Hechos 9 - Nuevo Testamento Toba Sur

Da 'eetec co'ollaq qantounaxanaxan so Saulo

¹ Qaq so Saulo ñaq queto'ot da ÿadeetega da ÿalauat na i'amaqteetac so qadataxala'. Qaq ÿoqo'oyi somayi nqo'oneu'a so lta'a na ntaxaÿaxanaxanecpi da qaitaxaÿapegue' ñi Dios.

² Nachi iÿaxanot somayi, da yaqto' ÿanem aca lmalate ca l'aqtac, da yaqto' so Saulo nqo'ona aca laponaxaqui na judiopi mayi naña yi Damasco, da ÿi'iguena'a nam quetague' da n'aqtac, da nauega yi Jerusalén da yaqto' qaicoñi', nai'ctaxa da ÿallippi, huo'otaq 'alpi.

³ Qalaxayi somayi co'ollaq quetague' so nqa'aic, qaq mashi sa qaÿapeque ca la ciudad Damasco, nachi nque'elaxatta da huaigui so n'edaxa chigoqo'ot na piguem.

⁴ Nachi so Saulo najñi. Huaña, nachi hua'axaÿa so n'aqtac, 'eeta': –Saulo, Saulo, ¿tá'ainco' yi aÿim 'aucaatac?

⁵ Nachi so Saulo denataxan, 'eeta': –'Am ÿataxala', ¿négue't 'am? Nachi se'eso nvilÿaxac qataq 'enapeco': –Qomyi nachaÿim Jesús, nachaÿim mayi aÿim 'aucaatac. 'Am 'eeta'am da maichi 'anque'emaqchittapeguela't, qoneta'am da 'eetec ca nauegaxanaxala' huaca da maichi ÿasottapeeguet aca n'adaxanaqte.

⁶ Nachi so Saulo ÿataqta iviloxolaqchit da lcolanaxa, nachi 'enapeco': –'Am ÿataxala', ¿chaq négue't ca 'anshitaique da aÿim so'ot? Nachi so qadataxala' 'enapego' somayi, 'eeta': –Qoñishiguem qome, nachi 'au'a yi la ciudad. Yimayi nachi huaña da 'am qai'aqtaxanem cam 'au'ot.

⁷ Qaq som shiÿaxa'u mayi nnaictagueto so Saulo, soomayi ÿataqta ñi'i't, cha'ayi soomayi hua'aqchiyigui co'ollaxa so n'aqtac, qalaxayi sa ishit da huo'o ca iloda'a.

⁸ Qaq co'ollaq ime, nachi so Saulo ñishiguem. Qalaxayi somayi co'ollaq demejnaxan, nachi sa ishit da nauaañi. Ÿoqo'oyi qaÿacona na lhuaq, nachi qaÿauectau'a yi Damasco.

⁹ Huaña yimayi, nachi hueta'a tres na'axa'te, sa ishit da nauaañi, qataq sa ishit da huo'o ca chic, qataq sa ishit da nÿom.

¹⁰ Qaq yim Damasco nachi netaña so shiÿaxaua 'amqajnataxanaxaic, l'enaxat Ananías. Qaq somayi huo'o co'ollaxa so lauanaqchic da so qadataxala' nachaxana somayi. Nachi 'enapego', 'eeta': –¡Ananías! Nachi somayi 'enapeco': –Aja', nachaÿim, 'am ÿataxala'.

¹¹ Nachi so qadataxala' 'enapego' somayi, 'eeta': –Qoñishiguem qome, nachi qoquegue so nqa'aic l'enaxat Ÿashicteec. Qaq qom 'avita ñi lma' ñi Judas, nachi 'aunataxanaique ca shiÿaxaua mayi chigaqa'ague da Tarso, l'enaxat Saulo. Qaq camayi nqouagaxaueetac,

¹² nachi huo'o so lauanaqchic: ila'a ca shiÿaxaua, l'enaxat Ananías, da taÿau'a ca hueta'a, nachi ÿashil-lec na lqaic, da yaqto' qaltaq nauaañi.

¹³ Nachi co'ollaq hua'aqchigui de'eda so Ananías, nachi 'enapeco': –'Am ÿataxala', ÿataqta qalota na aÿim da'aqtaxanem que'eca shiÿaxaua qataq 'enauac nam qauem mayi i'otec nam netaña yi Jerusalén mayi 'am i'amaqteetac.

¹⁴ Qaq camayi nagui nachi naÿa'a ne'ena souaqta'a, nachitac da l'aqtac na lataxala'pi na ntaxaÿaxanaxanecpi, da yaqto' ÿauec da icoñi' 'enauac nam iÿaxaatega da 'ad'enaxat.

¹⁵ Qalaxayi so qadataxala' 'enapego' somayi, 'eeta': –'Aue, 'anqo'ona, cha'ayi aÿim llica'aguishic ñi'iñi shiÿaxaua, da yaqto' aÿim i'axat, aÿim i'axatem 'enauac na ÿotta'a't shiÿaxauapi, qataq na lta'alpi namayipi, nataq'en nam llalaqpi so Israel.

¹⁶ Qaq ñimayi aÿim sachaxana qome da ÿataqta qalota da nque'ejnaxac souaxat aÿim.

¹⁷ Nachi so Ananías jec da taÿa ca noÿic mayi netaña so Saulo. Qaq co'ollaq inoxoneu'a ca hueta'a, nachi ÿashil-lec somayi, nachi 'enapego', 'eeta': –'Am ÿaqaÿa Saulo, ñi qadataxala' Jesús mayi 'am nachaxana co'ollaq 'ananactague' na nqa'aic, ñimayi aÿim namaxa 'am, da yaqto' qaltaq 'anauaañi, qataq da 'am nlaqchigui so Espíritu Santo.

¹⁸ Huaña, nachi so Saulo huo'o aso chigoqtoiguilo naua l'ai'te, 'eeta'am ana lso, nachi ishit da qaltaq nauaañi. Nachi somayi ñishiguem, nachi qanachilaxan, da yaqto' da'amqajnataxan.

¹⁹ Qaq co'ollaq ime, nachi somayi deque'e, nachi qaltaq huo'o da l'añaxac. Nachi huo'oi soua na'axa'te da huetaigui so 'amqajnataxanaxaicpi mayi netaña yi Damasco.

So Saulo i'axattac da n'aqtac hueta'a yi Damasco

²⁰ Qaq co'ollaq ime de'eda, nachi so Saulo da'aqtaxaatapoigui ana laponaxaquipi na judiopi, i'axattac so Jesús da nachiso so llalec ñi Dios.

²¹ Nachi 'enauac nam n'axaÿaxaatega somayi ÿataqta huo'o da l'aalaxa. Nachi 'eeta': –¿Sa ishito' peta'a da saq nachida dam shiÿaxaua mayi icaatac nam nqouagaxaueetega so Jesús mayi netaña yi Jerusalén? qataq ¿sa ishito' peta'a da saq nachida dam naÿa'a ne'ena souaqta'a da ÿaconeu'a da icoñi' na 'amqajnataxanaxaicpi, nachi ÿaneu'a nam lataxala'pi na ntaxaÿaxanaxanecpi?

²² Qalaxayi so Saulo lamaaxa nquigaxatteec da l'añaxac da ÿachaxaatac so Jesús da nachiso so nta'a mayi qadca'alaxaqui, chochi ivitta'a da ÿataqta sa ÿaÿaten ca 'eetec naq'en na judiopi mayi netaña yi Damasco.

So Saulo naneltaxanguet na judiopi

²³ Qaq co'ollaq mashi qaÿoqteguelo soua na'axa'te, nachi na judiopi detaxaÿapigui da ÿauotaique da ÿalauat so Saulo.

²⁴ Qalaxayi somayi l'axaÿaxac de'eda. Qaq huo'oi soua na'axa'te qataq pesa'chi da na judiopi nauaataique somayi, qanayiuta'alo naua laso'mi yi la ciudad, da qaÿauotaique da qaÿalauat.

²⁵ Qalaxayi na 'amqajnataxanaxaicpi co'ollaq pe, nachi qaÿachagui somayi aso canasto late'edai, nachi qaÿasaqteueegue da laÿi so lcopaqtaxat so la ciudad. Huaña, nachi somayi qoÿit.

So Saulo hueta'a yi Jerusalén

²⁶ Qaq so Saulo co'ollaq iviteu'a yi Jerusalén, nachi ÿauotaique da ÿalegoigui na 'amqajnataxanaxaicpi. Qalaxayi 'enauac namayipi ñi'ita'aguet somayi, cha'ayi sa ishit da i'amaqten da somayi mashi da'amqajnataxan.

²⁷ Qalaxayi so Bernabé ÿauec somayi, nachi ÿauegueu'alo soua Jesús lamaxa'shi. Nachi ÿataqta da'aqtaxaatema da 'eetec so Saulo co'ollaq nauane' so qadataxala' Jesús co'ollaq huangui so nqa'aic, qataq da 'eetec co'ollaq detaqtague' somayi, qataq da 'eetec da ÿataqta sa ishit da ñi'itapeguelec da i'axattac da l'enaxat so Jesús co'ollaq hueta'a yi Damasco.

²⁸ Nachi so Saulo hua'a yi Jerusalén, nachi ÿalectaiguilo soua Jesús lamaxa'shi.

²⁹ Nachi somayi ÿataqta sa ishit da ñi'itapeguelec da i'axattac so qadataxala', nachi n'aqtaxaatapegue' qataq ncotatapegue' nam judiopi mayi ÿaÿate'n naua l'aqtaqa na griegopi. Qalaxayi namayipi co'ollaxa ÿauotaique da ÿalauat somayi.

³⁰ Nachi som 'amqajnataxanaxaicpi co'ollaq l'axaÿaxac de'eda, nachi qaÿauega so Saulo yi ñigaxasom Cesarea. Huaña yimayi, nachi qaÿamaxague da Tarso.

³¹ Nachi 'enauac nam 'amqajnataxanaxaicpi mayi netaña yi 'alhua Judea, qataq yi Galilea, qataq yi Samaria, namayipi ÿataqta lactapiguiñi qataq nquictauec da l'añaxac, qataq ÿataqta huo'o da lcolanaxa so qadataxala'. Qaq so Espíritu Santo ÿataqta i'añaqchittac namayipi da nquictauec naq'en yi lcata na da'amqajnataxan.

Qanataden so Eneas

³² Qaq so Pedro co'ollaq queuotapigui 'enauac na nqaÿañicpi, nachi nataq'en ivida'a so 'amqajnataxanaxaicpi mayi netaña yi Lida.

³³ Qaq huaña yimayi, nachi ilalec so shiÿaxaua l'enaxat Eneas. Somayi ivi' naua ocho vi'iyi da dalola, sa da'añiigue. Qaq ÿoqo'oyi huetalec ca lacanec.

³⁴ Nachi so Pedro 'enapego' somayi, 'eeta': –Eneas, 'am nataden so Jesucristo, qoñishiguem qome, nachi 'aunana't na 'adacanec. Nachi so Eneas ñishiguem.

³⁵ Qaq 'enauac ÿauaachigui de'eda nam netaña yi Lida qataq yi Sarón. Huaña, nachi namayipi ÿalat da toguishic l'amqajnataxanaxac, nachi quegue so qadataxala'.

Aso Dorcas qaltaq nca'aleec qanqoÿin

³⁶ Qaq se'esoua na'axa'te huo'o aso 'amqajnataxanaxai netaña yi la ciudad Jope. Asomayi naua judío l'aqtaqa l'enaxat Tabitá, qaq naua griego l'aqtaqa Dorcas (de'eda n'enaxat naigui da ñi'imshi). Asá'aso 'alo ÿataqta no'on da l'onataxanaxac, qataq itauaatac nam huo'o da lhuenaxanaxa.

³⁷ Qalaxayi huo'o so na'a'q nachi aso Dorcas sa no'on, nachi ileu. Qaq co'ollaq qaimat da qanachilaxaatac, nachi qaidoshiguemec ca pa'ashiguem so noÿic.

³⁸ Qaq yi'iyi Jope nachi sa qaÿapeque yi Lida yim hueta'a so Pedro. Nachi som 'amqajnataxanaxaicpi co'ollaq l'axaÿaxac somayi da hueta'a yimayi, nachi qaÿamaxalo soua dos shiÿaxa'u da qoÿinapega, qoÿiita': –'Ananaÿa qome na Jope; sa ishit da 'anaÿaloxon.

³⁹ Nachi so Pedro ca'ateguelo soomayi. Qaq co'ollaq iviyi', nachi somayi qaÿaviguishiguemec so noÿic mayi huetaña aso Dorcas. Qaq 'enauac nam pa'aipi datatau'a, noÿiitagui. Nachi qaÿachaxaatac ana l'onata npotopi qataq na lomaxaquipi mayi l'onatacpi asomayi co'ollaq ña qanachattague'.

⁴⁰ Qaq co'ollaq ime, nachi so Pedro ipa'axaneec 'enauac somayipi, nachi i'alyiñi naua l-llicte da nqouagaxauen. Qaq co'ollaq ime, nachi ÿamatalec asom leuaxai, nachi 'enapega, 'eeta': –Tabitá, qoñishiguem. Nachi asomayi ÿauachiguilo naua l'ai'te. Qaq co'ollaq ila'a so Pedro, nachi ñishiguem, nachi nso'ooñi.

⁴¹ Nachi somayi ÿacona na lhuaq asomayi, nachi ÿanaxanaxaashiguem. Ime, nachi iÿaxaneuga so nqaÿañicpi qataq som pa'aipi, nachi ÿachaxan asomayi da qaltaq nca'aleec.

⁴² Qaq de'eda 'enauac nam netaña yi la ciudad Jope ÿaÿaten, nachi ÿataqta qalota na i'amaqten so qadataxala'.

⁴³ Nachi so Pedro ÿataqta huo'oi soua na'axa'te da hueta'a yi la ciudad, netaña ca lma' so l'enaxat Simón, l'oc l'o.