Hechos 24 - Nuevo Testamento Toba Sur

Da ltaxaÿaxac so Pablo co'ollaq qaÿataxanot so nta'a Félix

¹ Qaq co'ollaq mashi inoxoodeec soua cinco na'axa'te, nachi nvi' so Ananías, som lataxala' na ntaxaÿaxanaxanecpi, chigoqta'ague da Cesarea, nnaictague' so nquedoxonecpi qataq so aloico l'o', l'enaxat Tértulo. Nachi soomayi nachaateu'alo so nta'a, da yaqto' qai'axat cam lasouaxashit so Pablo.

² Qaq co'ollaq mashi qanauegueuo so Pablo, nachi so Tértulo da'aqtaxanem so nta'a Félix da i'axat cam lasouaxashit so Pablo, 'eeta': –Souaxat da qoneta, 'am qadta'a, qomi' huo'o da qadlagaxayic, ÿataqta selagaqtapiguiñi, qataq 'enauac da 'ad'onataxanaxac da 'am nta'a ÿataqta ÿaÿamaqchiguiñi, souaxat da 'adaÿajnec.

³ Qaq 'enauac nam shiÿaxauapi mayi neta'alo naua 'ale'u ÿataqta nachi 'eetai' da ntootapeguec damayi, 'am qadta'a.

⁴ Qaq aÿim sauotaique da sa qaÿauec ca itaxaÿaxac, qaq ÿoqo'oyi 'am ñachoxonnot da qomi' 'anqouagueque da cada'ac da qomi' 'an'axaÿaxanalo.

⁵ Cha'ayi qomi' ÿataqta selaqlec ñi'iñi shiÿaxaua da ÿataqta sa dalemaqtaxan, qataq 'enauaque naua lÿa't 'ale'u i'otec da nÿodacachi naq'en na judiopi, qataq nachiñi ñim lataxala' nam lataxanatacpi so qaÿamata'ac Nazaret l'ec.

⁶ Ñimayi nataq'en ivida'a da huotaique da ÿi'inai' añi qad'onaxanaxaqui; nachi qomi' saconaxau'a da secoñidaq, nachi ñimitaqtac, sedoxolec na maichi qanqataxacpi.

⁷ Qalaxayi so huataxanaq lta'a Lisias qomi' tanguilo, nachi ÿataqta sa dechidaqtaxanapec da deuotaxanec.

⁸ Nachi somayi 'enapega nam npa'agueetega ñimayi da anac da 'am naÿa. Qaq nagui 'am maichi 'auchimaxata ñimayi da huo'otaq sa ishit da 'en dam qad'aqtaxanaxac da sa'axataqtac 'enauac nam lasouaxashitpi.

⁹ Nachi nam judiopi mayi ÿalectauo 'enauac nmashiguem da 'enapec ÿataqta 'eesa damayi.

¹⁰ Nachi so nta'a ÿauota'a l'anec da 'enapega so Pablo, da yaqto' detaqa. Nachi so Pablo 'enapeco': –Aÿim ÿataqta saÿamaxadeeta da sauo'o ca itaxaÿaxac, da yaqto' aÿim 'au'aqchigui, cha'ayi aÿim saÿaten da 'am mayi nachi'am 'au'ot na lataxaguesat da huo'o ca camachaqca nam qadhuo' l'ecpi, qaq de'eda 'ad'onataxanaxac, damayi mashi huo'oi soua vi'iyi.

¹¹ Qaq nagui 'am ishit da maichi 'auchimaxata qome da i'aqtaxanaxac, cha'ayi aÿim ñaq cha'ague da ñovita yi Jerusalén nagui saxanaxa da ivi' caua doce na'axa'te, qaq aÿim ñanac da sauotaique da ñatamnot ñi Dios.

¹² Qaq sa ishit da aÿim qanatenalec da huo'otaq huo'o ca ñicotatague', huo'otaq da so'ottac ca l'axa da huaigui añi n'onaxanaxaqui, huo'otaq da huaigui añi laponaxaquipi na judiopi, huo'otaq huo'o ca hua'ague yim la ciudad.

¹³ Qaq ne'ena shiÿaxauapi sa ishit da huo'o ca 'eesa naq'en 'enauac nam 'eetega da ÿasouaxashit.

¹⁴ Qalaxayi aÿim ñi'axatta da aÿim so'onataxaatacot ñim Dios so hua'au ita'alpi, qalaxayi aÿim shictague' de'eda dalaxaic ñiquiaxac mayi namayipi ÿamata'ac da dalaxaic n'amqajnataxanaxac, cha'ayi aÿim sa'amaqten 'enauac nam nanettañi nqataxacpi mayi chigoqo'ot so Moisés qataq som l'aqtaxanaxanecpi ñi Dios.

¹⁵ Qataq nachi shin'am namayipi dam qanaquitaxac ñi Dios da na leuaxaicpi ishit da qaltaq nca'aleec naq'en, cam no'on da lataxac qataq cam qauem da lataxac.

¹⁶ Qaq ÿoqo'oyi aÿim ÿataqta ñipogoxoueetapegue' da ÿataqta saqca ca da da ivilÿaxac, da yaqto' qaica ca hueto'ot ÿasouaxashit ñi Dios, nataq'en 'enauac na shiÿaxauapi.

¹⁷ Qaq can mashi qaÿoqteguelo soua vi'iyi da secoleetac, nachi aÿim ñi'iguelaxa yi ima' da ñidoi' aso i'agaxanaqte qataq da sanot aca ÿachitaqtaxanaqte ñi Dios.

¹⁸ Qaq aÿim mashi so'ottac co'ollaxa de'eda, nachi huo'oi soua judío lashi' mayi chigoqda'ague da Asia. Soomayi aÿim ilodalec da sootaigui añi n'onaxanaxaqui, can mashi seme da ñiÿoxoc da so'ottac dam maichi qan'onataxac. Qaq qaica da huo'otaq qalota na shiÿaxauapi, huo'otaq da huo'o ca n'axa.

¹⁹ Qaq que'ecaua shiÿaxa'u mayi nachicauáctaxa da ana'c, da yaqto' i'axa't ca ÿasouaxashit da huo'otaq huo'o cam sa ÿaÿamaxade'n da shiita.

²⁰ Qalaxayi nachi 'en'am ne'enapi da ishit da i'axat nagui da huo'otaq huo'o ca ilalec ÿasouaxashit can salectaigui so laponaxac nam lta'alpi na judiopi mayi loicnatac na lataxaguesat.

²¹ Cha'ayi sa iuena'a da huo'otaq nachida dam i'aqtac da sasoilec can ÿataqta sa ñicosaÿañi da shiita': “Na na'a'q aÿim qanmichiitac souaxat da aÿim sa'amaqten da qaltaq qanca'alaxateec qome na leuaxaicpi.”

²² Qaq co'ollaq hua'aqchigui de'eda so nta'a Félix, qaq somayi yi ÿataqta ÿaÿateeta da llic nam i'amaqteetac so Jesús, nachi somayi nañaxaañi naq'en so ntaxaÿaxac. Nachi 'enapeco': –Qom ivita da nvi' ca huataxanaq lta'a Lisias, nachi qaltaq huo'o qome ca saÿaten de'eda qancotaitapigui.

²³ Nachi so nta'a Félix 'enapega som ilotague' na huataxanaqpi da ñaq 'eetalec da qaicoñittai' so Pablo, qalaxayi qoÿanem da saqalligueme da qailo'ogue qataq qaÿashiitem da ishit da qanamaqtapegueu'a, qataq da maichi qanayiuapegue' da qaitauan.

²⁴ Qaq soua lÿa't na'axa'te nachi qaltaq nvi' so Félix, nnaictague' aso lhua Drusila, asomayi judío lashi. Nachi somayi damaxasoxoneuga so Pablo da yaqto' n'axaÿaxana da i'axat ca llic da qaipi'iÿa'a so Jesucristo.

²⁵ Qalaxayi co'ollaq so Pablo i'axat da llic ca shiÿaxaua da no'on da lataxac, qataq da 'eetec da maichi ntel-la't, qataq cam pa'ateec na'a'q qom qanmit 'enauacna, nachi so Félix ÿataqta ñi'i. Nachi 'enapeco': –'Asoma qome, maichiyo' qom qaltaq huo'o ca idaqa', nachi qaltaq 'am seÿaxaneuga.

²⁶ Nataq'en so Félix huo'o da lhuataxanaxac da huo'otaq so Pablo ishit da ishiiten somayi, nachi ishit da ÿaxaneec. Qaq ÿoqo'oyi ÿataqta qalota da iÿaxaneuga somayi da detaxaÿapegue'.

²⁷ Qaq ivi' soua dos vi'iyi da 'eeta'ac de'eda. Nachi so Félix co'ollaq ÿaxaneec da nta'a, nachi anac so Porcio Festo da qoÿanagui da l'onataxanaxac somayi. Qaq so Félix, cha'ayi huotaique da chochi qaica ca da naq'en na judiopi, nachi queto'ot da qaicoñittai' naq'en so Pablo.