Hechos 22 - Nuevo Testamento Toba Sur

¹ –Qami' ÿaqaÿañicpi, qataq qami' ita'alpi, ña qan'axaÿaxañiÿa da itaxaÿaxac da qami' shinapegalo.

² Qaq co'ollaq qai'axaÿa da detaxaiguilo naua judío l'aqtaqa, nachi ÿataqta ÿi'imaqtom so shiÿaxauapi. Nachi so Pablo 'enapeco':

³ –Aÿim judío l'ec. Ÿañoqo' yi Tarso mayi huaigui yi 'alhua Cilicia. Qalaxayi aÿim ñañaxatalec na Jerusalén, qaq aÿim lapaxaguenatac so Gamaliel. Aÿim ÿataqta shicteguelo naua nqataxaco som hua'au qadta'alpi. Qaq ÿoqo'oyi nachi 'eetai' da ÿataqta huo'o da iuogoxo da so'onataxaatacot ñi Dios, ÿataqta semato'ot da iquiyaqteÿaxac. Qaq nachi shiita'am 'enauac da qoñiita nagui.

⁴ Qaq aÿim co'ollaxa ÿataqta secaatac nam quetague' de'eda n'aqtac, chochi ivitta'a da huo'o na salauat. Nachi saconeu'a da secoñi' na ÿallippi qataq na 'alpi, da yaqto' sanaigui añi ncoñitaxanaxaqui.

⁵ Qaq som lataxala' na ntaxaÿaxanaxanecpi da qaitaxaÿapegue' ñi Dios, qataq 'enauac nam laÿipi nataxala'pi, namayipi ishit da i'axat de'eda, da nachina namayipi na aÿim ÿanem aso nede mayi taÿa'a na qadaÿipi judiopi mayi netaña yi Damasco. Qaq aÿim saÿa'a yimayi co'ollaxa da shi'iguena'a na 'amqajnataxanaxaicpi, da yaqto' ñauega na Jerusalén, qaq yi qaiuaxan.

So Pablo i'axat da 'eetec co'ollaq da'amqajnataxan

⁶ Qalaxayi co'ollaq shictague' so nqa'aic, nachi mashi ñayiitau'a yi Damasco, qaq mashi yaqta'a da na'a'q laiñi, nachi nque'elaxatta da souaigui so n'edaxa mayi chigoqo'ot na piguem.

⁷ Nachi aÿim sanajñi. Ime, nachi sa'axaÿa so n'aqtac aÿim 'eetega, 'eeta': “Saulo, Saulo, ¿tá'ainco' yi aÿim 'aucaatac?”

⁸ Nachi aÿim senataxaatac, shiita': “'Am ÿataxala', ¿négue't 'am?” Nachi somayi aÿim 'enapega, 'eeta': “Qomyi nachaÿim Jesús mayi aÿim Nazaret l'ec, nachaÿim mayi aÿim 'aucaatac.”

⁹ Qaq som ñinaictagueto, soomayi ÿauaachiyigui som n'edaxa, nachi ÿataqta ñi'i't, qalaxayi sa ishit da qai'axaÿa som aÿim 'eetega.

¹⁰ Nachi aÿim shinapec: “'Am ÿataxala', ¿négue't ca 'anshitaique da so'ot?” Nachi so qadataxala' aÿim 'enapega, 'eeta': “Qoñishiguem, nachi qocot da 'iquiaxac da 'aigue da Damasco. Qaq qom huaña yimayi, nachi 'am qai'aqtaxanem 'enauac cam 'ad'onataxanaxac.”

¹¹ Qaq cha'ayi aÿim nachi sa ñauaañi souaxat so n'edaxa, nachi soua ñinaictagueto aÿim ÿauecta'agueta, chochi sevittau'a yi Damasco.

¹² Qaq yimayi nachi netaña so shiÿaxaua l'enaxat Ananías. Qaq somayi ÿataqta ÿalaxalec nam lqataxacpi so Moisés, qaq nam judiopi mayi lma' yi Damasco ÿataqta no'on naq'en da n'aqtaguec somayi.

¹³ Nachi se'eso Ananías aÿim anaÿa, nachi aÿim 'enapega, 'eeta': “'Am ÿaqaÿa Saulo, 'am qaltaq 'anauaañi qome.” Huaña, nachi qaltaq ishit da ñauaañi, nachi sela'a somayi.

¹⁴ Nachi somayi aÿim 'enapega, 'eeta': “Ñim nDios som hua'au qadta'alpi, ñimayi 'am lca'aguishic co'ollaxa, cha'ayi nshitaique da yaqto' 'am 'auaÿaten cam maichi 'eetapeguec ñimayi, qataq da 'anauane' som no'on da lataxac, qataq da yaqto' 'an'axaÿaxana somayi da 'am detaxaÿot.

¹⁵ Qataq 'am 'au'axat qome somayi da 'au'aqtaxanem 'enauac na shiÿaxauapi, qataq da 'au'axat dam 'adauanaqchic qataq dam 'au'aqchigui.

¹⁶ Qaq ÿoqo'oyi nagui, ¿négue't cam 'au'aptapigui? Qoñishiguem qome, nachi 'am qanachilaxan, ÿataqta 'aupi'iÿa'a da l'enaxat so qadataxala', yaqto' ishit da qaÿapalaxat na 'adasouaxashitpi.”

So Pablo i'axat da 'eetec co'ollaq qaÿamaxa nam sa ishit da judiopi

¹⁷ Qaq can aÿim ñi'iguelaxague na Jerusalén, nachi ñoqo'oneu'a añi n'onaxanaxaqui da yaqto' ñoqouagaxauen, nachi huo'o so ÿauanaqchic.

¹⁸ Aÿim sela'a so qadataxala', nachi aÿim 'eetega, 'eeta': “Sa 'anaÿaloxon qome da qoca'ai na Jerusalén, cha'ayi sa ishit da qaÿaconguet da 'ad'aqtaxanaxac da aÿim 'au'axattac.”

¹⁹ Nachi aÿim shiita': “'Am ÿataxala', namayipi ÿaÿaten da aÿim shictagui co'ollaxa 'enauac ana laponaxaquipi na judiopi, nachi saconeu'a da secoñi' 'enauac nam i'amaqteetac da qoneta, qataq seuaxaatac.

²⁰ Qataq co'ollaq qaÿalauat yi Esteban mayi 'ad'aqtaxanaxanec, qalaq aÿim salectauo, qataq sovida'a da selotague' na logoxotpi nam dalaataxanpi.”

²¹ Qalaxayi so qadataxala' aÿim 'enapega, 'eeta': “'Aue qome, qojec, cha'ayi ÿataqta qaÿoqtegue cam 'am samaxague, 'am samaxa qome nam sa ishit da judiopi.”

So huataxanaq lta'a qaltaq icoñi' so Pablo

²² Huaña, nachi tachiguiña da sa ishit da qan'axaÿaxana. Nachi so shiÿaxauapi ÿataqta i'alaqtagui, 'eeta': –¡No'on da qaÿalauat de'eda shiÿaxaua! ¡Sa ishit da nachi 'eetai' da nca'altauec!

²³ Qaq cha'ayi nachi queto'ot da i'alaqtagui somayipi, qataq imetta'pe naua alogo qataq na 'alhua,

²⁴ nachi so huataxanaq lta'a damaxasoxoolec da qaltaq qoÿanaigui so lma' so huataxanaqpi so Pablo, qataq damaxasoxoolec da yaqto' qaiuaxan somayi, da yaqto' ishit da i'axat ca huo'o mshi i'alaqtalec somayi na shiÿaxauapi.

²⁵ Qalaxayi co'ollaq mashi ime da qaicoñida'ague da qaÿauotaique da qaiuaxan, nachi so Pablo 'enapeco': –¿Qami' qachi ishito' da huo'o da qoñiic da qauaxañi ca romano l'ec, da huo'otaq saxanaxa da qanmichi ca 'eetec ca lasouaxashit?

²⁶ Qaq co'ollaq hua'aqchigui de'eda so ltaua so huataxanaq lta'a, nachi jec da icoyiguen so lta'a, 'eeta': –Maxatchaxa, 'advitalec qome da 'anshitaique da 'au'ot, cha'ayi de'eda shiÿaxaua, damayi romano l'ec.

²⁷ Nachi se'eso nta'a nqo'oneu'a so Pablo, nachi inattac, 'eeta': –¿'Eesa peta'a da 'am romano l'ec? Nachi so Pablo 'enapeco': –Aja'.

²⁸ Nachi so nta'a 'enapeco': –Aÿim ÿataqta qaÿoqtegue aso seshiiten da yaqto' aÿim romano l'ec. Qalaxayi so Pablo 'enapeco': –Aÿim, qalaxayi ÿataqta ÿañoqo' yimayi.

²⁹ Huaña, nachi som nshitaique da iuaxan somayi nachi nlagaxatapecpi. Ivida'a som nta'a co'ollaq mashi ÿaÿaten da somayi romano l'ec, nachi somayi ÿataqta huo'o da lcolanaxa souaxat da icoñittai' so Pablo.

So Pablo qaÿataxanoigui so nta'alpi mayi loicnatac na lataxacpi na judiopi

³⁰ Qaq so lÿa na'a'q nachi som nta'a huotaique da ÿaÿaten chaq ta'ainec na judiopi da nquiÿatega so Pablo. Nachi nqa't so lque'te, nachi ÿamaxalec da i'ot so laponaxac so lataxala'pi na ntaxaÿaxanaxanecpi, nataq'en 'enauac so nta'alpi mayi loicnatac na lataxaguesat. Nachi nqateec so Pablo da ÿataxanoigui somayipi.