Hechos 12 - Nuevo Testamento Toba Sur

Da nalaataguec so Santiago qataq da ncoñitaguec so Pedro

¹ Qaq se'esoua na'axa'te nachi so nta'a Herodes damaxasoxoolec da huo'o na qaicanapec na 'amqajnataxanaxaicpi.

² Nachi damaxasoxoolec da qaÿalauat so Santiago som lqaÿa so Juan, qaidolec ca ÿiilonec.

³ Qaq somayi co'ollaq ila'a da na judiopi ÿataqta ÿaÿamaxadeeta de'eda, nachi nataq'en damaxasoxoolec da qaicoñi' so Pedro. Qaq de'eda nachi huetoiguilo soua na'axa'te da qanallic ana pan mayi sa qaÿauo'o ana lalecte.

⁴ Qaq co'ollaq mashi qaÿaconeu'a so Pedro, nachi so Herodes ÿanaigui somayi aso ncoñitaxanaxaqui. Nachi nauaatalec naq'en so dieciseis huataxanaqpi, cuatro naq'en naua huaxaÿapega't, cha'ayi somayi ÿauotaique da qom ime so naponaxac, nachi nqateec so Pedro da ÿachaxana 'enauac na shiÿaxauapi da ÿalauat.

⁵ Qaq ÿoqo'oyi so Pedro netaigui aso ncoñitaxanaxaqui, ÿataqta qanauaatalec. Qalaxayi na 'amqajnataxanaxaicpi ÿataqta huo'o da l'añaxac da queto'ot da nqouagaxaueetacot ñi Dios, da nqouagaxaueetapeguelec somayi.

Ñi Dios nca'alaxateeguesop aso ncoñitaxanaxaqui so Pedro

⁶ Qaq se'eso pe mayi huetoigui so lÿa na'a'q da so Herodes nqateec so Pedro da ÿachaxana na shiÿaxauapi. Nachi so Pedro do'ochito', huetanguilo soua dos huataxanaq lashi', qaicoñitta'aque soua dos lque'te, qaq soua lÿa't huataxanaq lashi' nauaata'pe so lasom aso ncoñitaxanaxaqui.

⁷ Nachi nque'elaxatta da nachatteuo so piguem l'ec lamaxashic ñi qadataxala', nachi ÿataqta yi'oqchiguiñi na pa'auo aso ncoñitaxanaxaqui. Nachi som namaxashic i'adeu'a na laÿi so Pedro da nqotoxon. Nachi 'enapego', 'eeta': –Qoñishiguem, 'anque'emgue. Nachi soua lque'te naua lhua'q so Pedro ñideec.

⁸ Nachi so namaxashic 'enapego' somayi, 'eeta': –'Ansauat qome, nachi 'ai'aayiñi caua 'adapela'te. Nachi so Pedro naÿamaxat, nachi so namaxashic 'enapego' somayi, 'eeta': –'Anapogoña na 'adpo', nachi aÿim 'auca'ategue.

⁹ Nachi so Pedro huenoxoneec, ca'atteueegue so namaxashic. Qalaxayi sa ÿaÿaten da ÿoqta 'eesa de'eda, huo'otaq saq 'en. Cha'ayi somayi 'eeta'am naq'en da huo'otaq chochi lauanaqchic de'eda.

¹⁰ Qalaxayi co'ollaq napacdalec caua hua'auchiyiñi nauanaxanaxanqa qataq jec napactalguete caua lÿa't, chochi ivittrauga so lasom mayi ima'a't lcat mayi pa'aiguet so nqa'aic. Nachi se'eso lasom maichi nauatoigui, nachi inoxoodeec, nachi je'c. Qaq co'ollaq napacdalec ca 'oonolec nqa'aic, nachi so namaxashic piguem l'ec ca'ai somayi da ndoqteeteec.

¹¹ Huaña, nachi so Pedro chita'ague da ÿoqta i'amaqten de'eda. Nachi 'enapeco': –Nagui saÿaten da qachi ÿoqta 'eesa de'eda, da ñi qadataxala' namaq so lamaxashic da aÿim nca'alaxateeguesop ñi Herodes qataq 'enauac dam nshitaique da aÿim i'otec nam judiopi.

¹² Qaq tatapigui lauel de'eda so Pedro, nachi nqo'ona ca lma' aso María mayi late'e so Juan, da lÿa l'enaxat Marcos. Qaq somayi nachi hueta'a so qalota shiÿaxauapi lapoota'a't, nqouagaxaueetac.

¹³ Qaq somayi co'ollaq iuaxaatapegueu'a so lasom som qasoxoc, nachi huo'o aso qa'añole, l'enaxat Rode, npa'auga da chochi nalliuga.

¹⁴ Nachi co'ollaq ÿauatto'n naua l'aqtaqa so Pedro, nachi sa ishit da ÿauatoigui so lasom, cha'ayi ÿapac da ntonaxac. Nachi nqalgaqhua'a ca pa'auo da decoyiguenataxanec so Pedro da hueta'a so lasom.

¹⁵ Nachi qoÿiitego' asomayi, qoÿiita': –¡Ÿoqta huo'o da 'oic peta'a! Qalaxayi asomayi ÿoqta 'eesa naq'en da nachiso. Qalaxayi somayipi 'enapeco': –¡'A'i, sa ishit da nachida; souaxai' chochi lqui'i da nachaxan!

¹⁶ Qalaxayi so Pedro lamaaxa iuaxaatapegueu'a so lasom. Qaq co'ollaq qaÿauatoigui so lasom, nachi qailauga somayi, nachi ÿataqta ñi'i somayipi.

¹⁷ Qalaxayi somayi ÿauota'a na lhuaq da nhuogaxa somayipi da de'enaxaatai'. Ime, nachi i'axat da 'eetec ñi qadataxala' da nqateeguesop somayi añi ncoñitaxanaxaqui. Ime, nachi 'enapego' somayipi, 'eeta': –Qau'axachiim qome 'enauac de'eda ca Santiago qataq 'enauac na qadqaÿañicpi. Ime, nachi somayi jec da taÿa ca lÿa 'alhua.

¹⁸ Qaq co'ollaq mashi yi'oxoñi, nachi ÿataqta sa ÿaÿaten ca 'eetec som huataxanaqpi, cha'ayi sa qaÿaÿaten ca 'eetec so Pedro.

¹⁹ Nachi so Herodes damaxasoxoolec da qanmitaique somayi. Qaq co'ollaq sa ishit da qaÿanata, nachi ichimaxattega som huataxanaqpi mayi ilotague' somayi. Ime, nachi damaxasoxoolec 'enauac somayipi da qaÿalauat. Qaq co'ollaq ime de'eda, nachi so Herodes ca'ai yi Judea da taÿa yi Cesarea.

Da l-leuaxa so Herodes

²⁰ Qaq so Herodes ÿataqta dalemataÿa nam shiÿaxauapi mayi netaña yi Tiro qataq yi Sidón. Qalaxayi somayipi co'ollaxa huaxaÿa't da qaÿauotaique qanqo'oneu'a somayi da qaitaxaÿapegue'. Qalaxayi qai'auaxaañi da qaitaxaÿapegue' so Blasto som nta'a lta'adaic mayi ltaua so Herodes, da yaqto' somayi detaxaÿapegue' so nta'a, da yaqto' ÿanem da l-lagaxayic somayipi. Cha'ayi somayipi da lqui'axac nachi ÿachigoxottapiguiña yim n'alhua so nta'a.

²¹ Nachi so Herodes ÿauo'o so na'a'q mayi laloqnec da anac naq'en so shiÿaxauapi. Qaq co'ollaq ivita se'eso na'a'q, nachi somayi ÿaayiñi soua alogo mayi lalegaxaqui', nachi nso'oongui aso nso'onaxaqui da nta'a, nachi ÿauo'o so ltaxaÿaxac.

²² Nachi na shiÿaxauapi i'alaqtagui, 'eeta': –¡Ñi'iñi shiÿaxaua mayi detaqtac sa ishit da chochi shiÿaxaua, ñimayi 'eeta'am na saq cha'a ntaxaÿaxaua!

²³ Lcopata, nachi anac so lamaxashic piguem l'ec ñi qadataxala', nachi dalola naq'en so Herodes, cha'ayi somayi sa ishit da ÿi'oxoden ñi Dios. Nachi anac na qochi'l, chic, chochi ivitta'a da ileu.

²⁴ Qalaxayi da l'aqtac ñi Dios lamaaxa nqochiitauec qataq qai'axattac 'enauaque naua laÿil ana 'alhua.

²⁵ Qaq so Bernabé qataq so Saulo co'ollaq ima't da l'onataxanaxa'c, nachi ÿi'iguela'q, chigoqchiguiña yi Jerusalén. Qaq qannaictague' so Juan, da lÿa l'enaxat Marcos.