Hechos 13 - Nuevo Testamento Toba Sur

So Bernabé qataq so Saulo chita'ague da qaÿamaxalguete da i'axa't da n'aqtac

¹ Qaq nam 'amqajnataxanaxaicpi mayi netaña yi Antioquía huo'o na l'aqtaxanaxanec ñi Dios qataq na dapaxaguenataxanec da n'aqtac. Qaq naua l'enqa'te soomayi Bernabé, qataq so Simón (da lÿa l'enaxat Huedaic), qataq so Lucio, l'ec yi Cirene, qataq so Menahem (som nacta'ai' co'ollaxa so nta'a Herodes mayi ilotague' yi Galilea), qataq so Saulo.

² Qaq huo'o so na'a'q co'ollaq somayipi i'ottac so lli'oxonnataxanaxac ñi qadataxala', nachi nqouaqchit da nqouagaxauen. Nachi so Espíritu Santo 'enapego' somayipi, 'eeta': –Qauÿochiÿauga qome ñi Bernabé qataq ñi Saulo, da yaqto' sanaguilo dam sauotaique l'onataxanaxa'c mayi huo'o mshi seÿaxanalo.

³ Qaq co'ollaq ime da qouagaxaunaxac qataq da qouaqchitaxac, nachi qanatameetapeguelguete soomayi, qaÿashiltalguete. Ime, nachi qaÿama'q.

Soua Jesús lamaxa'shi tadegue da Chipre da i'axat da n'aqtac

⁴ Qaq co'ollaq ime de'eda, nachi so Espíritu Santo ÿama'q so Bernabé qataq so Saulo, nachi soomayi tadegue da Seleucia. Qaq huaña yimayi, nachi huenotreuo da nqo'ootra yi ÿaqa'ata 'alhuolec, l'enaxat Chipre.

⁵ Qaq co'ollaq ivitra yimayi, nachi huetra'a so ñigaxasom l'enaxat Salamina. Huaña, nachi i'axattrac da l'aqtac ñi Dios, huetraigui ana laponaxaquipi na judiopi. Qaq so Juan Marcos nachi quetaiguilo soomayi da itauaata'pe.

⁶ Nachi soomayi co'ollaq ime da i'axasoxoodelec aso ÿaqa'ata 'alhua, nachi qaivitta'a yi la ciudad Pafos. Qaq huaña yimayi, nachi qanatenalec so judío l'ec, l'enaxat Barjesús, pi'oxonaq, somayi ÿataqta tenataxanaxaic, 'eetega da l'aqtaxanaxanec ñi Dios.

⁷ Qaq se'eso pi'oxonaq, somayi nachi neto'ot so nta'a, l'enaxat Sergio Paulo, som ÿale mayi ÿajnaxanaxaic. Qaq se'eso nta'a, somayi damaxasoxona co'ollaxa so Bernabé qataq so Saulo, cha'ayi somayi huotaique da n'axaÿaxana da l'aqtac ñi Dios.

⁸ Qalaxayi som pi'oxonaq mayi da lÿa l'enaxat Elimas, somayi ÿataqta ncotatapegueto soomayi, qataq nqanaxattac so nta'a, da yaqto' sa ishit da da'amqajnataxan.

⁹ Huaña, nachi so Saulo mayi nataq'en l'enaxat Pablo, mayi ÿataqta nlaqchigui so Espíritu Santo, nachi ÿataqta ilochigui somayi.

¹⁰ Nachi 'enapego', 'eeta': –¡'Am tenataxanaxaic, qataq 'am 'itaxaloxoic, 'am llalec so shiÿaxaua mayi lma'na, qataq ÿataqta 'anpa'aguenaxaua 'enauac na ÿaÿamaqchiguiñisat! ¿Tá'ainco' yi sa i'atai' da 'auashaxaadeec naua ÿaÿamaqchiyiñi 'eetapegueco ñi Dios?

¹¹ Qaq nagui ñi qadataxala' 'am iuaxanec qome da yaqto' sa 'anauaañi, nachi ÿataqta huo'oi caua na'axa'te da yaqto' sa 'anauane' añi nala'. Huaña, nachi somayi 'o'm naua l'ai'te. Nachi nmittaique da huo'o ca ÿaueca'aguet somayi, cha'ayi sa ishit da nauaañi.

¹² Nachi so nta'a co'ollaq ÿauaachigui de'eda, nachi da'amqajnataxan, cha'ayi ÿataqta huo'o da l'aalaxa da napaxaguenataxanaxac da qai'axattac so qadataxala' Jesús.

So Pablo qataq so Bernabé huetra'a yi Antioquía yim huaigui yi 'alhua Pisidia

¹³ So Pablo qataq soua lÿa't huenotreuo, chigoqchiyiña yi Pafos da nqo'ooda yi Perge mayi huaigui yim 'alhua Panfilia, qalaxayi so Juan Marcos ÿi'iguelaxague da Jerusalén da saq ca'atoiguilo soomayi.

¹⁴ Qaq co'ollaq ime, nachi soomayi queda'ai yi Perge da nqo'ooda yi la ciudad Antioquía mayi huaigui yi 'alhua Pisidia. Qaq co'ollaq huaña yimayi, nachi nqo'oodeu'a aso laponaxaqui na judiopi so na'a'q mataxaqui, nachi nso'ooyiñi.

¹⁵ Qaq co'ollaq ime da qaitaxaÿaxaatac aso lede so Moisés mayi huetalec na nqataxacpi qataq asom lede som l'aqtaxanaxanecpi ñi Dios, nachi soua nataxala'te asom naponaxaqui, soomayi 'enapegalo soua Pablo, 'eeta': –Qami' qadqaÿa't, da huo'o ca qadqataxaqui, nachi no'on da qau'axachiim nagui na shiÿaxauapi.

¹⁶ Nachi so Pablo nachajñi, nachi ÿauota'a na lhuaq da 'enapega na shiÿaxauapi da de'enaxaatai'. Nachi 'enapeco': –Aÿim qan'axaÿaxañiÿa, qami' Israel l'ecpi nataq'en qami' mayi qayi'iÿai ñi Dios.

¹⁷ Ñim lta'a Dios nam llalaqpi so Israel, ñimayi lca'aguishic co'ollaxa som hua'au qadta'alpi, nachi ÿanem somayipi da ÿataqta qalota naq'en co'ollaq somayipi netaña yim ÿaqa'a 'alhua l'enaxat Egipto. Qaq co'ollaq ime, nachi ñimayi nqateeguesop yi'iyi 'alhua somayipi, idolec dam lta'adaic l'añaxac.

¹⁸ Ñi Dios ÿataqta n'añaxategueta co'ollaxa naua qauema n'onataxaco somayipi co'ollaq quetalec so tojlec 'alhua se'esoua cuarenta vi'iyi.

¹⁹ Qataq ñimayi i'otec da qaÿalauat co'ollaxa so siete ÿotta'a't shiÿaxauapi mayi netalec ne'ena 'alhua Canaán, cha'ayi nshitaique da ÿanem ne'ena 'alhua som hua'au qadta'alpi.

²⁰ Qaq co'ollaq ime, nachi ñimayi ilotague' naq'en somayipi soua cuatrocientos cincuenta vi'iyi nam nataxala'pi mayi ishit da nmit na nasouaxashitpi, chochi ivitta'a so na'a'q co'ollaq huo'o so l'aqtaxanaxanec l'enaxat Samuel.

²¹ Huaña, nachi namayipi co'ollaxa iÿaxanaique ca lta'a da yaqto' ilo'ogue. Nachi ñi Dios ÿanem da lta'a naq'en so Saúl, som llalec so Quis. Somayi nachi chigaqaigui na llalaqpi so Benjamín, nachi ilotague' namayipi soua cuarenta vi'iyi.

²² Qaq co'ollaq ime, nachi ñi Dios nqat somayi da yaqto' sa nta'a, nachi ÿanem namayipi da lta'a naq'en so David. Cha'ayi ñimayi 'enapeco': “Nagui sanata ñi David ñim Isaí llalec, ñimayi ÿataqta saÿamaxadeeta, cha'ayi ÿataqta i'ot qome 'enauac nam shiitapeguecpi.”

²³ Qaq huo'o so 'oonolec nam llalaqpi se'eso David, somayi nachiso so Jesús som ÿanagui ñi Dios da lca'alaxaqui naq'en na llalaqpi so Israel, cha'ayi ñimayi nachi ÿachaxanapec co'ollaxa damayi da ÿan.

²⁴ Qaq co'ollaq saxanaxa da noviyi' so Jesús, nachi so Juan da'aqtaxaatapeguem 'enauac nam Israel l'ecpi, 'eetega da yaqto' ÿaxaadeec naua n'onataxaco, nachi ishit da qanachilaxan.

²⁵ Qaq so Juan co'ollaq nayiita'a ca laloqo', nachi somayi 'enapeco': “Aÿim sa ishit da nachaÿim cam qanpi'itaxañiitaique; qalaxayi camayi nachi aÿim nca'attaueegue, camayi ÿataqta sa ishit da yalou'a da chochi ñaqa't naua lque'te caua lapela'te.”

²⁶ Qaq qami' ÿaqaÿa't mayi qami' llalaqpi so Abraham qataq 'enauac da qoñiita mayi ÿataqta qayi'iÿai ñi Dios, de'eda qai'axattac nca'alaxa, damayi nachi qadalamaxachi.

²⁷ Cha'ayi nam shiÿaxauapi mayi netaña yi Jerusalén qataq nam lataxala'pi, namayipi sa ishit co'ollaxa da ÿauatton so Jesús, qataq namayipi sa ishit da ÿaÿajnegueta naua l'aqtaqa som l'aqtaxanaxanecpi ñi Dios mayi qaitaxaÿaxaata'pe naxa da huaigui ana laponaxaquipi namayipi yi na'a'q mataxaqui, nachi qoÿanguet somayi da nalaataguec. Qaq de'eda i'ot, damayi ipacchigui dam i'axattac co'ollaxa so n'aqtaxanaxanecpi.

²⁸ Qaq nai'ctaxa da sa ishit da qaÿanata co'ollaxa ca lasouaxashit somayi da yaqto' qaÿalauat, qalaxayi nachi 'en'am qaiÿaxanot so Pilato, da yaqto' damaxasoxoolec da qaÿalauat.

²⁹ Qaq co'ollaq ime da qai'otec somayi 'enauac nam i'axatta'a co'ollaxa naua n'aqtaqa mayi nanettrañi, nachi qanqateeguesop so npe'enaxaqui, nachi qailayiñi.

³⁰ Qalaxayi ñi Dios qaltaq nca'aleec naq'en somayi.

³¹ Nachi somayi ÿataqta huo'oi soua na'axa'te da nachaxaategalo soua ÿataqta nnaigaxa'u co'ollaq chigoqchiguiña yi Galilea, chochi ivitta'a yi Jerusalén. Qaq nagui nachisoua soomayi som da'aqtaxaatapeguema na shiÿaxauapi de'eda.

³² Qaq ÿoqo'oyi qomi' qami' sa'axataqtapeguema nagui de'eda no'on qad'axaÿaxac mayi ÿachaxanapeguem co'ollaxa som hua'au qadta'alpi ñi Dios.

³³ Cha'ayi qomi' maichi qomi' llalaqpi somayipi, qaq ÿoqo'oyi ñi Dios ÿataqta ipacchigui dam 'enapec co'ollaxa da qaltaq nca'alaxateec so Jesús da qadca'alaxaqui. Cha'ayi nachi nanettalec aso nede l'enaxat Salmo da l'aqtac, 'eeta': “'Am mayi nachi'am ÿalec, 'am seco'oic ne'ena na'a'q.”

³⁴ Ñi Dios i'axata'a co'ollaxa da qaltaq nca'aleeguesop naq'en somayi da nleuaxa, yaqto' da l'oquiaxac sa ishit da nlaguiñi. Cha'ayi nachi 'enapec naua nanettrañi l'aqtaqa, 'eeta': “Aÿim qami' sanema qome da ÿoqouagaxanaqtaic mayi sachaxanapecot co'ollaxa so David.”

³⁵ Nataq'en so lÿa l'aqtac mayi nanettalec ana Salmo 'eeta': “Sa ishit da 'auashinem da yaqto' nlaguiñi da i'oquiaxac, cha'ayi aÿim 'adamaxashic 'adauotaxat.”

³⁶ Qaq 'eesa da so David ÿataqta huapegue' co'ollaxa so lauo' da i'o't naua ÿamaxalguete ñi Dios. Qalaxayi co'ollaq ime, nachi somayi ileu, nachi qailadoigui som hua'au lta'alpi, nachi da l'oquiaxac nlaguiñi.

³⁷ Qalaxayi dam l'oquiaxac som nca'alaxateec ñi Dios, sa ishit da nlaguiñi.

³⁸ Qaq ÿoqo'oyi, qami' ÿaqaÿa't, iuen da qauaÿajñi da nachiso so Jesús so chigoqchigui da qaÿapalaxat na nasouaxashitpi. Qaq nachida dam qami' sa'axataqtapeguema nagui.

³⁹ Qaq ÿoqo'oyi 'enauac nam i'amaqten somayi, nachi ishit da qaÿapalaxat 'enauac nam lasouaxashitpi mayi sa ishit co'ollaxa da ÿañoxot da ÿapalaxat nam lqataxacpi so Moisés.

⁴⁰ Qaq ÿoqo'oyi maxatchaxa qome da qoñiita, ten qom qami' tachiguilo naua l'aqtaqa som l'aqtaxanaxanecpi ñi Dios, mayi 'eeta':

⁴¹ Ña qaumijñi, qami' 'enaxanaxaicpi, chochi qau'elaqÿapigui' qome, qataq qami' qaÿaqatte' da qadellivi; cha'ayi aÿim mayi aÿim Dios, huo'o ca na'a'q qome qavichiÿa, qaq aÿim huo'o ca so'ot lta'adaxanec, qaq camayi ÿataqta sa qau'amaqchiñi, nai'ctoxo' da huo'o ca qami' da'aqtaxaatapeguema.

⁴² Qaq so Pablo qataq soua lÿa't co'ollaq huenoxootraguec da queda'ai aso laponaxaqui na judiopi, nachi nam sa ishit da judío l'ecpi iÿaxanot somayi, da yaqto' que'eca lÿa na'a'q mataxaqui nachi qaltaq ipaquejlec da i'axat de'eda.

⁴³ Qaq co'ollaq mashi ime so naponaxac aso naponaxaqui, nachi ÿataqta qalota na judiopi qataq nam chochi ÿaconguet da l'amqajnataxanaxac na judiopi qataq ÿataqta quetegue, namayipi quegue so Pablo qataq so Bernabé. Nachi soomayi ÿataqta huaqattega namayipi, da yaqto' sa ishit da ÿaxaneec da lchoxonnataxanaxa ñi Dios.

⁴⁴ Qaq co'ollaq iviteuga so lÿa na'a'q mataxaqui, nachi huac da imauec da lapona't 'enauac nam netaña so la ciudad, da n'axaÿaxana da l'aqtac ñi Dios.

⁴⁵ Qalaxayi nam judiopi co'ollaq ila'a da ÿataqta qalota na shiÿaxauapi, nachi namayipi ÿataqta huo'o da ndaxaÿaxa. Nachi qaÿasatta'aguet na l'aqtacpi so Pablo qataq qaishiueetac.

⁴⁶ Qalaxayi so Pablo qataq so Bernabé sa ishit da ñi'idelec da l'aqtaxanaxa'c. Nachi co'ollaq ime, nachi 'ena'po': –Da l'aqtac ñi Dios, damayi iuen da hua'auñi da qai'axatem nam judiopi. Qalaxayi nagui yi qami' sa ishit da qauacoñiiguet, qataq qoñiÿapec yi sa iuen da qauacoñiiguet da nca'alaxa mayi chochaq tateec, qaq qomoxochictaxa qomi' nagui saxaigui nam sa ishit da judío l'ecpi.

⁴⁷ Cha'ayi nachida da qomi' ÿamaxalguete ñi qadataxala', 'eeta': 'Am sanagui da 'ico' 'am lcoÿadaxanaxaqui na ÿotta'a't shiÿaxauapi, qataq 'am chigoqchigui qome da nca'alaxa, chochi ivitta'a ca loga't ana 'alhua.

⁴⁸ Nachi co'ollaq hua'axaÿa de'eda nam sa ishit da judiopi, nachi ÿataqta huo'o da ntonaxac. Nachi namayipi 'enac yi ÿataqta 'onaxaic da l'aqtac ñi qadataxala'. Huaña, nachi da'amqajnataxan nam nal'ena co'ollaxa da qaÿaqataxaatai' da yaqto' taÿot da nca'alaxa mayi chochaq tateec.

⁴⁹ Qaq 'eda da 'eetec co'ollaq qai'axattac da l'aqtac ñi qadataxala' 'enauac se'eso 'alhua.

⁵⁰ Qalaxayi nam judiopi nachi huo'o ana detaxaÿot nam ÿi'oxodaipi 'alpi mayi quetague' ñi Dios, qataq nam ÿallippi mayi 'amaqtaqaicpi se'eso la ciudad, da ÿayina'a namayipi, da yaqto' sa qaÿalemaxat so Pablo qataq so Bernabé, chochi ivitta'a da queda'ai qanqoÿin se'eso 'alhua.

⁵¹ Huaña, nachi soomayi ichigoxodeec na namoxoÿaxa naua lapia'te, qaq damayi nachi l'anaxat da maichi nasouaxajla't somayipi. Nachi soomayi nqo'ooda yi la ciudad Iconio.

⁵² Qalaxayi nam da'amqajnataxanpi ÿataqta huo'o da ntonaxac qataq nlaqchigui so Espíritu Santo.