Hebreos 4 - Nuevo Testamento Toba Sur

¹ Qaq ÿoqo'oyi nagui da ñaq huo'o da qomi' qaÿachaxanapecoto da ishit da senoxonaxau'a ca nmataxac ñi Dios, nachi ÿataqta ñitelaqañi qome. Ten, qom huo'o ca 'oonolec da qoñiita da sa ishit da inoxoneuo.

² Cha'ayi qomi' nataq'en qomi' qai'axatema da n'aqtac mayi chigaqaigui da nca'alaxa, 'eeta'am da 'eetec somayipi da qai'aqtaxanem co'ollaxa. Qalaxayi somayipi sa ishit da huo'o ca naigui naq'en de'eda n'aqtaxanaxac, cha'ayi chochi n'axaÿaxaatega, sa ishit da i'amaqten.

³ Qalaxayi qomi' mayi sa'amqajnataxanaq nachi ishit qome da senoxonaxau'a que'eca mataxac mayi 'enapega co'ollaxa ñi Dios, 'eeta': Ÿoqo'oyi aÿim salemataÿa se'eso shiÿaxauapi, nachi setaxaÿa da sa ishit qome da senoxonaqchiteu'a ca ñimataxac. Qamaq ñi Dios mashi sogote da imat da l'onataxanaxac da i'ot 'enauac ana 'alhua.

⁴ Cha'ayi naua nanettrañi n'aqtaqa i'axa't so pa'ateec na'a'q, 'eeta': Ñi Dios nmateeguesop 'enauac na l'onatacpi co'ollaq ivi' naua siete na'axa'te.

⁵ Qataq yi lÿa n'aqtac 'eeta': Sa ishit qome da inoxoneu'a qome ca ñimataxac namayipi.

⁶ Qalaxayi saxanaxa da huo'otaq huo'o ca ishit da inoxoneu'a de'eda mataxac. Qaq nam hua'auchiguiñipi co'ollaxa da qai'aqtaxanem da n'aqtac mayi chigaqaigui da nca'alaxa, qalaq namayipi sa ishit da inoxoneuo, souaxat da sa ÿalaq.

⁷ Qaq ÿoqo'oyi ñi Dios qaltaq ÿi'iguelaxalec da i'axat que'eca na'a'q, 'eeta': ne'ena na'a'q. Cha'ayi ñi Dios ÿachigoxotchigui so David da qomi' da'aqtaxanema soua ÿoxoguelo na'axa'te nam nanettrañi l'aqtaqa, mayi 'eeta': Nagui da qami' qau'aqaichiguilo naua 'ena'pe ñi Dios, qalaq sa ishit qome da qau'añaxachiiguilo naua qadquiyaqchilli'.

⁸ Cha'ayi so Josué da huo'otaq inoxonaqchiteu'áctaxa so Israel llalaqpi de'eda mataxac, nachi ñi Dios sa ishíttaxa da qaltaq ÿi'iguelaxalec da i'axat ca lÿa na'a'q.

⁹ Qaq ÿoqo'oyi ñaq huo'o qone' que'eca na'a'q mataxaqui mayi qaÿauotaique da nmataxaqui na lalamaxatpi ñi Dios.

¹⁰ Cha'ayi ca inoxoneu'a da nmataxaua ñi Dios, camayi nmateeguesop 'enauac na l'onatacpi, 'eeta'am da 'eetec da nmateeguesop 'enauac na l'onatacpi ñi Dios.

¹¹ Qaq ÿoqo'oyi qomi' ÿataqta ñi'añaxataq, da yaqto' ishit da senoxonaxau'a que'eca mataxac, ten, qom huo'otaq huo'o ca 'eeta'am da lliquiaxac som sa ishit co'ollaxa da da'amqajnataxan.

¹² Cha'ayi da l'aqtac ñi Dios ÿataqta nca'altauec, qataq huo'o da l'añaxac. Qataq na llaxa napactelec ca ÿilonec mayi dos naua ala'pi. Qataq damayi ishit da ividau'a cam ÿataqta pa'auo saq cha'a nachaalataxac ca shiÿaxaua qataq som capegue' lqui'i, qataq ishit da ÿaateec naq'en ca lhuennataxac qataq da lavilÿaxac.

¹³ Qaq sa ishit da huo'o ca 'oonolec nam l'onatacpi ñi Dios da huo'otaq ishit da nqañoxochiisop ñimayi. Cha'ayi 'enauac namayipi ÿataqta yi'oqta qataq ÿaateec naq'en da ilotalec ñim huo'o ca na'a'q qaq ñachaataxau'a da sa'axataxam ca qad'onataxanaxac.

So Jesús nachiso so lataxala' na ntaxaÿaxanaxanecpi da qaitaxaÿapegue' ñi Dios

¹⁴ So Jesús mayi llalec ñi Dios, somayi nachiso som 'oonolec qadtaxaÿaxanaxanec mayi inoxoneu'a ca hueta'a ñi Dios da detaxaÿapegue'. Qaq ÿoqo'oyi qomi' ÿataqta ñi'añaxataqtec qome da qad'amqajnataxanaxac.

¹⁵ Cha'ayi som qadtaxaÿaxanaxanec, somayi ÿataqta huo'o da lchoxonnataxanaxa da shinaqta souaxat da qaica ca qad'añaxac. Cha'ayi somayi co'ollaxa ÿataqta nque'etaxangui 'enauac na ÿotta'a't ñi'iguenataguec, 'eeta'am da shinaqta. Qalaxayi somayi sa ishit da huo'o ca lasouaxashit.

¹⁶ Qaq ÿoqo'oyi ÿataqta qaica qome ca shi'oqtaique da ñoqochinaxau'a ca nso'onqa' ñim qadta'a Dios mayi soxodaic, yaqto' ñimayi ishit da qomi' ichoxode'n, qataq qomi' nqouagueque da qomi' itaua'n da huo'o ca souaqaigui qadhuenaxanaxa.