Hechos 26 - Nuevo Testamento Toba Sur

So Pablo i'axatem so Agripa dam qai'otec somayi

¹ Nachi so nta'a Agripa 'enapega so Pablo, 'eeta': –'Am peta'a ishit da 'au'ot ca 'adtaxaÿaxac. Nachi so Pablo ÿachaxaashiguem na lhuaq, nachi detaqa, 'eeta':

² –Aÿim ÿataqta samachiguiñi da aÿim 'an'axaÿaxana da setaqa, 'am ita'a Agripa, da yaqto' aÿim so'ot ca itaxaÿaxac da sataÿa'aguet 'enauac nam 'eetega ÿasouaxashitpi na judío l'ecpi.

³ Cha'ayi aÿim saÿateeta da 'am ÿataqta 'auaÿateete' naua qan'onataxaco qomi' judío lashi', qataq dam de'eda ñicotaqtapigui. Qaq ÿoqo'oyi aÿim 'am ñachoxonnot da aÿim 'anhualaxaune' da aÿim 'an'axaÿaxana.

So Pablo i'axat da 'eetec co'ollaq da'amqajnataxan

⁴ 'Enauac na judiopi ÿataqta ÿaÿateeta da ÿataxac co'ollaq sootaña yi ima' qataq yi Jerusalén can sootaigui namayipi co'ollaq ñaq aÿim nogotolec.

⁵ Namayipi nataq'en ÿaÿateeta, qataq ishit da maichi i'axat, da co'ollaq ñaq aÿim nogotolec qalaq ñanacte' da shictaigui na fariseopi, nam ÿataqta quetegue da l'amqajnataxanaxac na judiopi, saq 'en'am na laÿipi.

⁶ Qaq nagui aÿim qanauegueuo, da yaqto' aÿim qanmit souaxat de'eda ñaquitaxac, da ñi Dios ishit qome da qaltaq nca'aleec naq'en na leuaxaicpi, cha'ayi nachida dam ÿachaxanapecot co'olloxochiyi som hua'au qadta'alpi.

⁷ Nataq'en nam llalaqpi soua sachigoxosoxogueta doce llalqa so Israel, namayipi nataq'en iuattaique qom ivita da ipacchigui de'eda qaÿachaxanapec co'ollaxa. Qaq ÿoqo'oyi namayipi ÿi'oxodeetac ñi Dios, qataq i'ot da l'aqtac 'enauaque naua na'axa'te qataq naua pe'. Qaq nachida de'eda ñaquitaxac, 'am ita'a Agripa, da huo'o mshi na judiopi aÿim npa'agueetega.

⁸ Qaq ¿qami' peta'a sa ishito' da qau'amaqchiñi da ñi Dios ishit da qaltaq nca'aleec naq'en na leuaxaicpi?

Da 'eetec so Pablo co'ollaq icaatac da icoñi' nam quetague' so Cristo

⁹ Aÿim co'ollaxa ÿataqta qalota nam qauem iuennataxacpi mayi huotaique da so'otec dam l'enaxat som Jesús mayi Nazaret l'ec.

¹⁰ Qaq damayi sepacalec da so'ot co'ollaq huaña yi Jerusalén, nachi nam lataxala'pi nam ntaxaÿaxanaxanecpi aÿim ÿanem so l'aqtac. Huaña, nachi ÿataqta qalota na secoñi' nam 'amqajnataxanaxaicpi. Qataq naxa da huo'o na qaÿalauat, nachi aÿim ÿataqta saÿamaxadeeta.

¹¹ Qataq ÿataqta qalota da seuaxaatac namayipi da sauotaique da yaqto' ÿaxaañi da lpi'iÿaxac. Qaq 'eda da so'otec 'enauac anam laponaxaquipi nam judiopi. Cha'ayi aÿim ÿataqta qalota da iquiÿaxa namayipi, ÿoqo'oyi aÿim ivida'a da secanaxangui nam hueta'alo naua ÿaqa'alo la ciudad.

So Pablo qaltaq i'axat da 'eetec co'ollaq chita'ague da da'amqajnataxan

¹² Qaq nachida de'eda iuennataxac co'ollaq aÿim saÿa'ague da la ciudad Damasco, aÿim ÿanem da l'aqtac nam lataxala'pi nam ntaxaÿaxanaxanecpi da aÿim ÿamaq.

¹³ Qalaxayi co'ollaq huangui so nqa'aic, 'am ita'a Agripa, mashi na'a'q laiñi, nachi aÿim sela'aguet so n'edaxa ÿataqta napacalec na l'edaxa añi nala', chigoqo'ot na piguem. Nachi somayi souaigui, nataq'en soua ñinaictagueto.

¹⁴ Nachi qomi' 'enauac da sanataxañi, nachi aÿim sa'axaÿa so n'aqtac aÿim 'eetega, huota'aisalo naua l'aqtaqa na judiopi, 'eeta': “Saulo, Saulo, ¿tá'ainco' yi aÿim 'aucaatac? 'Am maichi 'anque'emaqchittapeguela't, qoneta'am ca nauegaxanaxala' huaca da maichi ÿasottapeeguet aca n'adaxanaqte.”

¹⁵ Nachi aÿim shinapec: “¿Négue't da qoneta, 'am ÿataxala'?” Nachi somayi aÿim 'enapega, 'eeta': “Qomyi nachaÿim Jesús mayi aÿim 'aucaatac.

¹⁶ Qalaxayi qoñishiguem qome, 'anachajñi, cha'ayi aÿim 'am ñachaxana, cha'ayi sauotaique da yaqto' aÿim 'au'onataxanot, qataq da yaqto' 'au'axat dam nagui 'adauanaqchic qataq cam taÿa'a da 'am sachaxana.

¹⁷ Aÿim qome 'am ñica'alaxateeguesop na judiopi, qataq nam ÿaqa'a ca chigaqa'ague, nam nagui 'am samaxa da 'anqo'ona.

¹⁸ Aÿim 'am samaxa namayipi, da yaqto' ishit da nauaañi 'anqa'en, yaqto' sa ishit da 'ico' quetaigui na napalaxa, chaqdata da quetaigui na yi'oqchiguiñi; qataq yaqto' namayipi sa ishit da hueto'ot da l'añaxac so Satanás, chaqdata da quegue ñi Dios; qataq yaqto' aÿim i'amaqten, nachi ishit da qaÿapalaxat na lasouaxashitpi, qataq yaqto' qaÿalecneu'a da qoÿanem qome cam ÿachaxanapec ñi Dios da ÿami' nam lalamaxatpi ñimayi.”

So Pablo ÿataqta ÿalaxaguet da lauanaqchic

¹⁹ Qaq ÿoqo'oyi, 'am ita'a Agripa, aÿim sa ishit co'ollaxa da sa salaxaguet de'eda ÿauanaqchic mayi chigoqo'ot na piguem.

²⁰ Ÿoqo'oyi aÿim sa'auaxaachiguiñi da sa'axatem da n'aqtac nam netaña yi Damasco. Ime, qataq jec nam netaña yi Jerusalén, qataq 'enauac nam netaña yi 'alhua Judea, qataq nataq'en nam sa ishit da judiopi. Shinapega da yaqto' ca'aisalo naua n'onataxaco, qataq ÿi'iguelaxa ñi Dios, nachi i'ot cam no'on mayi chigaqaigui da dalaxaic lataxac.

²¹ Qaq nachida da huo'o mshi na judiopi aÿim ÿaconeu'a da aÿim icoñi' can huaigui añi n'onaxanaxaqui, nachi huotaique da aÿim ÿalauat.

²² Qalaxayi souaxat da ltaunaxanaxac ñi Dios da shiita, ÿoqo'oyi nagui ñaq shicta da sa'axattapeguem ñimayi 'enauac na shiÿaxauapi, sa'aqtaxanem na saxanaxa da ÿi qataq nam ÿipi. Qaq sa ishit da huo'otaq ÿaqa'a ca i'aqtaxanaxac da sa'aqtaxan. Chaqdata da sa'axattac da l'aqtaxanaxac som hua'au l'aqtaxanaxanecpi ñi Dios qataq so Moisés da qai'axatta'aguet ca naÿa'cna.

²³ Qaq dam n'aqtaxanaxac qoÿinac yi cam nta'a mayi nca'alaxaqui, camayi qome ÿataqta huo'o da nque'ejnaxac. Qaq da ime, nachi qaÿalauat, qaq nachica qome ca l'auaxanec da qanca'alaxateeguesop na leuaxaicpi. Ime, nachi camayi i'axatem da nca'alaxa nam qadhuo' l'ecpi qataq nam saq judío l'ecpi, qaq damayi 'eeta'am na yi'oqchiguiñi.

So Pablo quetapegueu'a so Agripa da da'amqajnataxan

²⁴ Qaq co'ollaq 'enapec de'eda so Pablo, nachi so Festo 'enapeco': –¡Ÿoqta huo'o da 'oic, 'am Pablo! Souaxat da ÿapacteec da 'anapaxaguenaxac, nachi 'am n'aqchit.

²⁵ Qalaxayi so Pablo 'enapeco': –Sa ishit da huo'o ca aÿoic, 'am ita'a Festo; cha'ayi aÿim dam sa'axattac ÿataqta lataxac, qataq ÿataqta 'eesa.

²⁶ Qaq 'iñi ñi nta'a Agripa qomi' ÿalectaiguilo, ñimayi ÿataqta ÿaÿateeta de'eda. Qaq ÿoqo'oyi aÿim sa ishit da ñiteltapiguiñi da aÿim hua'aqtega ñimayi da sa'aqtaxaatac, cha'ayi saÿaten da ñimayi nataq'en ÿaÿateeta 'enauac de'eda. Cha'ayi damayi sa ishit da huo'otaq ÿapogoñi ca lataxac; damayi ÿataqta ÿaateec.

²⁷ Qaq 'am ita'a Agripa, ¿'au'amaqten peta'a da l'aqtaxanaxac som l'aqtaxanaxanecpi ñi Dios? Yi'oqta da 'am 'au'amaqten.

²⁸ Nachi so Agripa 'enapeco': –Mashi huac da aÿim 'auañoxot da yaqto' sa'amaqten so Cristo.

²⁹ Nachi so Pablo 'enapeco': –Nai'ctoxo' da huac da 'au'amqajnataxan, huo'otaq saxanaxa, qalaxayi ñishitaique da ñi Dios saq'amta naq'en, nataq'en 'enauac nam aÿim n'axaÿaxaatega nagui, ishit da ivida'a da 'eeta'am aÿim, qalaxayi sa ishit qome da aÿim qoñiita'am da aÿim qaicoñittai'.

³⁰ Qaq co'ollaq ime da 'enapec de'eda so Pablo, nachi ñishiguem so nta'a Agripa, nataq'en so nta'a Festo, qataq aso Berenice, qataq 'enauac som nso'ootañipi.

³¹ Nachi pa'auec somayipi, nachi qaitaqtapigui de'eda. Nachi somayipi maichi 'enapeco': –Ñi'iñi shiÿaxaua, ñimayi qaica ca lasouaxashit mayi naigui da yaqto' qaÿauo'o ca nalaataguec, huo'otaq da chochi qaicoñittai'.

³² Nachi so Agripa 'enapega so Festo, 'eeta': –Ñi'iñi shiÿaxaua ishíttaxa da qaisouec da huo'otaq sa iÿaxaneu'a da nmit cam nta'a mayi neta'ague da Roma.