Hechos 21 - Nuevo Testamento Toba Sur

Da lliquiaxac so Pablo co'ollaq taigue da Jerusalén

¹ Qaq can mashi soqolqa'ai so qadqaÿañicpi, nachi senotaxauo, nachi salamaxataqchigui yi Cos, qaq so lÿa na'a'q, nachi sovitaxa yi Rodas. Qaq huaña yimayi, nachi saxa yi Pátara.

² Qaq huaña yimayi, nachi ñatenaqteguet aso barco mayi taÿa'ague da Fenicia. Nachi senotaxau'a asomayi, nachi soqolaq.

³ Qaq can soqolaqta, nachi chochi seloqtau'a yi 'alhuolec Chipre pa'aÿa'ague da qan'emaq, nachi chochi sovidaqta'a yi Siria. Qaq cha'ayi aso barco qanÿoxoñi na l'ec can huaña yi ñigaxasom Tiro, nachi saxau'a yimayi.

⁴ Nachi qomi' ñauanaxai' na 'amqajnataxanaxaicpi, nachi souaqa'aguet somayipi soua siete na'axa'te. Nachi so Espíritu Santo da'aqtaxanem somayipi, da yaqto' 'enapega so Pablo da yaqto' sa ishit da taigue da Jerusalén.

⁵ Qaq can inoxoodeec soua siete na'axa'te, nachi qaltaq qolaq. Nachi 'enauac so 'amqajnataxanaxaicpi lÿatac na n'alpi qataq na llalaqpi da qomi' icaadaueegue da laÿi yi la ciudad. Qaq can sovidaqaama so loigue, nachi qomi' sa'adaxayiñi naua qadllicte, nachi ñoqouagaxauenaqtac.

⁶ Huaña, nachi ñaqapalaqtague' somayipi da ñicoyiguenaqtague', nachi senotaxau'a aso barco. Qaq somayipi ÿi'iguelaxau'alo naua lma'te.

⁷ Qaq sachigoxosoqchiguiña yi Tiro, chochi sovidaqta'a yi Tolemaida. Huaña yimayi, nachi tachiguiña da qoyiquiaxac da soqolaqtangui na 'etaxat. Qaq huaña yimayi, nachi ñauanaxai' so qadqaÿañicpi, nachi 'oonolec so na'a'q da souaqta'aguet.

⁸ Qaq so lÿa na'a'q, nachi so Pablo nataq'en qomi' qaltaq soqolaq, nachi sovidaxa yi la ciudad Cesarea. Qaq huaña yimayi, nachi ñoqo'onaxau'a yi lma' so Felipe som i'axattac da n'aqtac, som 'oonolec soua siete ntauapi co'olloxochiyi. Nachi souaqa'a yi lma'.

⁹ Qaq se'eso Felipe huo'oi soua cuatro llale. Soomayi saxanaxa da huado'n, qaq soomayi l'aqtaxanaxanal ñi Dios.

¹⁰ Qaq can mashi huo'oi soua na'axa'te da souaqta'a yi lma', nachi noviyi' so l'aqtaxanaxanec ñi Dios, l'enaxat Agabo, chigoqta'ague da Judea.

¹¹ Somayi qomi' namaqtegalo. Nachi somayi ÿacona so nsaataxaqui so Pablo, nachi maichi icoñiyiguilo naua lchil qataq naua lhua'q. Nachi 'enapeco': –So Espíritu Santo 'enapec da l'aqtaxanaxac yi cam judiopi mayi lma' yi Jerusalén nachi 'eetec qome de'eda ñim lalamaxat ne'ena saataxaqui da icoñi'. Ime, nachi ÿaneu'a na sa ishit da judiopi.

¹² Qaq can sa'axasoqchigui de'eda, nachi qomi' qataq na qadaÿipi mayi netaña yi Cesarea nachi ñachoxonnaqtacot so Pablo, da yaqto' sa ishit da taigue da Jerusalén.

¹³ Qalaxayi so Pablo 'enapec: –¿Tá'ainec yi qanoÿiñiitac qataq qanshiitaique da aÿim qauaquicoqchichi? Yi aÿim ÿataqta qaica ca shictega, nai'ctaxa da huo'otaq aÿim qaicoñi', huo'otaq da aÿim qaÿalauat da huaña yi Jerusalén, souaxat da sasoilec so qadataxala' Jesús.

¹⁴ Qaq cha'ayi sa ishit da qomi' ÿalaxagueta so Pablo, nachi saxanaxañi, nachi shinaqtega, shinaqta': –Hua', no'on da ÿataqta ipacchigui ca 'eetapeguec ñi qadataxala'.

¹⁵ Qaq can ime de'eda, nachi ñaÿamaxataq, nachi saxague da Jerusalén.

¹⁶ Nachi huo'oi soua qadÿata'pe nam 'amqajnataxanaxaicpi mayi lma' yi Cesarea, nataq'en nachi ÿalectaiguilo soomayi so chigaqa'ague da Chipre, somayi l'enaxat Mnasón. Qaq somayi mashi sa lcoshi'igue da 'amqajnataxanaxaic. Qaq nachiso so 'eetega da qadanataqa' ca lma' da sovidaq.

So Pablo namaqtega so Santiago

¹⁷ Qaq can mashi sovitaxa yi Jerusalén, nachi na qadqaÿañicpi ÿataqta qomi' ntootapegueque.

¹⁸ Qaq so lÿa na'a'q nachi so Pablo nataq'en qomi' ñoqo'onaxau'a so Santiago. Qaq somayi nachi hueta'aguet 'enauac so laÿipi nataxala'pi.

¹⁹ Nachi so Pablo nquiitague' 'enauac somayipi. Ime, nachi ÿachigoxottot da i'axattac 'enauac nam i'otpi ñi Dios mayi ÿachigoxotchigui somayi da huaigui naq'en nam sa ishit da judiopi.

²⁰ Qaq can ime da qai'aqchigui 'enauac de'eda, nachi ÿataqta qaÿi'oxodeetac ñi Dios. Ime, nachi qoÿiitega so Pablo, qoÿiita': –Hua', 'am qadqaÿa, qalaxayi 'am mashi 'auaÿaten da na judiopi ÿataqta qalota na da'amqajnataxan. Qaq namayipi ÿataqta ipactega da qaipactelec da qanayiigue 'enauac nam lqataxacpi so Moisés.

²¹ Qaq namayipi l'axaÿaxac da 'am 'auapaxagueetapegueco' 'enauac nam judiopi mayi neta'alo naua ÿaqa'alo' 'ale'u, da yaqto' sa ishit da ÿalaxaguet nam lqataxacpi so Moisés, qataq qonetego' da yaqto' sa ishit da ÿauo'o na n'anaxat na l'oc na llalec, qataq ÿaxaneec na maichi qan'onataxacpi.

²² Qaq ¿chaq huá'ague ca 'eetec nagui? Cha'ayi na shiÿaxauapi laÿona't qom l'axaÿaxac da 'am mashi 'anovi'.

²³ Qaq ÿoqo'oyi 'am no'on da 'au'ot qome da qadqataxac, 'eeta': Huo'oi naua cuatro shiÿaxa'u souaqta'agueta mayi yaqta'a da ivita ca laloqo' cam l'aqta'c co'olloxochiyi da yaqto' ÿauo'oi ca ÿaadot ñi Dios.

²⁴ Qaq nachiñiua qome 'annaicapegueto da 'anÿoxo'u, ime, nachi qaushiichiñi acam lashiue da qanÿoxoqui. Qaq qom ime, nachi naamayi ishi't da npete'c na laue. Qaq 'eda qome da qonetec, yaqto' 'enauac ishit da qaÿaÿaten da sa ishit da 'eesa de'eda 'an'aqtaguec, cha'ayi chaqdata da 'am nataq'en ÿataqta 'aupacchigui 'enauac da 'aualaxalec na nqataxacpi.

²⁵ Qaq nam sa ishit da judiopi mayi mashi da'amqajnataxan, qalaxayi mashi sauoqo'o co'ollaxa aso qodede da shinaqtega, da yaqto' sa ishit da taÿapegueu'a de'eda qan'onataxac. Chaqdata da namayipi sa ishit qome da chic na lapat nam mashi qoÿanot na nqolacpi, qataq sa ishit da chic na ntago'q qataq na lapat ca chochi ichigueuo na lqosot, qataq sa ishit qome da huo'o ca ncachitague' aca sa lhua.

Qaicoñi' so Pablo huaigui aso n'onaxanaxaqui

²⁶ Nachi so Pablo ÿaue'c soua lÿa't cuatro shiÿaxa'u. Nachi so lÿa na'a'q, nachi nÿo nataq'en soomayi. Qaq co'ollaq ime', nachi nqo'oodeu'a aso n'onaxanaxaqui da i'axatreuo cam na'a'q mayi laloxoqui da ime' da nÿoxo'c, cam na'a'q mayi huetoigui da ÿaadeuo aca lachitaqtaxanaqte'.

²⁷ Qalaxayi co'ollaq yaqta'a da inoxoodeec soua siete na'axa'te, nachi huo'oi soua judío lashi' mayi chigoqda'ague da 'alhua Asia. Soomayi ilalguete so Pablo da huetaigui aso n'onaxanaxaqui. Nachi soomayi i'o't da l'axa, ÿataqta lliÿa't naq'en na shiÿaxauapi. Nachi qaÿaconeu'a so Pablo.

²⁸ Nachi qai'alaqtalec somayi, qoÿiita': –¡Qami' Israel l'ecpi, ña qomi' qautauañi'! 'Ena nam shiÿaxaua mayi ÿataqta nmatte' 'enauaque naua 'ale'u da ÿapaxagueetapeguec na shiÿaxauapi, da yaqto' npa'aguene' na qadhuo' l'ecpi, qataq na nqataxacpi mayi chigoqo'ot so Moisés, qataq anam qad'onaxanaxaqui. Qaq namayi nagui qataq huenoxonoigui naq'en ana qad'onaxanaxaqui naua griego lashi', qaq ÿataqta ishipaxanaqchi't ne'ena n'onaxanqa' mayi qui'itta.

²⁹ Qaq soomayi 'eedapec de'eda, cha'ayi ÿauaachiyigui co'ollaxa so Pablo huaigui so la ciudad da nnaictague' so Trófimo, som l'ec yi Éfeso. Nachi qaipi'itaxaatega da so Pablo ÿauegoigui aso n'onaxanaxaqui somayi.

³⁰ Nachi 'enauac na shiÿaxauapi mayi netaña so la ciudad ÿataqta qalagaxa't, nqalgoqtagui. Nachi qaÿaconeu'a so Pablo, qaÿauogonnaueegue da laÿi aso n'onaxanaxaqui. Nachi ÿataqta saqaÿaloq da qaÿapoguilo naua laso'mi.

³¹ Nachi qanshitaique da qaÿalauat. Qalaxayi mashi huo'o co'ollaxa da l'axaÿaxac so huataxanaq lta'a da 'enauac se'eso la ciudad Jerusalén ÿataqta huo'o da l'axa.

³² Nachi se'eso huataxanaq lta'a laÿona't so nallippi qataq so ltauapi, nachi nqalgoqta'a so hueta'a so shiÿaxauapi. Nachi co'ollaq qaila'aguet so huataxanaq lta'a qataq so nallippi, nachi qoÿaxaañi da qaiuaxaatac so Pablo.

³³ Nachi so huataxanaq lta'a nqochineuo, nachi ÿaconeu'a so Pablo, nachi damaxasoxoolec da qaicoñida'aque naua lhua'q soua lque'te. Qaq co'ollaq ime, nachi dechimaqtaxaatapeguelec somayi qataq chaq negue't cam i'ot.

³⁴ Qalaxayi so shiÿaxauapi ÿataqta i'alaqtagui, saq ÿataq ca 'eetec ca l'aqtaxanaxac, qaq ÿoqo'oyi se'eso huataxanaq lta'a sa ÿaÿaten ca 'eetec souaxat na n'alaxac. Nachi damaxasoxoolec da qaÿauega so lma' na huataxanaqpi.

³⁵ Qaq co'ollaq qanayiitau'a ca lma' na huataxanaq, nachi ÿataqta qanachishiguem so Pablo souaxat da lhuaxanaxanaxac na shiÿaxauapi.

³⁶ Cha'ayi 'enauac namayipi nca'attauo, ÿataqta i'alaqtagui, 'eeta': –¡No'on da qaÿalauat!

So Pablo ÿauo'o da l'aqtac da dataÿa'aguet so shiÿaxauapi

³⁷ Qaq co'ollaq mashi huotaique da qaipa'axaneuo so Pablo, nachi somayi 'enapego' so lta'a na huataxanaq, 'eeta': –¿Peta'a ishit da huo'o ca i'aqtac? Nachi so nta'a 'enapeco': –¡'A! ¿Qachi 'auaÿate'no' naua l'aqtaqa na griegopi?

³⁸ Qachi ¿sa ishit qone' da nachi'am som Egipto l'ec mayi huo'o so na'a'q nachi i'ot so npa'aguenaxac, nachi ÿauegueuga so tojlec so cuatro mil shiÿaxauapi mayi laataxanaxaicpi?

³⁹ Nachi so Pablo 'enapeco': –'A'i, aÿim judío l'ec, ÿañoqo' yi Tarso mayi ÿi'oxodaic, huaigui yi 'alhua l'enaxat da Cilicia. Qalaxayi ñaq aÿim 'auchoxoden, aÿim 'auashiitem da sauo'o ca i'aqtac nam shiÿaxauapi.

⁴⁰ Nachi so huataxanaq lta'a ÿashiitem so Pablo da detaqa. Nachi somayi nachajñi cam ñiguishiguem, nachi ÿachaxaashiguem na lhuaq da 'enapega na shiÿaxauapi da de'enaxaatai'. Qaq co'ollaq mashi ntochiguiñi, nachi somayi detaqa, huota'aisalo naua l'aqtaqa na judiopi. Nachi 'eeta':