqa, qaq sa ishit da souaxat da qami' qauaÿajñi ca naigui na n'anecpi mayi sa qaÿauanapega.

²⁷ Sa ishit qome da qau'onataxañiitapeguelec cam nallic mayi taÿa'a da imeuo, chaqcata cam nallic mayi sa ishit da imeuo, qataq chigaqaigui ca nca'alaxa mayi chochaq tateec. Qaq 'eca cam nallic mayi qami' ÿanema qome na shiÿaxaua llalec. Cha'ayi ñi lta'a Dios nachina na ÿicchigui da ÿaÿamaxadeeta.

²⁸ Nachi qainattac somayi, qoÿiita': –¿Huá'ago' ca shinaqtec, da yaqto' qomi' ishit da so'otaq cam 'eetega ñi Dios da so'otaq?

²⁹ Nachi so Jesús 'enapeco': –Da 'eetapeguec ñi Dios nshitaique da qami' qau'amaqchiñi nam namaq ñimayi.

³⁰ Nachi qainat somayi, qoÿiita': –Qaq ¿négue'to' ca n'anec ishit da qomi' 'auachaxanalo, da yaqto' seloxogui, nachi ishit da 'am sa'amaqtenaq? Qaq ¿négue't cam 'au'ot?

³¹ Som hua'au qadta'alpi co'ollaxa chictac aso maná co'ollaq hualec so tojlec 'alhua, cha'ayi nachi 'enapec naua nanettrañi l'aqtaqa ñi Dios, 'eeta': “Ñi Dios iqui'axanec somayipi aso pan mayi chigoqo'ot na piguem.”

³² Nachi so Jesús 'enapeco': –Aja', ÿataqta 'eesa de'eda qami' sa'axatema, da sa ishit da nachiso so Moisés som qami' ÿanema aso pan mayi chigoqo'ot na piguem, chaqñita ñi ita'a mayi nachiñi ñi qami' ÿanema acam ÿataqta 'eesa pan mayi chigoqo'ot na piguem.

³³ Cha'ayi acam pan mayi ÿan ñi Dios, nachaca acam chigoqtot na piguem mayi anac da ÿanem da lca'alaxa na shiÿaxauapi.

³⁴ Nachi somayipi 'enapeco': –'Am qadataxala', no'ónctaxa da nachi 'eetai' da qomi' 'ai'anema aca'aca pan.

³⁵ Nachi so Jesús 'enapeco': –Nachaÿim mayi aÿim pan mayi chigaqaigui da nca'alaxa. Ca aÿim nau'a, nachi sa nauane' qome na lqouaxa; qataq ca aÿim i'amaqten, nachi sa nauane' qome na laquip.

³⁶ Qalaxayi aÿim mashi ime da qami' shinapegalo da qami' sa ishit da aÿim qau'amaqchiñi, nai'ctaxa da aÿim qauloito'ot.

³⁷ Qaq 'enauac nam aÿim ÿami' ñi ita'a, namayi aÿim nau'a; qaq nam aÿim nau'a, qalaq sa ishit da semaqa'aguet.

³⁸ Cha'ayi aÿim sa ishit da sachigoqtot na piguem da ñanac da so'ot ca maichi shiitapeguec, chaqdata da ñanac da so'ot ca 'eetapeguec ñim aÿim namaq.

³⁹ Qaq dam 'eetapeguec ñi ita'a mayi aÿim namaq nshitaique da aÿim qaica ca saqataqchit nam aÿim ÿanem ñimayi, chaqdata da qaltaq ñica'alaxateec qom iviteuga ca pa'ateec na'a'q.

⁴⁰ Da 'eetapeguec ñim aÿim namaq, nshitaique da 'enauac nam ÿamato'ot na llalec ñi Dios qataq i'amaqten namayi, nachi huo'o da lca'alaxa chochaq tateec, qataq da ñica'alaxateec qom iviteuga ca pa'ateec na'a'q.

⁴¹ Huaña, nachi na judiopi jec da quetapeguelec so Jesús souaxat co'ollaxa da 'eeta': “Aÿim nachaÿim pan mayi sachigoqo'ot na piguem.”

⁴² Nachi somayipi 'eeta': –¿Damayi sa ishito' da nachida da Jesús, dam llalec so José? Qomi' sauattonaq so lta'a José qataq aso late'e. Qaq ¿táloxochiyo' da 'enapec chigoqo'ot na piguem?

⁴³ Nachi so Jesús 'enapega somayipi, 'eeta': –A'ayi qome da aÿim qoquiitapeguelec.

⁴⁴ Qaica ca ishit da chochi aÿim nau'a da huo'otaq sa nauegueuo ñi ita'a mayi aÿim namaq; nachi camayi ishit da qaltaq ñica'alaxateec ca pa'ateec na'a'q.

⁴⁵ Naua nanettrañi l'aqtaqa som l'aqtaxanaxanecpi ñi Dios, naamayi 'eeta': “Ñi Dios ÿapaxaguen qome 'enauac na shiÿaxauapi.” Qaq ÿoqo'oyi 'enauac nam n'axaÿaxana ñi ita'a qataq lapaxaguenatac ñimayi, nachi namayipi aÿim nau'a.

⁴⁶ Sa ishit da huo'otaq huo'o ca ilogui da lashiguiÿaxac ñi ita'a; chaqnata nam chigoqtot ñimayi mayi nachinata ishit da ÿauatton ñimayi.

⁴⁷ Qaq ÿataqta 'eesa de'eda qami' sa'axatema, da cam aÿim i'amaqten, nachi ishit da huo'o da lca'alaxa mayi chochaq tateec.

⁴⁸ Aÿim nachaÿim pan mayi chigaqaigui da nca'alaxa.

⁴⁹ So hua'au qadta'aipi co'olloxochi quetalec so tojlec 'alhua, nachi somayipi chictac aso pan chigaqshiguem l'enaxat maná, qalaxayi nachi 'en'am ileu somayipi.

⁵⁰ Qalaxayi aÿim sa'axattac aso pan mayi chigoqo'ot na piguem, da ca chic asomayi, nachi sa ishit da ileu.

⁵¹ Qaq aÿim mayi nachaÿim pan mayi ñica'altauec, qataq sachigoqo'ot na piguem. Ca chic ana'ana pan, nachi huo'o da lca'alaxa chochaq tateec. Ana pan mayi san, nachida da i'oquiaxac. Qaq damayi san, yaqto' nca'aleec na shiÿaxauapi.

⁵² Nachi na judiopi maichi taÿa't da ncotatega't, 'eeta': –¿Huá'ago' ca 'eetec dam da', da qomi' ÿanema da maichi l'oquiaxac da sachiguenaq?

⁵³ Nachi 'enapega somayipi so Jesús, 'eeta': –Aja', ÿataqta 'eesa de'eda qami' sa'axatema, da huo'otaq sa ishit da qolliqui da l'oquiaxac na shiÿaxaua llalec, qataq da sa ishit da qanÿomiiguilo naua ltago'q, nachi sa ishit da huo'o ca qadca'alaqai.

⁵⁴ Qaq ca chic da i'oquiaxac qataq nÿomguilo naua itago'q, nachi huo'o da lca'alaxa mayi chochaq tateec. Nachi camayi qaltaq ñica'alaxateec ca pa'ateec na'a'q.

⁵⁵ Cha'ayi da i'oquiaxac, nachida da ÿoqta 'eesa nallic, qataq naua itago'q, nachinaua na ÿoqta 'eesa naquip.

⁵⁶ Ca chic da i'oquiaxac qataq da nÿomguilo naua itago'q, nachi camayi nachi 'eetai' da aÿim n'attau'a, qaq nachi 'en'am aÿim soota'aguet camayi.

⁵⁷ Ñim ita'a mayi aÿim namaq, ñimayi huo'o da lca'alaxa, nachi de'eda ica'alaxa chigoqo'ot ñimayi. Qaq nachi 'eetec nataq'en ca aÿim chic, nachi camayi aÿim ÿachigoxoto'ot da lca'alaxa.

⁵⁸ Qaq aÿim sa'axattac aso pan mayi chigoqo'ot na piguem. Qaq asa'aso pan, asomayi sa ishit da 'eeta'am aso maná mayi chictac co'ollaxa som hua'au qadta'aipi, qalaxayi nachi 'en'am 'enauac somayipi ileu. Qaq cam chic asa'aso pan mayi sa'axattac, nachi camayi nachi 'eetai' da nca'altauec.

⁵⁹ Qaq de'eda dapaxaguenataxaatapeguec so Jesús, damayi huaigui aso laponaxaqui na judiopi mayi naña yi Capernaum.

Da n'aqtac mayi chigaqaigui da nca'alaxa mayi chochaq tateec

⁶⁰ Qaq co'ollaq qai'aqchigui de'eda lapaxaguenataxanaxac somayi, nachi ÿataqta qalota nam quetague' so Jesús na 'eeta': –De'eda 'enapec, damayi ÿataqta huo'o da lqalaic da qaÿaconguet; ¿negue'tom ca ishit da n'axaÿaxana?

⁶¹ Nachi so Jesús ÿaÿajnau'a da lhuennataxac somayipi da quetapeguelec de'eda l'aqtac somayi. Nachi somayi inattac somayipi, 'eeta': –¿Peta'a qami' ÿashaxaadeec naq'en de'eda?

⁶² Qaq ¿huá'ago' ca qoñiitec qone' da huo'otaq qami' qauloÿa'a na shiÿaxaua llalec da ÿi'iguelaxashiguema yim hueta'a co'ollaxa?

⁶³ Som Espíritu, nachiso so chigoqo'ot da nca'alaxa; qaq dam yi'oqchigui n'oquiaxac, damayi sa ishit da huo'o ca chigaqaigui. Qaq dam shinapec, damayi ÿataqta 'eesa, qataq chigoqo'ot so Espíritu, qataq damayi chigaqaigui da nca'alaxa.

⁶⁴ Qalaxayi ñaqaiyita huo'o da qoñiita na sa ishit da da'amqajnataxan. Qaq 'enapec de'eda so Jesús, cha'ayi nal'ena da ÿaÿaten co'ollaq chita'ague da do'onataxan nam sa ishit da da'amqajnataxan qataq som huotaique co'ollaxa da ÿaneuo somayi.

⁶⁵ Nachi 'enapeco': –Ÿoqo'oyi aÿim qami' shinapegalo co'ollaxa da qaica ca ishit da chochi aÿim nau'a da huo'otaq sa ishit da nachiñi ñi ita'a da aÿim nauegueu'a camayi.

⁶⁶ Huaña, nachi ÿataqta qalota nam quetague' so Jesús da ÿaxaañi da quegue somayi.

⁶⁷ Nachi so Jesús inatta'pe soua doce lapaxaguenataqa, 'eeta': –¿Qami' peta'a nataq'en qanshiitaique da qoquii?

⁶⁸ Qalaxayi so Simón Pedro 'enapeco': –'Am ÿataxala', ¿negue'tom ca lÿa soqolaxague? Yi nachi'amta mayi naua 'ad'aqtaqa naamayi chigaqaiguilo da achaalataxac mayi chochaq tateec.

⁶⁹ Qomi' mashi sogote da sa'amqajnataxanaq, qataq saÿajnaq da nachi'am mayi 'am nta'a nca'alaxaqui mayi 'am llalec ñi Dios mayi nachi 'eetai' da nca'altauec.

⁷⁰ Nachi so Jesús 'enapeco': –¿Sa ishito' da qami' doce da qami' llica'agui'shi? Qalaq da 'oonolec da qoñiita ÿaatañi da lataxac so shiÿaxaua lma'na.

⁷¹ Qaq nachiso so Judas Iscariote som detaqtega so Jesús, som llalec so Simón. Cha'ayi so Judas, nachiso co'ollaxa so ÿaneuo somayi, nai'ctaxa da so Judas nachiso so 'oonolec soua doce lapaxaguenataqa.