Hechos 11 - Nuevo Testamento Toba Sur

So Pedro da'aqtaxanem so 'amqajnataxanaxaicpi yi Jerusalén

¹ Soua Jesús lamaxa'shi qataq so nqaÿañicpi mayi netaña yi Judea, somayipi co'ollaxa l'axaÿaxac da nataq'en ÿaconguet da l'aqtac ñi Dios na sa ishit da judiopi.

² Qaq so Pedro co'ollaq ÿi'iguelaxague da Jerusalén, nachi quetapeguelec somayi nam judiopi mayi quetague' da napaxaguenataxanaxac da qaÿauo'o ca n'anaxashit na l'oc cam saq judío l'ec.

³ Nachi qainattaco' somayi, qoÿiita': –¿Tá'ainco' yi 'anamaqtega nam sa ishit da judío l'ecpi qataq 'adqui'axauapi?

⁴ Nachi so Pedro ÿachigoxottelec da i'axat dam chigoqchiguiña 'enauac dam huaigui, 'eeta':

⁵ –Aÿim soota'a co'ollaxa yi la ciudad Jope. Nachi can ñoqouagaxaueetac, nachi huo'o so ÿauanaqchic: aÿim sela'a so 'eeta'am na hualoq laÿi lta'adaic chigoqto'ot na piguem, qoÿaxatta'a't naua cuatro ltela. Nachi chochi nvittaña yi soota'a.

⁶ Qaq co'ollaq ÿoqta selochigui, nachi sela'a na shiguiÿacpi mayi cuatro naua lapia'te, huo'o na nlopi qataq na huauec, qataq na hualectapigui', qataq na maÿopi.

⁷ Nachi sa'aqchigui so n'aqtac aÿim 'enapega, 'eeta': “Pedro, qoñishiguem, 'auauo'o qome ca 'aualauat ne'enapi, nachi qollic.”

⁸ Qalaxayi aÿim shinapec: “'A'i, 'am ÿataxala', cha'ayi aÿim ÿataqta sa sauanapega da sachic cam qaÿamata'ac da nshipaxan, huo'otaq cam sa qaishitapec da qanallic.”

⁹ Nachi se'eso n'aqtac mayi chimqot na piguem qaltaq ÿi'iguelaxalec da aÿim 'enapega, 'eeta': “Cam mashi qui'itta naq'en ñi Dios, sa ishit qome da 'auamata'ac da nshipaxan.”

¹⁰ Qaq se'eso n'aqtac tres da ÿi'iguelaxalec da aÿim 'enapega. Huaña, nachi 'enauac ÿi'iguelqot na piguem.

¹¹ Huaña, nachi nvildeu'a ñi noÿic mayi soota'a soua tres shiÿaxa'u. Soomayi namaxa'shi, chigoqda'ague da Cesarea da aÿim ñi'igueeda'a.

¹² Nachi so Espíritu Santo aÿim ÿamaxaguelo soomayi da seca'ateguelo, sa ishit da huo'o ca shictega. Nataq'en huo'oi ne'enaua ñinaictagueto seis qadqaÿa't. Nachi 'enauac da sepa'axaigui ñi lma' so shiÿaxaua.

¹³ Nachi somayi qomi' da'aqtaxaatapeguema da 'eetec co'ollaq huaña so lma' da nauane' so namaxashic piguem l'ec, nachattau'a, nachi 'enapego', 'eeta': “'Auauo'oi qome caua 'auamaxadegue da la ciudad Jope, da yaqto' ÿi'igueeda'a ñi l'enaxat Simón, da lÿa l'enaxat Pedro.

¹⁴ Qaq ñimayi qome 'am i'axatem da 'eetec, da yaqto' 'am 'anca'aleec qataq 'enauac nam 'ai'alaqpi.”

¹⁵ Qaq co'ollaq aÿim sa'aqtaxaatac, nachi anac so Espíritu Santo da tanguit 'enauac somayipi, 'eeta'am da 'eetec qomi' co'ollaq chita'ague da qomi' qotanguita.

¹⁶ Huaña, nachi aÿim seuennate co'ollaxa da l'aqtac so qadataxala' mayi 'eeta': “'Eesa so Juan da dachilaxanataxana na 'etaxat, qalaxayi da qoñiita qome qami' qanachilaxanguilo ca Espíritu Santo.”

¹⁷ Qaq ñim Dios da nataq'en ÿanem namayipi da 'eeta'ama naq'en qomi' mayi sa'amaqtenaq so qadataxala' Jesucristo, qaq ¿négue't aÿim qone' da huo'otaq ñanaxat ñimayi?

¹⁸ Nachi som nqaÿañicpi mayi netaña yi Jerusalén, co'ollaq hua'axaÿa de'eda, nachi nañaxaañi da ltaxaÿaxac, nachi ÿi'oxodeetac ñi Dios, 'eeta': –¡Aja', qachi nachi 'eeteco' ñi Dios da nataq'en ÿanem na saq judiopi, da yaqto' ca'aisalo naua n'onataxaco, qaq yi ishit da huo'o da lca'alaxa mayi chochaq tateec!

So 'amqajnataxanaxaicpi mayi netaña yi Antioquía

¹⁹ Qaq co'ollaq mashi qaÿalauat so Esteban, nachi chigoqchiguiña da nataq'en qaicanaxangui na laÿipi 'amqajnataxanaxaicpi, nachi namayipi datauec. Huo'o na taigue da Fenicia, Chipre, qataq da Antioquía. Huañalo ne'enaua 'ale'u, nachi qai'axattac da no'on qad'axaÿaxac, qalaxayi qandoxotteec na judiopi, qaq na laÿipi shiÿaxauapi sa ishit da qai'aqtaxanem.

²⁰ Qalaxayi huo'o na 'amqajnataxanaxaicpi mayi chigaqa'ague da Chipre qataq da Cirene na nvita yi la ciudad Antioquía. Nachi namayipi nataq'en da'aqtaxanem nam sa ishit da judiopi, da i'axatem dam no'on qad'axaÿaxac mayi n'aqtaguec so Jesús mayi qadataxala'.

²¹ Nachi dam l'añaxac so qadataxala' ÿataqta hueta'aguet namayipi, qaq ÿoqo'oyi ÿataqta qalota na ÿaxaneec da toguishic l'amqajnataxanaxac, nachi i'amaqten so qadataxala'.

²² Nachi nam 'amqajnataxanaxaicpi mayi netaña yi Jerusalén, co'ollaq l'axaÿaxac de'eda, nachi qaÿamaq so Bernabé da taÿa yi Antioquía.

²³ Qaq co'ollaq iviyi' so Bernabé, nachi ilalec da lqouagaxanaqtaic ñi Dios. Nachi somayi ÿataqta machiguiñi. Huaña, nachi ÿataqta huaqattega 'enauac somayipi da yaqto' da lquiyaqteÿaxac sa dashiuec, chaqdata da ÿataqta quetegue so qadataxala'.

²⁴ Cha'ayi so Bernabé ÿataqta no'on da lataxac, qataq somayi nlaqchigui so Espíritu Santo qataq da lpi'iÿaxac. Qaq ÿoqo'oyi ÿataqta qalota so dalaxaic shiÿaxauapi da quegue so qadataxala'.

²⁵ Qaq co'ollaq ime de'eda, nachi so Bernabé taigue da Tarso da ÿi'iguena'a so Saulo. Qaq co'ollaq ÿanata somayi, nachi nauega yi Antioquía.

²⁶ Nachi nedaña yimayi, ÿalectraigui na 'amqajnataxanaxaicpi, ivi' 'oonolec vi'i. Nachi ÿataqta qalota na shiÿaxauapi na ÿapaxagueetrac. Qaq huaña yi Antioquía, nachi chita'ague da na 'amqajnataxanaxaicpi qailonec da quetague' so Cristo.

²⁷ Qaq se'esoua na'axa'te huo'oi soua Dios l'aqtaxanaxanqa chigoqdaña yi Jerusalén da nqo'ooda yi Antioquía.

²⁸ Qaq huo'o so 'oonolec soomayi, l'enaxat Agabo. Somayi nachajñi co'ollaq huetaigui so nqaÿañicpi, nachi so Espíritu Santo i'aqtaxanaxanec somayi da huo'o qome ca lta'adaic nqouaxa ana 'alhua. Qaq de'eda l'aqtaxanaxac ipacchigui, huetoigui so na'a'q co'ollaq lta'a na nta'alpi so l'enaxat Claudio.

²⁹ Nachi nam 'amqajnataxanaxaicpi mayi netaña yi Antioquía detaxaÿapigui da ÿauo'o aca ltaunaxanaqte da ÿamaxa so 'amqajnataxanaxaicpi mayi netaña yi Judea. Qalaxayi ñi 'oonolec ÿan cam nalota'ai' da ÿan.

³⁰ Qaq 'eda da qoÿiitec. Nachi qaÿamaq aso nachitaqtaxanaqte da qaÿamaxa so nataxala'pi mayi netaña yi Judea, idoi' qanqoÿin so Bernabé qataq so Saulo.