Hechos 19 - Nuevo Testamento Toba Sur

So Pablo nvita yi Éfeso

¹ Qaq so Apolo co'ollaq ñaq hueta'a yi Corinto, nachi so Pablo quetaguilo naua 'ale'u mayi saqaÿoqotchiguemque, chochi nvitta'a yi Éfeso. Nachi huaña, qaq huo'o so ilalecpi 'amqajnataxanaxaicpi.

² Nachi inattaco' somayipi, 'eeta': –¿Qami' peta'a mashi qauacoñiiguet so Espíritu Santo co'ollaq qau'amqajnataxañi? Nachi somayipi 'enapeco': –Qomi' sa ishit da huo'otaq sa'axaÿaqpeguelec da huo'o ca Espíritu Santo.

³ Nachi so Pablo inat somayipi, 'eeta': –Qaq ¿chaq négue't lachilaxanataxanaxac cam qauacoñiiguet co'ollaxa? Nachi somayipi 'enapeco': –Qomyi dam lachilaxanataxanaxac so Juan.

⁴ Nachi so Pablo 'enapeco': –Aja', so Juan co'ollaxa nachilaxaatac nam shiÿaxauapi mayi ÿaxaadeec naua n'onataxaco, qalaxayi nataq'en 'enapega namayipi da yaqto' i'amaqten cam anatai' mayi nca'attalec, qaq somayi nachiso so Jesús som nta'a mayi qadca'alaxaqui.

⁵ Nachi somayipi co'ollaq hua'aqchigui de'eda, nachi qanachilaxan, qaÿachilaxanataxana da l'enaxat so qadataxala' Jesús.

⁶ Nachi so Pablo co'ollaq ÿashiltalec somayipi, nachi so Espíritu Santo anac da tanguit somayipi. Huaña, nachi detaxaiguilo naua n'aqtaqa mayi sa qaÿauanapegalo, qataq i'axatta'pe naua l'aqtaqa ñi Dios.

⁷ Qaq somayipi da ima'a't, nachi ivi' doce ÿallippi.

⁸ Nachi so Pablo ÿataqta ividaxattreec soua tres ca'agoxoiqa da ÿi'iguelaqtau'a aso laponaxaqui na judiopi da da'aqtaxaatac, qaica ca ñi'itaique, qataq i'axattapeguem somayipi da l'onataxanaxac ñi Dios da ilo'ogue 'enauacna, da yaqto' da'amqajnataxan.

⁹ Qalaxayi huo'o na i'añaxattaguilo naua lquiyaqte da sa ishit da da'amqajnataxan; chaqdata da ÿataqta sa iyacnapec da n'aqtac da detaxaÿa, hua'aqtac naq'en na shiÿaxauapi. Nachi so Pablo ca'ai somayipi, nachi ÿauec som da'amqajnataxanpi, ÿauega aca lapaxaguenataxanaxaqui som l'enaxat Tirano. Qaq huaña, nachi ica'n naua na'axa'te da da'aqtaxaatac.

¹⁰ Qaq 'eda da 'eetec, chochi ividaxattrauec soua dos vi'iyi. Nachi ÿataqta 'enauac na netaña yi 'alhua l'enaxat Asia, judiopi qataq nam sa ishit da judiopi, n'axaÿaxaatega da n'aqtaguec so qadataxala' Jesús.

¹¹ Nachi ñi Dios i'ot nam lta'adaicpi mayi sa qaÿauanapigui da chigoqchigui naq'en so Pablo,

¹² chochi ivitta'a somayi da huo'otaq qaidouec ca camachicague't ncopaxa, huo'otaq ca l'ola' mayi nhuoctapeeguet da l'oquiaxac, da yaqto' qalapaxalec ca sa no'on, nachi ishit da no'oita, qataq i'odauec na n'ecpi leguemaxaic.

¹³ Qalaxayi huo'oi soua judío lashi' mayi quetragui na shiÿaxauapi da i'ottrapeguec na n'ecpi leguemaxaic. Nachi soomayi nshitraique da do'onataxaada da l'enaxat so qadataxala' Jesús, da yaqto' i'oldauec na n'ecpi. Nachi soomayi 'eetegalo' na n'ecpi, 'eeta': –Qami' sedolguete da l'enaxat so Jesús mayi i'axattac so Pablo da qoquii.

¹⁴ Qaq 'eda da 'eetec co'ollaxa soua siete llalqa so judío l'ec l'enaxat Esceva, somayi nachi lataxala' na ntaxaÿaxanaxanecpi da qaitaxaÿapegue' ñi Dios.

¹⁵ Qalaxayi co'ollaq i'o't de'eda, nachi som n'ec leguemaxaic ÿasat, 'eeta': –Aÿim sauatton so Jesús, nataq'en sauattoota so Pablo; qalaq qami', ¿négue't da qoñiita?

¹⁶ Nachi se'eso shiÿaxaua mayi huo'o so l'ec leguemaxaic padenaxanoiguilo soomayi, nachi ÿataqta qaica ca 'eneque naq'en, sa iyacna'pe, qataq icolaxatta'pe, huetrauec naq'iñi qataq ique'emaqchi't, nachi soomayi datadeec.

¹⁷ Nachi 'enauac na netaña yi Éfeso judío l'ecpi qataq nam sa ishit da judiopi ÿaÿaten de'eda, nachi ÿataqta qalota da lcolanaxa. Nachi namayipi 'eetac da ÿataqta lta'adaic da lli'oxoyic da l'enaxat so qadataxala' Jesús.

¹⁸ Qaq nam da'amqajnataxanpi nataq'en ÿataqta qalota na n'axateuo nam i'otpi qauem co'ollaq saxanaxa da da'amqajnataxan.

¹⁹ Nachi ÿataqta qalota nam napaxagueetego' co'ollaxa da n'enaxanaxac mayi saq cha'a, nam ndouo ana lede mayi huetalec damayi. Nachi qaÿavigaxat 'enauac anamayipi, ÿauaachigui qanqoÿin na shiÿaxauapi. Qaq co'ollaq ime, nachi qanaloqna't aso lashiue, qaq asomayi ÿataqta qaÿoqtegue.

²⁰ Qaq 'eda da 'eetec da n'aqtaguec so qadataxala' da ÿataqta nquictashiguem, qataq ÿachaxan da l'añaxac.

²¹ Qaq co'ollaq ime de'eda, nachi so Pablo huo'o da lhuennataxa da taigue da Macedonia qataq da Acaya, qataq nachi huotaique da ivida'a yi Jerusalén. Qataq huotaique da huo'otaq imat yi Jerusalén, nachi taigue da Roma.

²² Nachi somayi ÿamaxadegue da Macedonia soua dos lta'u Timoteo qataq so Erasto, qaq somayi ñaq huo'oi soua na'axa'te da ñaq hueta'a yi Asia.

Da cotaxac yi Éfeso

²³ Qaq se'esoua na'axa'te nachi huo'o so lta'adaic cotaxac souaxat da l'aqtac ñi Dios.

²⁴ Qaq de'eda cotaxac chigoqchigui so shiÿaxaua l'enaxat Demetrio mayi i'ottac na lcat l'enaxat plata. Qaq somayi nachi i'ottac na l'enaqtac noÿicpi, i'enaxatchigui so lauo' aso nate'e mayi qanatameetacot, l'enaxat Artemisa, ÿachigoxotaigui na plata. Qaq damayi nachida da ÿachigoxottapoigui da lta'adaic lauegaxanaxac na l'onataxanaxanecpi.

²⁵ Nachi somayi laÿona't so l'onataxanaxanecpi, qataq 'enauac nam 'eeta'am da l'onataxanaxac somayi. Nachi 'enapego', 'eeta': –Qami' ÿallippi, qami' qauaÿajñi da de'eda qad'onataxanaxac, damayi nachida da saÿamaxasoqtapigui.

²⁶ Qalaxayi qami' mashi qauauañiichigui, qataq qau'aqaichigui da se'eso Pablo somayi 'eetega da na nqolacpi mayi maichi l'onatac na shiÿaxauapi, namayipi sa ishit da ÿoqta 'en da deca'alaqtaxan. Qaq somayi ÿataqta qalota na ÿañoxot da i'amaqten dam 'eetega, qaq sa ishit da chaqnata na Éfeso, nataq'en 'enauaque naua 'ale'u na Asia.

²⁷ Qaq damayi ÿataqta huo'o da lchic, cha'ayi de'eda qad'onataxanaxac ishit da nlaguiñi. Nataq'en ñi lauo' añi ñatamnaqtacot qadate'e Artemisa, ñimayi ishit da daqat da lli'oxoyic. Huaña, nachi sa ishit da huo'o ca 'enec qanqoÿin dam l'amaqchic añim qadate'e mayi natameetacot na netaña na Asia qataq 'enauac nam neta'alo naua lÿa't 'ale'u.

²⁸ Qaq co'ollaq chochi qai'aqchigui de'eda, nachi 'enauac somayipi ÿataqta dalemata. Nachi i'alaqtagui, 'eeta': –¡Ÿataqta lta'adaic da lli'oxoyic añi Artemisa mayi late'e nam netaña na Éfeso!

²⁹ Nachi ÿataqta huo'o da l'axa 'enauac so la ciudad. Nachi qaÿaconeu'a so Gayo qataq so Aristarco, soomayi chigoqda'ague da Macedonia, qaq nachi nnaictrague' so Pablo. Nachi soomayi qaÿauecdau'a cam noÿic mayi huaña naxa da qai'ot na ntaxaÿaxac.

³⁰ Qaq so Pablo nachi huotaique da pa'au'a somayipi da yaqto' da'aqtaxanem, qalaxayi som 'amqajnataxanaxaicpi sa ishit da ÿashineuo somayi.

³¹ Nataq'en huo'o na nta'alpi mayi lma' yi Asia nam nauattonaxauapi somayi na namaxa da l'aqtac somayi, da yaqto' sa ishit da pa'auo.

³² Nachi se'eso naponaxac ÿataqta huo'o da n'alaxac, ÿotta'a't na qai'alaqtalecpi, cha'ayi na shiÿaxauapi ÿataqta lliÿa't. Nachi ÿataqta qalota na ÿalectauo na sa ishit da ÿaÿaten ca huo'o mshi qai'ot se'eso naponaxac.

³³ Qalaxayi huo'o na ÿalectauopi na da'aqtaxanem da 'eetec de'eda naponaxac so Alejandro, nachi nam judiopi ÿamaqhuo somayi da yaqto' dataÿa'aguet 'enauac somayipi. Nachi somayi ÿachaxaashiguem na lhuaq, da yaqto' ÿi'imaqtom naq'en na shiÿaxauapi, nachi nshitaique da da'aqtaxanem namayipi da na judiopi sa ishit da lasouaxashit de'eda.

³⁴ Qalaxayi co'ollaq qaÿauatton somayi da judío l'ec, nachi somayipi qaltaq i'alqagui, ivi' dos horas da i'alaqtac, 'eeta': –¡Ÿataqta lta'adaic da lli'oxoyic añi Artemisa mayi late'e na netaña na Éfeso!

³⁵ Nachi som nedaxanaxanec da qai'ot na ntaxaÿaxac mayi lma' so la ciudad, co'ollaq ÿañoxot da nañaxaañi naq'en so shiÿaxauapi, nachi 'enapeco': –Qami' ÿallippi mayi qadmayi na Éfeso, qami' qauaÿajñi da 'enauac na shiÿaxauapi ÿaÿaten da na la ciudad Éfeso, nachina na ilotague' ñi lauo' añi qadate'e Artemisa qataq ñim lqui'i mayi najñi co'olloxochiyi, chigoqo'ot na piguem.

³⁶ Qaq cha'ayi sa ishit da huo'o ca ÿoqolguet de'eda, qaq no'on da qauañaxañiiñi, qaq sa ishit qome da huo'o ca qau'ochi da huo'otaq sa qauennataxañiilec.

³⁷ Cha'ayi ne'enaua shiÿaxa'u mayi qanaviquiideuo, naamayi sa ishit da huo'otaq ishiueetrac añim late'e 'enauac da qoñiita.

³⁸ Qaq ÿoqo'oyi dam Demetrio qataq nam l'onataxanaxanecpi da huo'otaq huo'o ca ncotatrague', qalaxayi huo'o nam nta'alpi mayi nmit na nasouaxashitpi da nqo'oneu'a, yaqto' ñi 'oonolec i'axat ca sa ÿaÿamaxaden.

³⁹ Qaq da huo'otaq huo'o ca lÿa qauÿaxañiitaique, qaq no'on da qauauo'oi ca qalaponaxaqui da ÿalectauo qanqashiñi na nta'alpi, da yaqto' qautaqÿapega't.

⁴⁰ Cha'ayi qomi' nagui mashi souaqaigui da lchic da huo'otaq qoÿiitega da qomi' npa'aguenaxaiqa, souaxat de'eda so'otaqtac nagui. Cha'ayi qomi' qaica cam qad'aqtaxanaxac da huo'otaq qomi' qaina't da qainataxanec de'eda qancotaxac.

⁴¹ Qaq co'ollaq ime de'eda l'aqtac, nachi tachiguiña naq'en se'eso naponaxac.