Hechos 14 - Nuevo Testamento Toba Sur

So Pablo qataq so Bernabé huetra'a yi Iconio

¹ Qaq huetra'a yi Iconio so Pablo qataq so Bernabé, nachi soomayi nqo'oodeu'a aso laponaxaqui na judiopi, nachi da'aqtaxaata'pe. Nachi ÿataqta qalota na da'amqajnataxan nam judiopi, qataq ivida'a nam saq judiopi.

² Qalaxayi nam judiopi mayi sa da'amqajnataxan, namayipi ÿilen nam saq judiopi, da yaqto' nquiÿalo soomayi.

³ Qaq ÿoqo'oyi soomayi ÿataqta huo'oi soua na'axa'te da huetra'a yimayi, nachi ÿataqta sa ishit da ñi'idelec da i'axattrac da n'aqtac qataq ÿataqta huedelec so qadataxala'. Nachi so qadataxala' ÿataqta ipacchiguilo naq'en naua l'aqtaxanaxaco soomayi da i'axattrac da lqouagaxanaqtaic ñi Dios, nachi ÿanema soomayi da l'añaxac, da yaqto' i'o't na n'anecpi qataq nam sa qaÿauanapega.

⁴ Qalaxayi nam shiÿaxauapi mayi netaña se'eso la ciudad, namayipi nÿodacachi, huo'o na iuejlec na judiopi qataq huo'o na iuejleguete soua Jesús lamaxa'shi.

⁵ Nachi nam judiopi qataq nam saq judiopi naÿamaxate' na nta'alpi da qaitaxaÿapiguilo soomayi, da yaqto' sa qaÿalemaxa't qataq da qaÿasa'q na coma'.

⁶ Qalaxayi so Pablo qataq so Bernabé co'ollaq l'axaÿaxa'c de'eda, nachi soomayi naneltaxa'n, tadegue da Listra qataq Derbe, yiimayi nachi huaiguilo yi 'alhua Licaonia. Nachi coleetrapeguelec 'enauac yi'iyi 'alhua.

⁷ Huaña yimayi, nachi qaltaq i'axattrac da no'on qad'axaÿaxac.

Qaÿasaq na coma' so Pablo huaña yi Listra

⁸ Qaq yi Listra nachi naña so shiÿaxaua sa ishit da queuoÿapigui'. Qaq somayi nso'ootañi, cha'ayi nachi ÿachigoxotteuo co'ollaxa da saq piguiñi, nachi ÿataqta sa nauane' da queuotapigui'.

⁹ Qaq se'eso shiÿaxaua co'ollaq n'axaÿaxaatega da l'aqtaxanaxac so Pablo. Nachi so Pablo co'ollaq ÿamato'ot somayi, nachi ila'a da ÿataqta huo'o da lpi'iÿaxac da qanataden.

¹⁰ Nachi ÿataqta ncosaxadeelec da 'enapega, 'eeta': –'Anachajñi qome, 'auapiaxaayiñi naua 'adchil. Nachi se'eso shiÿaxaua npadenaxaashiguem da nachajñi, nachi iqueuoÿapigui'.

¹¹ Nachi co'ollaq ÿauaachigui de'eda i'ot so Pablo na shiÿaxauapi, nachi i'alqagui, ÿauota'ai naua l'aqtaqa nam Licaonia l'ecpi, 'eeta': –¡Ÿataqta nmedañi daua saq cha'alo nnataqa, 'eeta'ama na shiÿaxaua, daamayi qomi' huetaiguilo!

¹² Nachi so Bernabé qoÿiitego' da nachiso so nnatac l'enaxat Zeus, qaq so Pablo qoÿiitega da nachiso so nnatac l'enaxat Hermes, cha'ayi somayi nachiso so detaqtac.

¹³ Qaq ÿoqo'oyi so ilotague' aca ñi'oxonnataxanaxaqui da qaÿi'oxoden ca nnatac l'enaxat Zeus, mayi naña cam ñigueuo se'eso la ciudad, somayi nauectrauo soua huaca qataq ndouo ana lauoxo. Nachi somayi qataq 'enauac na shiÿaxauapi huotaique da natamnoto soomayi, nachi qaÿalaua't soua huaca da qaÿauo'o nachitaqtaxanaqte.

¹⁴ Qalaxayi soua Jesús lamaxa'shi Bernabé qataq Pablo co'ollaq nomra de'eda, nachi soomayi ncolaxata'alo naua alogo, nachi tadoigui na shiÿaxauapi, nachi i'alaqta'pe, 'eeta':

¹⁵ –¡Qami' ÿallippi! ¿Tá'ainco' yi nachi qoñiitec de'eda? Qomi' nachi qami' shinaqta'ama, chochi qomi' shiÿaxa'u. Qalaxayi nachida da huo'o mshi ñanaguenaq da qami' shinaqpegalo da qai'axañiiuec na chochina qaica ca naigui, nachi qoquiigue ñi Dios mayi nca'altauec, ñim l'onatac na piguem, 'alhua, auaxai qataq 'enauac na huetalecna.

¹⁶ Soua lÿa't na'axa'te ñi Dios ÿauaqta'a na shiÿaxauapi, da yaqto' maichi ÿoiqueetac ca lliquiaxac.

¹⁷ Qalaxayi ñaqaiyita ñimayi ÿataqta qomi' nachaxaatalo, da qomi' i'oteque da ÿaÿamaqchiguiñi, da qomi' namaxalo na auot, qataq 'onaxaic naq'en na qodanguishic, qataq sa qoue naq'en na qonoq, da yaqto' samaqchiguiñi.

¹⁸ Qaq soomayi nai'ctaxa da 'eetrac de'eda, qalaq ñaqaiyita ÿajnac da sa ishi't da nqanaxa't so shiÿaxauapi da sa ÿalaua't soua huaca da qoÿaadeuo da qanatamnoto soomayi.

¹⁹ Nachi huo'o so nvideuo judío l'ecpi, chigaqa'ague da Antioquía qataq da Iconio. Nachi somayipi ÿilen na shiÿaxauapi, da yaqto' qaÿasaq na coma' so Pablo. Qaq co'ollaq qaipi'itaxana da mashi ileu, nachi qaÿauogonnaueegue da laÿi so pueblo.

²⁰ Qalaxayi so 'amqajnataxanaxaicpi co'ollaq qalaponeu'a so Pablo, nachi somayi ñishiguem, nachi qaltaq tau'a so pueblo. Qaq so lÿa na'a'q, nachi jec, lÿatac so Bernabé da tadegue da Derbe.

²¹ Qaq co'ollaq ime da i'axattrac da no'on qad'axaÿaxac yi'iyi pueblo, nachi ÿataqta qalota na loxone'c na da'amqajnataxan. Ime, nachi ÿi'iguelaxadegue da Listra, Iconio, qataq da Antioquía.

²² Nachi soomayi ÿataqta huaqattrega na 'amqajnataxanaxaicpi mayi netalguete ne'enaua 'ale'u, da yaqto' ÿataqta n'añaxattec da lpi'iÿaxac, qataq i'axattrac da qainoxoneu'a da l'onataxanaxac ñi Dios qom ilo'ogue 'enauacna, nachi ÿataqta qalota da que'ejnaxac.

²³ Nataq'en qaÿauo'o na lataxala'pi na 'amqajnataxanaxaicpi. Qaq co'ollaq ime da sa deque'e' souaxat da nqouagaxaunaxa'c, nachi qan'onaxata'aguet namayipi da ltelaxa ñi qadataxala' mayi qai'amaqteetac.

So Pablo qataq so Bernabé ÿi'iguelaxadegue da Antioquía mayi huaigui yi 'alhua Siria

²⁴ Qaq co'ollaq ime, nachi tajdelec yi 'alhua Pisidia, nachi ivittra'a yi 'alhua Panfilia.

²⁵ Nachi i'axattrac da n'aqtac huetra'a yi la ciudad Perge. Huaña, nachi qaltaq tadegue da Atalía.

²⁶ Huaña yimayi, nachi huenotreuo da nqo'ooda yi Antioquía yim la ciudad mayi huaña co'ollaq qoÿanoto ñi Dios da ntela'alo dam l'onataxanaxa'c mayi chita'ague nagui da ima't.

²⁷ Nachi co'ollaq ivildeu'a yi Antioquía, nachi soomayi lapona't na 'amqajnataxanaxaicpi. Nachi i'axattrapeguem namayipi 'enauac nam i'oteque soomayi ñi Dios qataq da 'eetec so qadataxala' da ÿauateu'a da lpi'iÿaxac nam sa ishit da judiopi, da yaqto' ishit da da'amqajnataxan.

²⁸ Nachi so Pablo qataq so Bernabé ÿataqta huo'oi soua ca'agoxoiqa da hueta'aguet na 'amqajnataxanaxaicpi da nedaña yimayi.