Hechos 23 - Nuevo Testamento Toba Sur

¹ Nachi so Pablo co'ollaq ÿamataigui so nta'alpi mayi loicnatac na lataxaguesat. Nachi 'enapeco': –Qami' ÿaqaÿañicpi, aÿim chochi ivitta'a nagui da qaica ca da da ivilÿaxac, qaq ñi Dios ÿaÿaten.

² Nachi so Ananías mayi nachiso so lataxala' na ntaxaÿaxanaxanecpi da qaitaxaÿapegue' ñi Dios, somayi ÿamaxalec nam sa qaÿapeque so Pablo, da yaqto' iuaxanoigui na alap somayi.

³ Qalaxayi so Pablo 'enapeco': –¡Ñi Dios 'am iuaxan qome, 'am mayi qonetega da 'am 'eesa! 'Am 'anso'ootaina da yaqto' aÿim 'audolec na nqataxacpi da yaqto' aÿim 'anmit, qalaq ¿tá'ainco' yi maichi 'anpa'aguene' na nqataxacpi da aÿim 'auamaxasoxoolec da aÿim qaiuaxan?

⁴ Nachi nam huetai'yi 'enapego' somayi, 'enapeco': –¿Tá'ainec yi qonetec de'eda da 'aushiuen ñim lataxala' na ntaxaÿaxanaxanecpi da qaitaxaÿapegue' ñi Dios?

⁵ Nachi so Pablo 'enapeco': –Qami' ÿaqaÿañicpi, aÿim sa ishit da saÿaten ñimayi da nachiñi ñim lataxala' na ntaxaÿaxanaxanecpi; cha'ayi nachi 'enapec naua nanettrañi n'aqtaqa, 'eeta': “Sa ishit qome da 'aushiuen cam lta'a na 'adhuo' l'ecpi.”

⁶ Nachi so Pablo ila'a da huo'o na saduceopi se'eso nta'alpi mayi loicnatac na lataxaguesat, qataq huo'o na fariseopi. Nachi somayi ÿataqta n'axanneque naua l'aqtaqa, 'eeta': –Qami' ÿaqaÿañicpi, aÿim fariseo l'ec, nachi sachigaqaigui na fariseopi, qalaq nagui aÿim qanmichiitac, souaxat da huo'o da ñaquitaxac da qaltaq qanca'alaxateec na leuaxaicpi.

⁷ Qaq co'ollaq chochi 'enapec de'eda, nachi na fariseopi qataq na saduceopi maichi taÿa't da ncotatega't. Huaña, nachi somayipi nÿodacachi.

⁸ Cha'ayi nam saduceopi, namayipi 'eetega da sa ishit da qaltaq nca'aleec na leuaxaicpi, qataq sa ishit da huo'o ca chigaqshiguem lamaxashic ñi Dios, qataq qaica nam saq cha'a nqui'ipi; qaq nam fariseopi, qalaxayi i'amaqten da huo'o 'enauac ne'enapi.

⁹ Nachi 'enauac somayipi i'alaqtagui; nachi huo'o na nachajñi nam dapaxaguenataxaatapeguec na nqataxacpi mayi nachi laÿipi na fariseopi. Nachi namayipi 'eeta': –De'eda shiÿaxaua, damayi sa ishit da huo'o ca i'ot sa ÿaÿamaxañi, cha'ayi sa iuena'a da huo'otaq huo'o cam detaqtague' nam namaxashic piguem l'ecpi, huo'otaq nam saq cha'a nqui'ipi. Qaq no'on da sa ishit qome da 'ico' ñipa'aguenaqtague' ñi Dios.

¹⁰ Nachi ÿataqta lta'adaic da cotaxac. Nachi som huataxanaq lta'a ÿataqta huo'o da lcolanaxa da qanaviigui so Pablo. Huaña, nachi damaxasoxoneuga so nallippi da yaqto' nqateeguesop somayipi so Pablo, nachi qaltaq ÿauegueu'a so lma' na huataxanaq.

¹¹ Qaq se'eso pe nachi so qadataxala' nachaxana so Pablo, nachi 'eetega, 'eeta': –Pablo, 'an'añaxat qome, cha'ayi de'eda qonetec co'ollaq aÿim 'au'axattac can huaña na Jerusalén, nataq'en nachida qome da qonetec da aÿim 'au'axat qom huaña yi Roma.

Qaitaqtapigui da qaÿalauat so Pablo

¹² Qaq so lÿa na'a'q, nachi huo'o na judiopi na detaxaÿapigui da huotaique da ÿalauat so Pablo, nachi somayipi ÿan da l'aqtac da 'enapec sa ishit da deque'e, huo'otaq nÿom, da huo'otaq saxanaxa da ÿalauat somayi.

¹³ Qaq napacalec cuarenta som shiÿaxauapi mayi n'ochigui de'eda.

¹⁴ Nachi somayipi nqo'oneu'a som lataxala' na ntaxaÿaxanaxanecpi, qataq nam lquedoxonecpi nam judiopi, nachi 'enapeco': –Qomi' sanaq da qad'aqtac, da yaqto' sepagaqchigui da sa ishit da sequi'aq, da huo'otaq saxanaxa da salauataq so Pablo.

¹⁵ Qaq nagui qami' qataq nam laÿipi nta'alpi mayi loicnatac na lataxaguesat, qauÿaxañiÿot qome ñi huataxanaq lta'a, da yaqto' qoyi'oxoñi nte'eta nachi navigui' ca Pablo, chochi qoñiÿapec qome da huotaique da ÿoqta qaumijñiita da lasouaxashit somayi. Qaq qomi' qome nachi sogote da ñaÿamaxataqtai', da yaqto' salauataq camayi qom huo'otaq saxanaxa da noviyi'.

¹⁶ Qalaxayi som llalec aso lqaÿa so Pablo l'axaÿaxac de'eda, nachi somayi jec da nqo'oneu'a so lma' na huataxanaqpi, nachi i'axatem de'eda so Pablo.

¹⁷ Nachi so Pablo iÿaxana so 'oonolec nam ltauapi so huataxanaq lta'a, nachi 'enapega, 'eeta': –'Auauegueu'a qome de'eda nsoq ca nta'a, cha'ayi damayi huo'o da l'aqtaxanaxac da da'aqtaxanem camayi.

¹⁸ Nachi se'eso ltaua so nta'a ÿauegueu'a somayi so nta'a, nachi da'aqtaxanem, 'eeta': –Ñim Pablo mayi ncoñitaguishic, ñimayi aÿim iÿaxana, nachi aÿim 'enapega da yaqto' 'am ñauegueu'a ne'ena nsoq, cha'ayi huo'o cam l'aqtaxanaxac da 'am da'aqtaxanem.

¹⁹ Nachi so nta'a ÿacona na lhuaq so nsoq, nachi iÿotauga. Nachi inattac, 'eeta': –¿Négue't cam huotaique da aÿim 'au'axatem?

²⁰ Nachi so nsoq 'enapeco': –Nam judiopi mashi nmachigui da l'aqtac da huotaique da 'am qaiÿaxanot qonte' nte'eta, da yaqto' 'auauega ñi Pablo na nta'alpi mayi loicnatac na lataxaguesat, qaq chochi qaÿatenataxangui da qoÿiitega da ÿoqta qanmitta ca lasouaxashit.

²¹ Qalaxayi sa ishit qome da 'au'amaqten; cha'ayi napacalec ca cuarenta na shiÿaxauapi na nqañoxottañi na dauanaxaatac. Qaq namayipi ÿan da l'aqtac da 'enapec sa deque'e qataq sa nÿom, da huo'otaq saxanaxa da ÿalauat ñi Pablo. Qaq yimayipi nagui mashi naÿamaxattai', chochi qaiuatta'a ca 'ad'aqtac.

²² Nachi so nta'a nquine' so nsoq, nachi huaqattapeguelec da yaqto' sa ishit da huo'o ca i'axatem de'eda.

So Pablo qaÿamaxa so nta'a l'enaxat Félix

²³ Nachi so nta'a iÿaxanalo soua dos mayi ilotagueto na huataxanaqpi, nachi 'enapegalo da yaqto' ÿaqataxanai'salo ca doscientos huataxanaqpi na petañi, qataq setenta nam ÿauota'a na lalo caaÿo, qataq doscientos nam ÿauota'a ana lataquiaxai, cha'ayi qom qaÿata'ague so pe, nachi soomayi qaÿamaxadegue da Cesarea.

²⁴ Nataq'en damaxasoxoolec da qaÿaqataxanai' ca nnotaxala' caaÿo so Pablo. Nachi huaqata da ÿataqta qaica ca da qanqoÿin da qaÿauega so nta'a Félix.

²⁵ Nachi ÿamaxaguelo soomayi aso lede mayi huetalec da 'eeta':

²⁶ “Aÿim Claudio Lisias, 'am samaxa da iquinaxanaxac, 'am ñauochaxaua ita'a Félix.

²⁷ Na judiopi co'ollaxa ÿaconeu'a ne'ena shiÿaxaua, nachi mashi huotaique da ÿalauat. Qalaxayi can saÿaten da namayi romano l'ec, nachi sauo'o so ñallippi, nachi ñoqo'ona da ñica'alaxateec.

²⁸ Qaq can sauotaique da saÿaten cam huo'o mshi qanquiÿatega, nachi sauega nam lta'alpi na judiopi.

²⁹ Huaña, nachi saÿaten da chochi huasoitapeguelec nam maichi nqataxacpi namayipi, qaq qaica cam ÿoqta huasoilec namayi da yaqto' qaÿalauat, huo'otaq da qaicoñittai'.

³⁰ Qalaxayi can aÿim i'axaÿaxac da na judiopi mashi detaqtapigui namayi da huotaique da ÿalauat, nachi namayi 'am samaxa. Nataq'en shinapega nam ipa'agueetacpi namayi da yaqto' nataq'en 'am dataÿot da yaqto' i'axat cam ÿasaqtapeguelec lasouaxashit namayi. Hua', nachi tachiguiña.”

³¹ Nachi so huataxanaqpi i'ot dam l'aqtac so nta'a. Nachi se'eso pe qaÿacoosop so Pablo, qaÿaueegue da Antípatris.

³² Qaq so lÿa na'a'q nachi ñi'iguelaxa so lma' so huataxanaqpi mayi petañi, nachi ndoteec som huota'a lalopi so nnaicapegue' so Pablo.

³³ Qaq co'ollaq qaivita yi Cesarea, nachi qoÿanem so nta'a aso nede, nataq'en qoÿaneuo so Pablo.

³⁴ Qaq co'ollaq imat da itaxaÿaxaatac aso nede so nta'a, nachi inattac so Pablo da chaq hua'ague ca chigoqchiguiña. Qaq co'ollaq mashi ÿaÿaten somayi da chigoqta'ague da Cilicia.

³⁵ Nachi 'enapego', 'eeta': –Maichi 'am ñi'axaÿaxano' qom ivita da nvi' cam 'am ipa'agueetacpi. Ime, nachi damaxasoxoolec somayi da yaqto' qaÿauega da qoÿanaigui so lma' co'olloxochiyi so Herodes. Nachi qaÿauo'o so nhuataxaua.