Juan 21 - Nuevo Testamento Toba Sur

So Jesús nachaxanalo soua siete lapaxaguenataqa

¹ Qaq co'ollaq ime de'eda, nachi so Jesús qaltaq nachaxanalo soua lapaxaguenataqa huaña yi loigue aso lapel mayi huaña yi Tiberias. Qaq da 'eetec co'ollaq nachaxanalo, 'eeta':

² Soomayi co'ollaxa ÿalecta'a't so Simón Pedro, Tomás som qaÿamata'ac da huaya', qataq so Natanael mayi lma' yi Caná yim huaigui yi Galilea, qataq soua llalqa so Zebedeo, qataq soua lÿa't dos lapaxaguenataqa so Jesús.

³ Nachi so Simón Pedro 'enapegalo' soomayi, 'eeta': –Aÿim ashic da shi'aco. Nachi soomayi 'ena'po': –Qomi' nataq'en 'am seca'ataxague. Nachi je'c soomayi, nachi huenojyingui aso nnotaxaqui', qalaxayi se'eso pe sa ishit da huo'o ca lalliiguishi'c.

⁴ Qaq co'ollaq mashi yaqta'a da yi'oxoñi, nachi so Jesús nachaxan, hueto'ot so loigue, qalaxayi se'esoua lapaxaguenataqa sa ishit da ÿaÿate'n da nachiso somayi.

⁵ Nachi somayi 'enapegalo' soomayi, 'eeta': –Qami' ñaqpi, ¿qaica peta'a ca qadalliiguishiqui? Nachi soomayi 'ena'po': –Qaica.

⁶ Nachi so Jesús 'enapegalo' soomayi, 'eeta': –Qauasaqaiñi qome na qadalliguiiqui, qalaxayi qauasaqaigue da aloic ana qannotaxaquii, yaqto' huo'o ca qadalliiguishiqui. Qaq 'eda da qoÿiitec co'ollaq qaÿasaxañi so naleguec. Qaq co'ollaq ime, nachi sa ishit da qanqatshiguem so naleguec, souaxat da ÿagueec na huetaigui nÿaq.

⁷ Nachi som napaxaguenatac mayi ÿataqta nauochaxaua so Jesús, somayi 'enapego' so Pedro, 'eeta': –¡Nachida da qadataxala'! Nachi co'ollaq chochi hua'aqchigui de'eda so Simón Pedro da nachiso so qadataxala', nachi ÿaayiñi soua alogo (cha'ayi somayi nqa't co'ollaxa soua alogo), nachi padenaxangui so 'etaxat.

⁸ Qaq soua lÿa't napaxaguenataqa qalaq ivittra'ata so loigue da netrangui aso nnotaxaqui', qaÿauogueleeta'ata so naleguec, ÿataqta nlaqchigui na nÿaq, cha'ayi se'eso le'ego ivi' ca cien metros yi lshiquetta.

⁹ Qaq co'ollaq huenotreec, nachi qailalec so nodec ndoteec lpoqo, qaq huetangui so nÿaq, qataq huo'o aso pan.

¹⁰ Nachi so Jesús 'enapegalo' soomayi, 'eeta': –Ñaq huo'o ca qandoita nam nÿaqpi mayi chita'ague da qandoita.

¹¹ Nachi so Simón Pedro huenojñigui aso notaxaqui, nachi nauogonna'ata so loigue so naleguec mayi ÿataqta nlaqchigui na nÿaqpi, ndoteec na lta'adaic. Qaq se'eso nÿaqpi ivi' ciento cincuenta y tres. Qaq nai'ctaxa da ÿataqta qalota, qalaxayi sa ishit da icolaxata'ague so naleguec.

¹² Nachi so Jesús 'enapegalo' soomayi, 'eeta': –Qayalaÿi, qauqui'ii. Nachi se'esoua napaxaguenataqa sa ishit da huo'otaq huo'o ca ÿañoxot da inat somayi da chaq negue'tso somayi, cha'ayi qaÿaÿaten da somayi nachiso so qadataxala'.

¹³ Nachi so Jesús nqochineuo, nachi ÿacona aso pan, nachi ÿanoiguilo soomayi, qataq nachi 'eeta'am naq'en so nÿaq.

¹⁴ Qaq 'eda da 'eetec co'ollaq mashi ivi' na tres da ÿi'iguelaxalec da nachaxanalo soua lapaxaguenataqa co'ollaq ime da mashi qaltaq nca'aleec.

So Jesús detaxaÿapegue' so Simón Pedro

¹⁵ Qaq co'ollaq ime da nqui'axac, nachi so Jesús inat so Simón Pedro, 'eeta': –'Am Simón mayi 'am llalec so Jonás, ¿peta'a ÿacteec da aÿim 'auauotec, qaq sa ishit da qoneta'am ne'ena 'adaÿipi da aÿim ÿauotec? Nachi so Pedro 'enapeco': –Aja', 'am ÿataxala', 'am 'auaÿaten mque' da 'am sauotec. Nachi so Jesús 'enapego' somayi, 'eeta': –'Antela'a qone' na ilopi qagueta llalaqpi.

¹⁶ Nachi qaltaq ÿi'iguelaxalec da inat somayi, 'eeta': –'Am Simón mayi 'am llalec so Jonás, ¿aÿim 'auauotec peta'a? Nachi so Pedro 'enapeco': –Aja', 'am ÿataxala', 'am 'auaÿaten mque' da 'am sauotec. Nachi so Jesús 'enapego' somayi, 'eeta': –'Aulo'ogue qone' ana ilopi qagueta.

¹⁷ Nachi qaltaq ÿi'iguelaxalec da inat, 'eeta': –'Am Simón mayi 'am llalec so Jonás, ¿peta'a aÿim 'auauotec? Nachi so Pedro ÿataqta naquicochiguiñi, souaxat da mashi ivi' tres da qaÿi'iguelaxalec da qainat da ÿoqta 'eesa da dauotaxanaqta. Nachi somayi 'enapeco': –'Am ÿataxala', 'am 'auaÿaten mque' 'enauac da ÿataxac, qataq 'auaÿateeta da ÿataqta 'am ÿauotaxat. Nachi so Jesús 'enapego' somayi, 'eeta': –'Aulo'ogue qone' ana ilopi qagueta.

¹⁸ Qaq ÿataqta 'eesa de'eda 'am sa'axatem nagui, da co'ollaq ñaq 'am nsoqolec, qalaq 'am maichi 'ai'aayiñi naua 'ogo da 'an'ot qataq 'am maichi 'oiqueetac ca 'aigue. Qalaxayi da ivita da 'am ÿi'axaiquiolec, nachi 'am 'ai'aatrauec naua 'adhua'q, qaq ÿaqa'a ca 'am n'otaxanaxan, qataq 'am qaÿaueegue cam sa ishit da ÿoqta 'atapeegue.

¹⁹ Qaq de'eda 'enapec so Jesús, damayi naigui da nshitaique da ÿaÿajnaxanaxanec da 'eetec qome da l-leuaxa so Pedro qataq da 'eetec da ÿi'oxoden ñi Dios. Qaq co'ollaq ime, nachi 'enapego' somayi, 'eeta': –¡Aÿim 'auca'ategue qome!

Som napaxaguenatac mayi auochaxaua

²⁰ Qaq co'ollaq nqoilec so Pedro, nachi ila'aguet so napaxaguenaxaua mayi ÿataqta nauochaxaua so Jesús, som huetau'a co'ollaxa na laÿi co'ollaq huo'o so nqui'axac, som inattac somayi co'ollaq 'eeta': “'Am ÿataxala', ¿chaq négue't cam taÿa'a da 'am ÿaneuo?”

²¹ Qaq so Pedro co'ollaq ila'a somayi, nachi inattac so Jesús, 'eeta': –'Am ÿataxala', qaq ne'ena cha'aguet ¿chaq huá'ague qome ca 'eetec ca taÿa'a?

²² Nachi so Jesús 'enapeco': –Da aÿim ñishitaique da namayi nachi 'eetai' qome da nca'altauec, chochi ivitta'a qom aÿim ñi'iguelaq, qalaxayi ¡'auauaqta'a qome; sa ishit da 'atapegueu'a namayi! 'Am, qalaxayi aÿim qoquegue.

²³ Nachi jec de'eda n'aqtaxanaxac som nqaÿañicpi da se'eso apaxaguenaxaua, somayi sa ishit da ileu. Qalaxayi so Jesús sa ishit da 'eetega somayi da sa ishit da ileu. Cha'ayi de'eda 'enapec 'eeta': “Da aÿim ñishitaique namayi da nachi 'eetai' qome da nca'altauec, chochi ivitta'a qom aÿim ñi'iguelaq, qaq ¡'am sa ishit qome da 'atapegueu'a namayi!”

²⁴ Qaq nachiso se'eso napaxaguenatac, som i'axattac 'enauac de'eda, qataq maichi ÿiyiñi. Qaq qomi' saÿajnaq da ÿoqta 'eesa de'eda 'enapec.

²⁵ Nataq'en ÿataqta qalota co'ollaxa na laÿi i'otpi so Jesús, qaq namayipíctaxa da 'enauac da qoÿiyiñi, nachi aÿim sepeta'a da ÿoqta sa ishit qome da nalolec ana 'alhua ana nedepi mayi qoÿiyiñi. Aja', nachi 'eetec de'eda.