Hechos 18 - Nuevo Testamento Toba Sur

So Pablo taigue da Corinto

¹ Qaq co'ollaq ime de'eda, nachi so Pablo ca'ai yi Atenas da taigue da la ciudad Corinto.

² Qaq huaña yimayi, nachi natena'aguet so judío l'ec l'enaxat Áquila. Somayi chigaqa'ague da 'alhua l'enaxat Ponto. Qaq se'eso Áquila qataq aso lhua Priscila ñaq cha'aguelo da nvi't, chigoqtra'ague da Italia. Queda'ai yimayi, cha'ayi so lta'a na nta'alpi l'enaxat Claudio 'enapega 'enauac na judiopi da ca'ai yi Roma. Nachi so Pablo namaqtego' somayi,

³ qaq cha'ayi nachi 'eeta'ama soomayi da l'onataxanaxa'c da i'ottrac na npe'l, nachi na'asopa soomayi da l'onataxanaxa'u.

⁴ Nachi naxa da iviteuga yi na'a'q mataxaqui, nachi so Pablo tau'a aca laponaxaqui na judiopi, nachi da'aqtaxaatapeguem, qataq nam sa ishit da judiopi, da yaqto' da'amqajnataxan naq'en.

⁵ Qaq co'ollaq nvilyi' so Silas qataq so Timoteo, chigoqda'ague da Macedonia, nachi so Pablo ÿataqta nalamaqteguet da i'axattac da l'aqtac ñi Dios, qataq ÿataqta da'aqtaxaatem na judiopi da so Jesús somayi nachiso so nta'a mayi qadca'alaxaqui mayi qaiuattaique.

⁶ Qalaxayi somayipi ÿataqta ncotatague' somayi qataq ishiueetac, nachi so Pablo ichigo'q soua alogo, damayi l'anaxat da jec. Nachi 'enapego' somayipi, 'eeta': –Qami' maichi qanasouaxachiila't qom ivita da qadellivi; aÿim sa ishit da qami' ÿasouaxashi'te. Qaq nagui dam saÿa'ague, aÿim saigui qome nam sa ishit da judiopi.

⁷ Nachi ca'ai aso laponaxaqui na judiopi, nachi taÿa ca lma' so shiÿaxaua l'enaxat Ticio Justo. Somayi quetague' ñi Dios qataq nachi sa qaÿapeque ca lma' aso naponaxaqui.

⁸ Qaq so Crispo mayi ilotague' aso naponaxaqui, somayi qataq 'enauac so llalaqpi i'amaqten so qadataxala'. Nataq'en qalota nam shiÿaxauapi mayi lma' yi Corinto co'ollaq hua'axaÿa da n'aqtac, nachi da'amqajnataxan, nachi 'enauac qanachilaxan.

⁹ Qaq huo'o so pe, nachi so qadataxala' 'enapego' so Pablo co'ollaq huaigui so l'ochaxa, 'eeta': –Sa ishit qome da 'ayi'itac, nachi qoqueto'ot da 'ad'aqtaxanaxac, sa ishit da 'anañaxaañi.

¹⁰ Cha'ayi aÿim 'am soota'aguet, qaq sa ishit qome da huo'o ca 'am ÿaconeu'a da huo'o ca 'am i'otec. Cha'ayi ÿataqta qalota na shiÿaxauapi na netaña ne'ena la ciudad na ÿalamaxatpi.

¹¹ Nachi so Pablo naña yi Corinto so 'oonolec vi'i qataq so laiñi so lÿa vi'i da ÿapaxagueetapeguec somayipi da l'aqtac ñi Dios.

¹² Qalaxayi so na'a'q co'ollaq lta'a nam netaña yi Acaya so l'enaxat Galión, nachi na judiopi huaxaÿa't da qanpa'aguena so Pablo. Nachi qaÿaconeu'a somayi da qaÿauegueu'a aca l'onataxanaxaqui so nta'a.

¹³ Nachi qoÿinapego' so nta'a, qoÿiita': –De'eda shiÿaxaua, damayi quetapegueu'a na shiÿaxauapi, da yaqto' natamnot naq'en ñi Dios, qalaxayi dam 'eetec naq'en da ñi'oxonnataxanaxac ÿataqta npe'enguet na maichi qanqataxacpi.

¹⁴ Qaq co'ollaq mashi huotaique da detaqa so Pablo, nachi so nta'a Galión 'enapego' so judiopi, 'eeta': –Qami' judío lashi', da huo'otaq aÿim qandoiua'a ca negue'tca cotaxac, huo'otaq lta'adaic nasouaxashit, nachi aÿímctaxa ishit da ñiualaxaune' da qami' ñi'axaÿaxanalo.

¹⁵ Qalaxayi da aÿim qandoiua'a yi chochi n'aqtac dam qancotaitapigui, qataq dam n'enaxat, qataq nam maichi qanqataxaqui mayi qami' qoÿanema co'ollaxa, qaq ÿoqo'oyi no'on da maichi qau'ochi ca lataxac. Aÿim sa ishit da saÿapegueu'a da so'ot ca lataxac damayi.

¹⁶ Nachi ÿamaqhuec somayipi aso l'onataxanaxaqui.

¹⁷ Nachi 'enauac nam griego l'ecpi ÿaconeu'a so Sóstenes som nataxala' aca naponaxaqui, nachi ÿataqta qaiuaxaatac, ÿauaachigui qanqoÿin so nta'a Galión. Qalaxayi somayi sa ishit da ÿoqochitega de'eda.

So Pablo ÿi'iguelaxague da Antioquía, nachi chigoqchiguiña co'ollaq qaltaq jec da da'aqtaxan

¹⁸ Nachi so Pablo ÿataqta huo'oi soua na'axa'te da hueta'a yi Corinto. Qaq co'ollaq ime, nachi somayi ncoyiguene' so nqaÿañicpi, nachi huenoteuo da nqo'ona yi 'alhua Siria, lÿatac so Áquila qataq aso Priscila. Qaq somayi co'ollaq yaqta'a da ca'ai yi ñigaxasom Cencrea da huenoteuo, nachi npetec na laue ÿataqta nmatta, cha'ayi nshitaique da ipacchigui cam l'aqtac mayi ÿan co'olloxochiyi.

¹⁹ Qaq co'ollaq ivitra yi la ciudad Éfeso, nachi so Pablo n'onaxatañi aso Priscila qataq so lhua Áquila, nachi tau'a aso laponaxaqui na judiopi, nachi da'aqtaxaatapeguem 'enauac so lapoota'a't judiopi.

²⁰ Nachi somayipi nachoxodeetacot so Pablo da ñaq cada'ac hua'a, qalaxayi somayi sa ishit da hua'a.

²¹ Chaqdata da ncoyiguene' somayipi da jec. Nachi 'eetega, 'eeta': –Aÿim huo'o da iyaxa da sovita yi Jerusalén, da yaqto' salectauo ca naponaxac mayi naÿa'cna. Qalaxayi huo'o qome ca na'a'q da aÿim qaltaq qami' ñi'iguelaxalo, qom huo'otaq aÿim ÿanem ca ÿiquiaxac ñi Dios. Nachi somayi huenoteuo, chigoqchiguiña yi Éfeso.

²² Nachi co'ollaq ivita yi Cesarea, nachi so Pablo taÿa yi Jerusalén da dequinaxana so 'amqajnataxanaxaicpi. Qaq co'ollaq ime, nachi taigue da Antioquía.

²³ Qaq co'ollaq mashi huo'oi soua na'axa'te da hueta'a yimayi, nachi qaltaq inoxoneec, quetaguilo yiua 'ale'u Galacia qataq yi Frigia, da i'añaqchittac 'enauac na 'amqajnataxanaxaicpi.

So Apolo da'aqtaxaatac hueta'a yi Éfeso

²⁴ Qaq se'esoua na'axa'te nachi nvita yi Éfeso so judío l'ec l'enaxat Apolo. Somayi nachi lañoqo' yi 'alhua Alejandría, qaq somayi ÿataqta ÿaÿaten da l'aqtaxanaxac, qataq ÿataqta ÿaÿate'n naua llico naua nanettrañi l'aqtaqa ñi Dios.

²⁵ Qataq ÿataqta ÿaÿaten da lliquiaxac da l'onataxanaxac ñi qadataxala', nachi da dapaxaguenataxaatac ÿataqta huo'o da lhuogoxo da i'axattegue da llic so Jesús, qaq nai'ctaxa da ndoteec da lachilaxanataxanaxac so Juan da ÿaÿaten da i'axategue.

²⁶ Nachi so Apolo co'ollaq huaigui aca laponaxaqui na judiopi, nachi da'aqtaxaatac qaica ca ñi'itaique. Qalaxayi co'ollaq n'axaÿaxaategalo somayi aso Priscila qataq so Áquila, nachi qandoxotteec da qaÿauec, nachi ÿataqta qai'aqtaxaatem da lliquiaxac da l'onataxanaxac ñi Dios.

²⁷ Nachi so Apolo co'ollaq huo'o da lyaxa da taitague da 'alhua Acaya, nachi so nqaÿañicpi itauan somayi da i'añaqchit, nachi qaÿauo'o aso nede qaÿamaxa so 'amqajnataxanaxaicpi mayi naña que'eca 'alhua da ÿataqta qailo'oguet somayi. Nachi somayi co'ollaq ivita yi Acaya, nachi ÿataqta lta'adaic da ltaunaxanaxac da itauaatac nam ñi Dios ÿachigoxotchigui naq'en da lqouagaxanaqtaic da da'amqajnataxan naq'en.

²⁸ Cha'ayi ÿataqta i'axattem 'enauac na lsomaxacpi na judiopi. Qaq somayi ÿataqta sa ishit da huo'o ca ÿoqolguet. Cha'ayi somayi ÿaconalo naua ñiyigui'shi n'aqtaqa, nachi i'axattac so Jesús da nachiso so nta'a qadca'alaxaqui mayi iuattaique namayipi.