Hechos 15 - Nuevo Testamento Toba Sur

So naponaxac huaña yi Jerusalén

¹ Qaq se'esoua na'axa'te, nachi huo'oi soua nvilyi' shiÿaxa'u chigoqda'ague da Judea da nqo'ooda yi Antioquía. Nachi soomayi ÿapaxagueetrapeguec na 'amqajnataxanaxaicpi da ca nshitaique da qanca'alaxateec, qalaq camayi iuen da qaÿauo'o ca n'anaxashit na l'oc, cha'ayi damayi nachi lamaxasoxonaxac so Moisés.

² Nachi so Pablo qataq so Bernabé nqalligottapegueto soomayi, ÿataqta lta'adaic da nqalligotaxa'c. Huaña, nachi qaÿaconeu'alo so Pablo qataq so Bernabé, qataq qaÿauo'oi soua lÿa't. Nachi qaÿamaxadegue da Jerusalén da nqo'onalo qanqoÿin soua Jesús lamaxa'shi qataq soua lÿa't lataxala'te na 'amqajnataxanaxaicpi mayi netraña yi'iyi la ciudad, da yaqto' qaitaxaÿapigui ca llic de'eda.

³ Nachi so 'amqajnataxanaxaicpi mayi netaña yi Antioquía ÿama'q soomayi. Qaq da lliquiaxa'c soomayi nachi tatrelec yi 'alhua Fenicia qataq yi 'alhua Samaria. Nachi i'axatta'pe da 'eetec nam saq judiopi da ÿalat da toguishic l'amqajnataxanaxac, nachi quegue ñi Dios. Nachi 'enauac na 'amqajnataxanaxaicpi ÿataqta huo'o da ntonaxac, souaxat de'eda l'axaÿaxac.

⁴ Nachi so Pablo qataq so Bernabé co'ollaq ivildeu'a yi Jerusalén, nachi na 'amqajnataxanaxaicpi qataq soua Jesús lamaxa'shi, qataq soua nataxala'te ÿataqta ÿoqochi'igueta soomayi. Nachi soomayi i'axattrac 'enauac nam i'oteque ñi Dios soomayi.

⁵ Qalaxayi huo'oi soua ÿalectrauo na fariseopi mayi 'amqajnataxanaxaiqa soua nachajyiñi, nachi 'ena'po': –Nam 'amqajnataxanaxaicpi mayi sa ishit da judiopi, namayipi iuen da qaÿauo'o ca n'anaxashit na l'oc, qataq da qaÿamaxalec da i'ot na nqataxacpi mayi chigoqo'ot so Moisés.

⁶ Nachi soua Jesús lamaxa'shi qataq soua lÿa't nataxala'te ÿauo'oi so ltaxaÿaxa'c, da yaqto' qailaique ca lataxac de'eda.

⁷ Qaq co'ollaq mashi qaÿoqtegue da ntaxaÿaxac, nachi so Pedro nachajñi, nachi 'enapeco': –Qami' ÿaqaÿa't, qami' qauaÿajñi da ñi Dios aÿim ÿaconeu'a co'ollaxa, aÿim ÿachigoxottoigui da qoñiita, da yaqto' aÿim sa'axatem da no'on qad'axaÿaxac na sa ishit da judiopi, da yaqto' da'amqajnataxan.

⁸ Qaq ñim Dios mayi maichi ÿauatton da nquiyaqteÿaxac, nachi ÿachaxan nam ÿaÿamaxadeetapi da ÿami' so Espíritu Santo, 'eeta'ama naq'en qomi' co'olloxochiyi.

⁹ Ñi Dios sa ishit da qomi' lca'ataguilo, da yaqto' iÿotauga namayipi. Cha'ayi ñimayi iÿoi' nataq'en naua lquiyaqte namayipi, chigoqchigui naq'en da lpi'iÿaxac.

¹⁰ Qaq ÿoqo'oyi nagui qami', ¿tá'ainco' yi qauqolliguichiitac dam i'ot ñi Dios, qataq qauasaqaitapeguelec na sa ishit da judiopi da sa pa'atta mayi qomi' nataq'en sa ishit da sachoq, ivida'a nataq'en som hua'au qadta'alpi?

¹¹ Chaqdata da qomi' sa'amaqtenaq da yica'alaxauec, qalaxayi sachigoxosoqchigui da lqouagaxanaqtaic so qadataxala' Jesús, qaq nachi shinaqta'am namayipi.

¹² Huaña, nachi 'enauac somayipi ÿi'imaqtom. Nachi qan'axaÿaxana so Bernabé qataq so Pablo da i'axattrac na n'anecpi qataq nam sa qaÿauanapega da i'ot ñi Dios, ÿachigoxotchiguilo soomayi da huaigui naq'en nam sa ishit da judiopi.

¹³ Qaq co'ollaq ima't da l'aqtaxanaxa'c, nachi so Santiago detaqa, 'eeta': –Qami' ÿaqaÿa't, ñaq qan'axaÿaxañiÿa da i'aqtac, 'eeta':

¹⁴ Ñi Simón Pedro qomi' da'aqtaxaatapeguema da 'eetec ñi Dios co'ollaq chita'ague da nqouaguec nam sa ishit da judiopi, nachi ÿauo'o na lca'au'a namayipi da ÿauo'o lalamaxatpi.

¹⁵ Qaq de'eda ÿataqta nateeteguet dam l'aqtaxanaxac som l'aqtaxanaxanecpi ñi Dios mayi nanettañi, 'eeta':

¹⁶ Qom ime de'eda, nachi aÿim ñi'iguelaq, da yaqto' qaltaq ñauaxaÿaxaashiguem ñi lauo' so David mayi mashi nlaguiñi; nachi qaltaq ñi'oxooshiguem cam ñaq huo'o,

¹⁷ yaqto' 'enauac nam laÿipi shiÿaxauapi aÿim nmitaique mayi aÿim Dios, qataq 'enauac nam ÿotta'a't shiÿaxauapi mayi seÿaxana da sauotaique ÿalamaxatpi.

¹⁸ 'Eda da l'aqtac ñi qadataxala' mayi i'axatta'a co'ollaxa soua hua'a'u vi'iyi.

¹⁹ Qaq ÿoqo'oyi nagui qami' shinapegalo da sa ishit qome da sa qaualemaxachi nam sa ishit da judiopi, mayi mashi ÿaxaneec dam toguishic l'amqajnataxanaxac, nachi quegue ñi Dios.

²⁰ Chaqdata da qomi' samaxasaxa aca qodede namayipi, da yaqto' ÿaxaañi da chic na nallic mayi mashi qoÿanot ca nqolac, qataq sa ishit da huo'o ca ncachitapegue' aca sa ishit da lhua, qataq sa ishit da chic na lapat ca chochi chigueuo na lqosot, huo'otaq ca 'ogaxaic mayi sa qaicoldeec na ltago'q, qataq sa ishit da chic na ntago'q.

²¹ Cha'ayi dam chigoqta'ague soua hua'a'u vi'iyi huo'o co'ollaxa na shiÿaxauapi mayi i'axatta'pe naua lqataxaco so Moisés mayi qaitaxaÿaxaata'pe yi na'a'q mataxaqui da huaigui ana laponaxaquipi na judiopi.

²² Nachi soua Jesús lamaxa'shi qataq soua lÿa't nataxala'te qataq 'enauac na 'amqajnataxanaxaicpi, huo'o da lhuennataxa da qaÿauo'oi caua qaÿaconeu'alo somayipi, nachi qaÿamaxadegue da Antioquía da nnaicapegueto qanqoÿin so Pablo qataq so Bernabé. Nachi qaÿaconeu'a so Judas, da lÿa l'enaxat Barsabás, qataq so Silas. Soomayi ÿataqte' lataxala'te nam nqaÿañicpi.

²³ Nachi soomayi qaÿamaxadegue aso nede mayi huetalec da n'aqtac, 'eeta': “Qomi' Jesús lamaxa'shi qataq naua qadÿa't nataxala'te qataq 'enauac na qadqaÿañicpi, qomi' samaxasaxa da qadquinaxanaxac na qadqaÿañicpi mayi sa ishit da judiopi, mayi netaña yi Antioquía qataq yi 'alhua Siria qataq yi Cilicia.

²⁴ Cha'ayi qomi' qad'axaÿaxac da huo'o na shiÿaxauapi chigoqchiguiña ne'ena, da sa ishit da qadamaxashic, da qami' nqo'onalo da qami' sa ÿalemaxa't. Qaq naua l'aqtaxanaxaco namayipi i'ot da sa qauaÿajñi ca qoñiitec, qataq qami' ÿamaqtapeguelguete da qauauo'oi ca qan'anaxachi qataq da qoquiigue na lqataxacpi so Moisés.

²⁵ Qaq ÿoqo'oyi 'enauac da shinaqta saÿamaxadenaqta da sauoqo'oi ne'enaua qadqaÿa't, da yaqto' qami' nqo'onalo, nachi lÿata'pe naua qanauochaxa'u qadqaÿa't Bernabé qataq Pablo,

²⁶ nam qadqaÿa't mayi ÿataqta nañaadeguet 'enauac na lchiquiaxac souaxat so qadataxala' Jesucristo.

²⁷ Qaq nagui qami' samaxasaxalo na Judas qataq na Silas. Qaq naamayi ÿataqta qami' da'aqtaxaatema qome, qami' i'axattema 'enauac de'eda qad'aqtac.

²⁸ Cha'ayi so Espíritu Santo ÿataqta ÿaÿamaxadeeta, nataq'en qomi', da sa ishit da huo'o ca lÿa qami' sachoxolguete sa pa'atta, chaqdata da iuen da qauaÿajñi da 'eeta':

²⁹ Sa ishit qome da qolliqui na lapat cam mashi qoÿanot na nqolacpi, qataq sa ishit da qolliqui na ntago'q, nachi 'eeta'am na lapat na shiguiÿac mayi chochi chigueuo na lqosot, qataq sa ishit da huo'o ca ncachitague' aca sa lhua. Qaq qom qaupaquiitelec da qau'ochi' ne'enaua, qaq ÿataqta ÿaÿamaqchiguiñi. No'on qome da qoyiquiaxaqui.”

³⁰ Qaq soomayi co'ollaq ime da qaÿaconeu'alo da qaÿama'q, nachi je'c, tadegue da Antioquía. Qaq co'ollaq mashi ivilyi', nachi lapona't na 'amqajnataxanaxaicpi, nachi ÿaadeuo aso nede.

³¹ Nachi so nqaÿañicpi co'ollaq itaxaÿaxaatac aso nede, nachi ÿataqta machiguiñi souaxat da n'añaqchitaguec.

³² Cha'ayi som Judas qataq so Silas, soomayi nataq'en l'aqtaxanaxanqa ñi Dios. Nachi soomayi i'añaqchi't qataq huaqattrega so nqaÿañicpi, ÿataqta lta'adaic da lqataxa'c.

³³ Qaq co'ollaq mashi qaÿata'aguelo soua na'axa'te, nachi so nqaÿañicpi ncoyigueetagueto soomayi da ÿi'iguela'q. Nachi qoÿanema da ÿataqta ÿachitreec da l-lagaxayi'c, da yaqto' ÿi'iguelaxalo som lamaxa'shi soomayi.

³⁴ Qalaxayi so Silas huo'o da lhuennataxa da n'onañi.

³⁵ Nataq'en so Pablo qataq so Bernabé, soomayi n'oidaña yi Antioquía. Nachi soomayi, nataq'en huo'o na qalota laÿipi', queto'oto da lapaxaguenataxanaxa'c da i'axattrac da l'aqtac so qadataxala'.

So Pablo qaltaq ÿi'iguelaxalec da lliquiaxac da i'axat da n'aqtac

³⁶ Qaq huo'o so na'a'q, nachi so Pablo 'enapego' so Bernabé, 'eeta': –Qomi' ÿoltaq qolaq qome da ñamaxasoqtega na qadqaÿañicpi mayi neta'alo naua puebloyi mayi souaqta'alo co'ollaq sa'axataqtac da l'aqtac so qadataxala', da yaqto' saÿajnaq da saqca ca da.

³⁷ Nachi so Bernabé ÿauotaique da nauectrague' so Juan Marcos.

³⁸ Qalaxayi so Pablo sa ÿaÿamaxaden da ÿoltaq qaÿauec somayi, cha'ayi mashi n'onaxatchiguilo soomayi co'ollaq huaña yi Panfilia, nachi sa ishit da ca'atoiguilo soomayi da l'onataxanaxa'u.

³⁹ Nachi nqalligottrapigui somayi, chochi ivitta'a da nÿottecachi soomayi da lliquiaxa'c. Nachi so Bernabé ÿauec so Marcos, nachi huenoteuo da taigue da Chipre.

⁴⁰ Qaq so Pablo, qalaxayi ÿaconeu'a so Silas. Qaq co'ollaq ime da so nqaÿañicpi ÿanot ñi Dios somayi da yaqto' ntela'a, nachi jec.

⁴¹ Nachi tajlec yi Siria qataq yi Cilicia, nachi ÿataqta i'añaqchittac na nqaÿañicpi ana n'onaxanaxaquipi.