Hechos 28 - Nuevo Testamento Toba Sur

So Pablo hueta'a yi 'alhuolec l'enaxat Malta

¹ Qaq can mashi 'enauac da qadca'aleec, nachi saÿajnaq da l'enaxat yi'iyi 'alhuolec, l'enaxat da Malta.

² Qaq nam lma' yimayi ÿataqta qomi' ilo'ogueta. Ÿoqo'oyi qaÿalooñi so nodec lta'adaic, souaxat na latomaxa qataq so auot. Ime, nachi qomi' 'enapegalo da 'enauac ñoqochinaxau'a so nodec, da yaqto' ñitonaq.

³ Nachi so Pablo laÿootega't na qo'ipaq ltoxoicpi mayi daqaqta, nachi ÿasaqtangui so nodec. Nachi som n'adaxanaq mayi dataueguesop na l'edaxa na nodec, nachi inaigui na lhuaq, nachi netauo.

⁴ Nachi nam lma' se'eso 'alhua co'ollaq ÿauaachigui se'eso n'adaxanaq da netau'a na lhuaq so Pablo, nachi namayipi 'enapeco': –De'eda shiÿaxaua yi'oqta da laataxanaxaic, ÿoqo'oyi nai'ctaxa da ÿit na 'etaxat, qalaxayi dam nhuaxanaguec mayi saq cha'a sa ishit da nca'alaxattauec damayi.

⁵ Qalaxayi so Pablo ichigoxongui somayi so nodec. Qaq somayi ÿataqta qaica ca da.

⁶ Nachi 'enauac somayipi iuatta'a da huo'otaq somayi nalauat na l'oc, huo'otaq da nque'elaxatta da huañi da ileu. Qalaxayi co'ollaq mashi qaÿoqtegue da qaiuatta'a, nachi co'ollaq qaila'a da qaica ca da, nachi somayipi nadalaxat da lhuennataxa. Nachi qoÿiitega somayi da nachina na nnatac mayi saq cha'a.

⁷ Qaq se'eso qanayiuta'a nachi sa qaÿapeque so n'alhua som lataxala' na lma' se'eso 'alhuolec, somayi l'enaxat da Publio. Nachi somayi qomi' ÿacongueta, nachi ÿataqta qomi' huetapegueto se'esoua tres na'axa'te.

⁸ Qaq somayi so lta'a sa no'on, huetalec ca lmala', huo'o na l'edaxa qataq iuet na lauel. Nachi so Pablo jec da namaqtega somayi. Qaq co'ollaq ime da natameetapeguelec somayi, nachi ÿashil-lec, nachi no'oita naq'en.

⁹ Huaña, nachi anac nataq'en nam laÿipi sa no'on mayi netaña se'eso 'alhuolec, nachi 'enauac no'oita qanqoÿin.

¹⁰ Nachi somayipi ÿataqta qalota da lli'oxonnataxanaxa da shinaqta. Qaq can ime, nachi qaltaq soqolaq, nachi somayipi qomi' ÿanema 'enauac na qadhuenec de'eda qoyiquiaxac.

So Pablo mashi ivita yi Roma

¹¹ Qaq can mashi inoxoodeec soua tres ca'agoxoiqa da souaqta'a yi'iyi 'alhuolec. Nachi qaltaq senotaxau'a aso barco mayi nal'ena da hueta'a yimayi, iuatta'a da inoxoneec so n'omaxa. Asá'aso barco, asomayi lashi yi Alejandría, huetalguete soua dos n'anqa lqui'il soua nnataqa Cástor qataq so Pólux.

¹² Qaq can sovidaxa yi ñigaxasom l'enaxat Siracusa, nachi tres na'axa'te da souaqta'a.

¹³ Qaq huaña yimayi, nachi soqolaqto'ot so loigue, chochi sovidaqta'a yi l'enaxat Regio. Qaq so lÿa na'a'q, nachi qaltaq anac so nte. Qaq ÿoqo'oyi so lÿa na'a'q nachi chita'ague da sovitaxa yi Pozzuoli.

¹⁴ Nachi huaña, qaq huo'oi soua ñatenaqleguete qadqaÿa't, nachi soomayi qomi' 'eetegalo da souaqa'a 'oonolec la semana. Qaq can ime, nachi qaltaq soqolaq da saxague da Roma.

¹⁵ Qaq som qadqaÿañicpi mayi netaña yi Roma mashi huo'o da l'axaÿaxac da shinaqta; nachi somayipi qomi' huaqata'agueta. Huo'o na nqatauga yi nmenqa' so Apio, qataq yim l'enaxat tres mataqa'te. Qaq can ilaigui somayipi so Pablo, nachi ÿanot da n'achic ñi Dios, nachi ÿataqta nomteguet da l'añaxac.

¹⁶ Qaq can sovitaxau'a yi Roma, nachi som huataxanaq lta'a ÿaneu'a na ncoñitaguishicpi som ilotague' aso ncoñitaxanaxaqui. Qalaxayi so Pablo ÿaqa'a ca netaña qanqoÿin, qalaxayi qaÿauo'o so nhuataxaua.

So Pablo da'aqtaxaatac hueta'a yi Roma

¹⁷ Qaq can mashi ivi' tres na'axa'te da sovidaxa yi Roma, nachi so Pablo damaxasoxoneuga nam lataxala'pi na judiopi mayi netaña yimayi. Qaq can mashi laÿoota'a't somayipi, nachi so Pablo 'enapega, 'eeta': –Qami' ÿaqaÿañicpi, aÿim nai'ctaxa co'ollaxa da qaica ca so'otec na qadhuo' judío l'ecpi, qataq qaica da ñipa'agueetega da n'onataxac som hua'au qadta'alpi, qalaxayi ñaqaiyita namayipi aÿim icoñi' can huaña yi Jerusalén, nachi aÿim ÿaneu'a na nta'alpi romano l'ecpi.

¹⁸ Qaq can ime da aÿim qaichimaxattega, nachi qaÿauotaique da aÿim qaÿachaxaneec, cha'ayi qaica ca qaÿanata ÿasouaxashit cam naigui da huo'otaq qaÿauo'o ca ñalaataguec.

¹⁹ Qalaxayi nam judiopi sa ÿaÿamaxaden da aÿim qaisouec. Huaña, nachi aÿim seÿaxaneu'a da aÿim nmit ñim nta'a mayi naña na Roma, qaq nai'ctaxa da aÿim qaica ca sasaxalec lasouaxashit na iuo' l'ecpi.

²⁰ Qaq nachida da huo'o mshi qami' seÿaxaneugalo, da yaqto' qami' ñauaneto, qataq qami' setaxaÿapegueto. Cha'ayi nachida dam 'enauac qanaquitaxac qomi' Israel l'ecpi, da huo'o mshi aÿim qaicoñitta'aque ne'enaua ique'te.

²¹ Nachi qoÿiitego' somayi, qoÿiita': –Qomi' qaca aca qomi' nvitalo nede da chigaqa'ague da Judea da huo'otaq 'am qai'axattac, qataq nam nvittac qadhuo' l'ecpi qaica da huo'otaq huo'o ca 'am i'axattac da huo'o ca 'adasouaxashit.

²² Qaq ÿoqo'oyi qomi' sauoqtaique da 'am ñi'axaÿaxanaxa ca 'eetec ca 'adhuennataxac. Cha'ayi saÿajnaq da 'enauaque naua 'ale'u qanpa'agueetega de'eda dalaxaic n'amqajnataxanaxac.

²³ Qaq ÿoqo'oyi qaÿauo'o so naloqnec na'a'q. Qaq co'ollaq ivita se'eso na'a'q, nachi ÿataqta qalota na shiÿaxauapi na nvita ca netaña so Pablo. Nachi ÿachigoxottot se'eso nte'eta, chochi ivitta'a so avit, da i'axattapeguem somayipi da l'onataxanaxac ñi Dios da ilo'ogue 'enauacna. Ÿataqta quetapegueu'a somayipi da i'amaqten naq'en so Jesús, nachi i'axattac nam nqataxacpi mayi chigoqo'ot so Moisés qataq nam l'aqtaxanaxac som l'aqtaxanaxanecpi ñi Dios.

²⁴ Nachi huo'o na i'amaqten da l'aqtaxanaxac so Pablo, qataq huo'o na sa ishit da i'amaqten.

²⁵ Qaq cha'ayi sa ishit da 'eeta'a't somayipi, nachi huo'o na jec. Nachi so Pablo 'enapeco': –Ÿataqta tachigui da l'aqtaxanaxac so Espíritu Santo co'ollaq ÿachigoxotchigui so Isaías da 'enapega naq'en so hua'au qadta'alpi, 'eeta':

²⁶ 'Asoma, 'au'aqtaxanem qome ne'ena shiÿaxauapi, qoneta': Qami' yi'oqta da qau'aqaitac, qalaxayi sa ishit da qauaÿajñi cam qai'axattac; qami' qanloitauec, qalaxayi sa ishit da huo'o ca qauloÿa'a.

²⁷ Cha'ayi da lquiyaqteÿaxac ne'ena shiÿaxauapi ÿi'iguelaxalec da ÿataqta qadamchigui, qataq sa ishit da ÿoqta hua'aqa, qataq naua l'ai'te ÿamaqta'a't; da yaqto' sa ishit da huo'o ca ila'a, qataq sa ishit da huo'o ca hua'axaÿa, qataq sa ishit da huo'o ca ÿaÿaten da lquiyaqteÿaxac, qataq sa ishit da aÿim ñi'iguelaxa da yaqto' ñataden.

²⁸ Qaq nagui qami' qauaÿajñi, da de'eda qotaÿa'ague, nachi de'eda nca'alaxa mayi chigoqo'ot ñi Dios, damayi qoÿami' qome nam sa ishit da judío l'ecpi. Qaq namayipi qome ÿataqta n'axaÿaxana.

²⁹ Nachi so Pablo co'ollaq 'enapec de'eda, nachi nam judiopi jec, qalaxayi ÿataqta maichi nqalligottega't.

³⁰ Nachi so Pablo ÿataqta ividaxattreec soua dos vi'iyi da naña yimayi, netaigui so lma' mayi chochi qaishiiteetac. Nachi ÿataqta ilo'oguet 'enauac nam natapegueu'a somayi da nauane'.

³¹ Nachi ÿataqta qaica ca ndaqtaique da i'axattac da l'onataxanaxac ñi Dios da ilo'ogue 'enauacna, qataq dapaxaguenataxaatapeguec so qadataxala' Jesucristo. Ÿataqta qaica ca naxattac da l'aqtaxanaxac.