Hebreos 9 - Nuevo Testamento Toba Sur

So lauo' ñi Dios ana 'alhua qataq cam neta'ague da piguem

¹ Nataq'en som hua'auchiguiñi aÿamaxataxac huo'o da lataxac da qai'ot da ñi'oxonnataxanaxac, qalaxayi huaigui acam n'onaxanaxaqui mayi lashi ana 'alhua.

² Qaq asom n'onaxanaxaqui co'ollaq qai'ot, qalaq qaÿaÿamaxatchiguiñi da n'onataxac so hua'auchiguiñi ndaqa', l'enaxat naponqa' qui'itta. Somayi nachi netaigui aso ncoÿadaxanaxaquipi lashi qataq so lmala' soua pan mayi qoÿanoto ñi Dios.

³ Qaq dam laÿi so napoxonaxat nataq'en huo'o so lÿa ndaqa', l'enaxat ndaqa' sa qaishitapec.

⁴ Qaq nachi huetaigui somayi aso nca'atoxonaxalate mayi chigaqaigui na oro. Asomayi nca'atoxolate na nchinaxanaxat. Qataq huetaigui somayi aso laÿi' da aÿamaxataxac. Asomayi qalapaxalec 'enauac na oro. Qaq asomayi nachi huetagui aso 'alhuole mayi huetaigui aso pan, l'enaxat negue't ana'ana. Nataq'en som lashilte co'ollaxa so Aarón mayi nañaxateec qataq soua coma'yi mayi nanettalguete dam aÿamaxataxac.

⁵ Qaq nam pa'ashiguem asomayi nachi netalguete soua n'enaqtaqa shiÿaxa'u mayi datato'oto ñi Dios. Qaq naua laua soomayi nachi ipelteetalguete som huaña da qaÿapalaxat na nasouaxashit. Qalaxayi qomi' nagui sa ishit da huo'o ca qaddaqa' da sa'axataqta ca lataxac damayi.

⁶ Qaq 'eda da 'eetec da naÿamaxataguec se'eso nma'. Nachi na ntaxaÿaxanaxanecpi ÿi'iguelaqtaigui naua na'axa'te se'eso hua'auchiguiñi ndaqa', da yaqto' huapegue' da l'onataxanaxac da qaÿi'oxoden ñi Dios.

⁷ Qaq so lÿa pa'auo ndaqa', qalaq chaqsota som lataxala' na ntaxaÿaxanaxanecpi mayi ishit da inoxoneu'a ñi 'oonolec na'a'q yi vi'i. Qalaxayi da inoxoneuo, nachi ÿachitrauo naua ltago'q ca shiguiÿac da ÿaneuo, da yaqto' qaÿapalaxat ca maichi lsomaxac qataq nam shiÿaxauapi.

⁸ Qaq 'eda da 'eetec so Espíritu Santo da qomi' i'axatema da se'eso hua'auchiguiñi ndaqa', da ñaq 'eetalec da qai'onataxaatapoigui da qai'ot da ñi'oxonnataxanaxac ñi Dios, nachi saxanaxa da qaÿauategue se'eso ñigueuo mayi taÿau'a so lÿa ndaqa' mayi sa qaishitapec.

⁹ Qaq 'enauac de'eda 'eeta'am da chochi naloqnaxanaxat nagui ne'enaua souaqtaiguilo na'axa'te. Cha'ayi ana nachitaqtaxanaqte qataq nam qoÿaneuo da qaÿavigaxat mayi huaigui somayi da qoÿanot ñi Dios, namayi sa ishit da ÿaÿamaxatchiguiñi da lavilÿaxac nam 'eetec de'eda da ÿi'oxoden ñi Dios.

¹⁰ Cha'ayi damayi nachida da chochi yi'oqchigui nqui'axac qataq ÿomaxac qataq dam ÿotta'a't ÿoxoc mayi chochi lataxac da qad'oquiaxac, qaq damayi ÿataqta huo'o da naigui da huo'otaq ñaq saxanaxa da nadalaxat ca lataxac ñi Dios.

¹¹ Qalaxayi mashi sogote da nvi' so Cristo, qaq nagui somayi nachiso so 'oonolec qadtaxaÿaxanaxanec, da yaqto' qomi' qoÿanema nam no'on lataxaguesat mayi mashi nvi'. Qaq acam n'onaxanaxaqui mayi do'onataxaatapoigui da ntaxaÿaxanaxanec, acamayi ÿataqta no'on qataq nalochiguiñi, saq 'en'am aso hua'auchiguiñi. Acamayi sa ishit da l'onata na shiÿaxauapi, qataq sa ishit da lashi ana 'alhua.

¹² Qaq so Cristo mashi inoxoneu'a cam ndaqa' mayi sa qaishitapec, qalaxayi sa ishit da ÿaadeuo caua ltago'q ca quetaq huo'otaq ca huaca llalec, cha'ayi nachinaua naua maichi ltago'q naua ÿaadeuo. Qaq 'eda da 'eetec da somayi 'oonolec da ÿi'iguelaxalec da pa'aigui se'eso ndaqa'. Huaña, nachi ÿauo'o da chochaq tateec qadca'alaxa.

¹³ Cha'ayi 'eesa da naua ltago'q ca huaca llalec qataq ca quetaq llalec qataq na alo da qaÿavigaxat aca huaca llale da namayi ÿataqta huo'o da l'añaxac da iÿota qataq iqui'itaxatta na npa'auec da qaichigoxolec cam shiÿaxaua mayi 'eeta'am da nshipaxan.

¹⁴ Qaq da nachi 'eetec de'eda, qaq ¡huá'ago' da saq ÿacteec da l'añaxac soua ltago'q so Cristo! Cha'ayi chigoqchigui da l'añaxac som Espíritu mayi chochaq tateec da so Cristo maichi nañanot ñi Dios, 'eeta'am aca nachitaqtaxanaqte mayi ÿataqta qui'itta. Nachi naua ltago'q somayi ishit da iÿoueguesop da qadvilÿaxac na qadasouaxashitpi mayi taÿa'a da nleuaxa, da yaqto' ishit da so'onataxanqot ñim Dios mayi nachi 'eetai' da nca'altauec.

¹⁵ Qaq ÿoqo'oyi so Jesucristo nachiso som qomi' detaqleguete nagui dam dalaxaic aÿamaxataxac. Qaq de'eda l-leuaxa so Cristo, damayi naigui da yaqto' qaÿapalaxat nam nasouaxashitpi mayi huaigui so hua'auchiguiñi aÿamaxataxac, qataq yaqto' nam iÿaxana ñimayi ishit da ÿaconguet ca ÿachaxanapec mayi chochaq tateec.

¹⁶ Cha'ayi da huo'otaq qai'ot aca nede mayi lmalate da qoÿan ca nalamaxat, qalaq iuen da qai'axat da l-leuaxa cam i'ot, yaqto' aca'aca nede ishit da ÿataqta ipacchigui cam qoÿittalec.

¹⁷ Cha'ayi aca'aca lmalate da qoÿan ca nalamaxat sa ishit da huo'o ca 'enec da huo'otaq ña nca'altauec cam i'ot, chaqdata da huo'otaq mashi ivita da ileu camayi.

¹⁸ Qaq ÿoqo'oyi se'eso hua'auchiguiñi aÿamaxataxac co'ollaq qai'ot, qalaq iuen da qaicoldeec naua ntago'q.

¹⁹ Cha'ayi so Moisés co'ollaq i'axatema naua lqataxaco ñi Dios 'enauac so shiÿaxauapi. Qaq co'ollaq ime, nachi ÿacona so qagueta laue togaxadaic qataq ana lcoue ana huoue l'enaxat hisopo, nachi ÿilchiingui na ltago'q so huaca llalec qataq so quetaq llalec mayi qaÿalecneguet na 'etaxat. Ime, nachi ichigoxolguete soua lqataxaco ñi Dios qataq 'enauac na shiÿaxauapi.

²⁰ Nachi 'enapega so shiÿaxauapi, 'eeta': “Ne'enaua ntago'q, naamayi nachinaua na ÿataqta 'itchiyiñi naq'en de'eda naÿamaxataxac ñi Dios da qami' naÿamaxateto.”

²¹ So Moisés nataq'en ichigoxolec co'ollaxa aso n'onaxanaxaqui qataq nam qai'onataxaategapi naxa da qai'ot da atamnaxac.

²² Nachi de'eda lliquiaxac ne'ena nqataxacpi i'axat da huac da 'enauac nam qai'otpi iuen da qaÿauota'a naua ntago'q da huo'o ca qaiqui'itaxat. Qaq sa ishit da huo'o ca chochi qaÿapalaxat nasouaxashit da huo'otaq sa ishit da qaicoldeec naua ntago'q.

Da nañanaxac so Cristo, damayi ishit da nqat ca nasouaxashit

²³ Qaq 'eda da 'eetec da qaiuen da huo'o ca qoÿaneuo da qaÿavigaxat, da yaqto' qaiqui'itaxat na nogoxoshitpi mayi chochi lqui'i cam hueta'ague da piguem. Qalaxayi nam nogoxoshitpi mayi hueta'ague da piguem, namayipi nataq'en iuen da qaÿauo'o ca qoÿan mayi napacalec ne'ena qoÿaatapegueuopi nagui da yaqto' qaÿavigaxat.

²⁴ Cha'ayi so Cristo sa ishit da inoxonoigui aso n'onaxanaxaqui mayi l'onata na shiÿaxauapi mayi chochi lqui'i acam ÿoqta 'eesa n'onaxanaxaqui. Cha'ayi somayi nachina na piguem na inoxoneu'a, da yaqto' nachaateu'a ñi Dios, da yaqto' qomi' detaqleguete.

²⁵ Som lataxala' na ltaxaÿaxanaxanecpi na judiopi, somayi 'oonolec naxa da inoxoneu'a so ndaqa' mayi sa qaishitapec yi 'oonolec vi'i, da yaqto' ÿaneuo da qaÿavigaxat na ntago'q mayi sa lalamaxat. Qaq so Cristo, qalaq sa ishit da huo'otaq ÿi'iguelaqtalec da nañanaxac.

²⁶ Cha'ayi da huo'otaq nachi 'eetec de'eda, qaq ÿataqta qalotáctaxa da qaÿi'iguelaxalec da qaÿalauat, chigoqchiguiña co'ollaq chita'ague da qai'ot ana 'alhua. Qalaxayi nagui da mashi inoxootrauec naua na'axa'te, nachi so Cristo 'oonolec da nachaxan, nachi sa lÿa da ÿi'iguelaxalec da maichi nañan, da yaqto' nqat 'enauac na nasouaxashitpi.

²⁷ Qaq de'eda 'eetec da 'enauac na shiÿaxauapi da 'oonolec da ÿi'iguelaxalec da ileu, ime, nachi qataq iuata'aguet ca na'a'q qom qanmit 'enauacna,

²⁸ qaq nachida da 'eetec nataq'en so Cristo da 'oonolec da qaÿi'iguelaxalec da qoÿaneuo da yaqto' nqat nam qalota nasouaxashitpi. Qaq da ime, nachi qaltaq ÿi'iguelaxalec da nachaxan, qalaxayi sa ishit da anaga da nqat na nasouaxashitpi, chaqdata da somayi anaga da nca'alaxateec nam iuattaique somayi.