Juan 20 - Nuevo Testamento Toba Sur

Da 'eetec co'ollaq qaltaq nca'aleec so Jesús

¹ Qaq som l'auaxanec na'a'q naua na'axa'te, nachi aso María mayi lashi yi Magdala, asomayi tauga aso huachiqui co'ollaq nte'etom. Qaq co'ollaq ña napaltañi, nachi asomayi ila'a da so coma' mayi lapoxot aso huachiqui da mashi qanqat.

² Nachi asomayi jec, nqalgoqtau'a ca hueta'a so Simón Pedro qataq so lÿa napaxaguenatac som ÿataqta nauochaxaua so Jesús. Nachi 'enapegalo', 'eeta': –So qadataxala' qanqateeguesop co'ollaxa añi nhuachiqui, qaq qomi' sa ishit da saÿajnaq ca qaÿacha'ague camayi.

³ Nachi so Pedro qataq so lÿa napaxaguenatac, soomayi je'c da nqo'oodeuga aso huachiqui.

⁴ Qaq soomayi nqalgoqte', nnaictega't, qalaxayi so 'oonolec sa ilaua'ague ana naloxo, napacalec so Pedro. Nachi somayi hua'auñi da ivideuga aso huachiqui.

⁵ Nachi somayi ÿamataigui asomayi da imeten. Nachi ila'a so laxataxat da huetaiya', qalaxayi sa ishit da ÿoqta taigui.

⁶ Qaq co'ollaq mashi nvi' so Pedro, nachi somayi ÿataqta taigui aso huachiqui. Nachi somayi nataq'en ila'a se'eso npataxaqui mayi huetaiya'.

⁷ Qataq nataq'en ila'a som hualoq mayi qoÿaxattagui na lqaic so Jesús. Qaq somayi sa ishit da huaqta'ai' se'eso npataxaqui, cha'ayi somayi qainaata't, qataq ÿaqa'a so huetaña.

⁸ Nachi se'eso lÿa napaxaguenatac mayi hua'auchiguiñi co'ollaxa da ivita aso huachiqui, somayi nataq'en taigui, nachi ÿauaachigui 'enauac de'eda, nachi ÿataqta i'amaqten.

⁹ Cha'ayi soomayi saxanaxa da ÿaÿate'n ca llic naua n'aqtaqa, da so Jesús iuen da qaltaq nca'aleeguesop qanqoÿin na leuaxaicpi.

¹⁰ Nachi se'esoua napaxaguenataqa, soomayi ÿi'iguelaxadeu'a ca lma't.

So Jesús nachaxana aso María mayi lashi yi Magdala

¹¹ Qalaxayi aso María n'onañi, pa'ataueegue da laÿi aso huachiqui. Qaq co'ollaq ña noÿiitac, nachi nqollimñi da ÿamataigui aso huachiqui.

¹² Nachi ila'alo soua dos namaxa'shi piguem lashi', lapagaxaiqa naua alogo, nso'ootraña som qaÿachaña co'ollaxa so Jesús. So 'oonolec soomayi nso'ootaña so n'axanqa', qaq so lÿa neta'ague da nchinnaqa'.

¹³ Nachi se'esoua namaxa'shi piguem lashi' inatta'po' asomayi, 'eeta': –'Am 'alo, ¿tá'ainco' yi 'anoÿiitac? Nachi asomayi 'enapeco': –Qomyi souaxat da qaÿachi so ÿataxala', qaq aÿim sa saÿaten ca qaÿacha'ague camayi.

¹⁴ Qaq co'ollaq chochi 'enapec de'eda, nachi qaltaq namatashiguem. Nachi ila'a so Jesús da nachattauo, qalaxayi sa ishit da ÿaÿaten da nachiso so Jesús.

¹⁵ Nachi so Jesús inattac asomayi, 'eeta': –'Am 'alo, ¿tá'ainco' yi 'anoÿiitac? qataq ¿négue't ca 'anmittaique? Nachi asomayi ipi'itaxaatega da somayi nachiso som ilotague' se'eso nanguishi lma'. Nachi 'eetego', 'eeta': –'Am ÿale, da huo'otaq nachi'am mayi 'auachi ca ÿataxala', qaq no'on da aÿim 'au'axatem cam 'auacha'ague, yaqto' aÿim shi'iguena'a camayi.

¹⁶ Nachi so Jesús 'enapego' asomayi, 'eeta': –¡María! Nachi asomayi ÿamato'ot, nachi huota'ai naua l'aqtaqa na hebreo da 'enapega, 'eeta': –¡Raboni! (Damayi naigui da 'eeta': 'Am napaxaguenataxanaq).

¹⁷ Nachi so Jesús 'enapego' asomayi, 'eeta': –Aÿim 'axaneec qome, cha'ayi aÿim saxanaxa da ñoqo'ongue da neta'ague ñi ita'a. Qalaxayi 'am qome qojec, nachi 'au'aqtaxanem ca ÿaqaÿañicpi da aÿim ñoqo'ongue da neta'ague ñi ita'a, ñim nataq'en qadta'ai, ñim ita'a Dios qataq nataq'en qadta'ai.

¹⁸ Nachi aso María mayi lashi yi Magdala, asomayi jec da icoyigue'n soua napaxaguenataqa da asomayi nauane' som qadataxala', qataq da somayi da'aqtaxaatapeguem asomayi de'eda.

So Jesús nachaxanalo soua lapaxaguenataqa

¹⁹ Qaq se'eso na'a'q mayi l'auaxanec naua na'axa'te co'ollaq mashi pe, nachi soua napaxaguenataqa, soomayi lapoota'a't. Qaq ÿataqta ÿapochiyigui so lasom, souaxat da qañi'itega na judiopi. Nachi so Jesús pa'auo, nachi vichiguinguilo na laiñi soua lapaxaguenataqa. Nachi iqui'n, 'eeta': –Qami' huo'o qome da qadlagaxayiqui.

²⁰ Qaq co'ollaq ime da 'enapec de'eda somayi, nachi ÿachaxa'n naua lhua'q qataq na laÿi. Nachi soomayi ÿataqta huo'o da ntonaxa'c da ilodo'ot so qadataxala'.

²¹ Ime, nachi so Jesús qaltaq 'enapegalo soomayi, 'eeta': –Qami' huo'o qome da qadlagaxayiqui. Qaq de'eda 'eetec co'ollaxa da aÿim namaq ñi ita'a, qaq nachida qome da shiitec da qami' sama'q.

²² Nachi somayi iquetetoiguilo soomayi so l'at, nachi 'enapegalo, 'eeta': –Qauacoñiiguet qome na Espíritu Santo.

²³ Qaq cam qami' qauapalaxachi na lasouaxashitpi, nachi camayi qaÿapalaxat na lasouaxashitpi. Qaq cam sa ishit da qauapalaxachi na lasouaxashitpi, nachi camayi sa ishit da qaÿapalaxat na lasouaxashitpi.

So Tomás nauane' so qadataxala' mayi qaltaq nca'aleec

²⁴ Qalaxayi so Tomás, som 'oonolec soua doce napaxaguenataqa mayi qaÿamata'ac da huaya', somayi sa ishit co'ollaxa da ÿalectaiguilo soomayi co'ollaq qanauane' so Jesús.

²⁵ Qaq co'ollaq imeueegue de'eda, nachi soua lÿa't napaxaguenataqa da'aqtaxaatapeguema somayi, qoÿiita': –Qomi' ñauanaxai' so qadataxala'. Qalaxayi so Tomás 'enapegalo' soomayi, 'eeta': –Aÿim da sa ishit da semete'n naua lhua'q ca lliguiyiñi ana clavo, huo'otaq da sepoteu'a ca lliguiyiñi ana clavo naua lhua'q qataq na laÿi, nachi aÿim sa ishit da sa'amaqten de'eda.

²⁶ Qaq co'ollaq mashi ivi' naua ocho na'axa'te, nachi soua napaxaguenataqa qaltaq lapoota'a't da huetra'a so noÿic, nachi ÿalectauo so Tomás da hueta'agueta soomayi. Qaq nai'ctaxa da ÿataqta ÿapochigui so lasom, qalaq so Jesús pa'auo, nachi vichiguinguilo soomayi. Nachi iqui'n, 'eeta': –Huo'o qome da qadlagaxayiqui.

²⁷ Ime, nachi 'enapego' so Tomás, 'eeta': –Ña ipoteu'alo 'anqa'en naua 'axaata naua iua'q, qataq nataq'en 'aupoteu'a na ÿaÿi. Nachi sa ishit qome da 'auqolguetaxaatac, chaqdata da 'au'amqajnataxan.

²⁸ Nachi so Tomás 'enapeco': –¡'Am ÿataxala' qataq 'am ita'a Dios!

²⁹ Nachi so Jesús 'enapego' somayi, 'eeta': –'Am Tomás, nagui 'au'amqajnataxan, cha'ayi aÿim 'anauane'. Qalaxayi ÿataqta machiguiñi qome ca nai'ctaxa da sa ishit da aÿim ilogui, qalaxayi da'amqajnataxan.

Dam 'eetec da huo'o mshi qoÿiyiñi ana'ana nede

³⁰ So Jesús nataq'en qalota na i'ot n'anecpi mayi sa qaÿauanapega da ÿauaachigui naq'en so lapaxaguenatacpi da sa ishit da qoÿittalec ana'ana nede.

³¹ Qalaxayi de'eda qoÿiyiñi, damayi qoÿiyiñi, yaqto' qami' ishit da qau'amaqchiñi da so Jesús nachiso som nta'a mayi qadca'alaxaqui, som llalec ñi Dios, qataq yaqto' qami' ishit da huo'o da qadca'alaqai da qau'amaqchiñi somayi.