Hebreos 8 - Nuevo Testamento Toba Sur

So Jesús nachiso so qomi' detaqleguete nagui dam dalaxaic aÿamaxataxac

¹ Qaq 'eda da ÿoqta ÿacteec da ñanacto'ot da sa'axattac, 'eeta': 'Eda da 'eetec da lataxac som 'oonolec qadtaxaÿaxanaxanec. Qaq nagui somayi nso'oota'ague da aloic ñi Dios mayi neta'ague da piguem.

² Qataq somayi nachiso so ntaxaÿaxanaxanec da qaitaxaÿapegue' ñi Dios cam ÿataqta lauo' ñimayi da piguem, cam noÿic mayi maichi l'onatac ñi qadataxala', qaq sa ishit da l'onatac na chochi shiÿaxauapi.

³ Qaq 'enauac nam lataxala'pi na ntaxaÿaxanaxanecpi, namayipi qoÿideuo, da yaqto' ÿaatapegueuo ana nachitaqtaxanaqte qataq nam qoÿaneuo da qaÿavigaxat. Qaq ÿoqo'oyi so Jesucristo, somayi nataq'en iuen da ÿauo'o aca ÿaneuo lachitaqtaxanaqte.

⁴ Qaq somayi da huo'otaq ñaq hueta'a ana 'alhua, nachi sa ishíttaxa da ntaxaÿaxanaxanec, cha'ayi ñaq huo'o nam ntaxaÿaxanaxanecpi mayi ÿaatapegueuo ana nachitaqtaxanaqte mayi damaxasoxoolec co'ollaxa so Moisés.

⁵ Qalaxayi ne'ena ntaxaÿaxanaxanecpi de'eda l'onataxanaxac, damayi 'eeta'am da chochi lqui'i qataq lpaqal cam hueta'ague da piguem. Cha'ayi saÿajnaq da chochi n'enaqtac, cha'ayi co'ollaq huotaique da i'ot so Moisés so lauo' ñi Dios, qalaq ñimayi 'enapega somayi 'eeta': “'Aulochigui qome da lataxac qataq 'au'enaxatchigui da n'onataxac so 'am sachaxana co'ollaq huaña añi qasoxonaxa Sinaí.”

⁶ Qaq se'eso 'oonolec qadtaxaÿaxanaxanec, qalaq somayi da l'onataxanaxac da ntaxaÿaxanaxanec ÿataqta ÿacteec da 'onaxaic, qaq saq 'en'am so hua'auchiguiñi. Cha'ayi somayi nachiso so qomi' detaqleguete nagui de'eda dalaxaic aÿamaxataxac mayi ÿataqta 'onaxaic, dam chigoqchigui nam qaÿachaxanapecpi mayi ÿacteec da no'on.

⁷ Cha'ayi se'eso hua'auchiguiñi lataxac da qanaÿamaxate' ñi Dios, da huo'otaq ÿataqta nalochiguiñi co'ollaxa, nachi sa ishíttaxa da iuen da qanadalaxat ca aÿamaxataxac.

⁸ Qalaxayi ñi Dios ila'a da se'eso shiÿaxauapi sa ishit da nalochiguiñi da lataxac, qaq tachigui da l'aqtac co'ollaq 'eetega somayipi nam l'aqtaqa mayi nanettrañi, 'eeta': Ñi qadataxala' 'eeta': Huo'o qome ca na'a'q, qaq aÿim ñadalaxat ca ñaÿamaxataxac da ñaÿamaxate' na llalaqpi so Israel qataq so Judá.

⁹ Qaq sa ishit da 'eeta'am so ñaÿamaxataxac mayi so'otec som hua'au lta'alpi namayipi so na'a'q co'ollaq sacona na lhuaq da ñaqateeguesop yi 'alhua Egipto. Cha'ayi somayipi sa ishit da ipaguelec da ñaÿamaxataxac, qaq ÿoqo'oyi aÿim shica'ai, 'enapec ñi qadataxala'.

¹⁰ Qaq cam ñaÿamaxataxac qom ñaÿamaxate' na llalaqpi so Israel qom mashi inoxoodeec que'ecaua na'axa'te, camayi qome ipacchigui da 'enapec ñi qadataxala', 'eeta': Aÿim qome sachaigui da lhuennataxac namayipi da ÿamaxasoxonaxac, qataq sedelguete naua lquiyaqte. Nachi namayipi aÿim lta'a Dios, qataq namayi maichi ÿalamaxatpi.

¹¹ Huaña, nachi sa ishit da huo'o ca qaÿapaxaguen, qataq sa ishit da huo'o ca ÿapaxaguen ca lÿa, huo'otaq ca lqaÿa, da yaqto' ÿauatton ñi qadataxala'. Cha'ayi 'enauac namayipi aÿim ÿauatton, ivida'a nam qaica ca l'amaqchic qataq nam 'amaqtaqaicpi namayipi.

¹² Qataq sapalaxat na qauemsat mayi i'ot namayipi, qataq sa ishit da seuennatapega na lasouaxashitpi.

¹³ Qaq ñi Dios da huo'otaq detaqtega cam dalaxaic aÿamaxataxac, qaq ñimayi 'eeta'am naq'en da mashi lto so hua'auchiguiñi; qaq dam 'eeta'am da mashi lto qataq mashi sa qai'onataxana, damayi saqaÿaloq qome da imeuo.