Hechos 17 - Nuevo Testamento Toba Sur

Dalemata na shiÿaxauapi yi Tesalónica

¹ Qaq da lliquiaxac so Pablo qataq so Silas tajdelec yi Anfípolis qataq yi Apolonia. Ime, nachi nqo'ooda yi la ciudad Tesalónica. Qaq yimayi huo'o aso laponaxaqui na judiopi.

² Qaq so Pablo, cha'ayi nachi n'onataxac, somayi ivi' soua tres mataxaqui' da ÿi'iguelaqtau'a aso laponaxaqui na judiopi, nachi da'aqtaxaatapeguem.

³ Qaq ÿacona ana huetalguete naua ñiyigui'shi l'aqtaqa ñi Dios, nachi i'axattac da ca nta'a nca'alaxaqui mayi qaiuattaique, camayi qome ÿataqta huo'o da nque'ejnaxac. Qaq qom ime, nachi qaÿalauat, nachi camayi qaltaq nca'aleec. Nachi 'enapeco': –Qaq ÿoqo'oyi se'eso Jesús mayi qami' sa'axattapeguema, somayi nachiso som nta'a mayi qadca'alaxaqui.

⁴ Nachi huo'o nam judiopi na da'amqajnataxan, nachi quegue so Pablo qataq so Silas. Nataq'en qalota na da'amqajnataxan na griego l'ecpi mayi nachi 'eetai' da quetague' ñi Dios. Qataq qalota na 'alpi na da'amqajnataxan nam ÿataqta ÿi'oxodaipi.

⁵ Qalaxayi ñaqaiyita huo'o nam judiopi nam sa ishit da da'amqajnataxan. Nachi namayipi ÿataqta huo'o da ndaxaÿaxa, nachi laÿona't nam shiÿaxauapi qauemaicpi mayi qaica ca i'ot, quetapeeguelo naua nqa'aico, da qainogoqchit. Nachi somayipi chochi idaxangui nam netaña so la ciudad. Nachi qanqo'ona ca lma' so Jasón da qainoxottac, qanmittaique so Pablo qataq so Silas da qaÿauotaique da qaÿaconeu'alo, nachi qoÿaneu'alo na shiÿaxauapi.

⁶ Qaq co'ollaq sa qaÿanatalo soomayi, nachi qaÿauec so Jasón, qaÿauogleeta. Qataq huo'oi soua lÿa't 'amqajnataxanaxaiqa da qaÿauegueu'alo som lta'alpi se'eso la ciudad. Nachi i'alaqtagui somayipi, 'eeta': –Ne'enaua shiÿaxa'u mayi idaxaatrapigui 'enauac na shiÿaxauapi da chigoqtra'ague, naamayi nagui qataq nvitra ne'ena souaqta'a.

⁷ Qaq dam Jasón, damayi ÿacongueta, nachi ÿaatraña yi lma'. Qaq 'enauac namayipi ÿataqta npa'aguene' da lamaxasoxonaxac ñim qadta'a mayi neta'ague da Roma, cha'ayi namayipi 'eetega da huo'o ca lÿa nta'a, camayi l'enaxato' Jesús.

⁸ Qaq co'ollaq hua'axaÿa de'eda na shiÿaxauapi qataq so nta'alpi, nachi ÿataqta huo'o da cotaxac.

⁹ Qalaxayi so Jasón qataq soua lÿa't co'ollaq ime da huo'o aso qaishiitenaxanaxanque, nachi qaisodeec.

So Pablo qataq so Silas tadegue da Berea

¹⁰ Qaq so nqaÿañicpi nachi ÿataqta sa qaÿaÿaloxon da so Pablo qataq so Silas qaÿamaxadegue da Berea se'eso pe. Qaq co'ollaq ivilyi', nachi nqo'oodeu'a aso laponaxaqui na judiopi.

¹¹ Qaq se'eso judiopi ÿataqta qaica ca ÿictega da n'axaÿaxan, qaq sa ishit da 'en'am nam netaña yi Tesalónica. Cha'ayi namayipi ÿataqta nqopita da n'axaÿaxana da n'aqtac. Ÿoqo'oyi 'enauaque naua na'axa'tesa'chi qaichimaxatta'pe naua ñiyigui'shi l'aqtaqa ñi Dios da huo'otaq ÿoqta 'eesa de'eda qai'axattac.

¹² Huaña, nachi ÿataqta qalota so da'amqajnataxan namayipi, nataq'en nam griego l'ecpi ÿataqta qalota na da'amqajnataxan ÿallippi qataq nam 'alpi mayi ÿi'oxodaipi.

¹³ Qalaxayi na judiopi mayi sa da'amqajnataxan mayi lma' yi Tesalónica, co'ollaq l'axaÿaxac so Pablo da i'axattac da l'aqtac ñi Dios hueta'a yi Berea, nachi nqo'ona yimayi, nachi i'ot da l'axa naq'en na shiÿaxauapi.

¹⁴ Qalaxayi so nqaÿañicpi sa ÿaÿaloxonai' somayi da qaÿamaq, da yaqto' taxaama so loigue aso auaxai. Qaq nda'a't so Silas qataq so Timoteo n'oidaña yi Berea.

¹⁵ Nachi soua nnaictagueto so Pablo ivittra'ague da la ciudad Atenas. Qaq co'ollaq ime, nachi ñi'iguela'q, nachi nachitrac da l'aqtac somayi da 'enapegalo so Silas qataq so Timoteo da sa naÿaloxo'n da ana'c da nqo'ooda somayi.

So Pablo hueta'a yi Atenas

¹⁶ Qaq so Pablo co'ollaq hueta'a yi Atenas da iuattapigui so Silas qataq so Timoteo, nachi ÿataqta qaica ca lama' souaxat da imeteetac se'eso la ciudad da ÿataqta nlaqchigui na nqolacpi mayi qanatameetacot.

¹⁷ Qaq ÿoqo'oyi nqo'oneu'a aca naponaxaqui, nachi da'aqtaxaatapeguem na judiopi, nataq'en nam laÿipi mayi ÿi'oxodeetac ñi Dios. Qataq 'enauaque naua na'axa'te da'aqtaxaatac, da'aqtaxaatapeguem nam hueta'a ca naponqa'.

¹⁸ Qaq huo'o nam shiÿaxauapi mayi napaxagueetega da lapaxaguenataxanaxac nam l'enaxat epicúreos, qataq nam napaxagueetega da lapaxaguenataxanaxac nam l'enaxat estoicos, nachi namayipi n'aqtaxaatague' somayi. Nachi namayipi huo'o na 'eeta': –¿Négue't da qomi' i'axattapeguema dam da' shiÿaxaua? yi ÿapacteec da ltaxaÿaxac. Qataq huo'o na 'eeta': –Damayi 'eeta'am da i'axattapeguec cam lÿa nnatac. Qaq qoÿiitec de'eda, cha'ayi so Pablo i'axattac dam no'on qad'axaÿaxac mayi n'aqtaguec so Jesús qataq da 'eetec da qaltaq nca'aleec ca shiÿaxaua.

¹⁹ Ime, nachi so Pablo qaÿauega ca naponqa' l'enaxat Areópago, cam nachi 'eetai' naxa da huaña da huo'o na qaitaxaÿapigui. Nachi qainattac, qoÿiita': –¿Peta'a ishit da qomi' huo'o ca saÿajnaq dam dalaxaic napaxaguenataxanaxac mayi 'au'axattac?

²⁰ Cha'ayi dam 'au'axattac, damayi ÿataqta yiualaqa'a, qaq sauoqtaique da saÿajnaq ca llic 'enauac damayi.

²¹ Cha'ayi 'enauac nam netaña na Atenas qataq 'enauac nam chigaqauecpi ÿataqta qaica ca lÿa n'aqtaxangui, nachaqdata da n'axaÿaxaata'ai da huo'o ca qai'axat dalaxaic.

²² Nachi so Pablo nachajñigui na laiñi som shiÿaxauapi mayi hueta'a se'eso Areópago. Nachi 'enapeco': –Qami' ÿallippi mayi qadmayi na Atenas, aÿim sela'a da 'enauac da qoñiita ÿataqta qoquiitegue da qad'amqajnataxanaxaqui nam nqolacpi mayi qanatameetacot.

²³ Cha'ayi can aÿim secoleetac na qoviita'a, nachi semeteetac 'enauac nam qanatamnaqa'aipi. Nachi huo'o yi selalec atamnaqa' qoÿittañi so n'aqtac, 'eeta': “Atamnaqa' da qanatamnot cam Dios mayi sa ishit da qaÿauatton.” Qaq ñi'iñi Dios mayi qanatamñiitacot qalaxayi sa qauauattoñi, nachiñi nagui ñi qami' sa'axatema.

²⁴ Ñim Dios mayi l'onata ana 'alhua qataq 'enauac nam huetalec, ñimayi nachiñi ñi lalamaxat na piguem qataq ana 'alhua. Ñimayi sa ishit da netaigui ca atamnaxaqui mayi chochi l'onatac cam chochi shiÿaxaua.

²⁵ Qataq sa ishit da iuen ca chochi l'onatac ca shiÿaxaua da qoÿanem. Cha'ayi ñimayi nachiñi ñi chigoqo'ot 'enauac da qadca'alaxa, qataq naua qad'a'chi, qataq 'enauac na chochina.

²⁶ Ñimayi ÿachigoxotchigui co'ollaxa so 'oonolec shiÿaxaua da i'ot 'enauac na ÿotta'a't shiÿaxauapi, da yaqto' namayipi nalguete naua 'ale'u. Nachi ÿauo'oi naua laloqo'te namayipi, qataq i'a'n naua lma'te,

²⁷ da yaqto' namayipi ishit da nmitaique ñimayi, nai'ctaxa da huo'otaq 'eeta'am da chochi ipottapeecda' da nmittaique ñimayi. Qamaq ñimayi sa ishit da iÿotaique naq'en 'enauac da shinaqta.

²⁸ Cha'ayi ñim Dios nachiñi ñi huo'o mshi yica'alaqtauec, qataq sedaqtapigui', qataq ñachaataqtac. Qaq damayi nataq'en nachi l'aqtac som ÿajnaxanaxaicpi da qoñiita, 'eeta': “Qomi' maichi qomi' llalaqpi ñi Dios.”

²⁹ Ÿoqo'oyi nagui da ÿoqta 'en da qomi' llalaqpi ñi Dios, nachi sa ishit qome da ñi Dios 'eeta'am ñaq'enaq ca chochi n'enaqtac mayi chigaqaigui na oro, huo'otaq na plata qataq na coma', mayi maichi l'onatac ca shiÿaxaua ÿachigoxochigui ca maichi lhuennataxac.

³⁰ Ñim Dios mayi sa ishit co'ollaxa da iloguilo naua n'enaxaco na shiÿaxauapi soua hua'a'u vi'iyi. Qalaxayi nagui ñimayi 'enapega na shiÿaxauapi mayi netalguete naua ÿotta'a't 'ale'u, da yaqto' ÿaxaadeec naua n'onataxaco.

³¹ Cha'ayi ñimayi mashi ÿauo'o ca 'oonolec na'a'q mayi huetoigui da nmit qome 'enauac na lasouaxashitpi na shiÿaxauapi, qaq ÿataqta ÿaqatchiguilo naua qai'o't. Qalaxayi ÿachigoxotchigui qome som 'oonolec shiÿaxaua mayi lca'aguishic. Qaq ÿoqta 'eesa da i'ot de'eda qome, ÿoqo'oyi ñimayi qaltaq nca'aleec naq'en co'ollaxa se'eso shiÿaxaua.

³² Qaq co'ollaq qai'axaÿa de'eda 'eetec da qaltaq nca'aleec na leuaxaicpi, nachi huo'o na daÿalliguittac, qataq huo'o na laÿipi 'eeta': –Qaltaq ñi'axaÿaxanaxa de'eda qom qaltaq 'aupaquejlec da 'au'axat.

³³ Nachi so Pablo ca'ai somayipi.

³⁴ Qalaxayi huo'o na da'amqajnataxanpi, nachi ca'ategue somayi. Qaq se'eso da'amqajnataxanpi nachi ÿalectauo so Dionisio. Qaq somayi nachi laÿipi nam ltaxaÿaqa' so Areópago. Nataq'en aso 'alo l'enaxat Dámaris, qataq huo'o so laÿipi.