Juan 11 - Nuevo Testamento Toba Sur

Da l-leuaxa so Lázaro

¹ Qaq huo'o so shiÿaxaua l'enaxat Lázaro, somayi sa no'on. Qaq somayi lma' yi Betania yim npueblo aso María, qataq aso lqaÿa Marta.

² Qaq asa'aso María, mayi lqaÿa so Lázaro som sa no'on, nachaso asom icodelguete co'ollaxa naua lapia'te so Jesús so codaxat, nachi deÿoxona na laue.

³ Nachi se'esoua dos nqaÿa't ÿamaxalo co'ollaxa da l'aqta'c so Jesús, 'eeta': –'Am qadataxala', yim 'anauochaxaua, yimayi sa no'on.

⁴ Nachi so Jesús co'ollaq hua'axaÿa de'eda, nachi 'eeta': –De'eda nalolaxa, damayi sa ishit da taÿa'a ca nleuaxa. Chaqdata da yaqto' damayi ishit da chigoqchigui da lli'oxoyic ñi Dios, qataq yaqto' de'eda nalolaxa ishit nataq'en da chigoqchigui da lli'oxoyic na llalec ñi Dios.

⁵ Qaq nai'ctaxa da so Jesús ÿataqta nauochaxaua aso Marta, qataq aso lqaÿa, qataq so Lázaro,

⁶ qalaxayi co'ollaq qai'aqtaxanem da so Lázaro sa no'on, qalaq somayi ñaq queuoiguilo soua dos na'axa'te da ñaq hueta'a cam netaña.

⁷ Qaq co'ollaq ime, nachi 'enapegalo soua lapaxaguenataqa, 'eeta': –Qaltaq shi'iguelaxasoxogue qome da Judea.

⁸ Nachi soua lapaxaguenataqa 'eetegalo somayi, 'eeta': –'Am mayi 'auapaxaguenataxaatac, ñaq chita'ague da na judiopi mayi lma' yi'iyi 'alhua, nshitaique da 'am ÿalauat da 'am ida'a na coma', qalaq ¿tá'ainco' yi qaltaq 'anshitaique da 'aÿa yimayi?

⁹ Nachi so Jesús 'enapeco': –¿Sa ishito' da yi 'oonolec na'a'q ivi' na doce horas? Yi ñi 'oonolec shiÿaxaua da huo'otaq queuotapigui yi na'a'q, qalaq sa ishit da qui'aqñi, cha'ayi camayi ilotaigui na yi'oqchiguiñi ana 'alhua.

¹⁰ Qalaxayi ca 'oonolec da huo'otaq queuotapigui yi pe, nachi camayi ishit da qui'aqñi, cha'ayi qaica na yi'oqchiguiñi.

¹¹ Qaq co'ollaq ime, nachi so Jesús 'enapeco': –Yi qanauochaxaua Lázaro, yimayi do'ochi, qalaxayi aÿim ñoqo'ona da ñoqotoxon.

¹² Nachi soua lapaxaguenataqa 'ena'po': –'Am qadataxala', camayi da chochi do'ochi, qachi yi'oqta qome da ÿaÿamaxañi.

¹³ Qalaxayi so Jesús 'eetega da so Lázaro ÿoqta ileu, qalaxayi soua lapaxaguenataqa ipi'itaxaatrega da somayi detaqtega da yi'oqchigui n'ochaxa.

¹⁴ Nachi so Jesús ÿoqta da'aqtaxaatema soomayi, 'eeta': –Yi Lázaro, yimayi mashi ileu.

¹⁵ Qaq aÿim ÿataqta huo'o da ñi'achic da sa ishit da soota'a yimayi. Qaq damayi ÿaÿamaqchiguiñi souaxat da qoñiita, yaqto' ishit da qau'amqajnataxañi. Qalaxayi qolaq qome da ñoqo'onaxa.

¹⁶ Nachi som Tomás mayi qaÿamata'ac da huaya' 'enapegalo' soua lÿa't mayi napaxaguenaxa'u, 'eeta': –Qolaq nataq'en qomi', yaqto' nataq'en qadleuaxaua damayi.

So Jesús nachiso so nca'aleec naq'en ca leuaxaic qataq nachiso so achaalataxac

¹⁷ Qaq co'ollaq iviyi' so Jesús, nachi natenalec da so Lázaro mashi ivi' naua cuatro na'axa'te da qailayiñi.

¹⁸ Qaq yim Betania, yimayi sa qaÿapeque yi Jerusalén, ivi' dos kilómetros y medio yi lshicta.

¹⁹ Qaq ÿataqta qalota na judiopi na nqo'ona aso Marta qataq aso María da qai'añaqchitta'pe soomayi, souaxat yi lqaÿa't mayi saqca.

²⁰ Qaq aso Marta co'ollaq ÿaÿaten da so Jesús mashi nvi', nachi huaqata'aguet; qaq aso María, qalaxayi n'onaña ca lma'.

²¹ Nachi aso Marta 'enapego' so Jesús, 'eeta': –'Am ÿataxala', da 'am qoueta'a ne'ena, nachi sa ishíttaxa da ileu yi ÿaqaÿa.

²² Qalaxayi aÿim saÿaten da ñi Dios ishit da 'am ÿanem 'enauac cam 'auÿaxanaique.

²³ Nachi so Jesús 'enapega asomayi, 'eeta': –Yi 'adqaÿa qaltaq nca'aleec qome.

²⁴ Nachi aso Marta 'enapeco': –Aÿim saÿaten da yimayi ishit qome da qaltaq nca'aleec qom qanca'alaxateec na leuaxaicpi cam pa'ateec na'a'q.

²⁵ Nachi so Jesús 'enapego' asomayi, 'eeta': –Aÿim mayi nachaÿim ñica'alaxateec ca leuaxaic, qataq nachaÿim nca'alaxa. Ca aÿim i'amaqten, qaq nai'ctaxa da ileu, qalaxayi ishit da nca'aleec.

²⁶ Qaq 'enauac nam ña nca'altauec nagui mayi aÿim i'amaqten, nachi namayipi sa nauane' qome da ileu. Qaq ¿'au'amaqten peta'a de'eda?

²⁷ Nachi asomayi 'enapeco': –Aja', sa'amaqten, 'am ÿataxala', da nachi'am nta'a nca'alaxaqui, mayi 'am llalec ñi Dios, mayi 'am qai'axatta'aguet co'ollaxa da 'auanaÿa'a ana 'alhua.

So Jesús noÿin co'ollaq hueta'a aso nhuachiqui so Lázaro

²⁸ Qaq co'ollaq ime de'eda l'aqtac aso Marta, nachi jec da iÿaxana aso lqaÿa María. Nachi isoxootot da 'enapega, 'eeta': –Dam dapaxaguenataxaatac hueta'a ne'ena, qaq damayi 'am nÿaxaneu'a.

²⁹ Qaq co'ollaq chochi hua'aqchigui de'eda aso María, nachi sa naÿaloxon da ñishiguem, nachi nqo'oneuga so Jesús.

³⁰ Qaq so Jesús saxanaxa co'ollaxa da inoxoneu'a ca pueblo. Ñaq hueta'a cam huaña co'ollaq natena'aguet aso Marta.

³¹ Qaq co'ollaq qaila'a da sa naÿaloxon da ñishiguem aso María, nachi jec, nachi na judiopi mayi hueta'a ca lma' asomayi da i'añaqchittac, namayipi ca'attaueegue, cha'ayi ipi'itaxaatega da asomayi taÿauga aso huachiqui da huaña da noÿin.

³² Nachi aso María co'ollaq iviteuga ca hueta'a so Jesús, nachi i'adoto naua l-llicte, nachi 'eetega, 'eeta': –'Am ÿataxala', da 'am qoueta'a ne'ena, nachi sa ishíttaxa da ileu yi ÿaqaÿa.

³³ Nachi so Jesús co'ollaq ila'a da noÿiitac aso María qataq so judiopi mayi nnaictapegue', nachi somayi ÿataqta huo'o da laquicoxo, qataq nomteguet da 'eeta lta'adaic da lquiyaqteÿaxac.

³⁴ Nachi inat somayipi, 'eeta': –¿Chaq huá'ague ca qaÿachaña co'ollaq qailayiñi camaxa? Nachi qoÿinapega, qoÿiita': –'Am qadataxala', 'ayala, ña 'amejnaxaneuga.

³⁵ Nachi so Jesús noÿiitac.

³⁶ Nachi na judiopi 'eeta': –Ña qauloÿa, damayi ÿataqta lauotaxat yimayi.

³⁷ Qalaxayi somayipi huo'o na 'eeta': –De'eda shiÿaxaua yi ishit da ÿauo'oi naua l'ai'te na sa nauaañi, qalaq ¿táloxochiyictoxo' da saq huo'o ca 'eetec da yaqto' sa ipaca'aguet naq'en da l-leuaxa co'ollaxa yi Lázaro?

Da 'eetec co'ollaq qaltaq nca'aleec so Lázaro

³⁸ Qaq so Jesús qaltaq nomteguet da 'eeta lta'adaic, nachi nqochineu'a aso huachiqui. Qaq asa'aso huachiqui 'eeta'am na chochi auac, qaq huo'o so lapoxot coma' som ñigueuo.

³⁹ Nachi so Jesús 'enapeco': –Ña qanqachi na coma'. Nachi aso Marta mayi lqaÿa som saqca, asomayi 'enapeco': –'Am ÿataxala', yimayi ÿoqta da mashi huo'o na laita, cha'ayi mashi ivi' naua cuatro na'axa'te da saqca.

⁴⁰ Qalaxayi so Jesús 'enapeco': –¿Sa ishito' da 'am shiitega caillaxa da huo'otaq 'au'amqajnataxan, nachi ishit da 'aulogui da lli'oxoyic ñi Dios?

⁴¹ Nachi qanqateec so coma'. Nachi so Jesús ÿamato'ot na piguem, nachi 'enapeco': –'Am ita'a, 'am sanot da ñi'achiquiaxac, cha'ayi 'am aÿim 'au'axaÿa.

⁴² Qaq aÿim saÿaten da 'am nachi 'eetai' naxa da aÿim 'au'aqtega. Qalaxayi aÿim shinapec de'eda souaxat nam shiÿaxauapi mayi hueta'a ne'ena, yaqto' namayipi ishit da i'amaqten da 'eesa da aÿim 'adamaxashic.

⁴³ Qaq co'ollaq ime da nasaxauec de'eda, nachi deÿaxan, 'eeta': –¡Lázaro, 'anpa'auec!

⁴⁴ Nachi som leuaxaic npa'auec, somayi qoÿaxatta'aguelo naua lhua'q qataq naua lchil som laxataxa, qataq qoÿaxattagui na lashic so hualoq. Nachi so Jesús 'enapega somayipi, 'eeta': –Ña qausoigue damayi, nachi qauaqÿa'a da queuoÿapigui'.

Qaÿauotaique da qaÿaconeu'a so Jesús

⁴⁵ Huaña, nachi ÿataqta qalota nam i'amaqten so Jesús nam judiopi mayi anaÿa aso María da i'añaqchit co'ollaq ÿauaachigui dam i'ot so Jesús.

⁴⁶ Qalaxayi huo'o somayipi na jec da nqo'oneu'a na fariseopi, nachi da'aqtaxanem da i'ot so Jesús.

⁴⁷ Nachi nam fariseopi qataq nam lataxala'pi na ntaxaÿaxanaxanecpi da qaitaxaÿapegue' ñi Dios, namayipi i'ot so laponaxac, huaxaiguet na loicnatac na lataxaguesat da detaxaÿapega't. Nachi somayipi 'enapeco': –¿Huá'ague ca shinaqtec? Cha'ayi se'eso shiÿaxaua ÿataqta qalota na i'ot n'anecpi mayi sa qaÿauanapega.

⁴⁸ Cha'ayi qomi' da sauaxasoqta'a da nachi 'eetai' de'eda, nachi 'enauac qome na shiÿaxauapi i'amaqten somayi. Nachi nam nta'alpi mayi lma' yi Roma ishit qome da anac, nachi ilaxachigui añi qad'onaxanaxaqui qataq nam qadhuo' l'ecpi.

⁴⁹ Qalaxayi huo'o so 'oonolec somayipi som l'enaxat da Caifás. Somayi nachiso som 'oonolec lataxala' nam ntaxaÿaxanaxanecpi da qaitaxaÿapegue' ñi Dios se'eso vi'i. Somayi 'enapeco': –Qami' qaica ca qauaÿajñiÿapec.

⁵⁰ Qataq sa qauaÿajñiÿo' da nataq'en ÿaÿamaqchiguiñi da 'oonolec ca shiÿaxaua da ileualec na lauo' l'ecpi, qaq sa ishit da huo'otaq qailaxachigui 'enauac na qadhuo' l'ecpi.

⁵¹ Qaq so Caifás sa ishit da huo'otaq maichi ndojlec de'eda 'enapec, cha'ayi somayi nachiso so lataxala' na ntaxaÿaxanaxanecpi se'eso vi'i. Qaq ñi Dios nachi i'aqtaxanaxanec somayi da so Jesús, somayi ileualec 'enauac nam judiopi;

⁵² qaq sa ishit da nachaqnata nam judiopi, cha'ayi nataq'en yaqto' lapona't 'enauac nam llalaqpi ñi Dios mayi nlagaxattac.

⁵³ Huaña, nachi se'eso na'a'q chigoqchiguiña da na lataxala'pi na judiopi detaxaÿapigui ca lataxac, da yaqto' qaÿalauat so Jesús.

⁵⁴ Qaq ÿoqo'oyi so Jesús mashi sa ishit da ÿoqta nachaxaata da huetaigui na judiopi. Chaqdata da somayi ca'ai yi 'alhua Judea da nqo'ona yim pueblo Efraín mayi sa qaÿapeque yim tojlec 'alhua. Huaña, nachi hua'a yimayi nnaictagueto soua lapaxaguenataqa.

⁵⁵ Qaq mashi sa qaÿauga so na'a'q mayi laponaxaqui na judiopi da qaiuennate so na'a'q co'ollaq qanayica'ai yi Egipto. Nachi ÿataqta qalota na shiÿaxauapi mayi nañalo naua lÿa't pueblo da taÿa yi Jerusalén, da yaqto' i'ot da n'onataxac da nqui'itaxat ca shiÿaxaua, da yaqta'a nvideuo se'eso na'a'q naponaxaqui.

⁵⁶ Qaq qaÿallitaique so Jesús, qaq co'ollaq qanayiuta'a aso n'onaxanaxaqui, nachi nnattega't somayipi, 'eeta': –¿Chaq 'éetec ca qad'aqtaqui? ¿Peta'a ishit da anac camaxa, huo'otaq jegatai'?

⁵⁷ Na fariseopi qataq na lataxala'pi na ntaxaÿaxanaxanecpi da qaitaxaÿapegue' ñi Dios, namayipi ÿan da l'aqtac da huo'otaq huo'o ca ÿaÿaten ca hueta'a so Jesús, nachi ishit da i'axat, da yaqto' qaÿaconeu'a somayi da qaicoñi'.